Utshovঅধ্যায় 16
16.1
সংজয় উবাচ
ত্বদ্যুক্তোঽয়মনুপ্রশ্নো মহারাজ যথার্হসি
ন তু দুর্যোধনে দোষমিমমাসক্তুমর্হসি
16.2
য আত্মনো দুশ্চরিতাদশুভং প্রাপ্নুয়ান্নরঃ
এনসা তেন নান্যং স উপাশঙ্কিতুমর্হতি
16.3
মহারাজ মনুষ্যেষু নিন্দ্যং যঃ সর্বমাচরেৎ
স বধ্যঃ সর্বলোকস্য নিন্দিতানি সমাচরন্
16.4
নিকারো নিকৃতিপ্রজ্ঞৈঃ পাণ্ডবৈস্ত্বত্প্রতীক্ষয়া
অনুভূতঃ সহামাত্যৈঃ ক্ষান্তং চ সুচিরং বনে
16.5
হয়ানাং চ গজানাং চ শূরাণাং চামিতৌজসাম্
প্রত্যক্ষং যন্ময়া দৃষ্টং দৃষ্টং যোগবলেন চ
16.6
শৃণু তত্পৃথিবীপাল মা চ শোকে মনঃ কৃথাঃ
দিষ্টমেতত্পুরা নূনমেবংভাবি নরাধিপ
16.7
নমস্কৃত্বা পিতুস্তেঽহং পারাশর্যায় ধীমতে
যস্য প্রসাদাদ্দিব্যং মে প্রাপ্তং জ্ঞানমনুত্তমম্
16.8
দৃষ্টিশ্চাতীন্দ্রিয়া রাজন্দূরাচ্ছ্রবণমেব চ
পরচিত্তস্য বিজ্ঞানমতীতানাগতস্য চ
16.9
ব্যুত্থিতোত্পত্তিবিজ্ঞানমাকাশে চ গতিঃ সদা
শস্ত্রৈরসঙ্গো যুদ্ধেষু বরদানান্মহাত্মনঃ
16.10
শৃণু মে বিস্তরেণেদং বিচিত্রং পরমাদ্ভুতম্
ভারতানাং মহদ্যুদ্ধং যথাভূল্লোমহর্ষণম্
16.11
তেষ্বনীকেষু যত্তেষু ব্যূঢেষু চ বিধানতঃ
দুর্যোধনো মহারাজ দুঃশাসনমথাব্রবীৎ
16.12
দুঃশাসন রথাস্তূর্ণং যুজ্যন্তাং ভীষ্মরক্ষিণঃ
অনীকানি চ সর্বাণি শীঘ্রং ত্বমনুচোদয়
16.13
অয়ং মা সমনুপ্রাপ্তো বর্ষপূগাভিচিন্তিতঃ
পাণ্ডবানাং সসৈন্যানাং কুরূণাং চ সমাগমঃ
16.14
নাতঃ কার্যতমং মন্যে রণে ভীষ্মস্য রক্ষণাৎ
হন্যাদ্গুপ্তো হ্যসৌ পার্থান্সোমকাংশ্চ সসৃঞ্জয়ান্
16.15
অব্রবীচ্চ বিশুদ্ধাত্মা নাহং হন্যাং শিখণ্ডিনম্
শ্রূয়তে স্ত্রী হ্যসৌ পূর্বং তস্মাদ্বর্জ্যো রণে মম
16.16
তস্মাদ্ভীষ্মো রক্ষিতব্যো বিশেষেণেতি মে মতিঃ
শিখণ্ডিনো বধে যত্তাঃ সর্বে তিষ্ঠন্তু মামকাঃ
16.17
তথা প্রাচ্যাঃ প্রতীচ্যাশ্চ দাক্ষিণাত্যোত্তরাপথাঃ
সর্বশস্ত্রাস্ত্রকুশলাস্তে রক্ষন্তু পিতামহম্
16.18
অরক্ষ্যমাণং হি বৃকো হন্যাত্সিংহং মহাবলম্
মা সিংহং জম্বুকেনেব ঘাতয়ামঃ শিখণ্ডিনা
16.19
বামং চক্রং যুধামন্যুরুত্তমৌজাশ্চ দক্ষিণম্
গোপ্তারৌ ফল্গুনস্যৈতৌ ফল্গুনোঽপি শিখণ্ডিনঃ
16.20
সংরক্ষ্যমাণঃ পার্থেন ভীষ্মেণ চ বিবর্জিতঃ
যথা ন হন্যাদ্গাঙ্গেয়ং দুঃশাসন তথা কুরু
16.21
ততো রজন্যাং ব্যুষ্টায়াং শব্দঃ সমভবন্মহান্
ক্রোশতাং ভূমিপালানাং যুজ্যতাং যুজ্যতামিতি
16.22
শঙ্খদুন্দুভিনির্ঘোষৈঃ সিংহনাদৈশ্চ ভারত
হয়হেষিতশব্দৈশ্চ রথনেমিস্বনৈস্তথা
16.23
গজানাং বৃংহতাং চৈব যোধানাং চাভিগর্জতাম্
ক্ষ্বেডিতাস্ফোটিতোত্ক্রুষ্টৈস্তুমুলং সর্বতোঽভবৎ
