অধ্যায় 21

21.1

সংজয় উবাচ
বৃহতীং ধার্তরাষ্ট্রাণাং দৃষ্ট্বা সেনাং সমুদ্যতাম্
বিষাদমগমদ্রাজা কুন্তীপুত্রো যুধিষ্ঠিরঃ

ব্যূহং ভীষ্মেণ চাভেদ্যং কল্পিতং প্রেক্ষ্য পাণ্ডবঃ
অভেদ্যমিব সংপ্রেক্ষ্য বিষণ্ণোঽর্জুনমব্রবীৎ

ধনংজয় কথং শক্যমস্মাভির্যোদ্ধুমাহবে
ধার্তরাষ্ট্রৈর্মহাবাহো যেষাং যোদ্ধা পিতামহঃ

অক্ষোভ্যোঽয়মভেদ্যশ্চ ভীষ্মেণামিত্রকর্শিনা
কল্পিতঃ শাস্ত্রদৃষ্টেন বিধিনা ভূরিতেজসা

তে বয়ং সংশয়ং প্রাপ্তাঃ সসৈন্যাঃ শত্রুকর্শন
কথমস্মান্মহাব্যূহাদুদ্যানং নো ভবিষ্যতি

অথার্জুনোঽব্রবীত্পার্থং যুধিষ্ঠিরমমিত্রহা
বিষণ্ণমভিসংপ্রেক্ষ্য তব রাজন্ননীকিনীম্

প্রজ্ঞয়াভ্যধিকাঞ্শূরান্গুণয়ুক্তান্বহূনপি
জয়ন্ত্যল্পতরা যেন তন্নিবোধ বিশাং পতে

তত্তু তে কারণং রাজন্প্রবক্ষ্যাম্যনসূয়বে
নারদস্তমৃষির্বেদ ভীষ্মদ্রোণৌ চ পাণ্ডব

এতমেবার্থমাশ্রিত্য যুদ্ধে দেবাসুরেঽব্রবীৎ
পিতামহঃ কিল পুরা মহেন্দ্রাদীন্দিবৌকসঃ

ন তথা বলবীর্যাভ্যাং বিজয়ন্তে জিগীষবঃ
যথা সত্যানৃশংস্যাভ্যাং ধর্মেণৈবোদ্যমেন চ

ত্যক্ত্বাধর্মং চ লোভং চ মোহং চোদ্যমমাস্থিতাঃ
যুধ্যধ্বমনহংকারা যতো ধর্মস্ততো জয়ঃ

এবং রাজন্বিজানীহি ধ্রুবোঽস্মাকং রণে জয়ঃ
যথা মে নারদঃ প্রাহ যতঃ কৃষ্ণস্ততো জয়ঃ

গুণভূতো জয়ঃ কৃষ্ণে পৃষ্ঠতোঽন্বেতি মাধবম্
অন্যথা বিজয়শ্চাস্য সংনতিশ্চাপরো গুণঃ

অনন্ততেজা গোবিন্দঃ শত্রুপূগেষু নির্ব্যথঃ
পুরুষঃ সনাতনতমো যতঃ কৃষ্ণস্ততো জয়ঃ

পুরা হ্যেষ হরির্ভূত্বা বৈকুণ্ঠোঽকুণ্ঠসায়কঃ
সুরাসুরানবস্ফূর্জন্নব্রবীত্কে জয়ন্ত্বিতি

অনু কৃষ্ণং জয়েমেতি যৈরুক্তং তত্র তৈর্জিতম্
তত্প্রসাদাদ্ধি ত্রৈলোক্যং প্রাপ্তং শক্রাদিভিঃ সুরৈঃ

তস্য তে ন ব্যথাং কাংচিদিহ পশ্যামি ভারত
যস্য তে জয়মাশাস্তে বিশ্বভুক্ত্রিদশেশ্বরঃ