Utshovঅধ্যায় 17
17.1
সংজয় উবাচ
যথা স ভগবান্ব্যাসঃ কৃষ্ণদ্বৈপায়নোঽব্রবীৎ
তথৈব সহিতাঃ সর্বে সমাজগ্মুর্মহীক্ষিতঃ
17.2
মঘাবিষয়গঃ সোমস্তদ্দিনং প্রত্যপদ্যত
দীপ্যমানাশ্চ সংপেতুর্দিবি সপ্ত মহাগ্রহাঃ
17.3
দ্বিধাভূত ইবাদিত্য উদয়ে প্রত্যদৃশ্যত
জ্বলন্ত্যা শিখয়া ভূয়ো ভানুমানুদিতো দিবি
17.4
ববাশিরে চ দীপ্তায়াং দিশি গোমায়ুবায়সাঃ
লিপ্সমানাঃ শরীরাণি মাংসশোণিতভোজনাঃ
17.5
অহন্যহনি পার্থানাং বৃদ্ধঃ কুরুপিতামহঃ
ভরদ্বাজাত্মজশ্চৈব প্রাতরুত্থায় সংয়তৌ
17.6
জয়োঽস্তু পাণ্ডুপুত্রাণামিত্যূচতুররিংদমৌ
যুয়ুধাতে তবার্থায় যথা স সময়ঃ কৃতঃ
17.7
সর্বধর্মবিশেষজ্ঞঃ পিতা দেবব্রতস্তব
সমানীয় মহীপালানিদং বচনমব্রবীৎ
17.8
ইদং বঃ ক্ষত্রিয়া দ্বারং স্বর্গায়াপাবৃতং মহৎ
গচ্ছধ্বং তেন শক্রস্য ব্রহ্মণশ্চ সলোকতাম্
17.9
এষ বঃ শাশ্বতঃ পন্থাঃ পূর্বৈঃ পূর্বতরৈর্গতঃ
সংভাবয়ত চাত্মানমব্যগ্রমনসো যুধি
17.10
নাভাগো হি যয়াতিশ্চ মান্ধাতা নহুষো নৃগঃ
সংসিদ্ধাঃ পরমং স্থানং গতাঃ কর্মভিরীদৃশৈঃ
17.11
অধর্মঃ ক্ষত্রিয়স্যৈষ যদ্ব্যাধিমরণং গৃহে
যদাজৌ নিধনং যাতি সোঽস্য ধর্মঃ সনাতনঃ
17.12
এবমুক্তা মহীপালা ভীষ্মেণ ভরতর্ষভ
নির্যয়ুঃ স্বান্যনীকানি শোভয়ন্তো রথোত্তমৈঃ
17.13
স তু বৈকর্তনঃ কর্ণঃ সামাত্যঃ সহ বন্ধুভিঃ
ন্যাসিতঃ সমরে শস্ত্রং ভীষ্মেণ ভরতর্ষভ
17.14
অপেতকর্ণাঃ পুত্রাস্তে রাজানশ্চৈব তাবকাঃ
নির্যয়ুঃ সিংহনাদেন নাদয়ন্তো দিশো দশ
17.15
শ্বেতৈশ্ছত্রৈঃ পতাকাভির্ধ্বজবারণবাজিভিঃ
তান্যনীকান্যশোভন্ত রথৈরথ পদাতিভিঃ
17.16
ভেরীপণবশব্দৈশ্চ পটহানাং চ নিস্বনৈঃ
রথনেমিনিনাদৈশ্চ বভূবাকুলিতা মহী
17.17
কাঞ্চনাঙ্গদকেয়ূরৈঃ কার্মুকৈশ্চ মহারথাঃ
ভ্রাজমানা ব্যদৃশ্যন্ত জঙ্গমাঃ পর্বতা ইব
17.18
তালেন মহতা ভীষ্মঃ পঞ্চতারেণ কেতুনা
বিমলাদিত্যসংকাশস্তস্থৌ কুরুচমূপতিঃ
17.19
যে ত্বদীয়া মহেষ্বাসা রাজানো ভরতর্ষভ
অবর্তন্ত যথাদেশং রাজঞ্শাংতনবস্য তে
17.20
স তু গোবাসনঃ শৈব্যঃ সহিতঃ সর্বরাজভিঃ
