Utshovঅধ্যায় 10
10.1
ধৃতরাষ্ট্র উবাচ
যদিদং ভারতং বর্ষং যত্রেদং মূর্ছিতং বলম্
যত্রাতিমাত্রং লুব্ধোঽয়ং পুত্রো দুর্যোধনো মম
10.2
যত্র গৃদ্ধাঃ পাণ্ডুসুতা যত্র মে সজ্জতে মনঃ
এতন্মে তত্ত্বমাচক্ষ্ব কুশলো হ্যসি সংজয়
10.3
সংজয় উবাচ
ন তত্র পাণ্ডবা গৃদ্ধাঃ শৃণু রাজন্বচো মম
গৃদ্ধো দুর্যোধনস্তত্র শকুনিশ্চাপি সৌবলঃ
10.4
অপরে ক্ষত্রিয়াশ্চাপি নানাজনপদেশ্বরাঃ
যে গৃদ্ধা ভারতে বর্ষে ন মৃষ্যন্তি পরস্পরম্
10.5
অত্র তে বর্ণয়িষ্যামি বর্ষং ভারত ভারতম্
প্রিয়মিন্দ্রস্য দেবস্য মনোর্বৈবস্বতস্য চ
10.6
পৃথোশ্চ রাজন্বৈন্যস্য তথেক্ষ্বাকোর্মহাত্মনঃ
যয়াতেরম্বরীষস্য মান্ধাতুর্নহুষস্য চ
10.7
তথৈব মুচুকুন্দস্য শিবেরৌশীনরস্য চ
ঋষভস্য তথৈলস্য নৃগস্য নৃপতেস্তথা
10.8
অন্যেষাং চ মহারাজ ক্ষত্রিয়াণাং বলীয়সাম্
সর্বেষামেব রাজেন্দ্র প্রিয়ং ভারত ভারতম্
10.9
তত্তে বর্ষং প্রবক্ষ্যামি যথাশ্রুতমরিংদম
শৃণু মে গদতো রাজন্যন্মাং ত্বং পরিপৃচ্ছসি
10.10
মহেন্দ্রো মলয়ঃ সহ্যঃ শুক্তিমানৃক্ষবানপি
বিন্ধ্যশ্চ পারিয়াত্রশ্চ সপ্তৈতে কুলপর্বতাঃ
10.11
তেষাং সহস্রশো রাজন্পর্বতাস্তু সমীপতঃ
অভিজ্ঞাতাঃ সারবন্তো বিপুলাশ্চিত্রসানবঃ
10.12
অন্যে ততোঽপরিজ্ঞাতা হ্রস্বা হ্রস্বোপজীবিনঃ
আর্যা ম্লেচ্ছাশ্চ কৌরব্য তৈর্মিশ্রাঃ পুরুষা বিভো
10.13
নদীঃ পিবন্তি বহুলা গঙ্গাং সিন্ধুং সরস্বতীম্
গোদাবরীং নর্মদাং চ বাহুদাং চ মহানদীম্
10.14
শতদ্রুং চন্দ্রভাগাং চ যমুনাং চ মহানদীম্
দৃষদ্বতীং বিপাশাং চ বিপাপাং স্থূলবালুকাম্
10.15
নদীং বেত্রবতীং চৈব কৃষ্ণবেণাং চ নিম্নগাম্
ইরাবতীং বিতস্তাং চ পয়োষ্ণীং দেবিকামপি
10.16
বেদস্মৃতিং বেতসিনীং ত্রিদিবামিষ্কুমালিনীম্
করীষিণীং চিত্রবহাং চিত্রসেনাং চ নিম্নগাম্
10.17
গোমতীং ধূতপাপাং চ বন্দনাং চ মহানদীম্
কৌশিকীং ত্রিদিবাং কৃত্যাং বিচিত্রাং লোহতারিণীম্
10.18
রথস্থাং শতকুম্ভাং চ সরয়ূং চ নরেশ্বর
চর্মণ্বতীং বেত্রবতীং হস্তিসোমাং দিশং তথা
