অধ্যায় 5

5.1

বৈশংপায়ন উবাচ
এবমুক্ত্বা যয়ৌ ব্যাসো ধৃতরাষ্ট্রায় ধীমতে
ধৃতরাষ্ট্রোঽপি তচ্ছ্রুত্বা ধ্যানমেবান্বপদ্যত

স মুহূর্তমিব ধ্যাত্বা বিনিঃশ্বস্য মুহুর্মুহুঃ
সংজয়ং সংশিতাত্মানমপৃচ্ছদ্ভরতর্ষভ

সংজয়েমে মহীপালাঃ শূরা যুদ্ধাভিনন্দিনঃ
অন্যোন্যমভিনিঘ্নন্তি শস্ত্রৈরুচ্চাবচৈরপি

পার্থিবাঃ পৃথিবীহেতোঃ সমভিত্যক্তজীবিতাঃ
ন চ শাম্যন্তি নিঘ্নন্তো বর্ধয়ন্তো যমক্ষয়ম্

ভৌমমৈশ্বর্যমিচ্ছন্তো ন মৃষ্যন্তে পরস্পরম্
মন্যে বহুগুণা ভূমিস্তন্মমাচক্ষ্ব সংজয়

বহূনি চ সহস্রাণি প্রয়ুতান্যর্বুদানি চ
কোট্যশ্চ লোকবীরাণাং সমেতাঃ কুরুজাঙ্গলে

দেশানাং চ পরীমাণং নগরাণাং চ সংজয়
শ্রোতুমিচ্ছামি তত্ত্বেন যত এতে সমাগতাঃ

দিব্যবুদ্ধিপ্রদীপেন যুক্তস্ত্বং জ্ঞানচক্ষুষা
প্রসাদাত্তস্য বিপ্রর্ষের্ব্যাসস্যামিততেজসঃ

সংজয় উবাচ
যথাপ্রজ্ঞং মহাপ্রাজ্ঞ ভৌমান্বক্ষ্যামি তে গুণান্
শাস্ত্রচক্ষুরবেক্ষস্ব নমস্তে ভরতর্ষভ

দ্বিবিধানীহ ভূতানি ত্রসানি স্থাবরাণি চ
ত্রসানাং ত্রিবিধা যোনিরণ্ডস্বেদজরায়ুজাঃ

ত্রসানাং খলু সর্বেষাং শ্রেষ্ঠা রাজঞ্জরায়ুজাঃ
জরায়ুজানাং প্রবরা মানবাঃ পশবশ্চ যে

নানারূপাণি বিভ্রাণাস্তেষাং ভেদাশ্চতুর্দশ
অরণ্যবাসিনঃ সপ্ত সপ্তৈষাং গ্রামবাসিনঃ

সিংহব্যাঘ্রবরাহাশ্চ মহিষা বারণাস্তথা
ঋক্ষাশ্চ বানরাশ্চৈব সপ্তারণ্যাঃ স্মৃতা নৃপ

গৌরজো মনুজো মেষো বাজ্যশ্বতরগর্দভাঃ
এতে গ্রাম্যাঃ সমাখ্যাতাঃ পশবঃ সপ্ত সাধুভিঃ

এতে বৈ পশবো রাজন্গ্রাম্যারণ্যাশ্চতুর্দশ
বেদোক্তাঃ পৃথিবীপাল যেষু যজ্ঞাঃ প্রতিষ্ঠিতাঃ

গ্রাম্যাণাং পুরুষঃ শ্রেষ্ঠঃ সিংহশ্চারণ্যবাসিনাম্
সর্বেষামেব ভূতানামন্যোন্যেনাভিজীবনম্

উদ্ভিজ্জাঃ স্থাবরাঃ প্রোক্তাস্তেষাং পঞ্চৈব জাতয়ঃ
বৃক্ষগুল্মলতাবল্ল্যস্ত্বক্সারাস্তৃণজাতয়ঃ

এষাং বিংশতিরেকোনা মহাভূতেষু পঞ্চসু
চতুর্বিংশতিরুদ্দিষ্টা গায়ত্রী লোকসংমতা

য এতাং বেদ গায়ত্রীং পুণ্যাং সর্বগুণান্বিতাম্
তত্ত্বেন ভরতশ্রেষ্ঠ স লোকান্ন প্রণশ্যতি

ভূমৌ হি জায়তে সর্বং ভূমৌ সর্বং প্রণশ্যতি
ভূমিঃ প্রতিষ্ঠা ভূতানাং ভূমিরেব পরায়ণম্

যস্য ভূমিস্তস্য সর্বং জগত্স্থাবরজঙ্গমম্
তত্রাভিগৃদ্ধা রাজানো বিনিঘ্নন্তীতরেতরম্