Utshovঅধ্যায় 115
115.1
ধৃতরাষ্ট্র উবাচ
কথমাসংস্তদা যোধা হীনা ভীষ্মেণ সংজয়
বলিনা দেবকল্পেন গুর্বর্থে ব্রহ্মচারিণা
115.2
তদৈব নিহতান্মন্যে কুরূনন্যাংশ্চ পার্থিবান্
ন প্রাহরদ্যদা ভীষ্মো ঘৃণিত্বাদ্দ্রুপদাত্মজে
115.3
ততো দুঃখতরং মন্যে কিমন্যত্প্রভবিষ্যতি
যদদ্য পিতরং শ্রুত্বা নিহতং মম দুর্মতেঃ
115.4
অশ্মসারময়ং নূনং হৃদয়ং মম সংজয়
শ্রুত্বা বিনিহতং ভীষ্মং শতধা যন্ন দীর্যতে
115.5
পুনঃ পুনর্ন মৃষ্যামি হতং দেবব্রতং রণে
ন হতো জামদগ্ন্যেন দিব্যৈরস্ত্রৈঃ স্ম যঃ পুরা
115.6
যদদ্য নিহতেনাজৌ ভীষ্মেণ জয়মিচ্ছতা
চেষ্টিতং নরসিংহেন তন্মে কথয় সংজয়
115.7
সংজয় উবাচ
সায়াহ্নে ন্যপতদ্ভূমৌ ধার্তরাষ্ট্রান্বিষাদয়ন্
পাঞ্চালানাং দদদ্ধর্ষং কুরুবৃদ্ধঃ পিতামহঃ
115.8
স শেতে শরতল্পস্থো মেদিনীমস্পৃশংস্তদা
ভীষ্মো রথাত্প্রপতিতঃ প্রচ্যুতো ধরণীতলে
115.9
হা হেতি তুমুলঃ শব্দো ভূতানাং সমপদ্যত
সীমাবৃক্ষে নিপতিতে কুরূণাং সমিতিক্ষয়ে
115.10
উভয়োঃ সেনয়ো রাজন্ক্ষত্রিয়ান্ভয়মাবিশৎ
ভীষ্মং শংতনবং দৃষ্ট্বা বিশীর্ণকবচধ্বজম্
কুরবঃ পর্যবর্তন্ত পাণ্ডবাশ্চ বিশাং পতে
115.11
খং তমোবৃতমাসীচ্চ নাসীদ্ভানুমতঃ প্রভা
ররাস পৃথিবী চৈব ভীষ্মে শাংতনবে হতে
115.12
অয়ং ব্রহ্মবিদাং শ্রেষ্ঠো অয়ং ব্রহ্মবিদাং গতিঃ
ইত্যভাষন্ত ভূতানি শয়ানং ভরতর্ষভম্
115.13
অয়ং পিতরমাজ্ঞায় কামার্তং শংতনুং পুরা
ঊর্ধ্বরেতসমাত্মানং চকার পুরুষর্ষভঃ
115.14
ইতি স্ম শরতল্পস্থং ভরতানামমধ্যমম্
ঋষয়ঃ পর্যধাবন্ত সহিতাঃ সিদ্ধচারণৈঃ
115.15
হতে শাংতনবে ভীষ্মে ভরতানাং পিতামহে
ন কিংচিত্প্রত্যপদ্যন্ত পুত্রাস্তব চ ভারত
115.16
বিবর্ণবদনাশ্চাসন্গতশ্রীকাশ্চ ভারত
অতিষ্ঠন্ব্রীডিতাশ্চৈব হ্রিয়া যুক্তা হ্যধোমুখাঃ
115.17
পাণ্ডবাশ্চ জয়ং লব্ধ্বা সংগ্রামশিরসি স্থিতাঃ
সর্বে দধ্মুর্মহাশঙ্খান্হেমজালপরিষ্কৃতান্
115.18
ভৃশং তূর্যনিনাদেষু বাদ্যমানেষু চানঘ
অপশ্যাম রণে রাজন্ভীমসেনং মহাবলম্
আক্রীডমানং কৌন্তেয়ং হর্ষেণ মহতা যুতম্
115.19
নিহত্য সমরে শত্রূন্মহাবলসমন্বিতান্
সংমোহশ্চাপি তুমুলঃ কুরূণামভবত্তদা
115.20
কর্ণদুর্যোধনৌ চাপি নিঃশ্বসেতাং মুহুর্মুহুঃ
তথা নিপতিতে ভীষ্মে কৌরবাণাং ধুরংধরে
হাহাকারমভূত্সর্বং নির্মর্যাদমবর্তত
115.21
দৃষ্ট্বা চ পতিতং ভীষ্মং পুত্রো দুঃশাসনস্তব
উত্তমং জবমাস্থায় দ্রোণানীকং সমাদ্রবৎ
115.22
ভ্রাত্রা প্রস্থাপিতো বীরঃ স্বেনানীকেন দংশিতঃ
প্রয়য়ৌ পুরুষব্যাঘ্রঃ স্বসৈন্যমভিচোদয়ন্
115.23
