UtshovChapter 117
117.1
संजय उवाच
ततस्ते पार्थिवाः सर्वे जग्मुः स्वानालयान्पुनः
तूष्णींभूते महाराज भीष्मे शंतनुनन्दने
Sanjaya uvacha
Tataste parthivah sarve jagmuh svanalayanpunah
Tushnimbhute maharaja bhishme shantanunandane
117.2
श्रुत्वा तु निहतं भीष्मं राधेयः पुरुषर्षभः
ईषदागतसंत्रासः त्वरयोपजगाम ह
Shrutva tu nihatam bhishmam radheyah purusharshabhah
Ishadagatasantrasah tvarayopajagama ha
117.3
स ददर्श महात्मानं शरतल्पगतं तदा
जन्मशय्यागतं देवं कार्त्तिकेयमिव प्रभुम्
Sa dadarsha mahatmanam sharatalpagatam tada
Janmashayyagatam devam karttikeyamiva prabhum
117.4
निमीलिताक्षं तं वीरं साश्रुकण्ठस्तदा वृषः
अभ्येत्य पादयोस्तस्य निपपात महाद्युतिः
Nimilitaksham tam viram sashrukanthastada vrishah
Abhyetya padayostasya nipapata mahadyutih
117.5
राधेयोऽहं कुरुश्रेष्ठ नित्यं चाक्षिगतस्तव
द्वेष्योऽत्यन्तमनागाः सन्निति चैनमुवाच ह
Radheyoham kurushreshtha nityam chakshigatastava
Dveshyotyantamanagah sanniti chainamuvacha ha
117.6
तच्छ्रुत्वा कुरुवृद्धः स बलात्संवृत्तलोचनः
शनैरुद्वीक्ष्य सस्नेहमिदं वचनमब्रवीत्
Tachchhrutva kuruvriddhah sa balatsanvrittalochanah
Shanairudvikshya sasnehamidam vachanamabravit
117.7
रहितं धिष्ण्यमालोक्य समुत्सार्य च रक्षिणः
पितेव पुत्रं गाङ्गेयः परिष्वज्यैकबाहुना
Rahitam dhishnyamalokya samutsarya cha rakshinah
Piteva putram gangeyah parishvajyaikabahuna
117.8
एह्येहि मे विप्रतीप स्पर्धसे त्वं मया सह
यदि मां नाभिगच्छेथा न ते श्रेयो भवेद्ध्रुवम्
Ehyehi me vipratipa spardhase tvam maya saha
Yadi mam nabhigachchhetha na te shreyo bhaveddhruvam
117.9
कौन्तेयस्त्वं न राधेयो विदितो नारदान्मम
कृष्णद्वैपायनाच्चैव केशवाच्च न संशयः
Kaunteyastvam na radheyo vidito naradanmama
Krishnadvaipayanachchaiva keshavachcha na sanshayah
117.10
न च द्वेषोऽस्ति मे तात त्वयि सत्यं ब्रवीमि ते
तेजोवधनिमित्तं तु परुषाण्यहमुक्तवान्
Na cha dveshosti me tata tvayi satyam bravimi te
Tejovadhanimittam tu parushanyahamuktavan
117.11
अकस्मात्पाण्डवान्हि त्वं द्विषसीति मतिर्मम
येनासि बहुशो रूक्षं चोदितः सूर्यनन्दन
Akasmatpandavanhi tvam dvishasiti matirmama
Yenasi bahusho ruksham choditah suryanandana
117.12
जानामि समरे वीर्यं शत्रुभिर्दुःसहं तव
ब्रह्मण्यतां च शौर्यं च दाने च परमां गतिम्
Janami samare viryam shatrubhirduhsaham tava
Brahmanyatam cha shauryam cha dane cha paramam gatim
117.13
न त्वया सदृशः कश्चित्पुरुषेष्वमरोपम
कुलभेदं च मत्वाहं सदा परुषमुक्तवान्
Na tvaya sadrishah kashchitpurusheshvamaropama
Kulabhedam cha matvaham sada parushamuktavan
117.14
इष्वस्त्रे भारसंधाने लाघवेऽस्त्रबले तथा
सदृशः फल्गुनेनासि कृष्णेन च महात्मना
Ishvastre bharasandhane laghavestrabale tatha
Sadrishah phalgunenasi krishnena cha mahatmana
117.15
कर्ण राजपुरं गत्वा त्वयैकेन धनुष्मता
तस्यार्थे कुरुराजस्य राजानो मृदिता युधि
Karna rajapuram gatva tvayaikena dhanushmata
Tasyarthe kururajasya rajano mridita yudhi
117.16
तथा च बलवान्राजा जरासंधो दुरासदः
समरे समरश्लाघी त्वया न सदृशोऽभवत्
Tatha cha balavanraja jarasandho durasadah
Samare samarashlaghi tvaya na sadrishobhavat
117.17
ब्रह्मण्यः सत्यवादी च तेजसार्क इवापरः
देवगर्भोऽजितः संख्ये मनुष्यैरधिको भुवि
Brahmanyah satyavadi cha tejasarka ivaparah
Devagarbhojitah sankhye manushyairadhiko bhuvi
117.18
व्यपनीतोऽद्य मन्युर्मे यस्त्वां प्रति पुरा कृतः
दैवं पुरुषकारेण न शक्यमतिवर्तितुम्
