অধ্যায় 20

20.1

ধৃতরাষ্ট্র উবাচ
সূর্যোদয়ে সংজয় কে নু পূর্বং; যুয়ুত্সবো হৃষ্যমাণা ইবাসন্
মামকা বা ভীষ্মনেত্রাঃ সমীকে; পাণ্ডবা বা ভীমনেত্রাস্তদানীম্

কেষাং জঘন্যৌ সোমসূর্যৌ সবায়ূ; কেষাং সেনাং শ্বাপদা ব্যাভষন্ত
কেষাং যূনাং মুখবর্ণাঃ প্রসন্নাঃ; সর্বং হ্যেতদ্ব্রূহি তত্ত্বং যথাবৎ

সংজয় উবাচ
উভে সেনে তুল্যমিবোপয়াতে; উভে ব্যূহে হৃষ্টরূপে নরেন্দ্র
উভে চিত্রে বনরাজিপ্রকাশে; তথৈবোভে নাগরথাশ্বপূর্ণে

উভে সেনে বৃহতী ভীমরূপে; তথৈবোভে ভারত দুর্বিষহ্যে
তথৈবোভে স্বর্গজয়ায় সৃষ্টে; তথা হ্যুভে সত্পুরুষার্যগুপ্তে

পশ্চান্মুখাঃ কুরবো ধার্তরাষ্ট্রাঃ; স্থিতাঃ পার্থাঃ প্রাঙ্মুখা যোত্স্যমানাঃ
দৈত্যেন্দ্রসেনেব চ কৌরবাণাং; দেবেন্দ্রসেনেব চ পাণ্ডবানাম্

শুক্রো বায়ুঃ পৃষ্ঠতঃ পাণ্ডবানাং; ধার্তরাষ্ট্রাঞ্শ্বাপদা ব্যাভষন্ত
গজেন্দ্রাণাং মদগন্ধাংশ্চ তীব্রা;ন্ন সেহিরে তব পুত্রস্য নাগাঃ

দুর্যোধনো হস্তিনং পদ্মবর্ণং; সুবর্ণকক্ষ্যং জাতিবলং প্রভিন্নম্
সমাস্থিতো মধ্যগতঃ কুরূণাং; সংস্তূয়মানো বন্দিভির্মাগধৈশ্চ

চন্দ্রপ্রভং শ্বেতমস্যাতপত্রং; সৌবর্ণী স্রগ্ভ্রাজতে চোত্তমাঙ্গে
তং সর্বতঃ শকুনিঃ পার্বতীয়ৈঃ; সার্ধং গান্ধারৈঃ পাতি গান্ধাররাজঃ

ভীষ্মোঽগ্রতঃ সর্বসৈন্যস্য বৃদ্ধঃ; শ্বেতচ্ছত্রঃ শ্বেতধনুঃ সশঙ্খঃ
শ্বেতোষ্ণীষঃ পাণ্ডুরেণ ধ্বজেন; শ্বেতৈরশ্বৈঃ শ্বেতশৈলপ্রকাশঃ

তস্য সৈন্যং ধার্তরাষ্ট্রাশ্চ সর্বে; বাহ্লীকানামেকদেশঃ শলশ্চ
যে চাম্বষ্ঠাঃ ক্ষত্রিয়া যে চ সিন্ধৌ; তথা সৌবীরাঃ পঞ্চনদাশ্চ শূরাঃ

শোণৈর্হয়ৈ রুক্মরথো মহাত্মা; দ্রোণো মহাবাহুরদীনসত্ত্বঃ
আস্তে গুরুঃ প্রয়শাঃ সর্বরাজ্ঞাং; পশ্চাচ্চমূমিন্দ্র ইবাভিরক্ষন্

বার্দ্ধক্ষত্রিঃ সর্বসৈন্যস্য মধ্যে; ভূরিশ্রবাঃ পুরুমিত্রো জয়শ্চ
শাল্বা মত্স্যাঃ কেকয়াশ্চাপি সর্বে; গজানীকৈর্ভ্রাতরো যোত্স্যমানাঃ

শারদ্বতশ্চোত্তরধূর্মহাত্মা; মহেষ্বাসো গৌতমশ্চিত্রয়োধী
শকৈঃ কিরাতৈর্যবনৈঃ পহ্লবৈশ্চ; সার্ধং চমূমুত্তরতোঽভিপাতি

মহারথৈরন্ধকবৃষ্ণিভোজৈঃ; সৌরাষ্ট্রকৈর্নৈরৃতৈরাত্তশস্ত্রৈঃ
বৃহদ্বলঃ কৃতবর্মাভিগুপ্তো; বলং ত্বদীয়ং দক্ষিণতোঽভিপাতি

সংশপ্তকানাময়ুতং রথানাং; মৃত্যুর্জয়ো বার্জুনস্যেতি সৃষ্টাঃ
যেনার্জুনস্তেন রাজন্কৃতাস্ত্রাঃ; প্রয়াতা বৈ তে ত্রিগর্তাশ্চ শূরাঃ

সাগ্রং শতসহস্রং তু নাগানাং তব ভারত
নাগে নাগে রথশতং শতং চাশ্বা রথে রথে

অশ্বেঽশ্বে দশ ধানুষ্কা ধানুষ্কে দশ চর্মিণঃ
এবং ব্যূঢান্যনীকানি ভীষ্মেণ তব ভারত

অব্যূহন্মানুষং ব্যূহং দৈবং গান্ধর্বমাসুরম্
দিবসে দিবসে প্রাপ্তে ভীষ্মঃ শাংতনবোঽগ্রণীঃ

মহারথৌঘবিপুলঃ সমুদ্র ইব পর্বণি
ভীষ্মেণ ধার্তরাষ্ট্রাণাং ব্যূহঃ প্রত্যঙ্মুখো যুধি

অনন্তরূপা ধ্বজিনী ত্বদীয়া; নরেন্দ্র ভীমা ন তু পাণ্ডবানাম্
তাং ত্বেব মন্যে বৃহতীং দুষ্প্রধৃষ্যাং; যস্যা নেতারৌ কেশবশ্চার্জুনশ্চ