Utshovঅধ্যায় 7
7.1
ধৃতরাষ্ট্র উবাচ
উক্তো দ্বীপস্য সংক্ষেপো বিস্তরং ব্রূহি সংজয়
যাবদ্ভূম্যবকাশোঽয়ং দৃশ্যতে শশলক্ষণে
তস্য প্রমাণং প্রব্রূহি ততো বক্ষ্যসি পিপ্পলম্
7.2
বৈশংপায়ন উবাচ
এবমুক্তঃ স রাজ্ঞা তু সংজয়ো বাক্যমব্রবীৎ
প্রাগায়তা মহারাজ ষডেতে রত্নপর্বতাঃ
অবগাঢা হ্যুভয়তঃ সমুদ্রৌ পূর্বপশ্চিমৌ
7.3
হিমবান্হেমকূটশ্চ নিষধশ্চ নগোত্তমঃ
নীলশ্চ বৈডূর্যময়ঃ শ্বেতশ্চ রজতপ্রভঃ
সর্বধাতুবিনদ্ধশ্চ শৃঙ্গবান্নাম পর্বতঃ
7.4
এতে বৈ পর্বতা রাজন্সিদ্ধচারণসেবিতাঃ
তেষামন্তরবিষ্কম্ভো যোজনানি সহস্রশঃ
7.5
তত্র পুণ্যা জনপদাস্তানি বর্ষাণি ভারত
বসন্তি তেষু সত্ত্বানি নানাজাতীনি সর্বশঃ
7.6
ইদং তু ভারতং বর্ষং ততো হৈমবতং পরম্
হেমকূটাত্পরং চৈব হরিবর্ষং প্রচক্ষতে
7.7
দক্ষিণেন তু নীলস্য নিষধস্যোত্তরেণ চ
প্রাগায়তো মহারাজ মাল্যবান্নাম পর্বতঃ
7.8
ততঃ পরং মাল্যবতঃ পর্বতো গন্ধমাদনঃ
পরিমণ্ডলস্তয়োর্মধ্যে মেরুঃ কনকপর্বতঃ
7.9
আদিত্যতরুণাভাসো বিধূম ইব পাবকঃ
যোজনানাং সহস্রাণি ষোডশাধঃ কিল স্মৃতঃ
7.10
উচ্চৈশ্চ চতুরাশীতির্যোজনানাং মহীপতে
ঊর্ধ্বমন্তশ্চ তির্যক্চ লোকানাবৃত্য তিষ্ঠতি
7.11
তস্য পার্শ্বে ত্বিমে দ্বীপাশ্চত্বারঃ সংস্থিতাঃ প্রভো
ভদ্রাশ্বঃ কেতুমালশ্চ জম্বূদ্বীপশ্চ ভারত
উত্তরাশ্চৈব কুরবঃ কৃতপুণ্যপ্রতিশ্রয়াঃ
7.12
বিহগঃ সুমুখো যত্র সুপর্ণস্যাত্মজঃ কিল
স বৈ বিচিন্তয়ামাস সৌবর্ণান্প্রেক্ষ্য বায়সান্
7.13
মেরুরুত্তমমধ্যানামধমানাং চ পক্ষিণাম্
অবিশেষকরো যস্মাত্তস্মাদেনং ত্যজাম্যহম্
7.14
তমাদিত্যোঽনুপর্যেতি সততং জ্যোতিষাং পতিঃ
চন্দ্রমাশ্চ সনক্ষত্রো বায়ুশ্চৈব প্রদক্ষিণম্
7.15
স পর্বতো মহারাজ দিব্যপুষ্পফলান্বিতঃ
ভবনৈরাবৃতঃ সর্বৈর্জাম্বূনদময়ৈঃ শুভৈঃ
7.16
তত্র দেবগণা রাজন্গন্ধর্বাসুররাক্ষসাঃ
অপ্সরোগণসংয়ুক্তাঃ শৈলে ক্রীডন্তি নিত্যশঃ
7.17
তত্র ব্রহ্মা চ রুদ্রশ্চ শক্রশ্চাপি সুরেশ্বরঃ
সমেত্য বিবিধৈর্যজ্ঞৈর্যজন্তেঽনেকদক্ষিণৈঃ
7.18
