Utshovঅধ্যায় 114
114.1
সংজয় উবাচ
এবং তে পাণ্ডবাঃ সর্বে পুরস্কৃত্য শিখণ্ডিনম্
বিব্যধুঃ সমরে ভীষ্মং পরিবার্য সমন্ততঃ
114.2
শতঘ্নীভিঃ সুঘোরাভিঃ পট্টিশৈঃ সপরশ্বধৈঃ
মুদ্গরৈর্মুসলৈঃ প্রাসৈঃ ক্ষেপণীভিশ্চ সর্বশঃ
114.3
শরৈঃ কনকপুঙ্খৈশ্চ শক্তিতোমরকম্পনৈঃ
নারাচৈর্বত্সদন্তৈশ্চ ভুশুণ্ডীভিশ্চ ভারত
অতাডয়ন্রণে ভীষ্মং সহিতাঃ সর্বসৃঞ্জয়াঃ
114.4
স বিশীর্ণতনুত্রাণঃ পীডিতো বহুভিস্তদা
বিব্যথে নৈব গাঙ্গেয়ো ভিদ্যমানেষু মর্মসু
114.5
স দীপ্তশরচাপার্চিরস্ত্রপ্রসৃতমারুতঃ
নেমিনির্হ্রাদসংনাদো মহাস্ত্রোদয়পাবকঃ
114.6
চিত্রচাপমহাজ্বালো বীরক্ষয়মহেন্ধনঃ
যুগান্তাগ্নিসমো ভীষ্মঃ পরেষাং সমপদ্যত
114.7
নিপত্য রথসংঘানামন্তরেণ বিনিঃসৃতঃ
দৃশ্যতে স্ম নরেন্দ্রাণাং পুনর্মধ্যগতশ্চরন্
114.8
ততঃ পাঞ্চালরাজং চ ধৃষ্টকেতুমতীত্য চ
পাণ্ডবানীকিনীমধ্যমাসসাদ স বেগিতঃ
114.9
ততঃ সাত্যকিভীমৌ চ পাণ্ডবং চ ধনংজয়ম্
দ্রুপদং চ বিরাটং চ ধৃষ্টদ্যুম্নং চ পার্ষতম্
114.10
ভীমঘোষৈর্মহাবেগৈর্বৈরিবারণভেদিভিঃ
ষডেতান্ষড্ভিরানর্ছদ্ভাস্করপ্রতিমৈঃ শরৈঃ
114.11
তস্য তে নিশিতান্বাণান্সংনিবার্য মহারথাঃ
দশভির্দশভির্ভীষ্মমর্দয়ামাসুরোজসা
114.12
শিখণ্ডী তু রণে বাণান্যান্মুমোচ মহাব্রতে
তে ভীষ্মং বিবিশুস্তূর্ণং স্বর্ণপুঙ্খাঃ শিলাশিতাঃ
114.13
ততঃ কিরীটী সংরব্ধো ভীষ্মমেবাভ্যবর্তত
শিখণ্ডিনং পুরস্কৃত্য ধনুশ্চাস্য সমাচ্ছিনৎ
114.14
ভীষ্মস্য ধনুষশ্ছেদং নামৃষ্যন্ত মহারথাঃ
দ্রোণশ্চ কৃতবর্মা চ সৈন্ধবশ্চ জয়দ্রথঃ
114.15
ভূরিশ্রবাঃ শলঃ শল্যো ভগদত্তস্তথৈব চ
সপ্তৈতে পরমক্রুদ্ধাঃ কিরীটিনমভিদ্রুতাঃ
114.16
উত্তমাস্ত্রাণি দিব্যানি দর্শয়ন্তো মহারথাঃ
অভিপেতুর্ভৃশং ক্রুদ্ধাশ্ছাদয়ন্ত স্ম পাণ্ডবান্
114.17
তেষামাপততাং শব্দঃ শুশ্রুবে ফল্গুনং প্রতি
উদ্বৃত্তানাং যথা শব্দঃ সমুদ্রাণাং যুগক্ষয়ে
114.18
হতানয়ত গৃহ্ণীত যুধ্যতাপি চ কৃন্তত
ইত্যাসীত্তুমুলঃ শব্দঃ ফল্গুনস্য রথং প্রতি
114.19
তং শব্দং তুমুলং শ্রুত্বা পাণ্ডবানাং মহারথাঃ
অভ্যধাবন্পরীপ্সন্তঃ ফল্গুনং ভরতর্ষভ
114.20
সাত্যকির্ভীমসেনশ্চ ধৃষ্টদ্যুম্নশ্চ পার্ষতঃ
