Utshovঅধ্যায় 2
2.1
বৈশংপায়ন উবাচ
ততঃ পূর্বাপরে সংধ্যে সমীক্ষ্য ভগবানৃষিঃ
সর্ববেদবিদাং শ্রেষ্ঠো ব্যাসঃ সত্যবতীসুতঃ
2.2
ভবিষ্যতি রণে ঘোরে ভরতানাং পিতামহঃ
প্রত্যক্ষদর্শী ভগবান্ভূতভব্যভবিষ্যবিৎ
2.3
বৈচিত্রবীর্যং রাজানং স রহস্যং ব্রবীদিদম্
শোচন্তমার্তং ধ্যায়ন্তং পুত্রাণামনয়ং তদা
2.4
ব্যাস উবাচ
রাজন্পরীতকালাস্তে পুত্রাশ্চান্যে চ ভূমিপাঃ
তে হনিষ্যন্তি সংগ্রামে সমাসাদ্যেতরেতরম্
2.5
তেষু কালপরীতেষু বিনশ্যত্সু চ ভারত
কালপর্যায়মাজ্ঞায় মা স্ম শোকে মনঃ কৃথাঃ
2.6
যদি ত্বিচ্ছসি সংগ্রামে দ্রষ্টুমেনং বিশাং পতে
চক্ষুর্দদানি তে হন্ত যুদ্ধমেতন্নিশাময়
2.7
ধৃতরাষ্ট্র উবাচ
ন রোচয়ে জ্ঞাতিবধং দ্রষ্টুং ব্রহ্মর্ষিসত্তম
যুদ্ধমেতত্ত্বশেষেণ শৃণুয়াং তব তেজসা
2.8
বৈশংপায়ন উবাচ
তস্মিন্ননিচ্ছতি দ্রষ্টুং সংগ্রামং শ্রোতুমিচ্ছতি
বরাণামীশ্বরো দাতা সংজয়ায় বরং দদৌ
2.9
ব্যাস উবাচ
এষ তে সংজয়ো রাজন্যুদ্ধমেতদ্বদিষ্যতি
এতস্য সর্বং সংগ্রামে নপরোক্ষং ভবিষ্যতি
2.10
চক্ষুষা সংজয়ো রাজন্দিব্যেনৈষ সমন্বিতঃ
কথয়িষ্যতি তে যুদ্ধং সর্বজ্ঞশ্চ ভবিষ্যতি
2.11
প্রকাশং বা রহস্যং বা রাত্রৌ বা যদি বা দিবা
মনসা চিন্তিতমপি সর্বং বেত্স্যতি সংজয়ঃ
2.12
নৈনং শস্ত্রাণি ভেত্স্যন্তি নৈনং বাধিষ্যতে শ্রমঃ
গাবল্গণিরয়ং জীবন্যুদ্ধাদস্মাদ্বিমোক্ষ্যতে
2.13
অহং চ কীর্তিমেতেষাং কুরূণাং ভরতর্ষভ
পাণ্ডবানাং চ সর্বেষাং প্রথয়িষ্যামি মা শুচঃ
2.14
দিষ্টমেতত্পুরা চৈব নাত্র শোচিতুমর্হসি
ন চৈব শক্যং সংয়ন্তুং যতো ধর্মস্ততো জয়ঃ
2.15
বৈশংপায়ন উবাচ
এবমুক্ত্বা স ভগবান্কুরূণাং প্রপিতামহঃ
পুনরেব মহাবাহুং ধৃতরাষ্ট্রমুবাচ হ
2.16
ইহ যুদ্ধে মহারাজ ভবিষ্যতি মহান্ক্ষয়ঃ
যথেমানি নিমিত্তানি ভয়ায়াদ্যোপলক্ষয়ে
2.17
শ্যেনা গৃধ্রাশ্চ কাকাশ্চ কঙ্কাশ্চ সহিতা বলৈঃ
সংপতন্তি বনান্তেষু সমবায়াংশ্চ কুর্বতে
2.18
অত্যুগ্রং চ প্রপশ্যন্তি যুদ্ধমানন্দিনো দ্বিজাঃ
ক্রব্যাদা ভক্ষয়িষ্যন্তি মাংসানি গজবাজিনাম্
2.19
খটাখটেতি বাশন্তো ভৈরবং ভয়বেদিনঃ
কহ্বাঃ প্রয়ান্তি মধ্যেন দক্ষিণামভিতো দিশম্
2.20
উভে পূর্বাপরে সংধ্যে নিত্যং পশ্যামি ভারত
উদয়াস্তমনে সূর্যং কবন্ধৈঃ পরিবারিতম্
2.21
শ্বেতলোহিতপর্যন্তাঃ কৃষ্ণগ্রীবাঃ সবিদ্যুতঃ
ত্রিবর্ণাঃ পরিঘাঃ সংধৌ ভানুমাবারয়ন্ত্যুত
2.22
জ্বলিতার্কেন্দুনক্ষত্রং নির্বিশেষদিনক্ষপম্
অহোরাত্রং ময়া দৃষ্টং তত্ক্ষয়ায় ভবিষ্যতি
2.23
অলক্ষ্যঃ প্রভয়া হীনঃ পৌর্ণমাসীং চ কার্ত্তিকীম্
চন্দ্রোঽভূদগ্নিবর্ণশ্চ সমবর্ণে নভস্তলে
2.24
স্বপ্স্যন্তি নিহতা বীরা ভূমিমাবৃত্য পার্থিবাঃ
রাজানো রাজপুত্রাশ্চ শূরাঃ পরিঘবাহবঃ
2.25
অন্তরিক্ষে বরাহস্য বৃষদংশস্য চোভয়োঃ
প্রণাদং যুধ্যতো রাত্রৌ রৌদ্রং নিত্যং প্রলক্ষয়ে
2.26
দেবতাপ্রতিমাশ্চাপি কম্পন্তি চ হসন্তি চ
বমন্তি রুধিরং চাস্যৈঃ স্বিদ্যন্তি প্রপতন্তি চ
2.27
অনাহতা দুন্দুভয়ঃ প্রণদন্তি বিশাং পতে
অয়ুক্তাশ্চ প্রবর্তন্তে ক্ষত্রিয়াণাং মহারথাঃ
2.28
কোকিলাঃ শতপত্রাশ্চ চাষা ভাসাঃ শুকাস্তথা
সারসাশ্চ ময়ূরাশ্চ বাচো মুঞ্চন্তি দারুণাঃ
2.29
গৃহীতশস্ত্রাভরণা বর্মিণো বাজিপৃষ্ঠগাঃ
অরুণোদয়েষু দৃশ্যন্তে শতশঃ শলভব্রজাঃ
2.30
উভে সংধ্যে প্রকাশেতে দিশাং দাহসমন্বিতে
আসীদ্রুধিরবর্ষং চ অস্থিবর্ষং চ ভারত
2.31
যা চৈষা বিশ্রুতা রাজংস্ত্রৈলোক্যে সাধুসংমতা
অরুন্ধতী তয়াপ্যেষ বসিষ্ঠঃ পৃষ্ঠতঃ কৃতঃ
2.32
রোহিণীং পীডয়ন্নেষ স্থিতো রাজঞ্শনৈশ্চরঃ
ব্যাবৃত্তং লক্ষ্ম সোমস্য ভবিষ্যতি মহদ্ভয়ম্
2.33
অনভ্রে চ মহাঘোরং স্তনিতং শ্রূয়তেঽনিশম্
বাহনানাং চ রুদতাং প্রপতন্ত্যশ্রুবিন্দবঃ