অধ্যায় 14

14.1

বৈশংপায়ন উবাচ
অথ গাবল্গণির্ধীমান্সমরাদেত্য সংজয়ঃ
প্রত্যক্ষদর্শী সর্বস্য ভূতভব্যভবিষ্যবিৎ

ধ্যায়তে ধৃতরাষ্ট্রায় সহসোপেত্য দুঃখিতঃ
আচষ্ট নিহতং ভীষ্মং ভরতানামমধ্যমম্

সংজয়োঽহং মহারাজ নমস্তে ভরতর্ষভ
হতো ভীষ্মঃ শাংতনবো ভরতানাং পিতামহঃ

ককুদং সর্বয়োধানাং ধাম সর্বধনুষ্মতাম্
শরতল্পগতঃ সোঽদ্য শেতে কুরুপিতামহঃ

যস্য বীর্যং সমাশ্রিত্য দ্যূতং পুত্রস্তবাকরোৎ
স শেতে নিহতো রাজন্সংখ্যে ভীষ্মঃ শিখণ্ডিনা

যঃ সর্বান্পৃথিবীপালান্সমবেতান্মহামৃধে
জিগায়ৈকরথেনৈব কাশিপুর্যাং মহারথঃ

জামদগ্ন্যং রণে রামমায়োধ্য বসুসংভবঃ
ন হতো জামদগ্ন্যেন স হতোঽদ্য শিখণ্ডিনা

মহেন্দ্রসদৃশঃ শৌর্যে স্থৈর্যে চ হিমবানিব
সমুদ্র ইব গাম্ভীর্যে সহিষ্ণুত্বে ধরাসমঃ

শরদংষ্ট্রো ধনুর্বক্ত্রঃ খড্গজিহ্বো দুরাসদঃ
নরসিংহঃ পিতা তেঽদ্য পাঞ্চাল্যেন নিপাতিতঃ

পাণ্ডবানাং মহত্সৈন্যং যং দৃষ্ট্বোদ্যন্তমাহবে
প্রবেপত ভয়োদ্বিগ্নং সিংহং দৃষ্ট্বেব গোগণঃ

পরিরক্ষ্য স সেনাং তে দশরাত্রমনীকহা
জগামাস্তমিবাদিত্যঃ কৃত্বা কর্ম সুদুষ্করম্

যঃ স শক্র ইবাক্ষোভ্যো বর্ষন্বাণান্সহস্রশঃ
জঘান যুধি যোধানামর্বুদং দশভির্দিনৈঃ

স শেতে নিষ্টনন্ভূমৌ বাতরুগ্ণ ইব দ্রুমঃ
তব দুর্মন্ত্রিতে রাজন্যথা নার্হঃ স ভারত