বিরাটদ্রুপদৌ চোভৌ রাক্ষসশ্চ ঘটোত্কচঃ
114.21
অভিমন্যুশ্চ সংক্রুদ্ধঃ সপ্তৈতে ক্রোধমূর্ছিতাঃ
সমভ্যধাবংস্ত্বরিতাশ্চিত্রকার্মুকধারিণঃ
114.22
তেষাং সমভবদ্যুদ্ধং তুমুলং লোমহর্ষণম্
সংগ্রামে ভরতশ্রেষ্ঠ দেবানাং দানবৈরিব
114.23
শিখণ্ডী তু রথশ্রেষ্ঠো রক্ষ্যমাণঃ কিরীটিনা
অবিধ্যদ্দশভির্ভীষ্মং ছিন্নধন্বানমাহবে
সারথিং দশভিশ্চাস্য ধ্বজং চৈকেন চিচ্ছিদে
114.24
সোঽন্যত্কার্মুকমাদায় গাঙ্গেয়ো বেগবত্তরম্
তদপ্যস্য শিতৈর্ভল্লৈস্ত্রিভিশ্চিচ্ছেদ ফল্গুনঃ
114.25
এবং স পাণ্ডবঃ ক্রুদ্ধ আত্তমাত্তং পুনঃ পুনঃ
ধনুর্ভীষ্মস্য চিচ্ছেদ সব্যসাচী পরংতপঃ
114.26
স চ্ছিন্নধন্বা সংক্রুদ্ধঃ সৃক্কিণী পরিসংলিহন্
শক্তিং জগ্রাহ সংক্রুদ্ধো গিরীণামপি দারণীম্
তাং চ চিক্ষেপ সংক্রুদ্ধঃ ফল্গুনস্য রথং প্রতি
114.27
তামাপতন্তীং সংপ্রেক্ষ্য জ্বলন্তীমশনীমিব
সমাদত্ত শিতান্ভল্লান্পঞ্চ পাণ্ডবনন্দনঃ
114.28
তস্য চিচ্ছেদ তাং শক্তিং পঞ্চধা পঞ্চভিঃ শরৈঃ
সংক্রুদ্ধো ভরতশ্রেষ্ঠ ভীষ্মবাহুবলেরিতাম্
114.29
সা পপাত পরিচ্ছিন্না সংক্রুদ্ধেন কিরীটিনা
মেঘবৃন্দপরিভ্রষ্টা বিচ্ছিন্নেব শতহ্রদা
114.30
ছিন্নাং তাং শক্তিমালোক্য ভীষ্মঃ ক্রোধসমন্বিতঃ
অচিন্তয়দ্রণে বীরো বুদ্ধ্যা পরপুরংজয়ঃ
114.31
শক্তোঽহং ধনুষৈকেন নিহন্তুং সর্বপাণ্ডবান্
যদ্যেষাং ন ভবেদ্গোপ্তা বিষ্বক্সেনো মহাবলঃ
114.32
কারণদ্বয়মাস্থায় নাহং যোত্স্যামি পাণ্ডবৈঃ
অবধ্যত্বাচ্চ পাণ্ডূনাং স্ত্রীভাবাচ্চ শিখণ্ডিনঃ
114.33
পিত্রা তুষ্টেন মে পূর্বং যদা কালীমুদাবহৎ
স্বচ্ছন্দমরণং দত্তমবধ্যত্বং রণে তথা
তস্মান্মৃত্যুমহং মন্যে প্রাপ্তকালমিবাত্মনঃ
114.34
এবং জ্ঞাত্বা ব্যবসিতং ভীষ্মস্যামিততেজসঃ
ঋষয়ো বসবশ্চৈব বিয়ত্স্থা ভীষ্মমব্রুবন্
114.35
যত্তে ব্যবসিতং বীর অস্মাকং সুমহত্প্রিয়ম্
তত্কুরুষ্ব মহেষ্বাস যুদ্ধাদ্বুদ্ধিং নিবর্তয়
114.36
তস্য বাক্যস্য নিধনে প্রাদুরাসীচ্ছিবোঽনিলঃ
অনুলোমঃ সুগন্ধী চ পৃষতৈশ্চ সমন্বিতঃ
114.37
দেবদুন্দুভয়শ্চৈব সংপ্রণেদুর্মহাস্বনাঃ
পপাত পুষ্পবৃষ্টিশ্চ ভীষ্মস্যোপরি পার্থিব
114.38
ন চ তচ্ছুশ্রুবে কশ্চিত্তেষাং সংবদতাং নৃপ