Vyapanitodya manyurme yastvam prati pura kritah
Daivam purushakarena na shakyamativartitum
117.19
सोदर्याः पाण्डवा वीरा भ्रातरस्तेऽरिसूदन
संगच्छ तैर्महाबाहो मम चेदिच्छसि प्रियम्
Sodaryah pandava vira bhratarasterisudana
Sangachchha tairmahabaho mama chedichchhasi priyam
117.20
मया भवतु निर्वृत्तं वैरमादित्यनन्दन
पृथिव्यां सर्वराजानो भवन्त्वद्य निरामयाः
Maya bhavatu nirvrittam vairamadityanandana
Prithivyam sarvarajano bhavantvadya niramayah
117.21
कर्ण उवाच
जानाम्यहं महाप्राज्ञ सर्वमेतन्न संशयः
यथा वदसि दुर्धर्ष कौन्तेयोऽहं न सूतजः
Karna uvacha
Janamyaham mahapragya sarvametanna sanshayah
Yatha vadasi durdharsha kaunteyoham na sutajah
117.22
अवकीर्णस्त्वहं कुन्त्या सूतेन च विवर्धितः
भुक्त्वा दुर्योधनैश्वर्यं न मिथ्या कर्तुमुत्सहे
Avakirnastvaham kuntya sutena cha vivardhitah
Bhuktva duryodhanaishvaryam na mithya kartumutsahe
117.23
वसु चैव शरीरं च यदुदारं तथा यशः
सर्वं दुर्योधनस्यार्थे त्यक्तं मे भूरिदक्षिण
कोपिताः पाण्डवा नित्यं मयाश्रित्य सुयोधनम्
Vasu chaiva shariram cha yadudaram tatha yashah
Sarvam duryodhanasyarthe tyaktam me bhuridakshina
Kopitah pandava nityam mayashritya suyodhanam
117.24
अवश्यभावी वै योऽर्थो न स शक्यो निवर्तितुम्
दैवं पुरुषकारेण को निवर्तितुमुत्सहेत्
Avashyabhavi vai yortho na sa shakyo nivartitum
Daivam purushakarena ko nivartitumutsahet
117.25
पृथिवीक्षयशंसीनि निमित्तानि पितामह
भवद्भिरुपलब्धानि कथितानि च संसदि
Prithivikshayashansini nimittani pitamaha
Bhavadbhirupalabdhani kathitani cha sansadi
117.26
पाण्डवा वासुदेवश्च विदिता मम सर्वशः
अजेयाः पुरुषैरन्यैरिति तांश्चोत्सहामहे
Pandava vasudevashcha vidita mama sarvashah
Ajeyah purushairanyairiti tanshchotsahamahe
117.27
अनुजानीष्व मां तात युद्धे प्रीतमनाः सदा
अनुज्ञातस्त्वया वीर युध्येयमिति मे मतिः
Anujanishva mam tata yuddhe pritamanah sada
Anugyatastvaya vira yudhyeyamiti me matih
117.28
दुरुक्तं विप्रतीपं वा संरम्भाच्चापलात्तथा
यन्मयापकृतं किंचित्तदनुक्षन्तुमर्हसि
Duruktam vipratipam va sanrambhachchapalattatha
Yanmayapakritam kinchittadanukshantumarhasi
117.29
भीष्म उवाच
न चेच्छक्यमथोत्स्रष्टुं वैरमेतत्सुदारुणम्
अनुजानामि कर्ण त्वां युध्यस्व स्वर्गकाम्यया
Bhishma uvacha
Na chechchhakyamathotsrashtum vairametatsudarunam
Anujanami karna tvam yudhyasva svargakamyaya
117.30
विमन्युर्गतसंरम्भः कुरु कर्म नृपस्य हि
यथाशक्ति यथोत्साहं सतां वृत्तेषु वृत्तवान्
Vimanyurgatasanrambhah kuru karma nripasya hi
Yathashakti yathotsaham satam vritteshu vrittavan
117.31
अहं त्वामनुजानामि यदिच्छसि तदाप्नुहि
क्षत्रधर्मजिताँल्लोकान्संप्राप्स्यसि न संशयः
Aham tvamanujanami yadichchhasi tadapnuhi
Kshatradharmajitanllokansamprapsyasi na sanshayah
117.32
युध्यस्व निरहंकारो बलवीर्यव्यपाश्रयः
धर्मो हि युद्धाच्छ्रेयोऽन्यत्क्षत्रियस्य न विद्यते
Yudhyasva nirahankaro balaviryavyapashrayah
Dharmo hi yuddhachchhreyonyatkshatriyasya na vidyate
117.33
प्रशमे हि कृतो यत्नः सुचिरात्सुचिरं मया
न चैव शकितः कर्तुं यतो धर्मस्ततो जयः
Prashame hi krito yatnah suchiratsuchiram maya
Na chaiva shakitah kartum yato dharmastato jayah
117.34
संजय उवाच
एवं ब्रुवन्तं गाङ्गेयमभिवाद्य प्रसाद्य च
राधेयो रथमारुह्य प्रायात्तव सुतं प्रति
Sanjaya uvacha
Evam bruvantam gangeyamabhivadya prasadya cha
Radheyo rathamaruhya prayattava sutam prati