Utshovঅধ্যায় 4
4.1
বৈশংপায়ন উবাচ
এবমুক্তো মুনিস্তত্ত্বং কবীন্দ্রো রাজসত্তম
পুত্রেণ ধৃতরাষ্ট্রেণ ধ্যানমন্বগমত্পরম্
4.2
পুনরেবাব্রবীদ্বাক্যং কালবাদী মহাতপাঃ
অসংশয়ং পার্থিবেন্দ্র কালঃ সংক্ষিপতে জগৎ
4.3
সৃজতে চ পুনর্লোকান্নেহ বিদ্যতি শাশ্বতম্
জ্ঞাতীনাং চ কুরূণাং চ সংবন্ধিসুহৃদাং তথা
4.4
ধর্ম্যং দেশয় পন্থানং সমর্থো হ্যসি বারণে
ক্ষুদ্রং জ্ঞাতিবধং প্রাহুর্মা কুরুষ্ব মমাপ্রিয়ম্
4.5
কালোঽয়ং পুত্ররূপেণ তব জাতো বিশাং পতে
ন বধঃ পূজ্যতে বেদে হিতং নৈতত্কথংচন
4.6
হন্যাত্স এব যো হন্যাত্কুলধর্মং স্বকাং তনুম্
কালেনোত্পথগন্তাসি শক্যে সতি যথাপথি
4.7
কুলস্যাস্য বিনাশায় তথৈব চ মহীক্ষিতাম্
অনর্থো রাজ্যরূপেণ ত্যজ্যতামসুখাবহঃ
4.8
লুপ্তপ্রজ্ঞঃ পরেণাসি ধর্মং দর্শয় বৈ সুতান্
কিং তে রাজ্যেন দুর্ধর্ষ যেন প্রাপ্তোঽসি কিল্বিষম্
4.9
যশো ধর্মং চ কীর্তিং চ পালয়ন্স্বর্গমাপ্স্যসি
লভন্তাং পাণ্ডবা রাজ্যং শমং গচ্ছন্তু কৌরবাঃ
4.10
এবং ব্রুবতি বিপ্রেন্দ্রে ধৃতরাষ্ট্রোঽম্বিকাসুতঃ
আক্ষিপ্য বাক্যং বাক্যজ্ঞো বাক্পথেনাপ্যয়াত্পুনঃ
4.11
ধৃতরাষ্ট্র উবাচ
যথা ভবান্বেদ তথাস্মি বেত্তা; ভাবাভাবৌ বিদিতৌ মে যথাবৎ
স্বার্থে হি সংমুহ্যতি তাত লোকো; মাং চাপি লোকাত্মকমেব বিদ্ধি
4.12
প্রসাদয়ে ত্বামতুলপ্রভাবং; ত্বং নো গতির্দর্শয়িতা চ ধীরঃ
ন চাপি তে বশগা মে মহর্ষে; ন কল্মষং কর্তুমিহার্হসে মাম্
4.13
ত্বং হি ধর্মঃ পবিত্রং চ যশঃ কীর্তির্ধৃতিঃ স্মৃতিঃ
কুরূণাং পাণ্ডবানাং চ মান্যশ্চাসি পিতামহঃ
4.14
ব্যাস উবাচ
বৈচিত্রবীর্য নৃপতে যত্তে মনসি বর্ততে
অভিধত্স্ব যথাকামং ছেত্তাস্মি তব সংশয়ম্
4.15
ধৃতরাষ্ট্র উবাচ
যানি লিঙ্গানি সংগ্রামে ভবন্তি বিজয়িষ্যতাম্
তানি সর্বাণি ভগবঞ্শ্রোতুমিচ্ছামি তত্ত্বতঃ
4.16
ব্যাস উবাচ
প্রসন্নভাঃ পাবক ঊর্ধ্বরশ্মিঃ; প্রদক্ষিণাবর্তশিখো বিধূমঃ
পুণ্যা গন্ধাশ্চাহুতীনাং প্রবান্তি; জয়স্যৈতদ্ভাবিনো রূপমাহুঃ
4.17
গম্ভীরঘোষাশ্চ মহাস্বনাশ্চ; শঙ্খা মৃদঙ্গাশ্চ নদন্তি যত্র
বিশুদ্ধরশ্মিস্তপনঃ শশী চ; জয়স্যৈতদ্ভাবিনো রূপমাহুঃ
4.18
ইষ্টা বাচঃ পৃষ্ঠতো বায়সানাং; সংপ্রস্থিতানাং চ গমিষ্যতাং চ
