Utshovঅধ্যায় 24
24.1
সংজয় উবাচ
তং তথা কৃপয়াবিষ্টমশ্রুপূর্ণাকুলেক্ষণম্
বিষীদন্তমিদং বাক্যমুবাচ মধুসূদনঃ
24.2
শ্রীভগবানুবাচ
কুতস্ত্বা কশ্মলমিদং বিষমে সমুপস্থিতম্
অনার্যজুষ্টমস্বর্গ্যমকীর্তিকরমর্জুন
24.3
ক্লৈব্যং মা স্ম গমঃ পার্থ নৈতত্ত্বয্যুপপদ্যতে
ক্ষুদ্রং হৃদয়দৌর্বল্যং ত্যক্ত্বোত্তিষ্ঠ পরংতপ
24.4
অর্জুন উবাচ
কথং ভীষ্মমহং সংখ্যে দ্রোণং চ মধুসূদন
ইষুভিঃ প্রতিয়োত্স্যামি পূজার্হাবরিসূদন
24.5
গুরূনহত্বা হি মহানুভাবা;ঞ্শ্রেয়ো ভোক্তুং ভৈক্ষমপীহ লোকে
হত্বার্থকামাংস্তু গুরূনিহৈব; ভুঞ্জীয় ভোগান্রুধিরপ্রদিগ্ধান্
24.6
ন চৈতদ্বিদ্মঃ কতরন্নো গরীয়ো; যদ্বা জয়েম যদি বা নো জয়েয়ুঃ
যানেব হত্বা ন জিজীবিষাম;স্তেঽবস্থিতাঃ প্রমুখে ধার্তরাষ্ট্রাঃ
24.7
কার্পণ্যদোষোপহতস্বভাবঃ; পৃচ্ছামি ত্বাং ধর্মসংমূঢচেতাঃ
যচ্ছ্রেয়ঃ স্যান্নিশ্চিতং ব্রূহি তন্মে; শিষ্যস্তেঽহং শাধি মাং ত্বাং প্রপন্নম্
24.8
ন হি প্রপশ্যামি মমাপনুদ্যা;দ্যচ্ছোকমুচ্ছোষণমিন্দ্রিয়াণাম্
অবাপ্য ভূমাবসপত্নমৃদ্ধং; রাজ্যং সুরাণামপি চাধিপত্যম্
24.9
সংজয় উবাচ
এবমুক্ত্বা হৃষীকেশং গুডাকেশঃ পরংতপ
ন যোত্স্য ইতি গোবিন্দমুক্ত্বা তূষ্ণীং বভূব হ
24.10
তমুবাচ হৃষীকেশঃ প্রহসন্নিব ভারত
সেনয়োরুভয়োর্মধ্যে বিষীদন্তমিদং বচঃ
24.11
শ্রীভগবানুবাচ
অশোচ্যানন্বশোচস্ত্বং প্রজ্ঞাবাদাংশ্চ ভাষসে
গতাসূনগতাসূংশ্চ নানুশোচন্তি পণ্ডিতাঃ
24.12
ন ত্বেবাহং জাতু নাসং ন ত্বং নেমে জনাধিপাঃ
ন চৈব ন ভবিষ্যামঃ সর্বে বয়মতঃ পরম্
24.13
দেহিনোঽস্মিন্যথা দেহে কৌমারং যৌবনং জরা
তথা দেহান্তরপ্রাপ্তির্ধীরস্তত্র ন মুহ্যতি
24.14
মাত্রাস্পর্শাস্তু কৌন্তেয় শীতোষ্ণসুখদুঃখদাঃ
আগমাপায়িনোঽনিত্যাস্তাংস্তিতিক্ষস্ব ভারত
24.15
যং হি ন ব্যথয়ন্ত্যেতে পুরুষং পুরুষর্ষভ
সমদুঃখসুখং ধীরং সোঽমৃতত্বায় কল্পতে
24.16
নাসতো বিদ্যতে ভাবো নাভাবো বিদ্যতে সতঃ
উভয়োরপি দৃষ্টোঽন্তস্ত্বনয়োস্তত্ত্বদর্শিভিঃ
24.17
অবিনাশি তু তদ্বিদ্ধি যেন সর্বমিদং ততম্
বিনাশমব্যয়স্যাস্য ন কশ্চিত্কর্তুমর্হতি
