অধ্যায় 22

22.1

সংজয় উবাচ
ততো যুধিষ্ঠিরো রাজা স্বাং সেনাং সমচোদয়ৎ
প্রতিব্যূহন্ননীকানি ভীষ্মস্য ভরতর্ষভ

যথোদ্দিষ্টান্যনীকানি প্রত্যব্যূহন্ত পাণ্ডবাঃ
স্বর্গং পরমভীপ্সন্তঃ সুয়ুদ্ধেন কুরূদ্বহাঃ

মধ্যে শিখণ্ডিনোঽনীকং রক্ষিতং সব্যসাচিনা
ধৃষ্টদ্যুম্নস্য চ স্বয়ং ভীমেন পরিপালিতম্

অনীকং দক্ষিণং রাজন্যুয়ুধানেন পালিতম্
শ্রীমতা সাত্বতাগ্র্যেণ শক্রেণেব ধনুষ্মতা

মহেন্দ্রয়ানপ্রতিমং রথং তু; সোপস্করং হাটকরত্নচিত্রম্
যুধিষ্ঠিরঃ কাঞ্চনভাণ্ডয়োক্ত্রং; সমাস্থিতো নাগকুলস্য মধ্যে

সমুচ্ছ্রিতং দান্তশলাকমস্য; সুপাণ্ডুরং ছত্রমতীব ভাতি
প্রদক্ষিণং চৈনমুপাচরন্তি; মহর্ষয়ঃ সংস্তুতিভির্নরেন্দ্রম্

পুরোহিতাঃ শত্রুবধং বদন্তো; মহর্ষিবৃদ্ধাঃ শ্রুতবন্ত এব
জপ্যৈশ্চ মন্ত্রৈশ্চ তথৌষধীভিঃ; সমন্ততঃ স্বস্ত্যয়নং প্রচক্রুঃ

ততঃ স বস্ত্রাণি তথৈব গাশ্চ; ফলানি পুষ্পাণি তথৈব নিষ্কান্
কুরূত্তমো ব্রাহ্মণসান্মহাত্মা; কুর্বন্যয়ৌ শক্র ইবামরেভ্যঃ

সহস্রসূর্যঃ শতকিঙ্কিণীকঃ; পরার্ধ্যজাম্বূনদহেমচিত্রঃ
রথোঽর্জুনস্যাগ্নিরিবার্চিমালী; বিভ্রাজতে শ্বেতহয়ঃ সুচক্রঃ

তমাস্থিতঃ কেশবসংগৃহীতং; কপিধ্বজং গাণ্ডিববাণহস্তঃ
ধনুর্ধরো যস্য সমঃ পৃথিব্যাং; ন বিদ্যতে নো ভবিতা বা কদাচিৎ

উদ্বর্তয়িষ্যংস্তব পুত্রসেনা;মতীব রৌদ্রং স বিভর্তি রূপম্
অনায়ুধো যঃ সুভুজো ভুজাভ্যাং; নরাশ্বনাগান্যুধি ভস্ম কুর্যাৎ

স ভীমসেনঃ সহিতো যমাভ্যাং; বৃকোদরো বীররথস্য গোপ্তা
তং প্রেক্ষ্য মত্তর্ষভসিংহখেলং; লোকে মহেন্দ্রপ্রতিমানকল্পম্

সমীক্ষ্য সেনাগ্রগতং দুরাসদং; প্রবিব্যথুঃ পঙ্কগতা ইবোষ্ট্রাঃ
বৃকোদরং বারণরাজদর্পং; যোধাস্ত্বদীয়া ভয়বিগ্নসত্ত্বাঃ

অনীকমধ্যে তিষ্ঠন্তং রাজপুত্রং দুরাসদম্
অব্রবীদ্ভরতশ্রেষ্ঠং গুডাকেশং জনার্দনঃ

বাসুদেব উবাচ
য এষ গোপ্তা প্রতপন্বলস্থো; যো নঃ সেনাং সিংহ ইবেক্ষতে চ
স এষ ভীষ্মঃ কুরুবংশকেতু;র্যেনাহৃতাস্ত্রিংশতো বাজিমেধাঃ

এতান্যনীকানি মহানুভাবং; গূহন্তি মেঘা ইব ঘর্মরশ্মিম্
এতানি হত্বা পুরুষপ্রবীর; কাঙ্ক্ষস্ব যুদ্ধং ভরতর্ষভেণ

ধৃতরাষ্ট্র উবাচ
কেষাং প্রহৃষ্টাস্তত্রাগ্রে যোধা যুধ্যন্তি সংজয়
উদগ্রমনসঃ কেঽত্র কে বা দীনা বিচেতসঃ

কে পূর্বং প্রাহরংস্তত্র যুদ্ধে হৃদয়কম্পনে
মামকাঃ পাণ্ডবানাং বা তন্মমাচক্ষ্ব সংজয়

কস্য সেনাসমুদয়ে গন্ধমাল্যসমুদ্ভবঃ
বাচঃ প্রদক্ষিণাশ্চৈব যোধানামভিগর্জতাম্

সংজয় উবাচ
উভয়োঃ সেনয়োস্তত্র যোধা জহৃষিরে মুদা
স্রগ্ধূপপানগন্ধানামুভয়ত্র সমুদ্ভবঃ

সংহতানামনীকানাং ব্যূঢানাং ভরতর্ষভ
সংসর্পতামুদীর্ণানাং বিমর্দঃ সুমহানভূৎ

বাদিত্রশব্দস্তুমুলঃ শঙ্খভেরীবিমিশ্রিতঃ
কুঞ্জরাণাং চ নদতাং সৈন্যানাং চ প্রহৃষ্যতাম্