তুম্বুরুর্নারদশ্চৈব বিশ্বাবসুর্হহা হুহূঃ
অভিগম্যামরশ্রেষ্ঠাঃ স্তবৈ স্তুন্বন্তি চাভিভো
7.19
সপ্তর্ষয়ো মহাত্মানঃ কশ্যপশ্চ প্রজাপতিঃ
তত্র গচ্ছন্তি ভদ্রং তে সদা পর্বণি পর্বণি
7.20
তস্যৈব মূর্ধন্যুশনাঃ কাব্যো দৈত্যৈর্মহীপতে
তস্য হীমানি রত্নানি তস্যেমে রত্নপর্বতাঃ
7.21
তস্মাত্কুবেরো ভগবাংশ্চতুর্থং ভাগমশ্নুতে
ততঃ কলাংশং বিত্তস্য মনুষ্যেভ্যঃ প্রয়চ্ছতি
7.22
পার্শ্বে তস্যোত্তরে দিব্যং সর্বর্তুকুসুমং শিবম্
কর্ণিকারবনং রম্যং শিলাজালসমুদ্গতম্
7.23
তত্র সাক্ষাত্পশুপতির্দিব্যৈর্ভূতৈঃ সমাবৃতঃ
উমাসহায়ো ভগবান্রমতে ভূতভাবনঃ
7.24
কর্ণিকারময়ীং মালাং বিভ্রত্পাদাবলম্বিনীম্
ত্রিভির্নেত্রৈঃ কৃতোদ্দ্যোতস্ত্রিভিঃ সূর্যৈরিবোদিতৈঃ
7.25
তমুগ্রতপসঃ সিদ্ধাঃ সুব্রতাঃ সত্যবাদিনঃ
পশ্যন্তি ন হি দুর্বৃত্তৈঃ শক্যো দ্রষ্টুং মহেশ্বরঃ
7.26
তস্য শৈলস্য শিখরাত্ক্ষীরধারা নরেশ্বর
ত্রিংশদ্বাহুপরিগ্রাহ্যা ভীমনির্ঘাতনিস্বনা
7.27
পুণ্যা পুণ্যতমৈর্জুষ্টা গঙ্গা ভাগীরথী শুভা
পতত্যজস্রবেগেন হ্রদে চান্দ্রমসে শুভে
তয়া হ্যুত্পাদিতঃ পুণ্যঃ স হ্রদঃ সাগরোপমঃ
7.28
তাং ধারয়ামাস পুরা দুর্ধরাং পর্বতৈরপি
শতং বর্ষসহস্রাণাং শিরসা বৈ মহেশ্বরঃ
7.29
মেরোস্তু পশ্চিমে পার্শ্বে কেতুমালো মহীপতে
জম্বূষণ্ডশ্চ তত্রৈব সুমহান্নন্দনোপমঃ
7.30
আয়ুর্দশ সহস্রাণি বর্ষাণাং তত্র ভারত
সুবর্ণবর্ণাশ্চ নরাঃ স্ত্রিয়শ্চাপ্সরসোপমাঃ
7.31
অনাময়া বীতশোকা নিত্যং মুদিতমানসাঃ
জায়ন্তে মানবাস্তত্র নিষ্টপ্তকনকপ্রভাঃ
7.32
গন্ধমাদনশৃঙ্গেষু কুবেরঃ সহ রাক্ষসৈঃ
সংবৃতোঽপ্সরসাং সংঘৈর্মোদতে গুহ্যকাধিপঃ
7.33
গন্ধমাদনপাদেষু পরেষ্বপরগণ্ডিকাঃ
একাদশ সহস্রাণি বর্ষাণাং পরমায়ুষঃ
7.34
তত্র কৃষ্ণা নরা রাজংস্তেজোয়ুক্তা মহাবলাঃ
স্ত্রিয়শ্চোত্পলপত্রাভাঃ সর্বাঃ সুপ্রিয়দর্শনাঃ
7.35
নীলাত্পরতরং শ্বেতং শ্বেতাদ্ধৈরণ্যকং পরম্
বর্ষমৈরাবতং নাম ততঃ শৃঙ্গবতঃ পরম্
7.36
ধনুঃসংস্থে মহারাজ দ্বে বর্ষে দক্ষিণোত্তরে