ঋতে ভীষ্মং মহাবাহুং মাং চাপি মুনিতেজসা
114.39
সংভ্রমশ্চ মহানাসীত্ত্রিদশানাং বিশাং পতে
পতিষ্যতি রথাদ্ভীষ্মে সর্বলোকপ্রিয়ে তদা
114.40
ইতি দেবগণানাং চ শ্রুত্বা বাক্যং মহামনাঃ
ততঃ শাংতনবো ভীষ্মো বীভত্সুং নাভ্যবর্তত
ভিদ্যমানঃ শিতৈর্বাণৈঃ সর্বাবরণভেদিভিঃ
114.41
শিখণ্ডী তু মহারাজ ভরতানাং পিতামহম্
আজঘানোরসি ক্রুদ্ধো নবভির্নিশিতৈঃ শরৈঃ
114.42
স তেনাভিহতঃ সংখ্যে ভীষ্মঃ কুরুপিতামহঃ
নাকম্পত মহারাজ ক্ষিতিকম্পে যথাচলঃ
114.43
ততঃ প্রহস্য বীভত্সুর্ব্যাক্ষিপন্গাণ্ডিবং ধনুঃ
গাঙ্গেয়ং পঞ্চবিংশত্যা ক্ষুদ্রকাণাং সমর্পয়ৎ
114.44
পুনঃ শরশতেনৈনং ত্বরমাণো ধনংজয়ঃ
সর্বগাত্রেষু সংক্রুদ্ধঃ সর্বমর্মস্বতাডয়ৎ
114.45
এবমন্যৈরপি ভৃশং বধ্যমানো মহারণে
ন চক্রুস্তে রুজং তস্য রুক্মপুঙ্খাঃ শিলাশিতাঃ
114.46
ততঃ কিরীটী সংরব্ধো ভীষ্মমেবাভ্যবর্তত
শিখণ্ডিনং পুরস্কৃত্য ধনুশ্চাস্য সমাচ্ছিনৎ
114.47
অথৈনং দশভির্বিদ্ধ্বা ধ্বজমেকেন চিচ্ছিদে
সারথিং বিশিখৈশ্চাস্য দশভিঃ সমকম্পয়ৎ
114.48
সোঽন্যত্কার্মুকমাদত্ত গাঙ্গেয়ো বলবত্তরম্
তদপ্যস্য শিতৈর্ভল্লৈস্ত্রিধা ত্রিভিরুপানুদৎ
নিমেষান্তরমাত্রেণ আত্তমাত্তং মহারণে
114.49
এবমস্য ধনূংষ্যাজৌ চিচ্ছেদ সুবহূন্যপি
ততঃ শাংতনবো ভীষ্মো বীভত্সুং নাভ্যবর্তত
114.50
অথৈনং পঞ্চবিংশত্যা ক্ষুদ্রকাণাং সমর্দয়ৎ
সোঽতিবিদ্ধো মহেষ্বাসো দুঃশাসনমভাষত
114.51
এষ পার্থো রণে ক্রুদ্ধঃ পাণ্ডবানাং মহারথঃ
শরৈরনেকসাহস্রৈর্মামেবাভ্যসতে রণে
114.52
ন চৈষ শক্যঃ সমরে জেতুং বজ্রভৃতা অপি
ন চাপি সহিতা বীরা দেবদানবরাক্ষসাঃ
মাং চৈব শক্তা নির্জেতুং কিমু মর্ত্যাঃ সুদুর্বলাঃ
114.53
এবং তয়োঃ সংবদতোঃ ফল্গুনো নিশিতৈঃ শরৈঃ
শিখণ্ডিনং পুরস্কৃত্য ভীষ্মং বিব্যাধ সংয়ুগে
114.54
ততো দুঃশাসনং ভূয়ঃ স্ময়মানোঽভ্যভাষত
অতিবিদ্ধঃ শিতৈর্বাণৈর্ভৃশং গাণ্ডীবধন্বনা
114.55
বজ্রাশনিসমস্পর্শাঃ শিতাগ্রাঃ সংপ্রবেশিতাঃ
বিমুক্তা অব্যবচ্ছিন্না নেমে বাণাঃ শিখণ্ডিনঃ
114.56
নিকৃন্তমানা মর্মাণি দৃঢাবরণভেদিনঃ
মুসলানীব মে ঘ্নন্তি নেমে বাণাঃ শিখণ্ডিনঃ
114.57
