UtshovChapter 12
12.1
धृतराष्ट्र उवाच
जम्बूखण्डस्त्वया प्रोक्तो यथावदिह संजय
विष्कम्भमस्य प्रब्रूहि परिमाणं च तत्त्वतः
Dhritarashtra uvacha
Jambukhandastvaya prokto yathavadiha sanjaya
Vishkambhamasya prabruhi parimanam cha tattvatah
12.2
समुद्रस्य प्रमाणं च सम्यगच्छिद्रदर्शन
शाकद्वीपं च मे ब्रूहि कुशद्वीपं च संजय
Samudrasya pramanam cha samyagachchhidradarshana
Shakadvipam cha me bruhi kushadvipam cha sanjaya
12.3
शाल्मलं चैव तत्त्वेन क्रौञ्चद्वीपं तथैव च
ब्रूहि गावल्गणे सर्वं राहोः सोमार्कयोस्तथा
Shalmalam chaiva tattvena kraunchadvipam tathaiva cha
Bruhi gavalgane sarvam rahoh somarkayostatha
12.4
संजय उवाच
राजन्सुबहवो द्वीपा यैरिदं संततं जगत्
सप्त त्वहं प्रवक्ष्यामि चन्द्रादित्यौ ग्रहांस्तथा
Sanjaya uvacha
Rajansubahavo dvipa yairidam santatam jagat
Sapta tvaham pravakshyami chandradityau grahanstatha
12.5
अष्टादश सहस्राणि योजनानां विशां पते
षट्शतानि च पूर्णानि विष्कम्भो जम्बुपर्वतः
Ashtadasha sahasrani yojananam visham pate
Shatshatani cha purnani vishkambho jambuparvatah
12.6
लावणस्य समुद्रस्य विष्कम्भो द्विगुणः स्मृतः
नानाजनपदाकीर्णो मणिविद्रुमचित्रितः
Lavanasya samudrasya vishkambho dvigunah smritah
Nanajanapadakirno manividrumachitritah
12.7
नैकधातुविचित्रैश्च पर्वतैरुपशोभितः
सिद्धचारणसंकीर्णः सागरः परिमण्डलः
Naikadhatuvichitraishcha parvatairupashobhitah
Siddhacharanasankirnah sagarah parimandalah
12.8
शाकद्वीपं च वक्ष्यामि यथावदिह पार्थिव
शृणु मे त्वं यथान्यायं ब्रुवतः कुरुनन्दन
Shakadvipam cha vakshyami yathavadiha parthiva
Shrinu me tvam yathanyayam bruvatah kurunandana
12.9
जम्बूद्वीपप्रमाणेन द्विगुणः स नराधिप
विष्कम्भेण महाराज सागरोऽपि विभागशः
क्षीरोदो भरतश्रेष्ठ येन संपरिवारितः
Jambudvipapramanena dvigunah sa naradhipa
Vishkambhena maharaja sagaropi vibhagashah
Kshirodo bharatashreshtha yena samparivaritah
12.10
तत्र पुण्या जनपदा न तत्र म्रियते जनः
कुत एव हि दुर्भिक्षं क्षमातेजोयुता हि ते
Tatra punya janapada na tatra mriyate janah
Kuta eva hi durbhiksham kshamatejoyuta hi te
12.11
शाकद्वीपस्य संक्षेपो यथावद्भरतर्षभ
उक्त एष महाराज किमन्यच्छ्रोतुमिच्छसि
Shakadvipasya sankshepo yathavadbharatarshabha
Ukta esha maharaja kimanyachchhrotumichchhasi
12.12
धृतराष्ट्र उवाच
शाकद्वीपस्य संक्षेपो यथावदिह संजय
उक्तस्त्वया महाभाग विस्तरं ब्रूहि तत्त्वतः
Dhritarashtra uvacha
Shakadvipasya sankshepo yathavadiha sanjaya
Uktastvaya mahabhaga vistaram bruhi tattvatah
12.13
संजय उवाच
तथैव पर्वता राजन्सप्तात्र मणिभूषिताः
रत्नाकरास्तथा नद्यस्तेषां नामानि मे शृणु
