অধ্যায় 18

18.1

সংজয় উবাচ
ততো মুহূর্তাত্তুমুলঃ শব্দো হৃদয়কম্পনঃ
অশ্রূয়ত মহারাজ যোধানাং প্রয়ুয়ুত্সতাম্

শঙ্খদুন্দুভিনির্ঘোষৈর্বারণানাং চ বৃংহিতৈঃ
রথানাং নেমিঘোষৈশ্চ দীর্যতীব বসুংধরা

হয়ানাং হেষমাণানাং যোধানাং তত্র গর্জতাম্
ক্ষণেন খং দিশশ্চৈব শব্দেনাপূরিতং তদা

পুত্রাণাং তব দুর্ধর্ষ পাণ্ডবানাং তথৈব চ
সমকম্পন্ত সৈন্যানি পরস্পরসমাগমে

তত্র নাগা রথাশ্চৈব জাম্বূনদবিভূষিতাঃ
ভ্রাজমানা ব্যদৃশ্যন্ত মেঘা ইব সবিদ্যুতঃ

ধ্বজা বহুবিধাকারাস্তাবকানাং নরাধিপ
কাঞ্চনাঙ্গদিনো রেজুর্জ্বলিতা ইব পাবকাঃ

স্বেষাং চৈব পরেষাং চ সমদৃশ্যন্ত ভারত
মহেন্দ্রকেতবঃ শুভ্রা মহেন্দ্রসদনেষ্বিব

কাঞ্চনৈঃ কবচৈর্বীরা জ্বলনার্কসমপ্রভৈঃ
সংনদ্ধাঃ প্রত্যদৃশ্যন্ত গ্রহাঃ প্রজ্বলিতা ইব

উদ্যতৈরায়ুধৈশ্চিত্রৈস্তলবদ্ধাঃ পতাকিনঃ
ঋষভাক্ষা মহেষ্বাসাশ্চমূমুখগতা বভুঃ

পৃষ্ঠগোপাস্তু ভীষ্মস্য পুত্রাস্তব নরাধিপ
দুঃশাসনো দুর্বিষহো দুর্মুখো দুঃসহস্তথা

বিবিংশতিশ্চিত্রসেনো বিকর্ণশ্চ মহারথঃ
সত্যব্রতঃ পুরুমিত্রো জয়ো ভূরিশ্রবাঃ শলঃ

রথা বিংশতিসাহস্রাস্তথৈষামনুয়ায়িনঃ
অভীষাহাঃ শূরসেনাঃ শিবয়োঽথ বসাতয়ঃ

শাল্বা মত্স্যাস্তথাম্বষ্ঠাস্ত্রিগর্তাঃ কেকয়াস্তথা
সৌবীরাঃ কিতবাঃ প্রাচ্যাঃ প্রতীচ্যোদীচ্যমালবাঃ

দ্বাদশৈতে জনপদাঃ সর্বে শূরাস্তনুত্যজঃ
মহতা রথবংশেন তেঽভ্যরক্ষন্পিতামহম্

অনীকং দশসাহস্রং কুঞ্জরাণাং তরস্বিনাম্
মাগধো যেন নৃপতিস্তদ্রথানীকমন্বয়াৎ

রথানাং চক্ররক্ষাশ্চ পাদরক্ষাশ্চ দন্তিনাম্
অভূবন্বাহিনীমধ্যে শতানাময়ুতানি ষট্

পাদাতাশ্চাগ্রতোঽগচ্ছন্ধনুশ্চর্মাসিপাণয়ঃ
অনেকশতসাহস্রা নখরপ্রাসয়োধিনঃ

অক্ষৌহিণ্যো দশৈকা চ তব পুত্রস্য ভারত
অদৃশ্যন্ত মহারাজ গঙ্গেব যমুনান্তরে