24.18
অন্তবন্ত ইমে দেহা নিত্যস্যোক্তাঃ শরীরিণঃ
অনাশিনোঽপ্রমেয়স্য তস্মাদ্যুধ্যস্ব ভারত
24.19
য এনং বেত্তি হন্তারং যশ্চৈনং মন্যতে হতম্
উভৌ তৌ ন বিজানীতো নায়ং হন্তি ন হন্যতে
24.20
ন জায়তে ম্রিয়তে বা কদাচি;ন্নায়ং ভূত্বা ভবিতা বা ন ভূয়ঃ
অজো নিত্যঃ শাশ্বতোঽয়ং পুরাণো; ন হন্যতে হন্যমানে শরীরে
24.21
বেদাবিনাশিনং নিত্যং য এনমজমব্যয়ম্
কথং স পুরুষঃ পার্থ কং ঘাতয়তি হন্তি কম্
24.22
বাসাংসি জীর্ণানি যথা বিহায়; নবানি গৃহ্ণাতি নরোঽপরাণি
তথা শরীরাণি বিহায় জীর্ণা;ন্যন্যানি সংয়াতি নবানি দেহী
24.23
নৈনং ছিন্দন্তি শস্ত্রাণি নৈনং দহতি পাবকঃ
ন চৈনং ক্লেদয়ন্ত্যাপো ন শোষয়তি মারুতঃ
24.24
অচ্ছেদ্যোঽয়মদাহ্যোঽয়মক্লেদ্যোঽশোষ্য এব চ
নিত্যঃ সর্বগতঃ স্থাণুরচলোঽয়ং সনাতনঃ
24.25
অব্যক্তোঽয়মচিন্ত্যোঽয়মবিকার্যোঽয়মুচ্যতে
তস্মাদেবং বিদিত্বৈনং নানুশোচিতুমর্হসি
24.26
অথ চৈনং নিত্যজাতং নিত্যং বা মন্যসে মৃতম্
তথাপি ত্বং মহাবাহো নৈনং শোচিতুমর্হসি
24.27
জাতস্য হি ধ্রুবো মৃত্যুর্ধ্রুবং জন্ম মৃতস্য চ
তস্মাদপরিহার্যেঽর্থে ন ত্বং শোচিতুমর্হসি
24.28
অব্যক্তাদীনি ভূতানি ব্যক্তমধ্যানি ভারত
অব্যক্তনিধনান্যেব তত্র কা পরিদেবনা
24.29
আশ্চর্যবত্পশ্যতি কশ্চিদেন;মাশ্চর্যবদ্বদতি তথৈব চান্যঃ
আশ্চর্যবচ্চৈনমন্যঃ শৃণোতি; শ্রুত্বাপ্যেনং বেদ ন চৈব কশ্চিৎ
24.30
দেহী নিত্যমবধ্যোঽয়ং দেহে সর্বস্য ভারত
তস্মাত্সর্বাণি ভূতানি ন ত্বং শোচিতুমর্হসি
24.31
স্বধর্মমপি চাবেক্ষ্য ন বিকম্পিতুমর্হসি
ধর্ম্যাদ্ধি যুদ্ধাচ্ছ্রেয়োঽন্যত্ক্ষত্রিয়স্য ন বিদ্যতে
24.32
যদৃচ্ছয়া চোপপন্নং স্বর্গদ্বারমপাবৃতম্
সুখিনঃ ক্ষত্রিয়াঃ পার্থ লভন্তে যুদ্ধমীদৃশম্
24.33
অথ চেত্ত্বমিমং ধর্ম্যং সংগ্রামং ন করিষ্যসি
ততঃ স্বধর্মং কীর্তিং চ হিত্বা পাপমবাপ্স্যসি
24.34
অকীর্তিং চাপি ভূতানি কথয়িষ্যন্তি তেঽব্যয়াম্
সংভাবিতস্য চাকীর্তির্মরণাদতিরিচ্যতে
24.35
ভয়াদ্রণাদুপরতং মংস্যন্তে ত্বাং মহারথাঃ
যেষাং চ ত্বং বহুমতো ভূত্বা যাস্যসি লাঘবম্
24.36