ব্রহ্মদণ্ডসমস্পর্শা বজ্রবেগা দুরাসদাঃ
মম প্রাণানারুজন্তি নেমে বাণাঃ শিখণ্ডিনঃ
114.58
ভুজগা ইব সংক্রুদ্ধা লেলিহানা বিষোল্বণাঃ
মমাবিশন্তি মর্মাণি নেমে বাণাঃ শিখণ্ডিনঃ
114.59
নাশয়ন্তীব মে প্রাণান্যমদূতা ইবাহিতাঃ
গদাপরিঘসংস্পর্শা নেমে বাণাঃ শিখণ্ডিনঃ
114.60
কৃন্তন্তি মম গাত্রাণি মাঘমাসে গবামিব
অর্জুনস্য ইমে বাণা নেমে বাণাঃ শিখণ্ডিনঃ
114.61
সর্বে হ্যপি ন মে দুঃখং কুর্যুরন্যে নরাধিপাঃ
বীরং গণ্ডীবধন্বানমৃতে জিষ্ণুং কপিধ্বজম্
114.62
ইতি ব্রুবঞ্শাংতনবো দিধক্ষুরিব পাণ্ডবম্
সবিষ্ফুলিঙ্গাং দীপ্তাগ্রাং শক্তিং চিক্ষেপ ভারত
114.63
তামস্য বিশিখৈশ্ছিত্ত্বা ত্রিধা ত্রিভিরপাতয়ৎ
পশ্যতাং কুরুবীরাণাং সর্বেষাং তত্র ভারত
114.64
চর্মাথাদত্ত গাঙ্গেয়ো জাতরূপপরিষ্কৃতম্
খড্গং চান্যতরং প্রেপ্সুর্মৃত্যোরগ্রে জয়ায় বা
114.65
তস্য তচ্ছতধা চর্ম ব্যধমদ্দংশিতাত্মনঃ
রথাদনবরূঢস্য তদদ্ভুতমিবাভবৎ
114.66
বিনদ্যোচ্চৈঃ সিংহ ইব স্বান্যনীকান্যচোদয়ৎ
অভিদ্রবত গাঙ্গেয়ং মা বোঽস্তু ভয়মণ্বপি
114.67
অথ তে তোমরৈঃ প্রাসৈর্বাণৌঘৈশ্চ সমন্ততঃ
পট্টিশৈশ্চ সনিস্ত্রিংশৈর্নানাপ্রহরণৈস্তথা
114.68
বত্সদন্তৈশ্চ ভল্লৈশ্চ তমেকমভিদুদ্রুবুঃ
সিংহনাদস্ততো ঘোরঃ পাণ্ডবানামজায়ত
114.69
তথৈব তব পুত্রাশ্চ রাজন্ভীষ্মজয়ৈষিণঃ
তমেকমভ্যবর্তন্ত সিংহনাদাংশ্চ নেদিরে
114.70
তত্রাসীত্তুমুলং যুদ্ধং তাবকানাং পরৈঃ সহ
দশমেঽহনি রাজেন্দ্র ভীষ্মার্জুনসমাগমে
114.71
আসীদ্গাঙ্গ ইবাবর্তো মুহূর্তমুদধেরিব
সৈন্যানাং যুধ্যমানানাং নিঘ্নতামিতরেতরম্
114.72
অগম্যরূপা পৃথিবী শোণিতাক্তা তদাভবৎ
সমং চ বিষমং চৈব ন প্রাজ্ঞায়ত কিংচন
114.73
যোধানাময়ুতং হত্বা তস্মিন্স দশমেঽহনি
অতিষ্ঠদাহবে ভীষ্মো ভিদ্যমানেষু মর্মসু
114.74
ততঃ সেনামুখে তস্মিন্স্থিতঃ পার্থো ধনংজয়ঃ
মধ্যেন কুরুসৈন্যানাং দ্রাবয়ামাস বাহিনীম্
114.75
বয়ং শ্বেতহয়াদ্ভীতাঃ কুন্তীপুত্রাদ্ধনংজয়াৎ
পীড্যমানাঃ শিতৈঃ শস্ত্রৈঃ প্রদ্রবাম মহারণাৎ
114.76
সৌবীরাঃ কিতবাঃ প্রাচ্যাঃ প্রতীচ্যোদীচ্যমালবাঃ
অভীষাহাঃ শূরসেনাঃ শিবয়োঽথ বসাতয়ঃ
114.77
