অধ্যায় 9

9.1

ধৃতরাষ্ট্র উবাচ
বর্ষাণাং চৈব নামানি পর্বতানাং চ সংজয়
আচক্ষ্ব মে যথাতত্ত্বং যে চ পর্বতবাসিনঃ

সংজয় উবাচ
দক্ষিণেন তু শ্বেতস্য নীলস্যৈবোত্তরেণ তু
বর্ষং রমণকং নাম জায়ন্তে তত্র মানবাঃ

শুক্লাভিজনসংপন্নাঃ সর্বে সুপ্রিয়দর্শনাঃ
রতিপ্রধানাশ্চ তথা জায়ন্তে তত্র মানবাঃ

দশ বর্ষসহস্রাণি শতানি দশ পঞ্চ চ
জীবন্তি তে মহারাজ নিত্যং মুদিতমানসাঃ

দক্ষিণে শৃঙ্গিণশ্চৈব শ্বেতস্যাথোত্তরেণ চ
বর্ষং হৈরণ্বতং নাম যত্র হৈরণ্বতী নদী

যক্ষানুগা মহারাজ ধনিনঃ প্রিয়দর্শনাঃ
মহাবলাস্তত্র সদা রাজন্মুদিতমানসাঃ

একাদশ সহস্রাণি বর্ষাণাং তে জনাধিপ
আয়ুষ্প্রমাণং জীবন্তি শতানি দশ পঞ্চ চ

শৃঙ্গাণি বৈ শৃঙ্গবতস্ত্রীণ্যেব মনুজাধিপ
একং মণিময়ং তত্র তথৈকং রৌক্মমদ্ভুতম্

সর্বরত্নময়ং চৈকং ভবনৈরুপশোভিতম্
তত্র স্বয়ংপ্রভা দেবী নিত্যং বসতি শাণ্ডিলী

উত্তরেণ তু শৃঙ্গস্য সমুদ্রান্তে জনাধিপ
বর্ষমৈরাবতং নাম তস্মাচ্ছৃঙ্গবতঃ পরম্

ন তত্র সূর্যস্তপতি ন তে জীর্যন্তি মানবাঃ
চন্দ্রমাশ্চ সনক্ষত্রো জ্যোতির্ভূত ইবাবৃতঃ

পদ্মপ্রভাঃ পদ্মবর্ণাঃ পদ্মপত্রনিভেক্ষণাঃ
পদ্মপত্রসুগন্ধাশ্চ জায়ন্তে তত্র মানবাঃ

অনিষ্পন্দাঃ সুগন্ধাশ্চ নিরাহারা জিতেন্দ্রিয়াঃ
দেবলোকচ্যুতাঃ সর্বে তথা বিরজসো নৃপ

ত্রয়োদশ সহস্রাণি বর্ষাণাং তে জনাধিপ
আয়ুষ্প্রমাণং জীবন্তি নরা ভরতসত্তম

ক্ষীরোদস্য সমুদ্রস্য তথৈবোত্তরতঃ প্রভুঃ
হরির্বসতি বৈকুণ্ঠঃ শকটে কনকাত্মকে

অষ্টচক্রং হি তদ্যানং ভূতয়ুক্তং মনোজবম্
অগ্নিবর্ণং মহাবেগং জাম্বূনদপরিষ্কৃতম্

স প্রভুঃ সর্বভূতানাং বিভুশ্চ ভরতর্ষভ
সংক্ষেপো বিস্তরশ্চৈব কর্তা কারয়িতা চ সঃ

পৃথিব্যাপস্তথাকাশং বায়ুস্তেজশ্চ পার্থিব
স যজ্ঞঃ সর্বভূতানামাস্যং তস্য হুতাশনঃ

বৈশংপায়ন উবাচ
এবমুক্তঃ সংজয়েন ধৃতরাষ্ট্রো মহামনাঃ
ধ্যানমন্বগমদ্রাজা পুত্রান্প্রতি জনাধিপ

স বিচিন্ত্য মহারাজ পুনরেবাব্রবীদ্বচঃ
অসংশয়ং সূতপুত্র কালঃ সংক্ষিপতে জগৎ
সৃজতে চ পুনঃ সর্বং নেহ বিদ্যতি শাশ্বতম্

নরো নারায়ণশ্চৈব সর্বজ্ঞঃ সর্বভূতভৃৎ
দেবা বৈকুণ্ঠ ইত্যাহুর্বেদা বিষ্ণুরিতি প্রভুম্