16.24
উদতিষ্ঠন্মহারাজ সর্বং যুক্তমশেষতঃ
সূর্যোদয়ে মহত্সৈন্যং কুরুপাণ্ডবসেনয়োঃ
তব রাজেন্দ্র পুত্রাণাং পাণ্ডবানাং তথৈব চ
16.25
তত্র নাগা রথাশ্চৈব জাম্বূনদপরিষ্কৃতাঃ
বিভ্রাজমানা দৃশ্যন্তে মেঘা ইব সবিদ্যুতঃ
16.26
রথানীকান্যদৃশ্যন্ত নগরাণীব ভূরিশঃ
অতীব শুশুভে তত্র পিতা তে পূর্ণচন্দ্রবৎ
16.27
ধনুর্ভিরৃষ্টিভিঃ খড্গৈর্গদাভিঃ শক্তিতোমরৈঃ
যোধাঃ প্রহরণৈঃ শুভ্রৈঃ স্বেষ্বনীকেষ্ববস্থিতাঃ
16.28
গজা রথাঃ পদাতাশ্চ তুরগাশ্চ বিশাং পতে
ব্যতিষ্ঠন্বাগুরাকারাঃ শতশোঽথ সহস্রশঃ
16.29
ধ্বজা বহুবিধাকারা ব্যদৃশ্যন্ত সমুচ্ছ্রিতাঃ
স্বেষাং চৈব পরেষাং চ দ্যুতিমন্তঃ সহস্রশঃ
16.30
কাঞ্চনা মণিচিত্রাঙ্গা জ্বলন্ত ইব পাবকাঃ
অর্চিষ্মন্তো ব্যরোচন্ত ধ্বজা রাজ্ঞাং সহস্রশঃ
16.31
মহেন্দ্রকেতবঃ শুভ্রা মহেন্দ্রসদনেষ্বিব
সংনদ্ধাস্তেষু তে বীরা দদৃশুর্যুদ্ধকাঙ্ক্ষিণঃ
16.32
উদ্যতৈরায়ুধৈশ্চিত্রাস্তলবদ্ধাঃ কলাপিনঃ
ঋষভাক্ষা মনুষ্যেন্দ্রাশ্চমূমুখগতা বভুঃ
16.33
শকুনিঃ সৌবলঃ শল্যঃ সৈন্ধবোঽথ জয়দ্রথঃ
বিন্দানুবিন্দাবাবন্ত্যৌ কাম্বোজশ্চ সুদক্ষিণঃ
16.34
শ্রুতায়ুধশ্চ কালিঙ্গো জয়ত্সেনশ্চ পার্থিবঃ
বৃহদ্বলশ্চ কৌশল্যঃ কৃতবর্মা চ সাত্বতঃ
16.35
দশৈতে পুরুষব্যাঘ্রাঃ শূরাঃ পরিঘবাহবঃ
অক্ষৌহিণীনাং পতয়ো যজ্বানো ভূরিদক্ষিণাঃ
16.36
এতে চান্যে চ বহবো দুর্যোধনবশানুগাঃ
রাজানো রাজপুত্রাশ্চ নীতিমন্তো মহাবলাঃ
16.37
সংনদ্ধাঃ সমদৃশ্যন্ত স্বেষ্বনীকেষ্ববস্থিতাঃ
বদ্ধকৃষ্ণাজিনাঃ সর্বে ধ্বজিনো মুঞ্জমালিনঃ
16.38
সৃষ্টা দুর্যোধনস্যার্থে ব্রহ্মলোকায় দীক্ষিতাঃ
সমৃদ্ধা দশ বাহিন্যঃ পরিগৃহ্য ব্যবস্থিতাঃ
16.39
একাদশী ধার্তরাষ্ট্রী কৌরবাণাং মহাচমূঃ
অগ্রতঃ সর্বসৈন্যানাং যত্র শাংতনবোঽগ্রণীঃ
16.40
শ্বেতোষ্ণীষং শ্বেতহয়ং শ্বেতবর্মাণমচ্যুতম্
অপশ্যাম মহারাজ ভীষ্মং চন্দ্রমিবোদিতম্
16.41
হেমতালধ্বজং ভীষ্মং রাজতে স্যন্দনে স্থিতম্
শ্বেতাভ্র ইব তীক্ষ্ণাংশুং দদৃশুঃ কুরুপাণ্ডবাঃ
16.42
দৃষ্ট্বা চমূমুখে ভীষ্মং সমকম্পন্ত পাণ্ডবাঃ
সৃঞ্জয়াশ্চ মহেষ্বাসা ধৃষ্টদ্যুম্নপুরোগমাঃ
16.43
জৃম্ভমাণং মহাসিংহং দৃষ্ট্বা ক্ষুদ্রমৃগা যথা
ধৃষ্টদ্যুম্নমুখাঃ সর্বে সমুদ্বিবিজিরে মুহুঃ
16.44
একাদশৈতাঃ শ্রীজুষ্টা বাহিন্যস্তব ভারত
পাণ্ডবানাং তথা সপ্ত মহাপুরুষপালিতাঃ
16.45
উন্মত্তমকরাবর্তৌ মহাগ্রাহসমাকুলৌ
যুগান্তে সমুপেতৌ দ্বৌ দৃশ্যেতে সাগরাবিব
16.46
নৈব নস্তাদৃশো রাজন্দৃষ্টপূর্বো ন চ শ্রুতঃ
অনীকানাং সমেতানাং সমবায়স্তথাবিধঃ