Utshovঅধ্যায় 3
3.1
ব্যাস উবাচ
খরা গোষু প্রজায়ন্তে রমন্তে মাতৃভিঃ সুতাঃ
অনার্তবং পুষ্পফলং দর্শয়ন্তি বনে দ্রুমাঃ
3.2
গর্ভিণ্যো রাজপুত্র্যশ্চ জনয়ন্তি বিভীষণান্
ক্রব্যাদান্পক্ষিণশ্চৈব গোমায়ূনপরান্মৃগান্
3.3
ত্রিবিষাণাশ্চতুর্নেত্রাঃ পঞ্চপাদা দ্বিমেহনাঃ
দ্বিশীর্ষাশ্চ দ্বিপুচ্ছাশ্চ দংষ্ট্রিণঃ পশবোঽশিবাঃ
3.4
জায়ন্তে বিবৃতাস্যাশ্চ ব্যাহরন্তোঽশিবা গিরঃ
ত্রিপদাঃ শিখিনস্তার্ক্ষ্যাশ্চতুর্দংষ্ট্রা বিষাণিনঃ
3.5
তথৈবান্যাশ্চ দৃশ্যন্তে স্ত্রিয়শ্চ ব্রহ্মবাদিনাম্
বৈনতেয়ান্ময়ূরাংশ্চ জনয়ন্ত্যঃ পুরে তব
3.6
গোবত্সং বডবা সূতে শ্বা সৃগালং মহীপতে
ক্রকরাঞ্শারিকাশ্চৈব শুকাংশ্চাশুভবাদিনঃ
3.7
স্ত্রিয়ঃ কাশ্চিত্প্রজায়ন্তে চতস্রঃ পঞ্চ কন্যকাঃ
তা জাতমাত্রা নৃত্যন্তি গায়ন্তি চ হসন্তি চ
3.8
পৃথগ্জনস্য কুডকাঃ স্তনপাঃ স্তেনবেশ্মনি
নৃত্যন্তি পরিগায়ন্তি বেদয়ন্তো মহদ্ভয়ম্
3.9
প্রতিমাশ্চালিখন্ত্যন্যে সশস্ত্রাঃ কালচোদিতাঃ
অন্যোন্যমভিধাবন্তি শিশবো দণ্ডপাণয়ঃ
উপরুন্ধন্তি কৃত্বা চ নগরাণি যুয়ুত্সবঃ
3.10
পদ্মোত্পলানি বৃক্ষেষু জায়ন্তে কুমুদানি চ
বিষ্বগ্বাতাশ্চ বান্ত্যুগ্রা রজো ন ব্যুপশাম্যতি
3.11
অভীক্ষ্ণং কম্পতে ভূমিরর্কং রাহুস্তথাগ্রসৎ
শ্বেতো গ্রহস্তথা চিত্রাং সমতিক্রম্য তিষ্ঠতি
3.12
অভাবং হি বিশেষেণ কুরূণাং প্রতিপশ্যতি
ধূমকেতুর্মহাঘোরঃ পুষ্যমাক্রম্য তিষ্ঠতি
3.13
সেনয়োরশিবং ঘোরং করিষ্যতি মহাগ্রহঃ
মঘাস্বঙ্গারকো বক্রঃ শ্রবণে চ বৃহস্পতিঃ
3.14
ভাগ্যং নক্ষত্রমাক্রম্য সূর্যপুত্রেণ পীড্যতে
শুক্রঃ প্রোষ্ঠপদে পূর্বে সমারুহ্য বিশাং পতে
উত্তরে তু পরিক্রম্য সহিতঃ প্রত্যুদীক্ষতে
3.15
শ্যামো গ্রহঃ প্রজ্বলিতঃ সধূমঃ সহপাবকঃ
ঐন্দ্রং তেজস্বি নক্ষত্রং জ্যেষ্ঠামাক্রম্য তিষ্ঠতি
3.16
ধ্রুবঃ প্রজ্বলিতো ঘোরমপসব্যং প্রবর্ততে
চিত্রাস্বাত্যন্তরে চৈব ধিষ্ঠিতঃ পরুষো গ্রহঃ
3.17
বক্রানুবক্রং কৃত্বা চ শ্রবণে পাবকপ্রভঃ
ব্রহ্মরাশিং সমাবৃত্য লোহিতাঙ্গো ব্যবস্থিতঃ
3.18
সর্বসস্যপ্রতিচ্ছন্না পৃথিবী ফলমালিনী
পঞ্চশীর্ষা যবাশ্চৈব শতশীর্ষাশ্চ শালয়ঃ
3.19
প্রধানাঃ সর্বলোকস্য যাস্বায়ত্তমিদং জগৎ
তা গাবঃ প্রস্নুতা বত্সৈঃ শোণিতং প্রক্ষরন্ত্যুত
3.20
নিশ্চেরুরপিধানেভ্যঃ খড্গাঃ প্রজ্বলিতা ভৃশম্
ব্যক্তং পশ্যন্তি শস্ত্রাণি সংগ্রামং সমুপস্থিতম্
3.21
অগ্নিবর্ণা যথা ভাসঃ শস্ত্রাণামুদকস্য চ
কবচানাং ধ্বজানাং চ ভবিষ্যতি মহান্ক্ষয়ঃ
3.22
দিক্ষু প্রজ্বলিতাস্যাশ্চ ব্যাহরন্তি মৃগদ্বিজাঃ
অত্যাহিতং দর্শয়ন্তো বেদয়ন্তি মহদ্ভয়ম্
3.23
একপক্ষাক্ষিচরণঃ শকুনিঃ খচরো নিশি
রৌদ্রং বদতি সংরব্ধঃ শোণিতং ছর্দয়ন্মুহুঃ
