Utshovঅধ্যায় 13
13.1
সংজয় উবাচ
উত্তরেষু তু কৌরব্য দ্বীপেষু শ্রূয়তে কথা
যথাশ্রুতং মহারাজ ব্রুবতস্তন্নিবোধ মে
13.2
ঘৃততোয়ঃ সমুদ্রোঽত্র দধিমণ্ডোদকোঽপরঃ
সুরোদঃ সাগরশ্চৈব তথান্যো ঘর্মসাগরঃ
13.3
পরস্পরেণ দ্বিগুণাঃ সর্বে দ্বীপা নরাধিপ
সর্বতশ্চ মহারাজ পর্বতৈঃ পরিবারিতাঃ
13.4
গৌরস্তু মধ্যমে দ্বীপে গিরির্মানঃশিলো মহান্
পর্বতঃ পশ্চিমঃ কৃষ্ণো নারায়ণনিভো নৃপ
13.5
তত্র রত্নানি দিব্যানি স্বয়ং রক্ষতি কেশবঃ
প্রজাপতিমুপাসীনঃ প্রজানাং বিদধে সুখম্
13.6
কুশদ্বীপে কুশস্তম্বো মধ্যে জনপদস্য হ
সংপূজ্যতে শল্মলিশ্চ দ্বীপে শাল্মলিকে নৃপ
13.7
ক্রৌঞ্চদ্বীপে মহাক্রৌঞ্চো গিরী রত্নচয়াকরঃ
সংপূজ্যতে মহারাজ চাতুর্বর্ণ্যেন নিত্যদা
13.8
গোমন্দঃ পর্বতো রাজন্সুমহান্সর্বধাতুমান্
যত্র নিত্যং নিবসতি শ্রীমান্কমললোচনঃ
মোক্ষিভিঃ সংস্তুতো নিত্যং প্রভুর্নারায়ণো হরিঃ
13.9
কুশদ্বীপে তু রাজেন্দ্র পর্বতো বিদ্রুমৈশ্চিতঃ
সুধামা নাম দুর্ধর্ষো দ্বিতীয়ো হেমপর্বতঃ
13.10
দ্যুতিমান্নাম কৌরব্য তৃতীয়ঃ কুমুদো গিরিঃ
চতুর্থঃ পুষ্পবান্নাম পঞ্চমস্তু কুশেশয়ঃ
13.11
ষষ্ঠো হরিগিরির্নাম ষডেতে পর্বতোত্তমাঃ
তেষামন্তরবিষ্কম্ভো দ্বিগুণঃ প্রবিভাগশঃ
13.12
ঔদ্ভিদং প্রথমং বর্ষং দ্বিতীয়ং বেণুমণ্ডলম্
তৃতীয়ং বৈ রথাকারং চতুর্থং পালনং স্মৃতম্
13.13
ধৃতিমত্পঞ্চমং বর্ষং ষষ্ঠং বর্ষং প্রভাকরম্
সপ্তমং কাপিলং বর্ষং সপ্তৈতে বর্ষপুঞ্জকাঃ
13.14
এতেষু দেবগন্ধর্বাঃ প্রজাশ্চ জগতীশ্বর
বিহরন্তি রমন্তে চ ন তেষু ম্রিয়তে জনঃ
13.15
ন তেষু দস্যবঃ সন্তি ম্লেচ্ছজাত্যোঽপি বা নৃপ
গৌরপ্রায়ো জনঃ সর্বঃ সুকুমারশ্চ পার্থিব
13.16
অবশিষ্টেষু বর্ষেষু বক্ষ্যামি মনুজেশ্বর
যথাশ্রুতং মহারাজ তদব্যগ্রমনাঃ শৃণু
13.17
ক্রৌঞ্চদ্বীপে মহারাজ ক্রৌঞ্চো নাম মহাগিরিঃ
ক্রৌঞ্চাত্পরো বামনকো বামনাদন্ধকারকঃ