যয়ৌ মাতঙ্গরাজেন রাজার্হেণ পতাকিনা
পদ্মবর্ণস্ত্বনীকানাং সর্বেষামগ্রতঃ স্থিতঃ
17.21
অশ্বত্থামা যয়ৌ যত্তঃ সিংহলাঙ্গূলকেতনঃ
শ্রুতায়ুশ্চিত্রসেনশ্চ পুরুমিত্রো বিবিংশতিঃ
17.22
শল্যো ভূরিশ্রবাশ্চৈব বিকর্ণশ্চ মহারথঃ
এতে সপ্ত মহেষ্বাসা দ্রোণপুত্রপুরোগমাঃ
স্যন্দনৈর্বরবর্ণাভৈর্ভীষ্মস্যাসন্পুরঃসরাঃ
17.23
তেষামপি মহোত্সেধাঃ শোভয়ন্তো রথোত্তমান্
ভ্রাজমানা ব্যদৃশ্যন্ত জাম্বূনদময়া ধ্বজাঃ
17.24
জাম্বূনদময়ী বেদিঃ কমণ্ডলুবিভূষিতা
কেতুরাচার্যমুখ্যস্য দ্রোণস্য ধনুষা সহ
17.25
অনেকশতসাহস্রমনীকমনুকর্ষতঃ
মহান্দুর্যোধনস্যাসীন্নাগো মণিময়ো ধ্বজঃ
17.26
তস্য পৌরবকালিঙ্গৌ কাম্বোজশ্চ সুদক্ষিণঃ
ক্ষেমধন্বা সুমিত্রশ্চ তস্থুঃ প্রমুখতো রথাঃ
17.27
স্যন্দনেন মহার্হেণ কেতুনা বৃষভেণ চ
প্রকর্ষন্নিব সেনাগ্রং মাগধশ্চ নৃপো যয়ৌ
17.28
তদঙ্গপতিনা গুপ্তং কৃপেণ চ মহাত্মনা
শারদাভ্রচয়প্রখ্যং প্রাচ্যানামভবদ্বলম্
17.29
অনীকপ্রমুখে তিষ্ঠন্বরাহেণ মহায়শাঃ
শুশুভে কেতুমুখ্যেন রাজতেন জয়দ্রথঃ
17.30
শতং রথসহস্রাণাং তস্যাসন্বশবর্তিনঃ
অষ্টৌ নাগসহস্রাণি সাদিনাময়ুতানি ষট্
17.31
তত্সিন্ধুপতিনা রাজন্পালিতং ধ্বজিনীমুখম্
অনন্তরথনাগাশ্বমশোভত মহদ্বলম্
17.32
ষষ্ট্যা রথসহস্রৈস্তু নাগানাময়ুতেন চ
পতিঃ সর্বকলিঙ্গানাং যয়ৌ কেতুমতা সহ
17.33
তস্য পর্বতসংকাশা ব্যরোচন্ত মহাগজাঃ
যন্ত্রতোমরতূণীরৈঃ পতাকাভিশ্চ শোভিতাঃ
17.34
শুশুভে কেতুমুখ্যেন পাদপেন কলিঙ্গপঃ
শ্বেতচ্ছত্রেণ নিষ্কেণ চামরব্যজনেন চ
17.35
কেতুমানপি মাতঙ্গং বিচিত্রপরমাঙ্কুশম্
আস্থিতঃ সমরে রাজন্মেঘস্থ ইব ভানুমান্
17.36
তেজসা দীপ্যমানস্তু বারণোত্তমমাস্থিতঃ
ভগদত্তো যয়ৌ রাজা যথা বজ্রধরস্তথা
17.37
গজস্কন্ধগতাবাস্তাং ভগদত্তেন সংমিতৌ
বিন্দানুবিন্দাবাবন্ত্যৌ কেতুমন্তমনুব্রতৌ
17.38
স রথানীকবান্ব্যূহো হস্ত্যঙ্গোত্তমশীর্ষবান্
বাজিপক্ষঃ পতন্নুগ্রঃ প্রাহরত্সর্বতোমুখঃ
17.39
দ্রোণেন বিহিতো রাজন্রাজ্ঞা শাংতনবেন চ
তথৈবাচার্যপুত্রেণ বাহ্লীকেন কৃপেণ চ