অধ্যায় 1

1.1

জনমেজয় উবাচ
কথং যুয়ুধিরে বীরাঃ কুরুপাণ্ডবসোমকাঃ
পার্থিবাশ্চ মহাভাগা নানাদেশসমাগতাঃ

1.2

বৈশংপায়ন উবাচ
যথা যুয়ুধিরে বীরাঃ কুরুপাণ্ডবসোমকাঃ
কুরুক্ষেত্রে তপঃক্ষেত্রে শৃণু তত্পৃথিবীপতে

1.3

অবতীর্য কুরুক্ষেত্রং পাণ্ডবাঃ সহসোমকাঃ
কৌরবানভ্যবর্তন্ত জিগীষন্তো মহাবলাঃ

1.4

বেদাধ্যয়নসংপন্নাঃ সর্বে যুদ্ধাভিনন্দিনঃ
আশংসন্তো জয়ং যুদ্ধে বধং বাভিমুখা রণে

1.5

অভিয়ায় চ দুর্ধর্ষাং ধার্তরাষ্ট্রস্য বাহিনীম্
প্রাঙ্মুখাঃ পশ্চিমে ভাগে ন্যবিশন্ত সসৈনিকাঃ

1.6

সমন্তপঞ্চকাদ্বাহ্যং শিবিরাণি সহস্রশঃ
কারয়ামাস বিধিবত্কুন্তীপুত্রো যুধিষ্ঠিরঃ

1.7

শূন্যেব পৃথিবী সর্বা বালবৃদ্ধাবশেষিতা
নিরশ্বপুরুষা চাসীদ্রথকুঞ্জরবর্জিতা

1.8

যাবত্তপতি সূর্যো হি জম্বূদ্বীপস্য মণ্ডলম্
তাবদেব সমাবৃত্তং বলং পার্থিবসত্তম

1.9

একস্থাঃ সর্ববর্ণাস্তে মণ্ডলং বহুয়োজনম্
পর্যাক্রামন্ত দেশাংশ্চ নদীঃ শৈলান্বনানি চ

1.10

তেষাং যুধিষ্ঠিরো রাজা সর্বেষাং পুরুষর্ষভ
আদিদেশ সবাহানাং ভক্ষ্যভোজ্যমনুত্তমম্

1.11

সংজ্ঞাশ্চ বিবিধাস্তাস্তাস্তেষাং চক্রে যুধিষ্ঠিরঃ
এবংবাদী বেদিতব্যঃ পাণ্ডবেয়োঽয়মিত্যুত

1.12

অভিজ্ঞানানি সর্বেষাং সংজ্ঞাশ্চাভরণানি চ
যোজয়ামাস কৌরব্যো যুদ্ধকাল উপস্থিতে

1.13

দৃষ্ট্বা ধ্বজাগ্রং পার্থানাং ধার্তরাষ্ট্রো মহামনাঃ
সহ সর্বৈর্মহীপালৈঃ প্রত্যব্যূহত পাণ্ডবান্

1.14

পাণ্ডুরেণাতপত্রেণ ধ্রিয়মাণেন মূর্ধনি
মধ্যে নাগসহস্রস্য ভ্রাতৃভিঃ পরিবারিতম্

1.15

দৃষ্ট্বা দুর্যোধনং হৃষ্টাঃ সর্বে পাণ্ডবসৈনিকাঃ
দধ্মুঃ সর্বে মহাশঙ্খান্ভেরীর্জঘ্নুঃ সহস্রশঃ

1.16

ততঃ প্রহৃষ্টাং স্বাং সেনামভিবীক্ষ্যাথ পাণ্ডবাঃ
বভূবুর্হৃষ্টমনসো বাসুদেবশ্চ বীর্যবান্

1.17

ততো যোধান্হর্ষয়ন্তৌ বাসুদেবধনংজয়ৌ
দধ্মতুঃ পুরুষব্যাঘ্রৌ দিব্যৌ শঙ্খৌ রথে স্থিতৌ

1.18

পাঞ্চজন্যস্য নির্ঘোষং দেবদত্তস্য চোভয়োঃ
শ্রুত্বা সবাহনা যোধাঃ শকৃন্মূত্রং প্রসুস্রুবুঃ

1.19

যথা সিংহস্য নদতঃ স্বনং শ্রুত্বেতরে মৃগাঃ
ত্রসেয়ুস্তদ্বদেবাসীদ্ধার্তরাষ্ট্রবলং তদা

1.20

উদতিষ্ঠদ্রজো ভৌমং ন প্রাজ্ঞায়ত কিংচন
অন্তর্ধীয়ত চাদিত্যঃ সৈন্যেন রজসাবৃতঃ

1.21

ববর্ষ চাত্র পর্জন্যো মাংসশোণিতবৃষ্টিমান্
ব্যুক্ষন্সর্বাণ্যনীকানি তদদ্ভুতমিবাভবৎ

1.22

বায়ুস্ততঃ প্রাদুরভূন্নীচৈঃ শর্করকর্ষণঃ
বিনিঘ্নংস্তান্যনীকানি বিধমংশ্চৈব তদ্রজঃ

1.23

উভে সেনে তদা রাজন্যুদ্ধায় মুদিতে ভৃশম্
কুরুক্ষেত্রে স্থিতে যত্তে সাগরক্ষুভিতোপমে

1.24

তয়োস্তু সেনয়োরাসীদদ্ভুতঃ স সমাগমঃ
যুগান্তে সমনুপ্রাপ্তে দ্বয়োঃ সাগরয়োরিব

1.25

শূন্যাসীত্পৃথিবী সর্বা বালবৃদ্ধাবশেষিতা
তেন সেনাসমূহেন সমানীতেন কৌরবৈঃ

1.26

ততস্তে সময়ং চক্রুঃ কুরুপাণ্ডবসোমকাঃ
ধর্মাংশ্চ স্থাপয়ামাসুর্যুদ্ধানাং ভরতর্ষভ

1.27

নিবৃত্তে চৈব নো যুদ্ধে প্রীতিশ্চ স্যাত্পরস্পরম্
যথাপুরং যথায়োগং ন চ স্যাচ্ছলনং পুনঃ

1.28

বাচা যুদ্ধে প্রবৃত্তে নো বাচৈব প্রতিয়োধনম্
নিষ্ক্রান্তঃ পৃতনামধ্যান্ন হন্তব্যঃ কথংচন

1.29

রথী চ রথিনা যোধ্যো গজেন গজধূর্গতঃ
অশ্বেনাশ্বী পদাতিশ্চ পদাতেনৈব ভারত

1.30

যথায়োগং যথাবীর্যং যথোত্সাহং যথাবয়ঃ
সমাভাষ্য প্রহর্তব্যং ন বিশ্বস্তে ন বিহ্বলে

1.31

পরেণ সহ সংয়ুক্তঃ প্রমত্তো বিমুখস্তথা
ক্ষীণশস্ত্রো বিবর্মা চ ন হন্তব্যঃ কথংচন

1.32

ন সূতেষু ন ধুর্যেষু ন চ শস্ত্রোপনায়িষু
ন ভেরীশঙ্খবাদেষু প্রহর্তব্যং কথংচন

1.33

এবং তে সময়ং কৃত্বা কুরুপাণ্ডবসোমকাঃ
বিস্ময়ং পরমং জগ্মুঃ প্রেক্ষমাণাঃ পরস্পরম্

1.34

নিবিশ্য চ মহাত্মানস্ততস্তে পুরুষর্ষভাঃ
হৃষ্টরূপাঃ সুমনসো বভূবুঃ সহসৈনিকাঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.