তমায়ান্তমভিপ্রেক্ষ্য কুরবঃ পর্যবারয়ন্
দুঃশাসনং মহারাজ কিময়ং বক্ষ্যতীতি বৈ
115.24
ততো দ্রোণায় নিহতং ভীষ্মমাচষ্ট কৌরবঃ
দ্রোণস্তদপ্রিয়ং শ্রুত্বা সহসা ন্যপতদ্রথাৎ
115.25
স সংজ্ঞামুপলভ্যাথ ভারদ্বাজঃ প্রতাপবান্
নিবারয়ামাস তদা স্বান্যনীকানি মারিষ
115.26
বিনিবৃত্তান্কুরূন্দৃষ্ট্বা পাণ্ডবাপি স্বসৈনিকান্
দূতৈঃ শীঘ্রাশ্বসংয়ুক্তৈরবহারমকারয়ন্
115.27
বিনিবৃত্তেষু সৈন্যেষু পারংপর্যেণ সর্বশঃ
বিমুক্তকবচাঃ সর্বে ভীষ্মমীয়ুর্নরাধিপাঃ
115.28
ব্যুপারম্য ততো যুদ্ধাদ্যোধাঃ শতসহস্রশঃ
উপতস্থুর্মহাত্মানং প্রজাপতিমিবামরাঃ
115.29
তে তু ভীষ্মং সমাসাদ্য শয়ানং ভরতর্ষভম্
অভিবাদ্য ব্যতিষ্ঠন্ত পাণ্ডবাঃ কুরুভিঃ সহ
115.30
অথ পাণ্ডূন্কুরূংশ্চৈব প্রণিপত্যাগ্রতঃ স্থিতান্
অভ্যভাষত ধর্মাত্মা ভীষ্মঃ শাংতনবস্তদা
115.31
স্বাগতং বো মহাভাগাঃ স্বাগতং বো মহারথাঃ
তুষ্যামি দর্শনাচ্চাহং যুষ্মাকমমরোপমাঃ
115.32
অভিনন্দ্য স তানেবং শিরসা লম্বতাব্রবীৎ
শিরো মে লম্বতেঽত্যর্থমুপধানং প্রদীয়তাম্
115.33
ততো নৃপাঃ সমাজহ্রুস্তনূনি চ মৃদূনি চ
উপধানানি মুখ্যানি নৈচ্ছত্তানি পিতামহঃ
115.34
অব্রবীচ্চ নরব্যাঘ্রঃ প্রহসন্নিব তান্নৃপান্
নৈতানি বীরশয্যাসু যুক্তরূপাণি পার্থিবাঃ
115.35
ততো বীক্ষ্য নরশ্রেষ্ঠমভ্যভাষত পাণ্ডবম্
ধনংজয়ং দীর্ঘবাহুং সর্বলোকমহারথম্
115.36
ধনংজয় মহাবাহো শিরসো মেঽস্য লম্বতঃ
দীয়তামুপধানং বৈ যদ্যুক্তমিহ মন্যসে
115.37
স সংন্যস্য মহচ্চাপমভিবাদ্য পিতামহম্
নেত্রাভ্যামশ্রুপূর্ণাভ্যামিদং বচনমব্রবীৎ
115.38
আজ্ঞাপয় কুরুশ্রেষ্ঠ সর্বশস্ত্রভৃতাং বর
প্রেষ্যোঽহং তব দুর্ধর্ষ ক্রিয়তাং কিং পিতামহ
115.39
তমব্রবীচ্ছাংতনবঃ শিরো মে তাত লম্বতে
উপধানং কুরুশ্রেষ্ঠ ফল্গুনোপনয়স্ব মে
শয়নস্যানুরূপং হি শীঘ্রং বীর প্রয়চ্ছ মে
115.40
ত্বং হি পার্থ মহাবাহো শ্রেষ্ঠঃ সর্বধনুষ্মতাম্
ক্ষত্রধর্মস্য বেত্তা চ বুদ্ধিসত্ত্বগুণান্বিতঃ
115.41
ফল্গুনস্তু তথেত্যুক্ত্বা ব্যবসায়পুরোজবঃ
প্রগৃহ্যামন্ত্র্য গাণ্ডীবং শরাংশ্চ নতপর্বণঃ
115.42
অনুমান্য মহাত্মানং ভরতানামমধ্যমম্
ত্রিভিস্তীক্ষ্ণৈর্মহাবেগৈরুদগৃহ্ণাচ্ছিরঃ শরৈঃ
115.43
অভিপ্রায়ে তু বিদিতে ধর্মাত্মা সব্যসাচিনা
অতুষ্যদ্ভরতশ্রেষ্ঠো ভীষ্মো ধর্মার্থতত্ত্ববিৎ
115.44
উপধানেন দত্তেন প্রত্যনন্দদ্ধনংজয়ম্
কুন্তীপুত্রং যুধাং শ্রেষ্ঠং সুহৃদাং প্রীতিবর্ধনম্
115.45
অনুরূপং শয়ানস্য পাণ্ডবোপহিতং ত্বয়া
যদ্যন্যথা প্রবর্তেথাঃ শপেয়ং ত্বামহং রুষা
