Utshovঅধ্যায় 8
8.1
ধৃতরাষ্ট্র উবাচ
মেরোরথোত্তরং পার্শ্বং পূর্বং চাচক্ষ্ব সংজয়
নিখিলেন মহাবুদ্ধে মাল্যবন্তং চ পর্বতম্
8.2
সংজয় উবাচ
দক্ষিণেন তু নীলস্য মেরোঃ পার্শ্বে তথোত্তরে
উত্তরাঃ কুরবো রাজন্পুণ্যাঃ সিদ্ধনিষেবিতাঃ
8.3
তত্র বৃক্ষা মধুফলা নিত্যপুষ্পফলোপগাঃ
পুষ্পাণি চ সুগন্ধীনি রসবন্তি ফলানি চ
8.4
সর্বকামফলাস্তত্র কেচিদ্বৃক্ষা জনাধিপ
অপরে ক্ষীরিণো নাম বৃক্ষাস্তত্র নরাধিপ
8.5
যে ক্ষরন্তি সদা ক্ষীরং ষড্রসং হ্যমৃতোপমম্
বস্ত্রাণি চ প্রসূয়ন্তে ফলেষ্বাভরণানি চ
8.6
সর্বা মণিময়ী ভূমিঃ সূক্ষ্মকাঞ্চনবালুকা
সর্বত্র সুখসংস্পর্শা নিষ্পঙ্কা চ জনাধিপ
8.7
দেবলোকচ্যুতাঃ সর্বে জায়ন্তে তত্র মানবাঃ
তুল্যরূপগুণোপেতাঃ সমেষু বিষমেষু চ
8.8
মিথুনানি চ জায়ন্তে স্ত্রিয়শ্চাপ্সরসোপমাঃ
তেষাং তে ক্ষীরিণাং ক্ষীরং পিবন্ত্যমৃতসংনিভম্
8.9
মিথুনং জায়মানং বৈ সমং তচ্চ প্রবর্ধতে
তুল্যরূপগুণোপেতং সমবেষং তথৈব চ
একৈকমনুরক্তং চ চক্রবাকসমং বিভো
8.10
নিরাময়া বীতশোকা নিত্যং মুদিতমানসাঃ
দশ বর্ষসহস্রাণি দশ বর্ষশতানি চ
জীবন্তি তে মহারাজ ন চান্যোন্যং জহত্যুত
8.11
ভারুণ্ডা নাম শকুনাস্তীক্ষ্ণতুণ্ডা মহাবলাঃ
তে নির্হরন্তি হি মৃতান্দরীষু প্রক্ষিপন্তি চ
8.12
উত্তরাঃ কুরবো রাজন্ব্যাখ্যাতাস্তে সমাসতঃ
মেরোঃ পার্শ্বমহং পূর্বং বক্ষ্যাম্যথ যথাতথম্
8.13
তস্য পূর্বাভিষেকস্তু ভদ্রাশ্বস্য বিশাং পতে
ভদ্রসালবনং যত্র কালাম্রশ্চ মহাদ্রুমঃ
8.14
কালাম্রশ্চ মহারাজ নিত্যপুষ্পফলঃ শুভঃ
দ্বীপশ্চ যোজনোত্সেধঃ সিদ্ধচারণসেবিতঃ
8.15
তত্র তে পুরুষাঃ শ্বেতাস্তেজোয়ুক্তা মহাবলাঃ
স্ত্রিয়ঃ কুমুদবর্ণাশ্চ সুন্দর্যঃ প্রিয়দর্শনাঃ
8.16
চন্দ্রপ্রভাশ্চন্দ্রবর্ণাঃ পূর্ণচন্দ্রনিভাননাঃ
চন্দ্রশীতলগাত্র্যশ্চ নৃত্তগীতবিশারদাঃ
8.17
দশ বর্ষসহস্রাণি তত্রায়ুর্ভরতর্ষভ
কালাম্ররসপীতাস্তে নিত্যং সংস্থিতয়ৌবনাঃ
8.18
দক্ষিণেন তু নীলস্য নিষধস্যোত্তরেণ তু
সুদর্শনো নাম মহাঞ্জম্বূবৃক্ষঃ সনাতনঃ
8.19
সর্বকামফলঃ পুণ্যঃ সিদ্ধচারণসেবিতঃ
তস্য নাম্না সমাখ্যাতো জম্বূদ্বীপঃ সনাতনঃ
8.20
যোজনানাং সহস্রং চ শতং চ ভরতর্ষভ
উত্সেধো বৃক্ষরাজস্য দিবস্পৃঙ্মনুজেশ্বর
8.21
অরত্নীনাং সহস্রং চ শতানি দশ পঞ্চ চ
পরিণাহস্তু বৃক্ষস্য ফলানাং রসভেদিনাম্
8.22
পতমানানি তান্যুর্ব্যাং কুর্বন্তি বিপুলং স্বনম্
মুঞ্চন্তি চ রসং রাজংস্তস্মিন্রজতসংনিভম্
8.23
তস্যা জম্ব্বাঃ ফলরসো নদী ভূত্বা জনাধিপ
মেরুং প্রদক্ষিণং কৃত্বা সংপ্রয়াত্যুত্তরান্কুরূন্
8.24
পিবন্তি তদ্রসং হৃষ্টা জনা নিত্যং জনাধিপ
তস্মিন্ফলরসে পীতে ন জরা বাধতে চ তান্
8.25
তত্র জাম্বূনদং নাম কনকং দেবভূষণম্
তরুণাদিত্যবর্ণাশ্চ জায়ন্তে তত্র মানবাঃ
8.26
তথা মাল্যবতঃ শৃঙ্গে দীপ্যতে তত্র হব্যবাট্
নাম্না সংবর্তকো নাম কালাগ্নির্ভরতর্ষভ
8.27
তথা মাল্যবতঃ শৃঙ্গে পূর্বে পূর্বান্তগণ্ডিকা
যোজনানাং সহস্রাণি পঞ্চাশন্মাল্যবান্স্থিতঃ
8.28
মহারজতসংকাশা জায়ন্তে তত্র মানবাঃ
ব্রহ্মলোকাচ্চ্যুতাঃ সর্বে সর্বে চ ব্রহ্মবাদিনঃ
8.29
তপস্তু তপ্যমানাস্তে ভবন্তি হ্যূর্ধ্বরেতসঃ
রক্ষণার্থং তু ভূতানাং প্রবিশন্তি দিবাকরম্
8.30
ষষ্টিস্তানি সহস্রাণি ষষ্টিরেব শতানি চ
অরুণস্যাগ্রতো যান্তি পরিবার্য দিবাকরম্
8.31
ষষ্টিং বর্ষসহস্রাণি ষষ্টিমেব শতানি চ
আদিত্যতাপতপ্তাস্তে বিশন্তি শশিমণ্ডলম্