Utshovঅধ্যায় 116
116.1
সংজয় উবাচ
ব্যুষ্টায়াং তু মহারাজ রজন্যাং সর্বপার্থিবাঃ
পাণ্ডবা ধার্তরাষ্ট্রাশ্চ অভিজগ্মুঃ পিতামহম্
116.2
তং বীরশয়নে বীরং শয়ানং কুরুসত্তমম্
অভিবাদ্যোপতস্থুর্বৈ ক্ষত্রিয়াঃ ক্ষত্রিয়র্ষভম্
116.3
কন্যাশ্চন্দনচূর্ণৈশ্চ লাজৈর্মাল্যৈশ্চ সর্বশঃ
স্ত্রিয়ো বালাস্তথা বৃদ্ধাঃ প্রেক্ষকাশ্চ পৃথগ্জনাঃ
সমভ্যয়ুঃ শাংতনবং ভূতানীব তমোনুদম্
116.4
তূর্যাণি গণিকা বারাস্তথৈব নটনর্তকাঃ
উপানৃত্যঞ্জগুশ্চৈব বৃদ্ধং কুরুপিতামহম্
116.5
উপারম্য চ যুদ্ধেভ্যঃ সংনাহান্বিপ্রমুচ্য চ
আয়ুধানি চ নিক্ষিপ্য সহিতাঃ কুরুপাণ্ডবাঃ
116.6
অন্বাসত দুরাধর্ষং দেবব্রতমরিংদমম্
অন্যোন্যং প্রীতিমন্তস্তে যথাপূর্বং যথাবয়ঃ
116.7
সা পার্থিবশতাকীর্ণা সমিতির্ভীষ্মশোভিতা
শুশুভে ভারতী দীপ্তা দিবীবাদিত্যমণ্ডলম্
116.8
বিবভৌ চ নৃপাণাং সা পিতামহমুপাসতাম্
দেবানামিব দেবেশং পিতামহমুপাসতাম্
116.9
ভীষ্মস্তু বেদনাং ধৈর্যান্নিগৃহ্য ভরতর্ষভ
অভিতপ্তঃ শরৈশ্চৈব নাতিহৃষ্টমনাব্রবীৎ
116.10
শরাভিতপ্তকায়োঽহং শরসংতাপমূর্ছিতঃ
পানীয়মভিকাঙ্ক্ষেঽহং রাজ্ঞস্তান্প্রত্যভাষত
116.11
ততস্তে ক্ষত্রিয়া রাজন্সমাজহ্রুঃ সমন্ততঃ
ভক্ষ্যানুচ্চাবচাংস্তত্র বারিকুম্ভাংশ্চ শীতলান্
116.12
উপনীতং চ তদ্দৃষ্ট্বা ভীষ্মঃ শাংতনবোঽব্রবীৎ
নাদ্য তাত ময়া শক্যং ভোগান্কাংশ্চন মানুষান্
116.13
উপভোক্তুং মনুষ্যেভ্যঃ শরশয্যাগতো হ্যহম্
প্রতীক্ষমাণস্তিষ্ঠামি নিবৃত্তিং শশিসূর্যয়োঃ
116.14
এবমুক্ত্বা শাংতনবো দীনবাক্সর্বপার্থিবান্
ধনংজয়ং মহাবাহুমভ্যভাষত ভারত
116.15
অথোপেত্য মহাবাহুরভিবাদ্য পিতামহম্
অতিষ্ঠত্প্রাঞ্জলিঃ প্রহ্বঃ কিং করোমীতি চাব্রবীৎ
116.16
তং দৃষ্ট্বা পাণ্ডবং রাজন্নভিবাদ্যাগ্রতঃ স্থিতম্
অভ্যভাষত ধর্মাত্মা ভীষ্মঃ প্রীতো ধনংজয়ম্
116.17
দহ্যতেঽদঃ শরীরং মে সংস্যূতোঽস্মি মহেষুভিঃ
মর্মাণি পরিদূয়ন্তে বদনং মম শুষ্যতি
116.18
হ্লাদনার্থং শরীরস্য প্রয়চ্ছাপো মমার্জুন
ত্বং হি শক্তো মহেষ্বাস দাতুমম্ভো যথাবিধি
116.19
অর্জুনস্তু তথেত্যুক্ত্বা রথমারুহ্য বীর্যবান্
অধিজ্যং বলবত্কৃত্বা গাণ্ডীবং ব্যাক্ষিপদ্ধনুঃ