অবাচ্যবাদাংশ্চ বহূন্বদিষ্যন্তি তবাহিতাঃ
নিন্দন্তস্তব সামর্থ্যং ততো দুঃখতরং নু কিম্
24.37
হতো বা প্রাপ্স্যসি স্বর্গং জিত্বা বা ভোক্ষ্যসে মহীম্
তস্মাদুত্তিষ্ঠ কৌন্তেয় যুদ্ধায় কৃতনিশ্চয়ঃ
24.38
সুখদুঃখে সমে কৃত্বা লাভালাভৌ জয়াজয়ৌ
ততো যুদ্ধায় যুজ্যস্ব নৈবং পাপমবাপ্স্যসি
24.39
এষা তেঽভিহিতা সাংখ্যে বুদ্ধির্যোগে ত্বিমাং শৃণু
বুদ্ধ্যা যুক্তো যয়া পার্থ কর্মবন্ধং প্রহাস্যসি
24.40
নেহাভিক্রমনাশোঽস্তি প্রত্যবায়ো ন বিদ্যতে
স্বল্পমপ্যস্য ধর্মস্য ত্রায়তে মহতো ভয়াৎ
24.41
ব্যবসায়াত্মিকা বুদ্ধিরেকেহ কুরুনন্দন
বহুশাখা হ্যনন্তাশ্চ বুদ্ধয়োঽব্যবসায়িনাম্
24.42
যামিমাং পুষ্পিতাং বাচং প্রবদন্ত্যবিপশ্চিতঃ
বেদবাদরতাঃ পার্থ নান্যদস্তীতি বাদিনঃ
24.43
কামাত্মানঃ স্বর্গপরা জন্মকর্মফলপ্রদাম্
ক্রিয়াবিশেষবহুলাং ভোগৈশ্বর্যগতিং প্রতি
24.44
ভোগৈশ্বর্যপ্রসক্তানাং তয়াপহৃতচেতসাম্
ব্যবসায়াত্মিকা বুদ্ধিঃ সমাধৌ ন বিধীয়তে
24.45
ত্রৈগুণ্যবিষয়া বেদা নিস্ত্রৈগুণ্যো ভবার্জুন
নির্দ্বংদ্বো নিত্যসত্ত্বস্থো নির্যোগক্ষেম আত্মবান্
24.46
যাবানর্থ উদপানে সর্বতঃ সংপ্লুতোদকে
তাবান্সর্বেষু বেদেষু ব্রাহ্মণস্য বিজানতঃ
24.47
কর্মণ্যেবাধিকারস্তে মা ফলেষু কদাচন
মা কর্মফলহেতুর্ভূর্মা তে সঙ্গোঽস্ত্বকর্মণি
24.48
যোগস্থঃ কুরু কর্মাণি সঙ্গং ত্যক্ত্বা ধনংজয়
সিদ্ধ্যসিদ্ধ্যোঃ সমো ভূত্বা সমত্বং যোগ উচ্যতে
24.49
দূরেণ হ্যবরং কর্ম বুদ্ধিয়োগাদ্ধনংজয়
বুদ্ধৌ শরণমন্বিচ্ছ কৃপণাঃ ফলহেতবঃ
24.50
বুদ্ধিয়ুক্তো জহাতীহ উভে সুকৃতদুষ্কৃতে
তস্মাদ্যোগায় যুজ্যস্ব যোগঃ কর্মসু কৌশলম্
24.51
কর্মজং বুদ্ধিয়ুক্তা হি ফলং ত্যক্ত্বা মনীষিণঃ
জন্মবন্ধবিনির্মুক্তাঃ পদং গচ্ছন্ত্যনাময়ম্
24.52
যদা তে মোহকলিলং বুদ্ধির্ব্যতিতরিষ্যতি
তদা গন্তাসি নির্বেদং শ্রোতব্যস্য শ্রুতস্য চ
24.53
শ্রুতিবিপ্রতিপন্না তে যদা স্থাস্যতি নিশ্চলা
সমাধাবচলা বুদ্ধিস্তদা যোগমবাপ্স্যসি
24.54
অর্জুন উবাচ
স্থিতপ্রজ্ঞস্য কা ভাষা সমাধিস্থস্য কেশব
স্থিতধীঃ কিং প্রভাষেত কিমাসীত ব্রজেত কিম্
