UtshovChapter 1
1.1
जनमेजय उवाच
कथं युयुधिरे वीराः कुरुपाण्डवसोमकाः
पार्थिवाश्च महाभागा नानादेशसमागताः
Janamejaya uvacha
Katham yuyudhire virah kurupandavasomakah
Parthivashcha mahabhaga nanadeshasamagatah
1.2
वैशंपायन उवाच
यथा युयुधिरे वीराः कुरुपाण्डवसोमकाः
कुरुक्षेत्रे तपःक्षेत्रे शृणु तत्पृथिवीपते
Vaishampayana uvacha
Yatha yuyudhire virah kurupandavasomakah
Kurukshetre tapahkshetre shrinu tatprithivipate
1.3
अवतीर्य कुरुक्षेत्रं पाण्डवाः सहसोमकाः
कौरवानभ्यवर्तन्त जिगीषन्तो महाबलाः
Avatirya kurukshetram pandavah sahasomakah
Kauravanabhyavartanta jigishanto mahabalah
1.4
वेदाध्ययनसंपन्नाः सर्वे युद्धाभिनन्दिनः
आशंसन्तो जयं युद्धे वधं वाभिमुखा रणे
Vedadhyayanasampannah sarve yuddhabhinandinah
Ashansanto jayam yuddhe vadham vabhimukha rane
1.5
अभियाय च दुर्धर्षां धार्तराष्ट्रस्य वाहिनीम्
प्राङ्मुखाः पश्चिमे भागे न्यविशन्त ससैनिकाः
Abhiyaya cha durdharsham dhartarashtrasya vahinim
Pranmukhah pashchime bhage nyavishanta sasainikah
1.6
समन्तपञ्चकाद्बाह्यं शिबिराणि सहस्रशः
कारयामास विधिवत्कुन्तीपुत्रो युधिष्ठिरः
Samantapanchakadbahyam shibirani sahasrashah
Karayamasa vidhivatkuntiputro yudhishthirah
1.7
शून्येव पृथिवी सर्वा बालवृद्धावशेषिता
निरश्वपुरुषा चासीद्रथकुञ्जरवर्जिता
Shunyeva prithivi sarva balavriddhavasheshita
Nirashvapurusha chasidrathakunjaravarjita
1.8
यावत्तपति सूर्यो हि जम्बूद्वीपस्य मण्डलम्
तावदेव समावृत्तं बलं पार्थिवसत्तम
Yavattapati suryo hi jambudvipasya mandalam
Tavadeva samavrittam balam parthivasattama
1.9
एकस्थाः सर्ववर्णास्ते मण्डलं बहुयोजनम्
पर्याक्रामन्त देशांश्च नदीः शैलान्वनानि च
Ekasthah sarvavarnaste mandalam bahuyojanam
Paryakramanta deshanshcha nadih shailanvanani cha
1.10
तेषां युधिष्ठिरो राजा सर्वेषां पुरुषर्षभ
आदिदेश सवाहानां भक्ष्यभोज्यमनुत्तमम्
Tesham yudhishthiro raja sarvesham purusharshabha
Adidesha savahanam bhakshyabhojyamanuttamam
1.11
संज्ञाश्च विविधास्तास्तास्तेषां चक्रे युधिष्ठिरः
एवंवादी वेदितव्यः पाण्डवेयोऽयमित्युत
Sangyashcha vividhastastastesham chakre yudhishthirah
Evanvadi veditavyah pandaveyoyamityuta
1.12
अभिज्ञानानि सर्वेषां संज्ञाश्चाभरणानि च
योजयामास कौरव्यो युद्धकाल उपस्थिते
Abhigyanani sarvesham sangyashchabharanani cha
Yojayamasa kauravyo yuddhakala upasthite
1.13
दृष्ट्वा ध्वजाग्रं पार्थानां धार्तराष्ट्रो महामनाः
सह सर्वैर्महीपालैः प्रत्यव्यूहत पाण्डवान्
Drishtva dhvajagram parthanam dhartarashtro mahamanah
Saha sarvairmahipalaih pratyavyuhata pandavan
1.14
पाण्डुरेणातपत्रेण ध्रियमाणेन मूर्धनि
मध्ये नागसहस्रस्य भ्रातृभिः परिवारितम्
Pandurenatapatrena dhriyamanena murdhani
Madhye nagasahasrasya bhratribhih parivaritam
1.15
दृष्ट्वा दुर्योधनं हृष्टाः सर्वे पाण्डवसैनिकाः
दध्मुः सर्वे महाशङ्खान्भेरीर्जघ्नुः सहस्रशः
Drishtva duryodhanam hrishtah sarve pandavasainikah
Dadhmuh sarve mahashankhanbherirjaghnuh sahasrashah
1.16
ततः प्रहृष्टां स्वां सेनामभिवीक्ष्याथ पाण्डवाः
बभूवुर्हृष्टमनसो वासुदेवश्च वीर्यवान्
Tatah prahrishtam svam senamabhivikshyatha pandavah
Babhuvurhrishtamanaso vasudevashcha viryavan
1.17
ततो योधान्हर्षयन्तौ वासुदेवधनंजयौ
दध्मतुः पुरुषव्याघ्रौ दिव्यौ शङ्खौ रथे स्थितौ
Tato yodhanharshayantau vasudevadhananjayau
