Utshovঅধ্যায় 15
15.1
ধৃতরাষ্ট্র উবাচ
কথং কুরূণামৃষভো হতো ভীষ্মঃ শিখণ্ডিনা
কথং রথাত্স ন্যপতত্পিতা মে বাসবোপমঃ
15.2
কথমাসংশ্চ মে পুত্রা হীনা ভীষ্মেণ সংজয়
বলিনা দেবকল্পেন গুর্বর্থে ব্রহ্মচারিণা
15.3
তস্মিন্হতে মহাসত্ত্বে মহেষ্বাসে মহাবলে
মহারথে নরব্যাঘ্রে কিমু আসীন্মনস্তদা
15.4
আর্তিঃ পরা মাবিশতি যতঃ শংসসি মে হতম্
কুরূণামৃষভং বীরমকম্প্যং পুরুষর্ষভম্
15.5
কে তং যান্তমনুপ্রেয়ুঃ কে চাস্যাসন্পুরোগমাঃ
কেঽতিষ্ঠন্কে ন্যবর্তন্ত কেঽভ্যবর্তন্ত সংজয়
15.6
কে শূরা রথশার্দূলমচ্যুতং ক্ষত্রিয়র্ষভম্
রথানীকং গাহমানং সহসা পৃষ্ঠতোঽন্বয়ুঃ
15.7
যস্তমোঽর্ক ইবাপোহন্পরসৈন্যমমিত্রহা
সহস্ররশ্মিপ্রতিমঃ পরেষাং ভয়মাদধৎ
অকরোদ্দুষ্করং কর্ম রণে কৌরবশাসনাৎ
15.8
গ্রসমানমনীকানি য এনং পর্যবারয়ন্
কৃতিনং তং দুরাধর্ষং সম্যগ্যাস্যন্তমন্তিকে
কথং শাংতনবং যুদ্ধে পাণ্ডবাঃ প্রত্যবারয়ন্
15.9
নিকৃন্তন্তমনীকানি শরদংষ্ট্রং তরস্বিনম্
চাপব্যাত্তাননং ঘোরমসিজিহ্বং দুরাসদম্
15.10
অত্যন্যান্পুরুষব্যাঘ্রান্হ্রীমন্তমপরাজিতম্
পাতয়ামাস কৌন্তেয়ঃ কথং তমজিতং যুধি
15.11
উগ্রধন্বানমুগ্রেষুং বর্তমানং রথোত্তমে
পরেষামুত্তমাঙ্গানি প্রচিন্বন্তং শিতেষুভিঃ
15.12
পাণ্ডবানাং মহত্সৈন্যং যং দৃষ্ট্বোদ্যন্তমাহবে
কালাগ্নিমিব দুর্ধর্ষং সমবেষ্টত নিত্যশঃ
15.13
পরিকৃষ্য স সেনাং মে দশরাত্রমনীকহা
জগামাস্তমিবাদিত্যঃ কৃত্বা কর্ম সুদুষ্করম্
15.14
যঃ স শক্র ইবাক্ষয্যং বর্ষং শরময়ং সৃজন্
জঘান যুধি যোধানামর্বুদং দশভির্দিনৈঃ
15.15
স শেতে নিষ্টনন্ভূমৌ বাতরুগ্ণ ইব দ্রুমঃ
মম দুর্মন্ত্রিতেনাসৌ যথা নার্হঃ স ভারতঃ
15.16
কথং শাংতনবং দৃষ্ট্বা পাণ্ডবানামনীকিনী
প্রহর্তুমশকত্তত্র ভীষ্মং ভীমপরাক্রমম্
15.17
কথং ভীষ্মেণ সংগ্রামমকুর্বন্পাণ্ডুনন্দনাঃ
কথং চ নাজয়দ্ভীষ্মো দ্রোণে জীবতি সংজয়
15.18
কৃপে সংনিহিতে তত্র ভরদ্বাজাত্মজে তথা
ভীষ্মঃ প্রহরতাং শ্রেষ্ঠঃ কথং স নিধনং গতঃ
15.19
কথং চাতিরথস্তেন পাঞ্চাল্যেন শিখণ্ডিনা
