Utshovঅধ্যায় 12
12.1
ধৃতরাষ্ট্র উবাচ
জম্বূখণ্ডস্ত্বয়া প্রোক্তো যথাবদিহ সংজয়
বিষ্কম্ভমস্য প্রব্রূহি পরিমাণং চ তত্ত্বতঃ
12.2
সমুদ্রস্য প্রমাণং চ সম্যগচ্ছিদ্রদর্শন
শাকদ্বীপং চ মে ব্রূহি কুশদ্বীপং চ সংজয়
12.3
শাল্মলং চৈব তত্ত্বেন ক্রৌঞ্চদ্বীপং তথৈব চ
ব্রূহি গাবল্গণে সর্বং রাহোঃ সোমার্কয়োস্তথা
12.4
সংজয় উবাচ
রাজন্সুবহবো দ্বীপা যৈরিদং সংততং জগৎ
সপ্ত ত্বহং প্রবক্ষ্যামি চন্দ্রাদিত্যৌ গ্রহাংস্তথা
12.5
অষ্টাদশ সহস্রাণি যোজনানাং বিশাং পতে
ষট্শতানি চ পূর্ণানি বিষ্কম্ভো জম্বুপর্বতঃ
12.6
লাবণস্য সমুদ্রস্য বিষ্কম্ভো দ্বিগুণঃ স্মৃতঃ
নানাজনপদাকীর্ণো মণিবিদ্রুমচিত্রিতঃ
12.7
নৈকধাতুবিচিত্রৈশ্চ পর্বতৈরুপশোভিতঃ
সিদ্ধচারণসংকীর্ণঃ সাগরঃ পরিমণ্ডলঃ
12.8
শাকদ্বীপং চ বক্ষ্যামি যথাবদিহ পার্থিব
শৃণু মে ত্বং যথান্যায়ং ব্রুবতঃ কুরুনন্দন
12.9
জম্বূদ্বীপপ্রমাণেন দ্বিগুণঃ স নরাধিপ
বিষ্কম্ভেণ মহারাজ সাগরোঽপি বিভাগশঃ
ক্ষীরোদো ভরতশ্রেষ্ঠ যেন সংপরিবারিতঃ
12.10
তত্র পুণ্যা জনপদা ন তত্র ম্রিয়তে জনঃ
কুত এব হি দুর্ভিক্ষং ক্ষমাতেজোয়ুতা হি তে
12.11
শাকদ্বীপস্য সংক্ষেপো যথাবদ্ভরতর্ষভ
উক্ত এষ মহারাজ কিমন্যচ্ছ্রোতুমিচ্ছসি
12.12
ধৃতরাষ্ট্র উবাচ
শাকদ্বীপস্য সংক্ষেপো যথাবদিহ সংজয়
উক্তস্ত্বয়া মহাভাগ বিস্তরং ব্রূহি তত্ত্বতঃ
12.13
সংজয় উবাচ
তথৈব পর্বতা রাজন্সপ্তাত্র মণিভূষিতাঃ
রত্নাকরাস্তথা নদ্যস্তেষাং নামানি মে শৃণু
অতীবগুণবত্সর্বং তত্র পুণ্যং জনাধিপ
12.14
দেবর্ষিগন্ধর্বয়ুতঃ পরমো মেরুরুচ্যতে
প্রাগায়তো মহারাজ মলয়ো নাম পর্বতঃ
যতো মেঘাঃ প্রবর্তন্তে প্রভবন্তি চ সর্বশঃ
12.15
ততঃ পরেণ কৌরব্য জলধারো মহাগিরিঃ
যত্র নিত্যমুপাদত্তে বাসবঃ পরমং জলম্
যতো বর্ষং প্রভবতি বর্ষাকালে জনেশ্বর
12.16
উচ্চৈর্গিরী রৈবতকো যত্র নিত্যং প্রতিষ্ঠিতঃ
রেবতী দিবি নক্ষত্রং পিতামহকৃতো বিধিঃ
12.17
উত্তরেণ তু রাজেন্দ্র শ্যামো নাম মহাগিরিঃ
যতঃ শ্যামত্বমাপন্নাঃ প্রজা জনপদেশ্বর
12.18
ধৃতরাষ্ট্র উবাচ
সুমহান্সংশয়ো মেঽদ্য প্রোক্তং সংজয় যত্ত্বয়া
