Utshovঅধ্যায় 117
117.1
সংজয় উবাচ
ততস্তে পার্থিবাঃ সর্বে জগ্মুঃ স্বানালয়ান্পুনঃ
তূষ্ণীংভূতে মহারাজ ভীষ্মে শংতনুনন্দনে
117.2
শ্রুত্বা তু নিহতং ভীষ্মং রাধেয়ঃ পুরুষর্ষভঃ
ঈষদাগতসংত্রাসঃ ত্বরয়োপজগাম হ
117.3
স দদর্শ মহাত্মানং শরতল্পগতং তদা
জন্মশয্যাগতং দেবং কার্ত্তিকেয়মিব প্রভুম্
117.4
নিমীলিতাক্ষং তং বীরং সাশ্রুকণ্ঠস্তদা বৃষঃ
অভ্যেত্য পাদয়োস্তস্য নিপপাত মহাদ্যুতিঃ
117.5
রাধেয়োঽহং কুরুশ্রেষ্ঠ নিত্যং চাক্ষিগতস্তব
দ্বেষ্যোঽত্যন্তমনাগাঃ সন্নিতি চৈনমুবাচ হ
117.6
তচ্ছ্রুত্বা কুরুবৃদ্ধঃ স বলাত্সংবৃত্তলোচনঃ
শনৈরুদ্বীক্ষ্য সস্নেহমিদং বচনমব্রবীৎ
117.7
রহিতং ধিষ্ণ্যমালোক্য সমুত্সার্য চ রক্ষিণঃ
পিতেব পুত্রং গাঙ্গেয়ঃ পরিষ্বজ্যৈকবাহুনা
117.8
এহ্যেহি মে বিপ্রতীপ স্পর্ধসে ত্বং ময়া সহ
যদি মাং নাভিগচ্ছেথা ন তে শ্রেয়ো ভবেদ্ধ্রুবম্
117.9
কৌন্তেয়স্ত্বং ন রাধেয়ো বিদিতো নারদান্মম
কৃষ্ণদ্বৈপায়নাচ্চৈব কেশবাচ্চ ন সংশয়ঃ
117.10
ন চ দ্বেষোঽস্তি মে তাত ত্বয়ি সত্যং ব্রবীমি তে
তেজোবধনিমিত্তং তু পরুষাণ্যহমুক্তবান্
117.11
অকস্মাত্পাণ্ডবান্হি ত্বং দ্বিষসীতি মতির্মম
যেনাসি বহুশো রূক্ষং চোদিতঃ সূর্যনন্দন
117.12
জানামি সমরে বীর্যং শত্রুভির্দুঃসহং তব
ব্রহ্মণ্যতাং চ শৌর্যং চ দানে চ পরমাং গতিম্
117.13
ন ত্বয়া সদৃশঃ কশ্চিত্পুরুষেষ্বমরোপম
কুলভেদং চ মত্বাহং সদা পরুষমুক্তবান্
117.14
ইষ্বস্ত্রে ভারসংধানে লাঘবেঽস্ত্রবলে তথা
সদৃশঃ ফল্গুনেনাসি কৃষ্ণেন চ মহাত্মনা
117.15
কর্ণ রাজপুরং গত্বা ত্বয়ৈকেন ধনুষ্মতা
তস্যার্থে কুরুরাজস্য রাজানো মৃদিতা যুধি
117.16
তথা চ বলবান্রাজা জরাসংধো দুরাসদঃ
সমরে সমরশ্লাঘী ত্বয়া ন সদৃশোঽভবৎ
117.17
ব্রহ্মণ্যঃ সত্যবাদী চ তেজসার্ক ইবাপরঃ
দেবগর্ভোঽজিতঃ সংখ্যে মনুষ্যৈরধিকো ভুবি
117.18
ব্যপনীতোঽদ্য মন্যুর্মে যস্ত্বাং প্রতি পুরা কৃতঃ
দৈবং পুরুষকারেণ ন শক্যমতিবর্তিতুম্
117.19
সোদর্যাঃ পাণ্ডবা বীরা ভ্রাতরস্তেঽরিসূদন
সংগচ্ছ তৈর্মহাবাহো মম চেদিচ্ছসি প্রিয়ম্
117.20
ময়া ভবতু নির্বৃত্তং বৈরমাদিত্যনন্দন
পৃথিব্যাং সর্বরাজানো ভবন্ত্বদ্য নিরাময়াঃ
117.21
কর্ণ উবাচ
জানাম্যহং মহাপ্রাজ্ঞ সর্বমেতন্ন সংশয়ঃ
যথা বদসি দুর্ধর্ষ কৌন্তেয়োঽহং ন সূতজঃ
117.22
অবকীর্ণস্ত্বহং কুন্ত্যা সূতেন চ বিবর্ধিতঃ
ভুক্ত্বা দুর্যোধনৈশ্বর্যং ন মিথ্যা কর্তুমুত্সহে
117.23
বসু চৈব শরীরং চ যদুদারং তথা যশঃ
সর্বং দুর্যোধনস্যার্থে ত্যক্তং মে ভূরিদক্ষিণ
কোপিতাঃ পাণ্ডবা নিত্যং ময়াশ্রিত্য সুয়োধনম্
117.24
অবশ্যভাবী বৈ যোঽর্থো ন স শক্যো নিবর্তিতুম্
দৈবং পুরুষকারেণ কো নিবর্তিতুমুত্সহেৎ
117.25
পৃথিবীক্ষয়শংসীনি নিমিত্তানি পিতামহ
ভবদ্ভিরুপলব্ধানি কথিতানি চ সংসদি
117.26
পাণ্ডবা বাসুদেবশ্চ বিদিতা মম সর্বশঃ
অজেয়াঃ পুরুষৈরন্যৈরিতি তাংশ্চোত্সহামহে
117.27
অনুজানীষ্ব মাং তাত যুদ্ধে প্রীতমনাঃ সদা
অনুজ্ঞাতস্ত্বয়া বীর যুধ্যেয়মিতি মে মতিঃ
117.28
দুরুক্তং বিপ্রতীপং বা সংরম্ভাচ্চাপলাত্তথা
যন্ময়াপকৃতং কিংচিত্তদনুক্ষন্তুমর্হসি
117.29
ভীষ্ম উবাচ
ন চেচ্ছক্যমথোত্স্রষ্টুং বৈরমেতত্সুদারুণম্
অনুজানামি কর্ণ ত্বাং যুধ্যস্ব স্বর্গকাম্যয়া
117.30
বিমন্যুর্গতসংরম্ভঃ কুরু কর্ম নৃপস্য হি
যথাশক্তি যথোত্সাহং সতাং বৃত্তেষু বৃত্তবান্
117.31
অহং ত্বামনুজানামি যদিচ্ছসি তদাপ্নুহি
ক্ষত্রধর্মজিতাঁল্লোকান্সংপ্রাপ্স্যসি ন সংশয়ঃ
117.32
যুধ্যস্ব নিরহংকারো বলবীর্যব্যপাশ্রয়ঃ
ধর্মো হি যুদ্ধাচ্ছ্রেয়োঽন্যত্ক্ষত্রিয়স্য ন বিদ্যতে
117.33
প্রশমে হি কৃতো যত্নঃ সুচিরাত্সুচিরং ময়া
ন চৈব শকিতঃ কর্তুং যতো ধর্মস্ততো জয়ঃ
117.34
সংজয় উবাচ
এবং ব্রুবন্তং গাঙ্গেয়মভিবাদ্য প্রসাদ্য চ
রাধেয়ো রথমারুহ্য প্রায়াত্তব সুতং প্রতি