Utshovঅধ্যায় 19
19.1
ধৃতরাষ্ট্র উবাচ
অক্ষৌহিণ্যো দশৈকাং চ ব্যূঢাং দৃষ্ট্বা যুধিষ্ঠিরঃ
কথমল্পেন সৈন্যেন প্রত্যব্যূহত পাণ্ডবঃ
19.2
যো বেদ মানুষং ব্যূহং দৈবং গান্ধর্বমাসুরম্
কথং ভীষ্মং স কৌন্তেয়ঃ প্রত্যব্যূহত পাণ্ডবঃ
19.3
সংজয় উবাচ
ধার্তরাষ্ট্রাণ্যনীকানি দৃষ্ট্বা ব্যূঢানি পাণ্ডবঃ
অভ্যভাষত ধর্মাত্মা ধর্মরাজো ধনংজয়ম্
19.4
মহর্ষের্বচনাত্তাত বেদয়ন্তি বৃহস্পতেঃ
সংহতান্যোধয়েদল্পান্কামং বিস্তারয়েদ্বহূন্
19.5
সূচীমুখমনীকং স্যাদল্পানাং বহুভিঃ সহ
অস্মাকং চ তথা সৈন্যমল্পীয়ঃ সুতরাং পরৈঃ
19.6
এতদ্বচনমাজ্ঞায় মহর্ষের্ব্যূহ পাণ্ডব
তচ্ছ্রুত্বা ধর্মরাজস্য প্রত্যভাষত ফল্গুনঃ
19.7
এষ ব্যূহামি তে রাজন্ব্যূহং পরমদুর্জয়ম্
অচলং নাম বজ্রাখ্যং বিহিতং বজ্রপাণিনা
19.8
যঃ স বাত ইবোদ্ধূতঃ সমরে দুঃসহঃ পরৈঃ
স নঃ পুরো যোত্স্যতি বৈ ভীমঃ প্রহরতাং বরঃ
19.9
তেজাংসি রিপুসৈন্যানাং মৃদ্নন্পুরুষসত্তমঃ
অগ্রেঽগ্রণীর্যাস্যতি নো যুদ্ধোপায়বিচক্ষণঃ
19.10
যং দৃষ্ট্বা পার্থিবাঃ সর্বে দুর্যোধনপুরোগমাঃ
নিবর্তিষ্যন্তি সংভ্রান্তাঃ সিংহং ক্ষুদ্রমৃগা ইব
19.11
তং সর্বে সংশ্রয়িষ্যামঃ প্রাকারমকুতোভয়ম্
ভীমং প্রহরতাং শ্রেষ্ঠং বজ্রপাণিমিবামরাঃ
19.12
ন হি সোঽস্তি পুমাঁল্লোকে যঃ সংক্রুদ্ধং বৃকোদরম্
দ্রষ্টুমত্যুগ্রকর্মাণং বিষহেত নরর্ষভম্
19.13
ভীমসেনো গদাং বিভ্রদ্বজ্রসারময়ীং দৃঢাম্
চরন্বেগেন মহতা সমুদ্রমপি শোষয়েৎ
19.14
কেকয়া ধৃষ্টকেতুশ্চ চেকিতানশ্চ বীর্যবান্
এত তিষ্ঠন্তি সামাত্যাঃ প্রেক্ষকাস্তে নরেশ্বর
19.15
ধৃতরাষ্ট্রস্য দায়াদা ইতি বীভত্সুরব্রবীৎ
ব্রুবাণং তু তথা পার্থং সর্বসৈন্যানি মারিষ
অপূজয়ংস্তদা বাগ্ভিরনুকূলাভিরাহবে
19.16
এবমুক্ত্বা মহাবাহুস্তথা চক্রে ধনংজয়ঃ
ব্যূহ্য তানি বলান্যাশু প্রয়য়ৌ ফল্গুনস্তদা
19.17
সংপ্রয়াতান্কুরূন্দৃষ্ট্বা পাণ্ডবানাং মহাচমূঃ
গঙ্গেব পূর্ণা স্তিমিতা স্যন্দমানা ব্যদৃশ্যত
19.18
ভীমসেনোঽগ্রণীস্তেষাং ধৃষ্টদ্যুম্নশ্চ পার্ষতঃ
নকুলঃ সহদেবশ্চ ধৃষ্টকেতুশ্চ বীর্যবান্
19.19
সমুদ্যোজ্য ততঃ পশ্চাদ্রাজাপ্যক্ষৌহিণীবৃতঃ
ভ্রাতৃভিঃ সহ পুত্রৈশ্চ সোঽভ্যরক্ষত পৃষ্ঠতঃ
19.20
চক্ররক্ষৌ তু ভীমস্য মাদ্রীপুত্রৌ মহাদ্যুতী
দ্রৌপদেয়াঃ সসৌভদ্রাঃ পৃষ্ঠগোপাস্তরস্বিনঃ
19.21
ধৃষ্টদ্যুম্নশ্চ পাঞ্চাল্যস্তেষাং গোপ্তা মহারথঃ
সহিতঃ পৃতনাশূরৈ রথমুখ্যৈঃ প্রভদ্রকৈঃ
19.22
শিখণ্ডী তু ততঃ পশ্চাদর্জুনেনাভিরক্ষিতঃ