শাল্বাশ্রয়াস্ত্রিগর্তাশ্চ অম্বষ্ঠাঃ কেকয়ৈঃ সহ
দ্বাদশৈতে জনপদাঃ শরার্তা ব্রণপীডিতাঃ
সংগ্রামে ন জহুর্ভীষ্মং যুধ্যমানং কিরীটিনা
114.78
ততস্তমেকং বহবঃ পরিবার্য সমন্ততঃ
পরিকাল্য কুরূন্সর্বাঞ্শরবর্ষৈরবাকিরন্
114.79
নিপাতয়ত গৃহ্ণীত বিধ্যতাথ চ কর্ষত
ইত্যাসীত্তুমুলঃ শব্দো রাজন্ভীষ্মরথং প্রতি
114.80
অভিহত্য শরৌঘৈস্তং শতশোঽথ সহস্রশঃ
ন তস্যাসীদনির্ভিন্নং গাত্রেষ্বঙ্গুলমাত্রকম্
114.81
এবং বিভো তব পিতা শরৈর্বিশকলীকৃতঃ
শিতাগ্রৈঃ ফল্গুনেনাজৌ প্রাক্শিরাঃ প্রাপতদ্রথাৎ
কিংচিচ্ছেষে দিনকরে পুত্রাণাং তব পশ্যতাম্
114.82
হা হেতি দিবি দেবানাং পার্থিবানাং চ সর্বশঃ
পতমানে রথাদ্ভীষ্মে বভূব সুমহান্স্বনঃ
114.83
তং পতন্তমভিপ্রেক্ষ্য মহাত্মানং পিতামহম্
সহ ভীষ্মেণ সর্বেষাং প্রাপতন্হৃদয়ানি নঃ
114.84
স পপাত মহাবাহুর্বসুধামনুনাদয়ন্
ইন্দ্রধ্বজ ইবোত্সৃষ্টঃ কেতুঃ সর্বধনুষ্মতাম্
ধরণীং নাস্পৃশচ্চাপি শরসংঘৈঃ সমাচিতঃ
114.85
শরতল্পে মহেষ্বাসং শয়ানং পুরুষর্ষভম্
রথাত্প্রপতিতং চৈনং দিব্যো ভাবঃ সমাবিশৎ
114.86
অভ্যবর্ষত পর্জন্যঃ প্রাকম্পত চ মেদিনী
পতন্স দদৃশে চাপি খর্বিতং চ দিবাকরম্
114.87
সংজ্ঞাং চৈবালভদ্বীরঃ কালং সংচিন্ত্য ভারত
অন্তরিক্ষে চ শুশ্রাব দিব্যাং বাচং সমন্ততঃ
114.88
কথং মহাত্মা গাঙ্গেয়ঃ সর্বশস্ত্রভৃতাং বরঃ
কালং কর্তা নরব্যাঘ্রঃ সংপ্রাপ্তে দক্ষিণায়নে
114.89
স্থিতোঽস্মীতি চ গাঙ্গেয়স্তচ্ছ্রুত্বা বাক্যমব্রবীৎ
ধারয়ামাস চ প্রাণান্পতিতোঽপি হি ভূতলে
উত্তরায়ণমন্বিচ্ছন্ভীষ্মঃ কুরুপিতামহঃ
114.90
তস্য তন্মতমাজ্ঞায় গঙ্গা হিমবতঃ সুতা
মহর্ষীন্হংসরূপেণ প্রেষয়ামাস তত্র বৈ
114.91
ততঃ সংপাতিনো হংসাস্ত্বরিতা মানসৌকসঃ
আজগ্মুঃ সহিতা দ্রষ্টুং ভীষ্মং কুরুপিতামহম্
যত্র শেতে নরশ্রেষ্ঠঃ শরতল্পে পিতামহঃ
114.92
তে তু ভীষ্মং সমাসাদ্য মুনয়ো হংসরূপিণঃ
অপশ্যঞ্শরতল্পস্থং ভীষ্মং কুরুপিতামহম্
114.93
তে তং দৃষ্ট্বা মহাত্মানং কৃত্বা চাপি প্রদক্ষিণম্
গাঙ্গেয়ং ভরতশ্রেষ্ঠং দক্ষিণেন চ ভাস্করম্
114.94
ইতরেতরমামন্ত্র্য প্রাহুস্তত্র মনীষিণঃ
ভীষ্ম এব মহাত্মা সন্সংস্থাতা দক্ষিণায়নে
