Utshovঅধ্যায় 11
11.1
ধৃতরাষ্ট্র উবাচ
ভারতস্যাস্য বর্ষস্য তথা হৈমবতস্য চ
প্রমাণমায়ুষঃ সূত ফলং চাপি শুভাশুভম্
11.2
অনাগতমতিক্রান্তং বর্তমানং চ সংজয়
আচক্ষ্ব মে বিস্তরেণ হরিবর্ষং তথৈব চ
11.3
সংজয় উবাচ
চত্বারি ভারতে বর্ষে যুগানি ভরতর্ষভ
কৃতং ত্রেতা দ্বাপরং চ পুষ্যং চ কুরুবর্ধন
11.4
পূর্বং কৃতয়ুগং নাম ততস্ত্রেতায়ুগং বিভো
সংক্ষেপাদ্দ্বাপরস্যাথ ততঃ পুষ্যং প্রবর্ততে
11.5
চত্বারি চ সহস্রাণি বর্ষাণাং কুরুসত্তম
আয়ুঃসংখ্যা কৃতয়ুগে সংখ্যাতা রাজসত্তম
11.6
তথা ত্রীণি সহস্রাণি ত্রেতায়াং মনুজাধিপ
দ্বিসহস্রং দ্বাপরে তু শতে তিষ্ঠতি সংপ্রতি
11.7
ন প্রমাণস্থিতির্হ্যস্তি পুষ্যেঽস্মিন্ভরতর্ষভ
গর্ভস্থাশ্চ ম্রিয়ন্তেঽত্র তথা জাতা ম্রিয়ন্তি চ
11.8
মহাবলা মহাসত্ত্বাঃ প্রজাগুণসমন্বিতাঃ
অজায়ন্ত কৃতে রাজন্মুনয়ঃ সুতপোধনাঃ
11.9
মহোত্সাহা মহাত্মানো ধার্মিকাঃ সত্যবাদিনঃ
জাতাঃ কৃতয়ুগে রাজন্ধনিনঃ প্রিয়দর্শনাঃ
11.10
আয়ুষ্মন্তো মহাবীরা ধনুর্ধরবরা যুধি
জায়ন্তে ক্ষত্রিয়াঃ শূরাস্ত্রেতায়াং চক্রবর্তিনঃ
11.11
সর্ববর্ণা মহারাজ জায়ন্তে দ্বাপরে সতি
মহোত্সাহা মহাবীর্যাঃ পরস্পরবধৈষিণঃ
11.12
তেজসাল্পেন সংয়ুক্তাঃ ক্রোধনাঃ পুরুষা নৃপ
লুব্ধাশ্চানৃতকাশ্চৈব পুষ্যে জায়ন্তি ভারত
11.13
ঈর্ষ্যা মানস্তথা ক্রোধো মায়াসূয়া তথৈব চ
পুষ্যে ভবন্তি মর্ত্যানাং রাগো লোভশ্চ ভারত
11.14
সংক্ষেপো বর্ততে রাজন্দ্বাপরেঽস্মিন্নরাধিপ
গুণোত্তরং হৈমবতং হরিবর্ষং ততঃ পরম্