প্রজাঃ কথং সূতপুত্র সংপ্রাপ্তাঃ শ্যামতামিহ
12.19
সংজয় উবাচ
সর্বেষ্বেব মহাপ্রাজ্ঞ দ্বীপেষু কুরুনন্দন
গৌরঃ কৃষ্ণশ্চ বর্ণৌ দ্বৌ তয়োর্বর্ণান্তরং নৃপ
12.20
শ্যামো যস্মাত্প্রবৃত্তো বৈ তত্তে বক্ষ্যামি ভারত
আস্তেঽত্র ভগবান্কৃষ্ণস্তত্কান্ত্যা শ্যামতাং গতঃ
12.21
ততঃ পরং কৌরবেন্দ্র দুর্গশৈলো মহোদয়ঃ
কেসরী কেসরয়ুতো যতো বাতঃ প্রবায়তি
12.22
তেষাং যোজনবিষ্কম্ভো দ্বিগুণঃ প্রবিভাগশঃ
বর্ষাণি তেষু কৌরব্য সংপ্রোক্তানি মনীষিভিঃ
12.23
মহামেরুর্মহাকাশো জলদঃ কুমুদোত্তরঃ
জলধারাত্পরো রাজন্সুকুমার ইতি স্মৃতঃ
12.24
রৈবতস্য তু কৌমারঃ শ্যামস্য তু মণীচকঃ
কেসরস্যাথ মোদাকী পরেণ তু মহাপুমান্
12.25
পরিবার্য তু কৌরব্য দৈর্ঘ্যং হ্রস্বত্বমেব চ
জম্বূদ্বীপেন বিখ্যাতস্তস্য মধ্যে মহাদ্রুমঃ
12.26
শাকো নাম মহারাজ তস্য দ্বীপস্য মধ্যগঃ
তত্র পুণ্যা জনপদাঃ পূজ্যতে তত্র শংকরঃ
12.27
তত্র গচ্ছন্তি সিদ্ধাশ্চ চারণা দৈবতানি চ
ধার্মিকাশ্চ প্রজা রাজংশ্চত্বারোঽতীব ভারত
12.28
বর্ণাঃ স্বকর্মনিরতা ন চ স্তেনোঽত্র দৃশ্যতে
দীর্ঘায়ুষো মহারাজ জরামৃত্যুবিবর্জিতাঃ
12.29
প্রজাস্তত্র বিবর্ধন্তে বর্ষাস্বিব সমুদ্রগাঃ
নদ্যঃ পুণ্যজলাস্তত্র গঙ্গা চ বহুধাগতিঃ
12.30
সুকুমারী কুমারী চ সীতা কাবেরকা তথা
মহানদী চ কৌরব্য তথা মণিজলা নদী
ইক্ষুবর্ধনিকা চৈব তথা ভরতসত্তম
12.31
ততঃ প্রবৃত্তাঃ পুণ্যোদা নদ্যঃ কুরুকুলোদ্বহ
সহস্রাণাং শতান্যেব যতো বর্ষতি বাসবঃ
12.32
ন তাসাং নামধেয়ানি পরিমাণং তথৈব চ
শক্যতে পরিসংখ্যাতুং পুণ্যাস্তা হি সরিদ্বরাঃ
12.33
তত্র পুণ্যা জনপদাশ্চত্বারো লোকসংমতাঃ
মগাশ্চ মশকাশ্চৈব মানসা মন্দগাস্তথা
12.34
মগা ব্রাহ্মণভূয়িষ্ঠাঃ স্বকর্মনিরতা নৃপ
মশকেষু তু রাজন্যা ধার্মিকাঃ সর্বকামদাঃ
12.35
মানসেষু মহারাজ বৈশ্যাঃ কর্মোপজীবিনঃ
সর্বকামসমায়ুক্তাঃ শূরা ধর্মার্থনিশ্চিতাঃ
শূদ্রাস্তু মন্দগে নিত্যং পুরুষা ধর্মশীলিনঃ
12.36
ন তত্র রাজা রাজেন্দ্র ন দণ্ডো ন চ দণ্ডিকাঃ
স্বধর্মেণৈব ধর্মং চ তে রক্ষন্তি পরস্পরম্
12.37
এতাবদেব শক্যং তু তস্মিন্দ্বীপে প্রভাষিতুম্
এতাবদেব শ্রোতব্যং শাকদ্বীপে মহৌজসি