Utshovঅধ্যায় 23
23.1
ধৃতরাষ্ট্র উবাচ
ধর্মক্ষেত্রে কুরুক্ষেত্রে সমবেতা যুয়ুত্সবঃ
মামকাঃ পাণ্ডবাশ্চৈব কিমকুর্বত সংজয়
23.2
সংজয় উবাচ
দৃষ্ট্বা তু পাণ্ডবানীকং ব্যূঢং দুর্যোধনস্তদা
আচার্যমুপসংগম্য রাজা বচনমব্রবীৎ
23.3
পশ্যৈতাং পাণ্ডুপুত্রাণামাচার্য মহতীং চমূম্
ব্যূঢাং দ্রুপদপুত্রেণ তব শিষ্যেণ ধীমতা
23.4
অত্র শূরা মহেষ্বাসা ভীমার্জুনসমা যুধি
যুয়ুধানো বিরাটশ্চ দ্রুপদশ্চ মহারথঃ
23.5
ধৃষ্টকেতুশ্চেকিতানঃ কাশিরাজশ্চ বীর্যবান্
পুরুজিত্কুন্তিভোজশ্চ শৈব্যশ্চ নরপুংগবঃ
23.6
যুধামন্যুশ্চ বিক্রান্ত উত্তমৌজাশ্চ বীর্যবান্
সৌভদ্রো দ্রৌপদেয়াশ্চ সর্ব এব মহারথাঃ
23.7
অস্মাকং তু বিশিষ্টা যে তান্নিবোধ দ্বিজোত্তম
নায়কা মম সৈন্যস্য সংজ্ঞার্থং তান্ব্রবীমি তে
23.8
ভবান্ভীষ্মশ্চ কর্ণশ্চ কৃপশ্চ সমিতিংজয়ঃ
অশ্বত্থামা বিকর্ণশ্চ সৌমদত্তিস্তথৈব চ
23.9
অন্যে চ বহবঃ শূরা মদর্থে ত্যক্তজীবিতাঃ
নানাশস্ত্রপ্রহরণাঃ সর্বে যুদ্ধবিশারদাঃ
23.10
অপর্যাপ্তং তদস্মাকং বলং ভীষ্মাভিরক্ষিতম্
পর্যাপ্তং ত্বিদমেতেষাং বলং ভীমাভিরক্ষিতম্
23.11
অয়নেষু চ সর্বেষু যথাভাগমবস্থিতাঃ
ভীষ্মমেবাভিরক্ষন্তু ভবন্তঃ সর্ব এব হি
23.12
তস্য সংজনয়ন্হর্ষং কুরুবৃদ্ধঃ পিতামহঃ
সিংহনাদং বিনদ্যোচ্চৈঃ শঙ্খং দধ্মৌ প্রতাপবান্
23.13
ততঃ শঙ্খাশ্চ ভের্যশ্চ পণবানকগোমুখাঃ
সহসৈবাভ্যহন্যন্ত স শব্দস্তুমুলোঽভবৎ
23.14
ততঃ শ্বেতৈর্হয়ৈর্যুক্তে মহতি স্যন্দনে স্থিতৌ
মাধবঃ পাণ্ডবশ্চৈব দিব্যৌ শঙ্খৌ প্রদধ্মতুঃ
23.15
পাঞ্চজন্যং হৃষীকেশো দেবদত্তং ধনংজয়ঃ
পৌণ্ড্রং দধ্মৌ মহাশঙ্খং ভীমকর্মা বৃকোদরঃ
23.16
অনন্তবিজয়ং রাজা কুন্তীপুত্রো যুধিষ্ঠিরঃ
নকুলঃ সহদেবশ্চ সুঘোষমণিপুষ্পকৌ
23.17
কাশ্যশ্চ পরমেষ্বাসঃ শিখণ্ডী চ মহারথঃ
ধৃষ্টদ্যুম্নো বিরাটশ্চ সাত্যকিশ্চাপরাজিতঃ
23.18
দ্রুপদো দ্রৌপদেয়াশ্চ সর্বশঃ পৃথিবীপতে
সৌভদ্রশ্চ মহাবাহুঃ শঙ্খান্দধ্মুঃ পৃথক্পৃথক্
23.19
স ঘোষো ধার্তরাষ্ট্রাণাং হৃদয়ানি ব্যদারয়ৎ
নভশ্চ পৃথিবীং চৈব তুমুলো ব্যনুনাদয়ন্
23.20
অথ ব্যবস্থিতান্দৃষ্ট্বা ধার্তরাষ্ট্রান্কপিধ্বজঃ
প্রবৃত্তে শস্ত্রসংপাতে ধনুরুদ্যম্য পাণ্ডবঃ
23.21
হৃষীকেশং তদা বাক্যমিদমাহ মহীপতে
সেনয়োরুভয়োর্মধ্যে রথং স্থাপয় মেঽচ্যুত
23.22
যাবদেতান্নিরীক্ষেঽহং যোদ্ধুকামানবস্থিতান্
কৈর্ময়া সহ যোদ্ধব্যমস্মিন্রণসমুদ্যমে
23.23
যোত্স্যমানানবেক্ষেঽহং য এতেঽত্র সমাগতাঃ
ধার্তরাষ্ট্রস্য দুর্বুদ্ধের্যুদ্ধে প্রিয়চিকীর্ষবঃ
23.24
এবমুক্তো হৃষীকেশো গুডাকেশেন ভারত