अतीवगुणवत्सर्वं तत्र पुण्यं जनाधिप
Sanjaya uvacha
Tathaiva parvata rajansaptatra manibhushitah
Ratnakarastatha nadyastesham namani me shrinu
Ativagunavatsarvam tatra punyam janadhipa
12.14
देवर्षिगन्धर्वयुतः परमो मेरुरुच्यते
प्रागायतो महाराज मलयो नाम पर्वतः
यतो मेघाः प्रवर्तन्ते प्रभवन्ति च सर्वशः
Devarshigandharvayutah paramo meruruchyate
Pragayato maharaja malayo nama parvatah
Yato meghah pravartante prabhavanti cha sarvashah
12.15
ततः परेण कौरव्य जलधारो महागिरिः
यत्र नित्यमुपादत्ते वासवः परमं जलम्
यतो वर्षं प्रभवति वर्षाकाले जनेश्वर
Tatah parena kauravya jaladharo mahagirih
Yatra nityamupadatte vasavah paramam jalam
Yato varsham prabhavati varshakale janeshvara
12.16
उच्चैर्गिरी रैवतको यत्र नित्यं प्रतिष्ठितः
रेवती दिवि नक्षत्रं पितामहकृतो विधिः
Uchchairgiri raivatako yatra nityam pratishthitah
Revati divi nakshatram pitamahakrito vidhih
12.17
उत्तरेण तु राजेन्द्र श्यामो नाम महागिरिः
यतः श्यामत्वमापन्नाः प्रजा जनपदेश्वर
Uttarena tu rajendra shyamo nama mahagirih
Yatah shyamatvamapannah praja janapadeshvara
12.18
धृतराष्ट्र उवाच
सुमहान्संशयो मेऽद्य प्रोक्तं संजय यत्त्वया
प्रजाः कथं सूतपुत्र संप्राप्ताः श्यामतामिह
Dhritarashtra uvacha
Sumahansanshayo medya proktam sanjaya yattvaya
Prajah katham sutaputra sampraptah shyamatamiha
12.19
संजय उवाच
सर्वेष्वेव महाप्राज्ञ द्वीपेषु कुरुनन्दन
गौरः कृष्णश्च वर्णौ द्वौ तयोर्वर्णान्तरं नृप
Sanjaya uvacha
Sarveshveva mahapragya dvipeshu kurunandana
Gaurah krishnashcha varnau dvau tayorvarnantaram nripa
12.20
श्यामो यस्मात्प्रवृत्तो वै तत्ते वक्ष्यामि भारत
आस्तेऽत्र भगवान्कृष्णस्तत्कान्त्या श्यामतां गतः
Shyamo yasmatpravritto vai tatte vakshyami bharata
Astetra bhagavankrishnastatkantya shyamatam gatah
12.21
ततः परं कौरवेन्द्र दुर्गशैलो महोदयः
केसरी केसरयुतो यतो वातः प्रवायति
Tatah param kauravendra durgashailo mahodayah
Kesari kesarayuto yato vatah pravayati
12.22
तेषां योजनविष्कम्भो द्विगुणः प्रविभागशः
वर्षाणि तेषु कौरव्य संप्रोक्तानि मनीषिभिः
Tesham yojanavishkambho dvigunah pravibhagashah
Varshani teshu kauravya samproktani manishibhih
12.23
महामेरुर्महाकाशो जलदः कुमुदोत्तरः
जलधारात्परो राजन्सुकुमार इति स्मृतः
Mahamerurmahakasho jaladah kumudottarah
Jaladharatparo rajansukumara iti smritah
12.24
रैवतस्य तु कौमारः श्यामस्य तु मणीचकः
केसरस्याथ मोदाकी परेण तु महापुमान्
Raivatasya tu kaumarah shyamasya tu manichakah
Kesarasyatha modaki parena tu mahapuman
12.25
परिवार्य तु कौरव्य दैर्घ्यं ह्रस्वत्वमेव च