10.19
শতাবরীং পয়োষ্ণীং চ পরাং ভৈমরথীং তথা
কাবেরীং চুলুকাং চাপি বাপীং শতবলামপি
10.20
নিচীরাং মহিতাং চাপি সুপ্রয়োগাং নরাধিপ
পবিত্রাং কুণ্ডলাং সিন্ধুং বাজিনীং পুরমালিনীম্
10.21
পূর্বাভিরামাং বীরাং চ ভীমামোঘবতীং তথা
পলাশিনীং পাপহরাং মহেন্দ্রাং পিপ্পলাবতীম্
10.22
পারিষেণামসিক্নীং চ সরলাং ভারমর্দিনীম্
পুরুহীং প্রবরাং মেনাং মোঘাং ঘৃতবতীং তথা
10.23
ধূমত্যামতিকৃষ্ণাং চ সূচীং ছাবীং চ কৌরব
সদানীরামধৃষ্যাং চ কুশধারাং মহানদীম্
10.24
শশিকান্তাং শিবাং চৈব তথা বীরবতীমপি
বাস্তুং সুবাস্তুং গৌরীং চ কম্পনাং সহিরণ্বতীম্
10.25
হিরণ্বতীং চিত্রবতীং চিত্রসেনাং চ নিম্নগাম্
রথচিত্রাং জ্যোতিরথাং বিশ্বামিত্রাং কপিঞ্জলাম্
10.26
উপেন্দ্রাং বহুলাং চৈব কুচরামম্বুবাহিনীম্
বৈনন্দীং পিঞ্জলাং বেণ্ণাং তুঙ্গবেণাং মহানদীম্
10.27
বিদিশাং কৃষ্ণবেণ্ণাং চ তাম্রাং চ কপিলামপি
শলুং সুবামাং বেদাশ্বাং হরিস্রাবাং মহাপগাম্
10.28
শীঘ্রাং চ পিচ্ছিলাং চৈব ভারদ্বাজীং চ নিম্নগাম্
কৌশিকীং নিম্নগাং শোণাং বাহুদামথ চন্দনাম্
10.29
দুর্গামন্তঃশিলাং চৈব ব্রহ্মমেধ্যাং বৃহদ্বতীম্
চরক্ষাং মহিরোহীং চ তথা জম্বুনদীমপি
10.30
সুনসাং তমসাং দাসীং ত্রসামন্যাং বরাণসীম্
লোলোদ্ধৃতকরাং চৈব পূর্ণাশাং চ মহানদীম্
10.31
মানবীং বৃষভাং চৈব মহানদ্যো জনাধিপ
সদানিরাময়াং বৃত্যাং মন্দগাং মন্দবাহিনীম্
10.32
ব্রহ্মাণীং চ মহাগৌরীং দুর্গামপি চ ভারত
চিত্রোপলাং চিত্রবর্হাং মঞ্জুং মকরবাহিনীম্
10.33
মন্দাকিনীং বৈতরণীং কোকাং চৈব মহানদীম্
শুক্তিমতীমরণ্যাং চ পুষ্পবেণ্যুত্পলাবতীম্
10.34
লোহিত্যাং করতোয়াং চ তথৈব বৃষভঙ্গিনীম্
কুমারীমৃষিকুল্যাং চ ব্রহ্মকুল্যাং চ ভারত
10.35
সরস্বতীঃ সুপুণ্যাশ্চ সর্বা গঙ্গাশ্চ মারিষ
বিশ্বস্য মাতরঃ সর্বাঃ সর্বাশ্চৈব মহাবলাঃ
10.36
তথা নদ্যস্ত্বপ্রকাশাঃ শতশোঽথ সহস্রশঃ
ইত্যেতাঃ সরিতো রাজন্সমাখ্যাতা যথাস্মৃতি
10.37
অত ঊর্ধ্বং জনপদান্নিবোধ গদতো মম