3.24
গ্রহৌ তাম্রারুণশিখৌ প্রজ্বলন্তাবিব স্থিতৌ
সপ্তর্ষীণামুদারাণাং সমবচ্ছাদ্য বৈ প্রভাম্
3.25
সংবত্সরস্থায়িনৌ চ গ্রহৌ প্রজ্বলিতাবুভৌ
বিশাখয়োঃ সমীপস্থৌ বৃহস্পতিশনৈশ্চরৌ
3.26
কৃত্তিকাসু গ্রহস্তীব্রো নক্ষত্রে প্রথমে জ্বলন্
বপূংষ্যপহরন্ভাসা ধূমকেতুরিব স্থিতঃ
3.27
ত্রিষু পূর্বেষু সর্বেষু নক্ষত্রেষু বিশাং পতে
বুধঃ সংপততেঽভীক্ষ্ণং জনয়ন্সুমহদ্ভয়ম্
3.28
চতুর্দশীং পঞ্চদশীং ভূতপূর্বাং চ ষোডশীম্
ইমাং তু নাভিজানামি অমাবাস্যাং ত্রয়োদশীম্
3.29
চন্দ্রসূর্যাবুভৌ গ্রস্তাবেকমাসে ত্রয়োদশীম্
অপর্বণি গ্রহাবেতৌ প্রজাঃ সংক্ষপয়িষ্যতঃ
3.30
রজোবৃতা দিশঃ সর্বাঃ পাংসুবর্ষৈঃ সমন্ততঃ
উত্পাতমেঘা রৌদ্রাশ্চ রাত্রৌ বর্ষন্তি শোণিতম্
3.31
মাংসবর্ষং পুনস্তীব্রমাসীত্কৃষ্ণচতুর্দশীম্
অর্ধরাত্রে মহাঘোরমতৃপ্যংস্তত্র রাক্ষসাঃ
3.32
প্রতিস্রোতোঽবহন্নদ্যঃ সরিতঃ শোণিতোদকাঃ
ফেনায়মানাঃ কূপাশ্চ নর্দন্তি বৃষভা ইব
পতন্ত্যুল্কাঃ সনির্ঘাতাঃ শুষ্কাশনিবিমিশ্রিতাঃ
3.33
অদ্য চৈব নিশাং ব্যুষ্টামুদয়ে ভানুরাহতঃ
জ্বলন্তীভির্মহোল্কাভিশ্চতুর্ভিঃ সর্বতোদিশম্
3.34
আদিত্যমুপতিষ্ঠদ্ভিস্তত্র চোক্তং মহর্ষিভিঃ
ভূমিপালসহস্রাণাং ভূমিঃ পাস্যতি শোণিতম্
3.35
কৈলাসমন্দরাভ্যাং তু তথা হিমবতো গিরেঃ
সহস্রশো মহাশব্দং শিখরাণি পতন্তি চ
3.36
মহাভূতা ভূমিকম্পে চতুরঃ সাগরান্পৃথক্
বেলামুদ্বর্তয়ন্তি স্ম ক্ষোভয়ন্তঃ পুনঃ পুনঃ
3.37
বৃক্ষানুন্মথ্য বান্ত্যুগ্রা বাতাঃ শর্করকর্ষিণঃ
পতন্তি চৈত্যবৃক্ষাশ্চ গ্রামেষু নগরেষু চ
3.38
পীতলোহিতনীলশ্চ জ্বলত্যগ্নির্হুতো দ্বিজৈঃ
বামার্চিঃ শাবগন্ধী চ ধূমপ্রায়ঃ খরস্বনঃ
স্পর্শা গন্ধা রসাশ্চৈব বিপরীতা মহীপতে
3.39
ধূমায়ন্তে ধ্বজা রাজ্ঞাং কম্পমানা মুহুর্মুহুঃ
মুঞ্চন্ত্যঙ্গারবর্ষাণি ভের্যোঽথ পটহাস্তথা
3.40
প্রাসাদশিখরাগ্রেষু পুরদ্বারেষু চৈব হি
গৃধ্রাঃ পরিপতন্ত্যুগ্রা বামং মণ্ডলমাশ্রিতাঃ
3.41
পক্বাপক্বেতি সুভৃশং বাবাশ্যন্তে বয়াংসি চ
নিলীয়ন্তে ধ্বজাগ্রেষু ক্ষয়ায় পৃথিবীক্ষিতাম্
3.42
ধ্যায়ন্তঃ প্রকিরন্তশ্চ বালান্বেপথুসংয়ুতাঃ
রুদন্তি দীনাস্তুরগা মাতঙ্গাশ্চ সহস্রশঃ
3.43
এতচ্ছ্রুত্বা ভবানত্র প্রাপ্তকালং ব্যবস্যতাম্
যথা লোকঃ সমুচ্ছেদং নায়ং গচ্ছেত ভারত
3.44
বৈশংপায়ন উবাচ
পিতুর্বচো নিশম্যৈতদ্ধৃতরাষ্ট্রোঽব্রবীদিদম্
দিষ্টমেতত্পুরা মন্যে ভবিষ্যতি ন সংশয়ঃ
3.45
ক্ষত্রিয়াঃ ক্ষত্রধর্মেণ বধ্যন্তে যদি সংয়ুগে
বীরলোকং সমাসাদ্য সুখং প্রাপ্স্যন্তি কেবলম্
3.46
ইহ কীর্তিং পরে লোকে দীর্ঘকালং মহত্সুখম্
প্রাপ্স্যন্তি পুরুষব্যাঘ্রাঃ প্রাণাংস্ত্যক্ত্বা মহাহবে