13.18
অন্ধকারাত্পরো রাজন্মৈনাকঃ পর্বতোত্তমঃ
মৈনাকাত্পরতো রাজন্গোবিন্দো গিরিরুত্তমঃ
13.19
গোবিন্দাত্তু পরো রাজন্নিবিডো নাম পর্বতঃ
পরস্তু দ্বিগুণস্তেষাং বিষ্কম্ভো বংশবর্ধন
13.20
দেশাংস্তত্র প্রবক্ষ্যামি তন্মে নিগদতঃ শৃণু
ক্রৌঞ্চস্য কুশলো দেশো বামনস্য মনোনুগঃ
13.21
মনোনুগাত্পরশ্চোষ্ণো দেশঃ কুরুকুলোদ্বহ
উষ্ণাত্পরঃ প্রাবরকঃ প্রাবরাদন্ধকারকঃ
13.22
অন্ধকারকদেশাত্তু মুনিদেশঃ পরঃ স্মৃতঃ
মুনিদেশাত্পরশ্চৈব প্রোচ্যতে দুন্দুভিস্বনঃ
13.23
সিদ্ধচারণসংকীর্ণো গৌরপ্রায়ো জনাধিপ
এতে দেশা মহারাজ দেবগন্ধর্বসেবিতাঃ
13.24
পুষ্করে পুষ্করো নাম পর্বতো মণিরত্নমান্
তত্র নিত্যং নিবসতি স্বয়ং দেবঃ প্রজাপতিঃ
13.25
তং পর্যুপাসতে নিত্যং দেবাঃ সর্বে মহর্ষিভিঃ
বাগ্ভির্মনোনুকূলাভিঃ পূজয়ন্তো জনাধিপ
13.26
জম্বূদ্বীপাত্প্রবর্তন্তে রত্নানি বিবিধান্যুত
দ্বীপেষু তেষু সর্বেষু প্রজানাং কুরুনন্দন
13.27
বিপ্রাণাং ব্রহ্মচর্যেণ সত্যেন চ দমেন চ
আরোগ্যায়ুঃপ্রমাণাভ্যাং দ্বিগুণং দ্বিগুণং ততঃ
13.28
একো জনপদো রাজন্দ্বীপেষ্বেতেষু ভারত
উক্তা জনপদা যেষু ধর্মশ্চৈকঃ প্রদৃশ্যতে
13.29
ঈশ্বরো দণ্ডমুদ্যম্য স্বয়মেব প্রজাপতিঃ
দ্বীপানেতান্মহারাজ রক্ষংস্তিষ্ঠতি নিত্যদা
13.30
স রাজা স শিবো রাজন্স পিতা স পিতামহঃ
গোপায়তি নরশ্রেষ্ঠ প্রজাঃ সজডপণ্ডিতাঃ
13.31
ভোজনং চাত্র কৌরব্য প্রজাঃ স্বয়মুপস্থিতম্
সিদ্ধমেব মহারাজ ভুঞ্জতে তত্র নিত্যদা
13.32
ততঃ পরং সমা নাম দৃশ্যতে লোকসংস্থিতিঃ
চতুরশ্রা মহারাজ ত্রয়স্ত্রিংশত্তু মণ্ডলম্
13.33
তত্র তিষ্ঠন্তি কৌরব্য চত্বারো লোকসংমতাঃ
দিগ্গজা ভরতশ্রেষ্ঠ বামনৈরাবতাদয়ঃ
সুপ্রতীকস্তথা রাজন্প্রভিন্নকরটামুখঃ
13.34
তস্যাহং পরিমাণং তু ন সংখ্যাতুমিহোত্সহে
অসংখ্যাতঃ স নিত্যং হি তির্যগূর্ধ্বমধস্তথা
13.35
তত্র বৈ বায়বো বান্তি দিগ্ভ্যঃ সর্বাভ্য এব চ