তত্রেমে কুরুপাঞ্চালাঃ শাল্বমাদ্রেয়জাঙ্গলাঃ
10.38
শূরসেনাঃ কলিঙ্গাশ্চ বোধা মৌকাস্তথৈব চ
মত্স্যাঃ সুকুট্যঃ সৌবল্যাঃ কুন্তলাঃ কাশিকোশলাঃ
10.39
চেদিবত্সাঃ করূষাশ্চ ভোজাঃ সিন্ধুপুলিন্দকাঃ
উত্তমৌজা দশার্ণাশ্চ মেকলাশ্চোত্কলৈঃ সহ
10.40
পাঞ্চালাঃ কৌশিজাশ্চৈব একপৃষ্ঠা যুগংধরাঃ
সৌধা মদ্রা ভুজিঙ্গাশ্চ কাশয়োঽপরকাশয়ঃ
10.41
জঠরাঃ কুক্কুশাশ্চৈব সুদাশার্ণাশ্চ ভারত
কুন্তয়োঽবন্তয়শ্চৈব তথৈবাপরকুন্তয়ঃ
10.42
গোবিন্দা মন্দকাঃ ষণ্ডা বিদর্ভানূপবাসিকাঃ
অশ্মকাঃ পাংসুরাষ্ট্রাশ্চ গোপরাষ্ট্রাঃ পনীতকাঃ
10.43
আদিরাষ্ট্রাঃ সুকুট্টাশ্চ বলিরাষ্ট্রং চ কেবলম্
বানরাস্যাঃ প্রবাহাশ্চ বক্রা বক্রভয়াঃ শকাঃ
10.44
বিদেহকা মাগধাশ্চ সুহ্মাশ্চ বিজয়াস্তথা
অঙ্গা বঙ্গাঃ কলিঙ্গাশ্চ যকৃল্লোমান এব চ
10.45
মল্লাঃ সুদেষ্ণাঃ প্রাহূতাস্তথা মাহিষকার্ষিকাঃ
বাহীকা বাটধানাশ্চ আভীরাঃ কালতোয়কাঃ
10.46
অপরন্ধ্রাশ্চ শূদ্রাশ্চ পহ্লবাশ্চর্মখণ্ডিকাঃ
অটবীশবরাশ্চৈব মরুভৌমাশ্চ মারিষ
10.47
উপাবৃশ্চানুপাবৃশ্চসুরাষ্ট্রাঃ কেকয়াস্তথা
কুট্টাপরান্তা দ্বৈধেয়াঃ কাক্ষাঃ সামুদ্রনিষ্কুটাঃ
10.48
অন্ধ্রাশ্চ বহবো রাজন্নন্তর্গির্যাস্তথৈব চ
বহির্গির্যাঙ্গমলদা মাগধা মানবর্জকাঃ
10.49
মহ্যুত্তরাঃ প্রাবৃষেয়া ভার্গবাশ্চ জনাধিপ
পুণ্ড্রা ভার্গাঃ কিরাতাশ্চ সুদোষ্ণাঃ প্রমুদাস্তথা
10.50
শকা নিষাদা নিষধাস্তথৈবানর্তনৈরৃতাঃ
দুগূলাঃ প্রতিমত্স্যাশ্চ কুশলাঃ কুনটাস্তথা
10.51
তীরগ্রাহাস্তরতোয়া রাজিকা রস্যকাগণাঃ
তিলকাঃ পারসীকাশ্চ মধুমন্তঃ প্রকুত্সকাঃ
10.52
কাশ্মীরাঃ সিন্ধুসৌবীরা গান্ধারা দর্শকাস্তথা
অভীসারা কুলূতাশ্চ শৈবলা বাহ্লিকাস্তথা
10.53
দর্বীকাঃ সকচা দর্বা বাতজামরথোরগাঃ
বহুবাদ্যাশ্চ কৌরব্য সুদামানঃ সুমল্লিকাঃ
10.54
বধ্রাঃ করীষকাশ্চাপি কুলিন্দোপত্যকাস্তথা
বনায়বো দশাপার্শ্বা রোমাণঃ কুশবিন্দবঃ
10.55
কচ্ছা গোপালকচ্ছাশ্চ লাঙ্গলাঃ পরবল্লকাঃ
কিরাতা বর্বরাঃ সিদ্ধা বিদেহাস্তাম্রলিঙ্গকাঃ