যে পৃষ্ঠতস্তে ত্বরয়ন্তি রাজ;ন্যে ত্বগ্রতস্তে প্রতিষেধয়ন্তি
4.19
কল্যাণবাচঃ শকুনা রাজহংসাঃ; শুকাঃ ক্রৌঞ্চাঃ শতপত্রাশ্চ যত্র
প্রদক্ষিণাশ্চৈব ভবন্তি সংখ্যে; ধ্রুবং জয়ং তত্র বদন্তি বিপ্রাঃ
4.20
অলংকারৈঃ কবচৈঃ কেতুভিশ্চ; মুখপ্রসাদৈর্হেমবর্ণৈশ্চ নৄণাম্
ভ্রাজিষ্মতী দুষ্প্রতিপ্রেক্ষণীয়া; যেষাং চমূস্তে বিজয়ন্তি শত্রূন্
4.21
হৃষ্টা বাচস্তথা সত্ত্বং যোধানাং যত্র ভারত
ন ম্লায়ন্তে স্রজশ্চৈব তে তরন্তি রণে রিপূন্
4.22
ইষ্টো বাতঃ প্রবিষ্টস্য দক্ষিণা প্রবিবিক্ষতঃ
পশ্চাত্সংসাধয়ত্যর্থং পুরস্তাত্প্রতিষেধতে
4.23
শব্দরূপরসস্পর্শগন্ধাশ্চাবিষ্কৃতাঃ শুভাঃ
সদা যোধাশ্চ হৃষ্টাশ্চ যেষাং তেষাং ধ্রুবং জয়ঃ
4.24
অন্বেব বায়বো বান্তি তথাভ্রাণি বয়াংসি চ
অনুপ্লবন্তে মেঘাশ্চ তথৈবেন্দ্রধনূংষি চ
4.25
এতানি জয়মানানাং লক্ষণানি বিশাং পতে
ভবন্তি বিপরীতানি মুমূর্ষূণাং জনাধিপ
4.26
অল্পায়াং বা মহত্যাং বা সেনায়ামিতি নিশ্চিতম্
হর্ষো যোধগণস্যৈকং জয়লক্ষণমুচ্যতে
4.27
একো দীর্ণো দারয়তি সেনাং সুমহতীমপি
তং দীর্ণমনুদীর্যন্তে যোধাঃ শূরতমা অপি
4.28
দুর্নিবারতমা চৈব প্রভগ্না মহতী চমূঃ
অপামিব মহাবেগস্ত্রস্তা মৃগগণা ইব
4.29
নৈব শক্যা সমাধাতুং সংনিপাতে মহাচমূঃ
দীর্ণা ইত্যেব দীর্যন্তে যোধাঃ শূরতমা অপি
ভীতান্ভগ্নাংশ্চ সংপ্রেক্ষ্য ভয়ং ভূয়ো বিবর্ধতে
4.30
প্রভগ্না সহসা রাজন্দিশো বিভ্রামিতা পরৈঃ
নৈব স্থাপয়িতুং শক্যা শূরৈরপি মহাচমূঃ
4.31
সংভৃত্য মহতীং সেনাং চতুরঙ্গাং মহীপতিঃ
উপায়পূর্বং মেধাবী যতেত সততোত্থিতঃ
4.32
উপায়বিজয়ং শ্রেষ্ঠমাহুর্ভেদেন মধ্যমম্
জঘন্য এষ বিজয়ো যো যুদ্ধেন বিশাং পতে
মহাদোষঃ সংনিপাতস্ততো ব্যঙ্গঃ স উচ্যতে
4.33
পরস্পরজ্ঞাঃ সংহৃষ্টা ব্যবধূতাঃ সুনিশ্চিতাঃ
পঞ্চাশদপি যে শূরা মথ্নন্তি মহতীং চমূম্
অথ বা পঞ্চ ষট্সপ্ত বিজয়ন্ত্যনিবর্তিনঃ
4.34
ন বৈনতেয়ো গরুডঃ প্রশংসতি মহাজনম্
দৃষ্ট্বা সুপর্ণোপচিতিং মহতীমপি ভারত
4.35
ন বাহুল্যেন সেনায়া জয়ো ভবতি ভারত
অধ্রুবো হি জয়ো নাম দৈবং চাত্র পরায়ণম্
জয়ন্তো হ্যপি সংগ্রামে ক্ষয়বন্তো ভবন্ত্যুত