সেনয়োরুভয়োর্মধ্যে স্থাপয়িত্বা রথোত্তমম্
23.25
ভীষ্মদ্রোণপ্রমুখতঃ সর্বেষাং চ মহীক্ষিতাম্
উবাচ পার্থ পশ্যৈতান্সমবেতান্কুরূনিতি
23.26
তত্রাপশ্যত্স্থিতান্পার্থঃ পিতৄনথ পিতামহান্
আচার্যান্মাতুলান্ভ্রাতৄন্পুত্রান্পৌত্রান্সখীংস্তথা
23.27
শ্বশুরান্সুহৃদশ্চৈব সেনয়োরুভয়োরপি
তান্সমীক্ষ্য স কৌন্তেয়ঃ সর্বান্বন্ধূনবস্থিতান্
23.28
কৃপয়া পরয়াবিষ্টো বিষীদন্নিদমব্রবীৎ
দৃষ্ট্বেমান্স্বজনান্কৃষ্ণ যুয়ুত্সূন্সমবস্থিতান্
23.29
সীদন্তি মম গাত্রাণি মুখং চ পরিশুষ্যতি
বেপথুশ্চ শরীরে মে রোমহর্ষশ্চ জায়তে
23.30
গাণ্ডীবং স্রংসতে হস্তাত্ত্বক্চৈব পরিদহ্যতে
ন চ শক্নোম্যবস্থাতুং ভ্রমতীব চ মে মনঃ
23.31
নিমিত্তানি চ পশ্যামি বিপরীতানি কেশব
ন চ শ্রেয়োঽনুপশ্যামি হত্বা স্বজনমাহবে
23.32
ন কাঙ্ক্ষে বিজয়ং কৃষ্ণ ন চ রাজ্যং সুখানি চ
কিং নো রাজ্যেন গোবিন্দ কিং ভোগৈর্জীবিতেন বা
23.33
যেষামর্থে কাঙ্ক্ষিতং নো রাজ্যং ভোগাঃ সুখানি চ
ত ইমেঽবস্থিতা যুদ্ধে প্রাণাংস্ত্যক্ত্বা ধনানি চ
23.34
আচার্যাঃ পিতরঃ পুত্রাস্তথৈব চ পিতামহাঃ
মাতুলাঃ শ্বশুরাঃ পৌত্রাঃ স্যালাঃ সংবন্ধিনস্তথা
23.35
এতান্ন হন্তুমিচ্ছামি ঘ্নতোঽপি মধুসূদন
অপি ত্রৈলোক্যরাজ্যস্য হেতোঃ কিং নু মহীকৃতে
23.36
নিহত্য ধার্তরাষ্ট্রান্নঃ কা প্রীতিঃ স্যাজ্জনার্দন
পাপমেবাশ্রয়েদস্মান্হত্বৈতানাততায়িনঃ
23.37
তস্মান্নার্হা বয়ং হন্তুং ধার্তরাষ্ট্রান্সবান্ধবান্
স্বজনং হি কথং হত্বা সুখিনঃ স্যাম মাধব
23.38
যদ্যপ্যেতে ন পশ্যন্তি লোভোপহতচেতসঃ
কুলক্ষয়কৃতং দোষং মিত্রদ্রোহে চ পাতকম্
23.39
কথং ন জ্ঞেয়মস্মাভিঃ পাপাদস্মান্নিবর্তিতুম্
কুলক্ষয়কৃতং দোষং প্রপশ্যদ্ভির্জনার্দন
23.40
কুলক্ষয়ে প্রণশ্যন্তি কুলধর্মাঃ সনাতনাঃ
ধর্মে নষ্টে কুলং কৃত্স্নমধর্মোঽভিভবত্যুত
23.41
অধর্মাভিভবাত্কৃষ্ণ প্রদুষ্যন্তি কুলস্ত্রিয়ঃ
স্ত্রীষু দুষ্টাসু বার্ষ্ণেয় জায়তে বর্ণসংকরঃ
23.42
সংকরো নরকায়ৈব কুলঘ্নানাং কুলস্য চ
পতন্তি পিতরো হ্যেষাং লুপ্তপিণ্ডোদকক্রিয়াঃ
23.43
দোষৈরেতৈঃ কুলঘ্নানাং বর্ণসংকরকারকৈঃ
উত্সাদ্যন্তে জাতিধর্মাঃ কুলধর্মাশ্চ শাশ্বতাঃ
23.44
উত্সন্নকুলধর্মাণাং মনুষ্যাণাং জনার্দন
নরকে নিয়তং বাসো ভবতীত্যনুশুশ্রুম
23.45
অহো বত মহত্পাপং কর্তুং ব্যবসিতা বয়ম্
যদ্রাজ্যসুখলোভেন হন্তুং স্বজনমুদ্যতাঃ
23.46
যদি মামপ্রতীকারমশস্ত্রং শস্ত্রপাণয়ঃ
ধার্তরাষ্ট্রা রণে হন্যুস্তন্মে ক্ষেমতরং ভবেৎ
23.47
এবমুক্ত্বার্জুনঃ সংখ্যে রথোপস্থ উপাবিশৎ
বিসৃজ্য সশরং চাপং শোকসংবিগ্নমানসঃ