10.56
ওষ্ট্রাঃ পুণ্ড্রাঃ সসৈরন্ধ্রাঃ পার্বতীয়াশ্চ মারিষ
অথাপরে জনপদা দক্ষিণা ভরতর্ষভ
10.57
দ্রবিডাঃ কেরলাঃ প্রাচ্যা ভূষিকা বনবাসিনঃ
উন্নত্যকা মাহিষকা বিকল্পা মূষকাস্তথা
10.58
কর্ণিকাঃ কুন্তিকাশ্চৈব সৌদ্ভিদা নলকালকাঃ
কৌকুট্টকাস্তথা চোলাঃ কোঙ্কণা মালবাণকাঃ
10.59
সমঙ্গাঃ কোপনাশ্চৈব কুকুরাঙ্গদমারিষাঃ
ধ্বজিন্যুত্সবসংকেতাস্ত্রিগর্তাঃ সর্বসেনয়ঃ
10.60
ত্র্যঙ্গাঃ কেকরকাঃ প্রোষ্ঠাঃ পরসংচরকাস্তথা
তথৈব বিন্ধ্যপুলকাঃ পুলিন্দাঃ কল্কলৈঃ সহ
10.61
মালকা মল্লকাশ্চৈব তথৈবাপরবর্তকাঃ
কুলিন্দাঃ কুলকাশ্চৈব করণ্ঠাঃ কুরকাস্তথা
10.62
মূষকা স্তনবালাশ্চ সতিয়ঃ পত্তিপঞ্জকাঃ
আদিদায়াঃ সিরালাশ্চ স্তূবকা স্তনপাস্তথা
10.63
হৃষীবিদর্ভাঃ কান্তীকাস্তঙ্গণাঃ পরতঙ্গণাঃ
উত্তরাশ্চাপরে ম্লেচ্ছা জনা ভরতসত্তম
10.64
যবনাশ্চ সকাম্বোজা দারুণা ম্লেচ্ছজাতয়ঃ
সক্ষদ্দ্রুহঃ কুন্তলাশ্চ হূণাঃ পারতকৈঃ সহ
10.65
তথৈব মরধাশ্চীনাস্তথৈব দশমালিকাঃ
ক্ষত্রিয়োপনিবেশাশ্চ বৈশ্যশূদ্রকুলানি চ
10.66
শূদ্রাভীরাথ দরদাঃ কাশ্মীরাঃ পশুভিঃ সহ
খশিকাশ্চ তুখারাশ্চ পল্লবা গিরিগহ্বরাঃ
10.67
আত্রেয়াঃ সভরদ্বাজাস্তথৈব স্তনয়োষিকাঃ
ঔপকাশ্চ কলিঙ্গাশ্চ কিরাতানাং চ জাতয়ঃ
10.68
তামরা হংসমার্গাশ্চ তথৈব করভঞ্জকাঃ
উদ্দেশমাত্রেণ ময়া দেশাঃ সংকীর্তিতাঃ প্রভো
10.69
যথাগুণবলং চাপি ত্রিবর্গস্য মহাফলম্
দুহ্যেদ্ধেনুঃ কামধুক্চ ভূমিঃ সম্যগনুষ্ঠিতা
10.70
তস্যাং গৃধ্যন্তি রাজানঃ শূরা ধর্মার্থকোবিদাঃ
তে ত্যজন্ত্যাহবে প্রাণান্রসাগৃদ্ধাস্তরস্বিনঃ
10.71
দেবমানুষকায়ানাং কামং ভূমিঃ পরায়ণম্
অন্যোন্যস্যাবলুম্পন্তি সারমেয়া ইবামিষম্
10.72
রাজানো ভরতশ্রেষ্ঠ ভোক্তুকামা বসুংধরাম্
ন চাপি তৃপ্তিঃ কামানাং বিদ্যতে চেহ কস্যচিৎ
10.73
তস্মাত্পরিগ্রহে ভূমের্যতন্তে কুরুপাণ্ডবাঃ
সাম্না দানেন ভেদেন দণ্ডেনৈব চ পার্থিব
10.74
পিতা মাতা চ পুত্রশ্চ খং দ্যৌশ্চ নরপুংগব
ভূমির্ভবতি ভূতানাং সম্যগচ্ছিদ্রদর্শিনী