অসংবাধা মহারাজ তান্নিগৃহ্ণন্তি তে গজাঃ
13.36
পুষ্করৈঃ পদ্মসংকাশৈর্বর্ষ্মবদ্ভির্মহাপ্রভৈঃ
তে শনৈঃ পুনরেবাশু বায়ূন্মুঞ্চন্তি নিত্যশঃ
13.37
শ্বসদ্ভির্মুচ্যমানাস্তু দিগ্গজৈরিহ মারুতাঃ
আগচ্ছন্তি মহারাজ ততস্তিষ্ঠন্তি বৈ প্রজাঃ
13.38
ধৃতরাষ্ট্র উবাচ
পরো বৈ বিস্তরোঽত্যর্থং ত্বয়া সংজয় কীর্তিতঃ
দর্শিতং দ্বীপসংস্থানমুত্তরং ব্রূহি সংজয়
13.39
সংজয় উবাচ
উক্তা দ্বীপা মহারাজ গ্রহান্মে শৃণু তত্ত্বতঃ
স্বর্ভানুঃ কৌরবশ্রেষ্ঠ যাবদেষ প্রভাবতঃ
13.40
পরিমণ্ডলো মহারাজ স্বর্ভানুঃ শ্রূয়তে গ্রহঃ
যোজনানাং সহস্রাণি বিষ্কম্ভো দ্বাদশাস্য বৈ
13.41
পরিণাহেন ষট্ত্রিংশদ্বিপুলত্বেন চানঘ
ষষ্টিমাহুঃ শতান্যস্য বুধাঃ পৌরাণিকাস্তথা
13.42
চন্দ্রমাস্তু সহস্রাণি রাজন্নেকাদশ স্মৃতঃ
বিষ্কম্ভেণ কুরুশ্রেষ্ঠ ত্রয়স্ত্রিংশত্তু মণ্ডলম্
একোনষষ্টির্বৈপুল্যাচ্ছীতরশ্মের্মহাত্মনঃ
13.43
সূর্যস্ত্বষ্টৌ সহস্রাণি দ্বে চান্যে কুরুনন্দন
বিষ্কম্ভেণ ততো রাজন্মণ্ডলং ত্রিংশতং সমম্
13.44
অষ্টপঞ্চাশতং রাজন্বিপুলত্বেন চানঘ
শ্রূয়তে পরমোদারঃ পতংগোঽসৌ বিভাবসুঃ
এতত্প্রমাণমর্কস্য নির্দিষ্টমিহ ভারত
13.45
স রাহুশ্ছাদয়ত্যেতৌ যথাকালং মহত্তয়া
চন্দ্রাদিত্যৌ মহারাজ সংক্ষেপোঽয়মুদাহৃতঃ
13.46
ইত্যেতত্তে মহারাজ পৃচ্ছতঃ শাস্ত্রচক্ষুষা
সর্বমুক্তং যথাতত্ত্বং তস্মাচ্ছমমবাপ্নুহি
13.47
যথাদৃষ্টং ময়া প্রোক্তং সনির্যাণমিদং জগৎ
তস্মাদাশ্বস কৌরব্য পুত্রং দুর্যোধনং প্রতি
13.48
শ্রুত্বেদং ভরতশ্রেষ্ঠ ভূমিপর্ব মনোনুগম্
শ্রীমান্ভবতি রাজন্যঃ সিদ্ধার্থঃ সাধুসংমতঃ
আয়ুর্বলং চ বীর্যং চ তস্য তেজশ্চ বর্ধতে
13.49
যঃ শৃণোতি মহীপাল পর্বণীদং যতব্রতঃ
প্রীয়ন্তে পিতরস্তস্য তথৈব চ পিতামহাঃ
13.50
ইদং তু ভারতং বর্ষং যত্র বর্তামহে বয়ম্
পূর্বং প্রবর্ততে পুণ্যং তত্সর্বং শ্রুতবানসি