24.55
শ্রীভগবানুবাচ
প্রজহাতি যদা কামান্সর্বান্পার্থ মনোগতান্
আত্মন্যেবাত্মনা তুষ্টঃ স্থিতপ্রজ্ঞস্তদোচ্যতে
24.56
দুঃখেষ্বনুদ্বিগ্নমনাঃ সুখেষু বিগতস্পৃহঃ
বীতরাগভয়ক্রোধঃ স্থিতধীর্মুনিরুচ্যতে
24.57
যঃ সর্বত্রানভিস্নেহস্তত্তত্প্রাপ্য শুভাশুভম্
নাভিনন্দতি ন দ্বেষ্টি তস্য প্রজ্ঞা প্রতিষ্ঠিতা
24.58
যদা সংহরতে চায়ং কূর্মোঽঙ্গানীব সর্বশঃ
ইন্দ্রিয়াণীন্দ্রিয়ার্থেভ্যস্তস্য প্রজ্ঞা প্রতিষ্ঠিতা
24.59
বিষয়া বিনিবর্তন্তে নিরাহারস্য দেহিনঃ
রসবর্জং রসোঽপ্যস্য পরং দৃষ্ট্বা নিবর্ততে
24.60
যততো হ্যপি কৌন্তেয় পুরুষস্য বিপশ্চিতঃ
ইন্দ্রিয়াণি প্রমাথীনি হরন্তি প্রসভং মনঃ
24.61
তানি সর্বাণি সংয়ম্য যুক্ত আসীত মত্পরঃ
বশে হি যস্যেন্দ্রিয়াণি তস্য প্রজ্ঞা প্রতিষ্ঠিতা
24.62
ধ্যায়তো বিষয়ান্পুংসঃ সঙ্গস্তেষূপজায়তে
সঙ্গাত্সংজায়তে কামঃ কামাত্ক্রোধোঽভিজায়তে
24.63
ক্রোধাদ্ভবতি সংমোহঃ সংমোহাত্স্মৃতিবিভ্রমঃ
স্মৃতিভ্রংশাদ্বুদ্ধিনাশো বুদ্ধিনাশাত্প্রণশ্যতি
24.64
রাগদ্বেষবিয়ুক্তৈস্তু বিষয়ানিন্দ্রিয়ৈশ্চরন্
আত্মবশ্যৈর্বিধেয়াত্মা প্রসাদমধিগচ্ছতি
24.65
প্রসাদে সর্বদুঃখানাং হানিরস্যোপজায়তে
প্রসন্নচেতসো হ্যাশু বুদ্ধিঃ পর্যবতিষ্ঠতে
24.66
নাস্তি বুদ্ধিরয়ুক্তস্য ন চায়ুক্তস্য ভাবনা
ন চাভাবয়তঃ শান্তিরশান্তস্য কুতঃ সুখম্
24.67
ইন্দ্রিয়াণাং হি চরতাং যন্মনোঽনুবিধীয়তে
তদস্য হরতি প্রজ্ঞাং বায়ুর্নাবমিবাম্ভসি
24.68
তস্মাদ্যস্য মহাবাহো নিগৃহীতানি সর্বশঃ
ইন্দ্রিয়াণীন্দ্রিয়ার্থেভ্যস্তস্য প্রজ্ঞা প্রতিষ্ঠিতা
24.69
যা নিশা সর্বভূতানাং তস্যাং জাগর্তি সংয়মী
যস্যাং জাগ্রতি ভূতানি সা নিশা পশ্যতো মুনেঃ
24.70
আপূর্যমাণমচলপ্রতিষ্ঠং; সমুদ্রমাপঃ প্রবিশন্তি যদ্বৎ
তদ্বত্কামা যং প্রবিশন্তি সর্বে; স শান্তিমাপ্নোতি ন কামকামী
24.71
বিহায় কামান্যঃ সর্বান্পুমাংশ্চরতি নিঃস্পৃহঃ
নির্মমো নিরহংকারঃ স শান্তিমধিগচ্ছতি
24.72
এষা ব্রাহ্মী স্থিতিঃ পার্থ নৈনাং প্রাপ্য বিমুহ্যতি
স্থিত্বাস্যামন্তকালেঽপি ব্রহ্মনির্বাণমৃচ্ছতি