114.95
ইত্যুক্ত্বা প্রস্থিতান্হংসান্দক্ষিণামভিতো দিশম্
সংপ্রেক্ষ্য বৈ মহাবুদ্ধিশ্চিন্তয়িত্বা চ ভারত
114.96
তানব্রবীচ্ছাংতনবো নাহং গন্তা কথংচন
দক্ষিণাবৃত্ত আদিত্যে এতন্মে মনসি স্থিতম্
114.97
গমিষ্যামি স্বকং স্থানমাসীদ্যন্মে পুরাতনম্
উদগাবৃত্ত আদিত্যে হংসাঃ সত্যং ব্রবীমি বঃ
114.98
ধারয়িষ্যাম্যহং প্রাণানুত্তরায়ণকাঙ্ক্ষয়া
ঐশ্বর্যভূতঃ প্রাণানামুত্সর্গে নিয়তো হ্যহম্
তস্মাত্প্রাণান্ধারয়িষ্যে মুমূর্ষুরুদগায়নে
114.99
যশ্চ দত্তো বরো মহ্যং পিত্রা তেন মহাত্মনা
ছন্দতো মৃত্যুরিত্যেবং তস্য চাস্তু বরস্তথা
114.100
ধারয়িষ্যে ততঃ প্রাণানুত্সর্গে নিয়তে সতি
ইত্যুক্ত্বা তাংস্তদা হংসানশেত শরতল্পগঃ
114.101
এবং কুরূণাং পতিতে শৃঙ্গে ভীষ্মে মহৌজসি
পাণ্ডবাঃ সৃঞ্জয়াশ্চৈব সিংহনাদং প্রচক্রিরে
114.102
তস্মিন্হতে মহাসত্ত্বে ভরতানামমধ্যমে
ন কিংচিত্প্রত্যপদ্যন্ত পুত্রাস্তে ভরতর্ষভ
সংমোহশ্চৈব তুমুলঃ কুরূণামভবত্তদা
114.103
নৃপা দুর্যোধনমুখা নিঃশ্বস্য রুরুদুস্ততঃ
বিষাদাচ্চ চিরং কালমতিষ্ঠন্বিগতেন্দ্রিয়াঃ
114.104
দধ্যুশ্চৈব মহারাজ ন যুদ্ধে দধিরে মনঃ
ঊরুগ্রাহগৃহীতাশ্চ নাভ্যধাবন্ত পাণ্ডবান্
114.105
অবধ্যে শংতনোঃ পুত্রে হতে ভীষ্মে মহৌজসি
অভাবঃ সুমহান্রাজন্কুরূনাগাদতন্দ্রিতঃ
114.106
হতপ্রবীরাশ্চ বয়ং নিকৃত্তাশ্চ শিতৈঃ শরৈঃ
কর্তব্যং নাভিজানীমো নির্জিতাঃ সব্যসাচিনা
114.107
পাণ্ডবাস্তু জয়ং লব্ধ্বা পরত্র চ পরাং গতিম্
সর্বে দধ্মুর্মহাশঙ্খাঞ্শূরাঃ পরিঘবাহবঃ
সোমকাশ্চ সপঞ্চালাঃ প্রাহৃষ্যন্ত জনেশ্বর
114.108
ততস্তূর্যসহস্রেষু নদত্সু সুমহাবলঃ
আস্ফোটয়ামাস ভৃশং ভীমসেনো ননর্ত চ
114.109
সেনয়োরুভয়োশ্চাপি গাঙ্গেয়ে বিনিপাতিতে
সংন্যস্য বীরাঃ শস্ত্রাণি প্রাধ্যায়ন্ত সমন্ততঃ
114.110
প্রাক্রোশন্প্রাপতংশ্চান্যে জগ্মুর্মোহং তথাপরে
ক্ষত্রং চান্যেঽভ্যনিন্দন্ত ভীষ্মং চৈকেঽভ্যপূজয়ন্
114.111
ঋষয়ঃ পিতরশ্চৈব প্রশশংসুর্মহাব্রতম্
ভরতানাং চ যে পূর্বে তে চৈনং প্রশশংসিরে
114.112
মহোপনিষদং চৈব যোগমাস্থায় বীর্যবান্
জপঞ্শাংতনবো ধীমান্কালাকাঙ্ক্ষী স্থিতোঽভবৎ