ইলাবৃতং মধ্যমং তু পঞ্চ বর্ষাণি চৈব হ
7.37
উত্তরোত্তরমেতেভ্যো বর্ষমুদ্রিচ্যতে গুণৈঃ
আয়ুষ্প্রমাণমারোগ্যং ধর্মতঃ কামতোঽর্থতঃ
7.38
সমন্বিতানি ভূতানি তেষু বর্ষেষু ভারত
এবমেষা মহারাজ পর্বতৈঃ পৃথিবী চিতা
7.39
হেমকূটস্তু সুমহান্কৈলাসো নাম পর্বতঃ
যত্র বৈশ্রবণো রাজা গুহ্যকৈঃ সহ মোদতে
7.40
অস্ত্যুত্তরেণ কৈলাসং মৈনাকং পর্বতং প্রতি
হিরণ্যশৃঙ্গঃ সুমহান্দিব্যো মণিময়ো গিরিঃ
7.41
তস্য পার্শ্বে মহদ্দিব্যং শুভং কাঞ্চনবালুকম্
রম্যং বিন্দুসরো নাম যত্র রাজা ভগীরথঃ
দৃষ্ট্বা ভাগীরথীং গঙ্গামুবাস বহুলাঃ সমাঃ
7.42
যূপা মণিময়াস্তত্র চিত্যাশ্চাপি হিরণ্ময়াঃ
তত্রেষ্ট্বা তু গতঃ সিদ্ধিং সহস্রাক্ষো মহায়শাঃ
7.43
সৃষ্ট্বা ভূতপতির্যত্র সর্বলোকান্সনাতনঃ
উপাস্যতে তিগ্মতেজা বৃতো ভূতৈঃ সমাগতৈঃ
নরনারায়ণৌ ব্রহ্মা মনুঃ স্থাণুশ্চ পঞ্চমঃ
7.44
তত্র ত্রিপথগা দেবী প্রথমং তু প্রতিষ্ঠিতা
ব্রহ্মলোকাদপক্রান্তা সপ্তধা প্রতিপদ্যতে
7.45
বস্বোকসারা নলিনী পাবনা চ সরস্বতী
জম্বূনদী চ সীতা চ গঙ্গা সিন্ধুশ্চ সপ্তমী
7.46
অচিন্ত্যা দিব্যসংকল্পা প্রভোরেষৈব সংবিধিঃ
উপাসতে যত্র সত্রং সহস্রয়ুগপর্যয়ে
7.47
দৃশ্যাদৃশ্যা চ ভবতি তত্র তত্র সরস্বতী
এতা দিব্যাঃ সপ্ত গঙ্গাস্ত্রিষু লোকেষু বিশ্রুতাঃ
7.48
রক্ষাংসি বৈ হিমবতি হেমকূটে তু গুহ্যকাঃ
সর্পা নাগাশ্চ নিষধে গোকর্ণে চ তপোধনাঃ
7.49
দেবাসুরাণাং চ গৃহং শ্বেতঃ পর্বত উচ্যতে
গন্ধর্বা নিষধে শৈলে নীলে ব্রহ্মর্ষয়ো নৃপ
শৃঙ্গবাংস্তু মহারাজ পিতৄণাং প্রতিসংচরঃ
7.50
ইত্যেতানি মহারাজ সপ্ত বর্ষাণি ভাগশঃ
ভূতান্যুপনিবিষ্টানি গতিমন্তি ধ্রুবাণি চ
7.51
তেষামৃদ্ধির্বহুবিধা দৃশ্যতে দৈবমানুষী
অশক্যা পরিসংখ্যাতুং শ্রদ্ধেয়া তু বুভূষতা
7.52
যাং তু পৃচ্ছসি মা রাজন্দিব্যামেতাং শশাকৃতিম্
পার্শ্বে শশস্য দ্বে বর্ষে উভয়ে দক্ষিণোত্তরে
কর্ণৌ তু নাগদ্বীপং চ কশ্যপদ্বীপমেব চ
7.53
তাম্রবর্ণঃ শিরো রাজঞ্শ্রীমান্মলয়পর্বতঃ
এতদ্দ্বিতীয়ং দ্বীপস্য দৃশ্যতে শশসংস্থিতম্