ভীষ্মো বিনিহতো যুদ্ধে দেবৈরপি দুরুত্সহঃ
15.20
যঃ স্পর্ধতে রণে নিত্যং জামদগ্ন্যং মহাবলম্
অজিতং জামদগ্ন্যেন শক্রতুল্যপরাক্রমম্
15.21
তং হতং সমরে ভীষ্মং মহারথবলোচিতম্
সংজয়াচক্ষ্ব মে বীরং যেন শর্ম ন বিদ্মহে
15.22
মামকাঃ কে মহেষ্বাসা নাজহুঃ সংজয়াচ্যুতম্
দুর্যোধনসমাদিষ্টাঃ কে বীরাঃ পর্যবারয়ন্
15.23
যচ্ছিখণ্ডিমুখাঃ সর্বে পাণ্ডবা ভীষ্মমভ্যয়ুঃ
কচ্চিন্ন কুরবো ভীতাস্তত্যজুঃ সংজয়াচ্যুতম্
15.24
মৌর্বীঘোষস্তনয়িত্নুঃ পৃষত্কপৃষতো মহান্
ধনুর্হ্রাদমহাশব্দো মহামেঘ ইবোন্নতঃ
15.25
যদভ্যবর্ষত্কৌন্তেয়ান্সপাঞ্চালান্সসৃঞ্জয়ান্
নিঘ্নন্পররথান্বীরো দানবানিব বজ্রভৃৎ
15.26
ইষ্বস্ত্রসাগরং ঘোরং বাণগ্রাহং দুরাসদম্
কার্মুকোর্মিণমক্ষয্যমদ্বীপং সমরেঽপ্লবম্
গদাসিমকরাবর্তং হয়গ্রাহং গজাকুলম্
15.27
হয়ান্গজান্পদাতাংশ্চ রথাংশ্চ তরসা বহূন্
নিমজ্জয়ন্তং সমরে পরবীরাপহারিণম্
15.28
বিদহ্যমানং কোপেন তেজসা চ পরংতপম্
বেলেব মকরাবাসং কে বীরাঃ পর্যবারয়ন্
15.29
ভীষ্মো যদকরোত্কর্ম সমরে সংজয়ারিহা
দুর্যোধনহিতার্থায় কে তদাস্য পুরোঽভবন্
15.30
কেঽরক্ষন্দক্ষিণং চক্রং ভীষ্মস্যামিততেজসঃ
পৃষ্ঠতঃ কে পরান্বীরা উপাসেধন্যতব্রতাঃ
15.31
কে পুরস্তাদবর্তন্ত রক্ষন্তো ভীষ্মমন্তিকে
কেঽরক্ষন্নুত্তরং চক্রং বীরা বীরস্য যুধ্যতঃ
15.32
বামে চক্রে বর্তমানাঃ কেঽঘ্নন্সংজয় সৃঞ্জয়ান্
সমেতাগ্রমনীকেষু কেঽভ্যরক্ষন্দুরাসদম্
15.33
পার্শ্বতঃ কেঽভ্যবর্তন্ত গচ্ছন্তো দুর্গমাং গতিম্
সমূহে কে পরান্বীরান্প্রত্যয়ুধ্যন্ত সংজয়
15.34
রক্ষ্যমাণঃ কথং বীরৈর্গোপ্যমানাশ্চ তেন তে
দুর্জয়ানামনীকানি নাজয়ংস্তরসা যুধি
15.35
সর্বলোকেশ্বরস্যেব পরমেষ্ঠিপ্রজাপতেঃ
কথং প্রহর্তুমপি তে শেকুঃ সংজয় পাণ্ডবাঃ
15.36
যস্মিন্দ্বীপে সমাশ্রিত্য যুধ্যন্তি কুরবঃ পরৈঃ
তং নিমগ্নং নরব্যাঘ্রং ভীষ্মং শংসসি সংজয়
15.37
যস্য বীর্যে সমাশ্বস্য মম পুত্রো বৃহদ্বলঃ
ন পাণ্ডবানগণয়ত্কথং স নিহতঃ পরৈঃ
15.38
যঃ পুরা বিবুধৈঃ সেন্দ্রৈঃ সাহায্যে যুদ্ধদুর্মদঃ