যত্তো ভীষ্মবিনাশায় প্রয়য়ৌ ভরতর্ষভ
19.23
পৃষ্ঠগোপোঽর্জুনস্যাপি যুয়ুধানো মহারথঃ
চক্ররক্ষৌ তু পাঞ্চাল্যৌ যুধামন্যূত্তমৌজসৌ
19.24
রাজা তু মধ্যমানীকে কুন্তীপুত্রো যুধিষ্ঠিরঃ
বৃহদ্ভিঃ কুঞ্জরৈর্মত্তৈশ্চলদ্ভিরচলৈরিব
19.25
অক্ষৌহিণ্যা চ পাঞ্চাল্যো যজ্ঞসেনো মহামনাঃ
বিরাটমন্বয়াত্পশ্চাত্পাণ্ডবার্থে পরাক্রমী
19.26
তেষামাদিত্যচন্দ্রাভাঃ কনকোত্তমভূষণাঃ
নানাচিহ্নধরা রাজন্রথেষ্বাসন্মহাধ্বজাঃ
19.27
সমুত্সর্প্য ততঃ পশ্চাদ্ধৃষ্টদ্যুম্নো মহারথঃ
ভ্রাতৃভিঃ সহ পুত্রৈশ্চ সোঽভ্যরক্ষদ্যুধিষ্ঠিরম্
19.28
ত্বদীয়ানাং পরেষাং চ রথেষু বিবিধান্ধ্বজান্
অভিভূয়ার্জুনস্যৈকো ধ্বজস্তস্থৌ মহাকপিঃ
19.29
পাদাতাস্ত্বগ্রতোঽগচ্ছন্নসিশক্ত্যৃষ্টিপাণয়ঃ
অনেকশতসাহস্রা ভীমসেনস্য রক্ষিণঃ
19.30
বারণা দশসাহস্রাঃ প্রভিন্নকরটামুখাঃ
শূরা হেমময়ৈর্জালৈর্দীপ্যমানা ইবাচলাঃ
19.31
ক্ষরন্ত ইব জীমূতা মদার্দ্রাঃ পদ্মগন্ধিনঃ
রাজানমন্বয়ুঃ পশ্চাচ্চলন্ত ইব পর্বতাঃ
19.32
ভীমসেনো গদাং ভীমাং প্রকর্ষন্পরিঘোপমাম্
প্রচকর্ষ মহত্সৈন্যং দুরাধর্ষো মহামনাঃ
19.33
তমর্কমিব দুষ্প্রেক্ষ্যং তপন্তং রশ্মিমালিনম্
ন শেকুঃ সর্বতো যোধাঃ প্রতিবীক্ষিতুমন্তিকে
19.34
বজ্রো নামৈষ তু ব্যূহো দুর্ভিদঃ সর্বতোমুখঃ
চাপবিদ্যুদ্ধ্বজো ঘোরো গুপ্তো গাণ্ডীবধন্বনা
19.35
যং প্রতিব্যূহ্য তিষ্ঠন্তি পাণ্ডবাস্তব বাহিনীম্
অজেয়ো মানুষে লোকে পাণ্ডবৈরভিরক্ষিতঃ
19.36
সংধ্যাং তিষ্ঠত্সু সৈন্যেষু সূর্যস্যোদয়নং প্রতি
প্রাবাত্সপৃষতো বায়ুরনভ্রে স্তনয়িত্নুমান্
19.37
বিষ্বগ্বাতাশ্চ বান্ত্যুগ্রা নীচৈঃ শর্করকর্ষিণঃ
রজশ্চোদ্ধূয়মানং তু তমসাচ্ছাদয়জ্জগৎ
19.38
পপাত মহতী চোল্কা প্রাঙ্মুখী ভরতর্ষভ
উদ্যন্তং সূর্যমাহত্য ব্যশীর্যত মহাস্বনা
19.39
অথ সজ্জীয়মানেষু সৈন্যেষু ভরতর্ষভ
নিষ্প্রভোঽভ্যুদিয়াত্সূর্যঃ সঘোষো ভূশ্চচাল হ
ব্যশীর্যত সনাদা চ তদা ভরতসত্তম
19.40
নির্ঘাতা বহবো রাজন্দিক্ষু সর্বাসু চাভবন্
প্রাদুরাসীদ্রজস্তীব্রং ন প্রাজ্ঞায়ত কিংচন
19.41
ধ্বজানাং ধূয়মানানাং সহসা মাতরিশ্বনা
কিঙ্কিণীজালনদ্ধানাং কাঞ্চনস্রগ্বতাং রবৈঃ
19.42
মহতাং সপতাকানামাদিত্যসমতেজসাম্
সর্বং ঝণঝণীভূতমাসীত্তালবনেষ্বিব
19.43
এবং তে পুরুষব্যাঘ্রাঃ পাণ্ডবা যুদ্ধনন্দিনঃ
ব্যবস্থিতাঃ প্রতিব্যূহ্য তব পুত্রস্য বাহিনীম্
19.44
স্রংসন্ত ইব মজ্জানো যোধানাং ভরতর্ষভ
দৃষ্ট্বাগ্রতো ভীমসেনং গদাপাণিমবস্থিতম্