Dadhmatuh purushavyaghrau divyau shankhau rathe sthitau
1.18
पाञ्चजन्यस्य निर्घोषं देवदत्तस्य चोभयोः
श्रुत्वा सवाहना योधाः शकृन्मूत्रं प्रसुस्रुवुः
Panchajanyasya nirghosham devadattasya chobhayoh
Shrutva savahana yodhah shakrinmutram prasusruvuh
1.19
यथा सिंहस्य नदतः स्वनं श्रुत्वेतरे मृगाः
त्रसेयुस्तद्वदेवासीद्धार्तराष्ट्रबलं तदा
Yatha sinhasya nadatah svanam shrutvetare mrigah
Traseyustadvadevasiddhartarashtrabalam tada
1.20
उदतिष्ठद्रजो भौमं न प्राज्ञायत किंचन
अन्तर्धीयत चादित्यः सैन्येन रजसावृतः
Udatishthadrajo bhaumam na pragyayata kinchana
Antardhiyata chadityah sainyena rajasavritah
1.21
ववर्ष चात्र पर्जन्यो मांसशोणितवृष्टिमान्
व्युक्षन्सर्वाण्यनीकानि तदद्भुतमिवाभवत्
Vavarsha chatra parjanyo mansashonitavrishtiman
Vyukshansarvanyanikani tadadbhutamivabhavat
1.22
वायुस्ततः प्रादुरभून्नीचैः शर्करकर्षणः
विनिघ्नंस्तान्यनीकानि विधमंश्चैव तद्रजः
Vayustatah pradurabhunnichaih sharkarakarshanah
Vinighnanstanyanikani vidhamanshchaiva tadrajah
1.23
उभे सेने तदा राजन्युद्धाय मुदिते भृशम्
कुरुक्षेत्रे स्थिते यत्ते सागरक्षुभितोपमे
Ubhe sene tada rajanyuddhaya mudite bhrisham
Kurukshetre sthite yatte sagarakshubhitopame
1.24
तयोस्तु सेनयोरासीदद्भुतः स समागमः
युगान्ते समनुप्राप्ते द्वयोः सागरयोरिव
Tayostu senayorasidadbhutah sa samagamah
Yugante samanuprapte dvayoh sagarayoriva
1.25
शून्यासीत्पृथिवी सर्वा बालवृद्धावशेषिता
तेन सेनासमूहेन समानीतेन कौरवैः
Shunyasitprithivi sarva balavriddhavasheshita
Tena senasamuhena samanitena kauravaih
1.26
ततस्ते समयं चक्रुः कुरुपाण्डवसोमकाः
धर्मांश्च स्थापयामासुर्युद्धानां भरतर्षभ
Tataste samayam chakruh kurupandavasomakah
Dharmanshcha sthapayamasuryuddhanam bharatarshabha
1.27
निवृत्ते चैव नो युद्धे प्रीतिश्च स्यात्परस्परम्
यथापुरं यथायोगं न च स्याच्छलनं पुनः
Nivritte chaiva no yuddhe pritishcha syatparasparam
Yathapuram yathayogam na cha syachchhalanam punah
1.28
वाचा युद्धे प्रवृत्ते नो वाचैव प्रतियोधनम्
निष्क्रान्तः पृतनामध्यान्न हन्तव्यः कथंचन
Vacha yuddhe pravritte no vachaiva pratiyodhanam
Nishkrantah pritanamadhyanna hantavyah kathanchana
1.29
रथी च रथिना योध्यो गजेन गजधूर्गतः
अश्वेनाश्वी पदातिश्च पदातेनैव भारत
Rathi cha rathina yodhyo gajena gajadhurgatah
Ashvenashvi padatishcha padatenaiva bharata
1.30
यथायोगं यथावीर्यं यथोत्साहं यथावयः
समाभाष्य प्रहर्तव्यं न विश्वस्ते न विह्वले
Yathayogam yathaviryam yathotsaham yathavayah
Samabhashya prahartavyam na vishvaste na vihvale
1.31
परेण सह संयुक्तः प्रमत्तो विमुखस्तथा
क्षीणशस्त्रो विवर्मा च न हन्तव्यः कथंचन
Parena saha sanyuktah pramatto vimukhastatha
Kshinashastro vivarma cha na hantavyah kathanchana
1.32
न सूतेषु न धुर्येषु न च शस्त्रोपनायिषु
न भेरीशङ्खवादेषु प्रहर्तव्यं कथंचन
Na suteshu na dhuryeshu na cha shastropanayishu
Na bherishankhavadeshu prahartavyam kathanchana
1.33
एवं ते समयं कृत्वा कुरुपाण्डवसोमकाः
विस्मयं परमं जग्मुः प्रेक्षमाणाः परस्परम्
Evam te samayam kritva kurupandavasomakah
Vismayam paramam jagmuh prekshamanah parasparam
1.34
निविश्य च महात्मानस्ततस्ते पुरुषर्षभाः
हृष्टरूपाः सुमनसो बभूवुः सहसैनिकाः
Nivishya cha mahatmanastataste purusharshabhah
Hrishtarupah sumanaso babhuvuh sahasainikah