কাঙ্ক্ষিতো দানবান্ঘ্নদ্ভিঃ পিতা মম মহাব্রতঃ
15.39
যস্মিঞ্জাতে মহাবীর্যে শংতনুর্লোকশংকরে
শোকং দুঃখং চ দৈন্যং চ প্রাজহাত্পুত্রলক্ষ্মণি
15.40
প্রজ্ঞা পরায়ণং তজ্জ্ঞং সদ্ধর্মনিরতং শুচিম্
বেদবেদাঙ্গতত্ত্বজ্ঞং কথং শংসসি মে হতম্
15.41
সর্বাস্ত্রবিনয়োপেতং দান্তং শান্তং মনস্বিনম্
হতং শাংতনবং শ্রুত্বা মন্যে শেষং বলং হতম্
15.42
ধর্মাদধর্মো বলবান্সংপ্রাপ্ত ইতি মে মতিঃ
যত্র বৃদ্ধং গুরুং হত্বা রাজ্যমিচ্ছন্তি পাণ্ডবাঃ
15.43
জামদগ্ন্যঃ পুরা রামঃ সর্বাস্ত্রবিদনুত্তমঃ
অম্বার্থমুদ্যতঃ সংখ্যে ভীষ্মেণ যুধি নির্জিতঃ
15.44
তমিন্দ্রসমকর্মাণং ককুদং সর্বধন্বিনাম্
হতং শংসসি ভীষ্মং মে কিং নু দুঃখমতঃ পরম্
15.45
অসকৃত্ক্ষত্রিয়ব্রাতাঃ সংখ্যে যেন বিনির্জিতাঃ
জামদগ্ন্যস্তথা রামঃ পরবীরনিঘাতিনা
15.46
তস্মান্নূনং মহাবীর্যাদ্ভার্গবাদ্যুদ্ধদুর্মদাৎ
তেজোবীর্যবলৈর্ভূয়াঞ্শিখণ্ডী দ্রুপদাত্মজঃ
15.47
যঃ শূরং কৃতিনং যুদ্ধে সর্বশাস্ত্রবিশারদম্
পরমাস্ত্রবিদং বীরং জঘান ভরতর্ষভম্
15.48
কে বীরাস্তমমিত্রঘ্নমন্বয়ুঃ শত্রুসংসদি
শংস মে তদ্যথা বৃত্তং যুদ্ধং ভীষ্মস্য পাণ্ডবৈঃ
15.49
যোষেব হতবীরা মে সেনা পুত্রস্য সংজয়
অগোপমিব চোদ্ভ্রান্তং গোকুলং তদ্বলং মম
15.50
পৌরুষং সর্বলোকস্য পরং যস্য মহাহবে
পরাসিক্তে চ বস্তস্মিন্কথমাসীন্মনস্তদা
15.51
জীবিতেঽপ্যদ্য সামর্থ্যং কিমিবাস্মাসু সংজয়
ঘাতয়িত্বা মহাবীর্যং পিতরং লোকধার্মিকম্
15.52
অগাধে সলিলে মগ্নাং নাবং দৃষ্ট্বেব পারগাঃ
ভীষ্মে হতে ভৃশং দুঃখান্মন্যে শোচন্তি পুত্রকাঃ
15.53
অদ্রিসারময়ং নূনং সুদৃঢং হৃদয়ং মম
যচ্ছ্রুত্বা পুরুষব্যাঘ্রং হতং ভীষ্মং ন দীর্যতে
15.54
যস্মিন্নস্ত্রং চ মেধা চ নীতিশ্চ ভরতর্ষভে
অপ্রমেয়াণি দুর্ধর্ষে কথং স নিহতো যুধি
15.55
ন চাস্ত্রেণ ন শৌর্যেণ তপসা মেধয়া ন চ
ন ধৃত্যা ন পুনস্ত্যাগান্মৃত্যোঃ কশ্চিদ্বিমুচ্যতে
15.56
কালো নূনং মহাবীর্যঃ সর্বলোকদুরত্যয়ঃ
যত্র শাংতনবং ভীষ্মং হতং শংসসি সংজয়
15.57
পুত্রশোকাভিসংতপ্তো মহদ্দুঃখমচিন্তয়ন্