जम्बूद्वीपेन विख्यातस्तस्य मध्ये महाद्रुमः
Parivarya tu kauravya dairghyam hrasvatvameva cha
Jambudvipena vikhyatastasya madhye mahadrumah
12.26
शाको नाम महाराज तस्य द्वीपस्य मध्यगः
तत्र पुण्या जनपदाः पूज्यते तत्र शंकरः
Shako nama maharaja tasya dvipasya madhyagah
Tatra punya janapadah pujyate tatra shankarah
12.27
तत्र गच्छन्ति सिद्धाश्च चारणा दैवतानि च
धार्मिकाश्च प्रजा राजंश्चत्वारोऽतीव भारत
Tatra gachchhanti siddhashcha charana daivatani cha
Dharmikashcha praja rajanshchatvarotiva bharata
12.28
वर्णाः स्वकर्मनिरता न च स्तेनोऽत्र दृश्यते
दीर्घायुषो महाराज जरामृत्युविवर्जिताः
Varnah svakarmanirata na cha stenotra drishyate
Dirghayusho maharaja jaramrityuvivarjitah
12.29
प्रजास्तत्र विवर्धन्ते वर्षास्विव समुद्रगाः
नद्यः पुण्यजलास्तत्र गङ्गा च बहुधागतिः
Prajastatra vivardhante varshasviva samudragah
Nadyah punyajalastatra ganga cha bahudhagatih
12.30
सुकुमारी कुमारी च सीता कावेरका तथा
महानदी च कौरव्य तथा मणिजला नदी
इक्षुवर्धनिका चैव तथा भरतसत्तम
Sukumari kumari cha sita kaveraka tatha
Mahanadi cha kauravya tatha manijala nadi
Ikshuvardhanika chaiva tatha bharatasattama
12.31
ततः प्रवृत्ताः पुण्योदा नद्यः कुरुकुलोद्वह
सहस्राणां शतान्येव यतो वर्षति वासवः
Tatah pravrittah punyoda nadyah kurukulodvaha
Sahasranam shatanyeva yato varshati vasavah
12.32
न तासां नामधेयानि परिमाणं तथैव च
शक्यते परिसंख्यातुं पुण्यास्ता हि सरिद्वराः
Na tasam namadheyani parimanam tathaiva cha
Shakyate parisankhyatum punyasta hi saridvarah
12.33
तत्र पुण्या जनपदाश्चत्वारो लोकसंमताः
मगाश्च मशकाश्चैव मानसा मन्दगास्तथा
Tatra punya janapadashchatvaro lokasammatah
Magashcha mashakashchaiva manasa mandagastatha
12.34
मगा ब्राह्मणभूयिष्ठाः स्वकर्मनिरता नृप
मशकेषु तु राजन्या धार्मिकाः सर्वकामदाः
Maga brahmanabhuyishthah svakarmanirata nripa
Mashakeshu tu rajanya dharmikah sarvakamadah
12.35
मानसेषु महाराज वैश्याः कर्मोपजीविनः
सर्वकामसमायुक्ताः शूरा धर्मार्थनिश्चिताः
शूद्रास्तु मन्दगे नित्यं पुरुषा धर्मशीलिनः
Manaseshu maharaja vaishyah karmopajivinah
Sarvakamasamayuktah shura dharmarthanishchitah
Shudrastu mandage nityam purusha dharmashilinah
12.36
न तत्र राजा राजेन्द्र न दण्डो न च दण्डिकाः
स्वधर्मेणैव धर्मं च ते रक्षन्ति परस्परम्
Na tatra raja rajendra na dando na cha dandikah
Svadharmenaiva dharmam cha te rakshanti parasparam
12.37
एतावदेव शक्यं तु तस्मिन्द्वीपे प्रभाषितुम्
एतावदेव श्रोतव्यं शाकद्वीपे महौजसि
Etavadeva shakyam tu tasmindvipe prabhashitum
Etavadeva shrotavyam shakadvipe mahaujasi