116.20
তস্য জ্যাতলনির্ঘোষং বিস্ফূর্জিতমিবাশনেঃ
বিত্রেসুঃ সর্বভূতানি শ্রুত্বা সর্বে চ পার্থিবাঃ
116.21
ততঃ প্রদক্ষিণং কৃত্বা রথেন রথিনাং বরঃ
শয়ানং ভরতশ্রেষ্ঠং সর্বশস্ত্রভৃতাং বরম্
116.22
সংধায় চ শরং দীপ্তমভিমন্ত্র্য মহায়শাঃ
পর্জন্যাস্ত্রেণ সংয়োজ্য সর্বলোকস্য পশ্যতঃ
অবিধ্যত্পৃথিবীং পার্থঃ পার্শ্বে ভীষ্মস্য দক্ষিণে
116.23
উত্পপাত ততো ধারা বিমলা বারিণঃ শিবা
শীতস্যামৃতকল্পস্য দিব্যগন্ধরসস্য চ
116.24
অতর্পয়ত্ততঃ পার্থঃ শীতয়া বারিধারয়া
ভীষ্মং কুরূণামৃষভং দিব্যকর্মপরাক্রমঃ
116.25
কর্মণা তেন পার্থস্য শক্রষ্যেব বিকুর্বতঃ
বিস্ময়ং পরমং জগ্মুস্ততস্তে বসুধাধিপাঃ
116.26
তত্কর্ম প্রেক্ষ্য বীভত্সোরতিমানুষমদ্ভুতম্
সংপ্রাবেপন্ত কুরবো গাবঃ শীতার্দিতা ইব
116.27
বিস্ময়াচ্চোত্তরীয়াণি ব্যাবিধ্যন্সর্বতো নৃপাঃ
শঙ্খদুন্দুভিনির্ঘোষৈস্তুমুলং সর্বতোঽভবৎ
116.28
তৃপ্তঃ শাংতনবশ্চাপি রাজন্বীভত্সুমব্রবীৎ
সর্বপার্থিববীরাণাং সংনিধৌ পূজয়ন্নিব
116.29
নৈতচ্চিত্রং মহাবাহো ত্বয়ি কৌরবনন্দন
কথিতো নারদেনাসি পূর্বর্ষিরমিতদ্যুতিঃ
116.30
বাসুদেবসহায়স্ত্বং মহত্কর্ম করিষ্যসি
যন্নোত্সহতি দেবেন্দ্রঃ সহ দেবৈরপি ধ্রুবম্
116.31
বিদুস্ত্বাং নিধনং পার্থ সর্বক্ষত্রস্য তদ্বিদঃ
ধনুর্ধরাণামেকস্ত্বং পৃথিব্যাং প্রবরো নৃষু
116.32
মনুষ্যা জগতি শ্রেষ্ঠাঃ পক্ষিণাং গরুডো বরঃ
সরসাং সাগরঃ শ্রেষ্ঠো গৌর্বরিষ্ঠা চতুষ্পদাম্
116.33
আদিত্যস্তেজসাং শ্রেষ্ঠো গিরীণাং হিমবান্বরঃ
জাতীনাং ব্রাহ্মণঃ শ্রেষ্ঠঃ শ্রেষ্ঠস্ত্বমসি ধন্বিনাম্
116.34
ন বৈ শ্রুতং ধার্তরাষ্ট্রেণ বাক্যং; সংবোধ্যমানং বিদুরেণ চৈব
দ্রোণেন রামেণ জনার্দনেন; মুহুর্মুহুঃ সংজয়েনাপি চোক্তম্
116.35
পরীতবুদ্ধির্হি বিসংজ্ঞকল্পো; দুর্যোধনো নাভ্যনন্দদ্বচো মে
স শেষ্যতে বৈ নিহতশ্চিরায়; শাস্ত্রাতিগো ভীমবলাভিভূতঃ
116.36
ততঃ শ্রুত্বা তদ্বচঃ কৌরবেন্দ্রো; দুর্যোধনো দীনমনা বভূব
তমব্রবীচ্ছাংতনবোঽভিবীক্ষ্য; নিবোধ রাজন্ভব বীতমন্যুঃ
116.37
দৃষ্টং দুর্যোধনেদং তে যথা পার্থেন ধীমতা
জলস্য ধারা জনিতা শীতস্যামৃতগন্ধিনঃ