আশংসেঽহং পুরা ত্রাণং ভীষ্মাচ্ছংতনুনন্দনাৎ
15.58
যদাদিত্যমিবাপশ্যত্পতিতং ভুবি সংজয়
দুর্যোধনঃ শাংতনবং কিং তদা প্রত্যপদ্যত
15.59
নাহং স্বেষাং পরেষাং বা বুদ্ধ্যা সংজয় চিন্তয়ন্
শেষং কিংচিত্প্রপশ্যামি প্রত্যনীকে মহীক্ষিতাম্
15.60
দারুণঃ ক্ষত্রধর্মোঽয়মৃষিভিঃ সংপ্রদর্শিতঃ
যত্র শাংতনবং হত্বা রাজ্যমিচ্ছন্তি পাণ্ডবাঃ
15.61
বয়ং বা রাজ্যমিচ্ছামো ঘাতয়িত্বা পিতামহম্
ক্ষত্রধর্মে স্থিতাঃ পার্থা নাপরাধ্যন্তি পুত্রকাঃ
15.62
এতদার্যেণ কর্তব্যং কৃচ্ছ্রাস্বাপত্সু সংজয়
পরাক্রমঃ পরং শক্ত্যা তচ্চ তস্মিন্প্রতিষ্ঠিতম্
15.63
অনীকানি বিনিঘ্নন্তং হ্রীমন্তমপরাজিতম্
কথং শাংতনবং তাত পাণ্ডুপুত্রা ন্যপাতয়ন্
15.64
কথং যুক্তান্যনীকানি কথং যুদ্ধং মহাত্মভিঃ
কথং বা নিহতো ভীষ্মঃ পিতা সংজয় মে পরৈঃ
15.65
দুর্যোধনশ্চ কর্ণশ্চ শকুনিশ্চাপি সৌবলঃ
দুঃশাসনশ্চ কিতবো হতে ভীষ্মে কিমব্রুবন্
15.66
যচ্ছরীরৈরুপস্তীর্ণাং নরবারণবাজিনাম্
শরশক্তিগদাখড্গতোমরাক্ষাং ভয়াবহাম্
15.67
প্রাবিশন্কিতবা মন্দাঃ সভাং যুধি দুরাসদাম্
প্রাণদ্যূতে প্রতিভয়ে কেঽদীব্যন্ত নরর্ষভাঃ
15.68
কেঽজয়ন্কে জিতাস্তত্র হৃতলক্ষা নিপাতিতাঃ
অন্যে ভীষ্মাচ্ছাংতনবাত্তন্মমাচক্ষ্ব সংজয়
15.69
ন হি মে শান্তিরস্তীহ যুধি দেবব্রতং হতম্
পিতরং ভীমকর্মাণং শ্রুত্বা মে দুঃখমাবিশৎ
15.70
আর্তিং মে হৃদয়ে রূঢাং মহতীং পুত্রকারিতাম্
ত্বং সিঞ্চন্সর্পিষেবাগ্নিমুদ্দীপয়সি সংজয়
15.71
মহান্তং ভারমুদ্যম্য বিশ্রুতং সার্বলৌকিকম্
দৃষ্ট্বা বিনিহতং ভীষ্মং মন্যে শোচন্তি পুত্রকাঃ
15.72
শ্রোষ্যামি তানি দুঃখানি দুর্যোধনকৃতান্যহম্
তস্মান্মে সর্বমাচক্ষ্ব যদ্বৃত্তং তত্র সংজয়
15.73
সংগ্রামে পৃথিবীশানাং মন্দস্যাবুদ্ধিসংভবম্
অপনীতং সুনীতং বা তন্মমাচক্ষ্ব সংজয়
15.74
যত্কৃতং তত্র ভীষ্মেণ সংগ্রামে জয়মিচ্ছতা
তেজোয়ুক্তং কৃতাস্ত্রেণ শংস তচ্চাপ্যশেষতঃ
15.75
যথা তদভবদ্যুদ্ধং কুরুপাণ্ডবসেনয়োঃ
ক্রমেণ যেন যস্মিংশ্চ কালে যচ্চ যথা চ তৎ