115.46
এবমেতন্মহাবাহো ধর্মেষু পরিনিষ্ঠিতম্
স্বপ্তব্যং ক্ষত্রিয়েণাজৌ শরতল্পগতেন বৈ
115.47
এবমুক্ত্বা তু বীভত্সুং সর্বাংস্তানব্রবীদ্বচঃ
রাজ্ঞশ্চ রাজপুত্রাংশ্চ পাণ্ডবেনাভি সংস্থিতান্
115.48
শয়েয়মস্যাং শয্যায়াং যাবদাবর্তনং রবেঃ
যে তদা পারয়িষ্যন্তি তে মাং দ্রক্ষ্যন্তি বৈ নৃপাঃ
115.49
দিশং বৈশ্রবণাক্রান্তাং যদা গন্তা দিবাকরঃ
অর্চিষ্মান্প্রতপঁল্লোকান্রথেনোত্তমতেজসা
বিমোক্ষ্যেঽহং তদা প্রাণান্সুহৃদঃ সুপ্রিয়ানপি
115.50
পরিখা খন্যতামত্র মমাবসদনে নৃপাঃ
উপাসিষ্যে বিবস্বন্তমেবং শরশতাচিতঃ
উপারমধ্বং সংগ্রামাদ্বৈরাণ্যুত্সৃজ্য পার্থিবাঃ
115.51
উপাতিষ্ঠন্নথো বৈদ্যাঃ শল্যোদ্ধরণকোবিদাঃ
সর্বোপকরণৈর্যুক্তাঃ কুশলাস্তে সুশিক্ষিতাঃ
115.52
তান্দৃষ্ট্বা জাহ্নবীপুত্রঃ প্রোবাচ বচনং তদা
দত্তদেয়া বিসৃজ্যন্তাং পূজয়িত্বা চিকিত্সকাঃ
115.53
এবংগতে ন হীদানীং বৈদ্যৈঃ কার্যমিহাস্তি মে
ক্ষত্রধর্মপ্রশস্তাং হি প্রাপ্তোঽস্মি পরমাং গতিম্
115.54
নৈষ ধর্মো মহীপালাঃ শরতল্পগতস্য মে
এতৈরেব শরৈশ্চাহং দগ্ধব্যোঽন্তে নরাধিপাঃ
115.55
তচ্ছ্রুত্বা বচনং তস্য পুত্রো দুর্যোধনস্তব
বৈদ্যান্বিসর্জয়ামাস পূজয়িত্বা যথার্হতঃ
115.56
ততস্তে বিস্ময়ং জগ্মুর্নানাজনপদেশ্বরাঃ
স্থিতিং ধর্মে পরাং দৃষ্ট্বা ভীষ্মস্যামিততেজসঃ
115.57
উপধানং ততো দত্ত্বা পিতুস্তব জনেশ্বর
সহিতাঃ পাণ্ডবাঃ সর্বে কুরবশ্চ মহারথাঃ
115.58
উপগম্য মহাত্মানং শয়ানং শয়নে শুভে
তেঽভিবাদ্য ততো ভীষ্মং কৃত্বা চাভিপ্রদক্ষিণম্
115.59
বিধায় রক্ষাং ভীষ্মস্য সর্ব এব সমন্ততঃ
বীরাঃ স্বশিবিরাণ্যেব ধ্যায়ন্তঃ পরমাতুরাঃ
নিবেশায়াভ্যুপাগচ্ছন্সায়াহ্নে রুধিরোক্ষিতাঃ
115.60
নিবিষ্টান্পাণ্ডবাংশ্চাপি প্রীয়মাণান্মহারথান্
ভীষ্মস্য পতনাদ্ধৃষ্টানুপগম্য মহারথান্
উবাচ যাদবঃ কালে ধর্মপুত্রং যুধিষ্ঠিরম্
115.61
দিষ্ট্যা জয়সি কৌরব্য দিষ্ট্যা ভীষ্মো নিপাতিতঃ
অবধ্যো মানুষৈরেষ সত্যসংধো মহারথঃ
115.62
অথ বা দৈবতৈঃ পার্থ সর্বশস্ত্রাস্ত্রপারগঃ
ত্বাং তু চক্ষুর্হণং প্রাপ্য দগ্ধো ঘোরেণ চক্ষুষা
115.63
এবমুক্তো ধর্মরাজঃ প্রত্যুবাচ জনার্দনম্
তব প্রসাদাদ্বিজয়ঃ ক্রোধাত্তব পরাজয়ঃ
ত্বং হি নঃ শরণং কৃষ্ণ ভক্তানামভয়ংকরঃ
115.64
অনাশ্চর্যো জয়স্তেষাং যেষাং ত্বমসি কেশব
রক্ষিতা সমরে নিত্যং নিত্যং চাপি হিতে রতঃ
সর্বথা ত্বাং সমাসাদ্য নাশ্চর্যমিতি মে মতিঃ
115.65
এবমুক্তঃ প্রত্যুবাচ স্ময়মানো জনার্দনঃ
ত্বয্যেবৈতদ্যুক্তরূপং বচনং পার্থিবোত্তম