এতস্য কর্তা লোকেঽস্মিন্নান্যঃ কশ্চন বিদ্যতে
116.38
আগ্নেয়ং বারুণং সৌম্যং বায়ব্যমথ বৈষ্ণবম্
ঐন্দ্রং পাশুপতং ব্রাহ্মং পারমেষ্ঠ্যং প্রজাপতেঃ
ধাতুস্ত্বষ্টুশ্চ সবিতুর্দিব্যান্যস্ত্রাণি সর্বশঃ
116.39
সর্বস্মিন্মানুষে লোকে বেত্ত্যেকো হি ধনংজয়ঃ
কৃষ্ণো বা দেবকীপুত্রো নান্যো বৈ বেদ কশ্চন
ন শক্যাঃ পাণ্ডবাস্তাত যুদ্ধে জেতুং কথংচন
116.40
অমানুষাণি কর্মাণি যস্যৈতানি মহাত্মনঃ
তেন সত্ত্ববতা সংখ্যে শূরেণাহবশোভিনা
কৃতিনা সমরে রাজন্সংধিস্তে তাত যুজ্যতাম্
116.41
যাবত্কৃষ্ণো মহাবাহুঃ স্বাধীনঃ কুরুসংসদি
তাবত্পার্থেন শূরেণ সংধিস্তে তাত যুজ্যতাম্
116.42
যাবচ্চমূং ন তে শেষাং শরৈঃ সংনতপর্বভিঃ
নাশয়ত্যর্জুনস্তাবত্সংধিস্তে তাত যুজ্যতাম্
116.43
যাবত্তিষ্ঠন্তি সমরে হতশেষাঃ সহোদরাঃ
নৃপাশ্চ বহবো রাজংস্তাবত্সংধিঃ প্রয়ুজ্যতাম্
116.44
ন নির্দহতি তে যাবত্ক্রোধদীপ্তেক্ষণশ্চমূম্
যুধিষ্ঠিরো হি তাবদ্বৈ সংধিস্তে তাত যুজ্যতাম্
116.45
নকুলঃ সহদেবশ্চ ভীমসেনশ্চ পাণ্ডবঃ
যাবচ্চমূং মহারাজ নাশয়ন্তি ন সর্বশঃ
তাবত্তে পাণ্ডবৈঃ সার্ধং সৌভ্রাত্রং তাত রোচতাম্
116.46
যুদ্ধং মদন্তমেবাস্তু তাত সংশাম্য পাণ্ডবৈঃ
এতত্তে রোচতাং বাক্যং যদুক্তোঽসি ময়ানঘ
এতত্ক্ষেমমহং মন্যে তব চৈব কুলস্য চ
116.47
ত্যক্ত্বা মন্যুমুপশাম্যস্ব পার্থৈঃ; পর্যাপ্তমেতদ্যত্কৃতং ফল্গুনেন
ভীষ্মস্যান্তাদস্তু বঃ সৌহৃদং বা; সংপ্রশ্লেষঃ সাধু রাজন্প্রসীদ
116.48
রাজ্যস্যার্ধং দীয়তাং পাণ্ডবানা;মিন্দ্রপ্রস্থং ধর্মরাজোঽনুশাস্তু
মা মিত্রধ্রুক্পার্থিবানাং জঘন্যঃ; পাপাং কীর্তিং প্রাপ্স্যসে কৌরবেন্দ্র
116.49
মমাবসানাচ্ছান্তিরস্তু প্রজানাং; সংগচ্ছন্তাং পার্থিবাঃ প্রীতিমন্তঃ
পিতা পুত্রং মাতুলং ভাগিনেয়ো; ভ্রাতা চৈব ভ্রাতরং প্রৈতু রাজন্
116.50
ন চেদেবং প্রাপ্তকালং বচো মে; মোহাবিষ্টঃ প্রতিপত্স্যস্যবুদ্ধ্যা
ভীষ্মস্যান্তাদেতদন্তাঃ স্থ সর্বে; সত্যামেতাং ভারতীমীরয়ামি
116.51
এতদ্বাক্যং সৌহৃদাদাপগেয়ো; মধ্যে রাজ্ঞাং ভারতং শ্রাবয়িত্বা
তূষ্ণীমাসীচ্ছল্যসংতপ্তমর্মা; যত্বাত্মানং বেদনাং সংনিগৃহ্য