Utshovঅধ্যায় 9
9.1
যুধিষ্ঠির উবাচ
কথমিন্দ্রেণ রাজেন্দ্র সভার্যেণ মহাত্মনা
দুঃখং প্রাপ্তং পরং ঘোরমেতদিচ্ছামি বেদিতুম্
9.2
শল্য উবাচ
শৃণু রাজন্পুরা বৃত্তমিতিহাসং পুরাতনম্
সভার্যেণ যথা প্রাপ্তং দুঃখমিন্দ্রেণ ভারত
9.3
ত্বষ্টা প্রজাপতির্হ্যাসীদ্দেবশ্রেষ্ঠো মহাতপাঃ
স পুত্রং বৈ ত্রিশিরসমিন্দ্রদ্রোহাত্কিলাসৃজৎ
9.4
ঐন্দ্রং স প্রার্থয়ত্স্থানং বিশ্বরূপো মহাদ্যুতিঃ
তৈস্ত্রিভির্বদনৈর্ঘোরৈঃ সূর্যেন্দুজ্বলনোপমৈঃ
9.5
বেদানেকেন সোঽধীতে সুরামেকেন চাপিবৎ
একেন চ দিশঃ সর্বাঃ পিবন্নিব নিরীক্ষতে
9.6
স তপস্বী মৃদুর্দান্তো ধর্মে তপসি চোদ্যতঃ
তপোঽতপ্যন্মহত্তীব্রং সুদুশ্চরমরিংদম
9.7
তস্য দৃষ্ট্বা তপোবীর্যং সত্ত্বং চামিততেজসঃ
বিষাদমগমচ্ছক্র ইন্দ্রোঽয়ং মা ভবেদিতি
9.8
কথং সজ্জেত ভোগেষু ন চ তপ্যেন্মহত্তপঃ
বিবর্ধমানস্ত্রিশিরাঃ সর্বং ত্রিভুবনং গ্রসেৎ
9.9
ইতি সংচিন্ত্য বহুধা বুদ্ধিমান্ভরতর্ষভ
আজ্ঞাপয়ত্সোঽপ্সরসস্ত্বষ্টৃপুত্রপ্রলোভনে
9.10
যথা স সজ্জেত্ত্রিশিরাঃ কামভোগেষু বৈ ভৃশম্
ক্ষিপ্রং কুরুত গচ্ছধ্বং প্রলোভয়ত মাচিরম্
9.11
শৃঙ্গারবেষাঃ সুশ্রোণ্যো ভাবৈর্যুক্তা মনোহরৈঃ
প্রলোভয়ত ভদ্রং বঃ শময়ধ্বং ভয়ং মম
9.12
অস্বস্থং হ্যাত্মনাত্মানং লক্ষয়ামি বরাঙ্গনাঃ
ভয়মেতন্মহাঘোরং ক্ষিপ্রং নাশয়তাবলাঃ
9.13
অপ্সরস ঊচুঃ
তথা যত্নং করিষ্যামঃ শক্র তস্য প্রলোভনে
যথা নাবাপ্স্যসি ভয়ং তস্মাদ্বলনিষূদন
9.14
নির্দহন্নিব চক্ষুর্ভ্যাং যোঽসাবাস্তে তপোনিধিঃ
তং প্রলোভয়িতুং দেব গচ্ছামঃ সহিতা বয়ম্
যতিষ্যামো বশে কর্তুং ব্যপনেতুং চ তে ভয়ম্
9.15
শল্য উবাচ
ইন্দ্রেণ তাস্ত্বনুজ্ঞাতা জগ্মুস্ত্রিশিরসোঽন্তিকম্
তত্র তা বিবিধৈর্ভাবৈর্লোভয়ন্ত্যো বরাঙ্গনাঃ
নৃত্যং সংদর্শয়ন্ত্যশ্চ তথৈবাঙ্গেষু সৌষ্ঠবম্
9.16
বিচেরুঃ সংপ্রহর্ষং চ নাভ্যগচ্ছন্মহাতপাঃ
ইন্দ্রিয়াণি বশে কৃত্বা পূর্ণসাগরসংনিভঃ
9.17
তাস্তু যত্নং পরং কৃত্বা পুনঃ শক্রমুপস্থিতাঃ
কৃতাঞ্জলিপুটাঃ সর্বা দেবরাজমথাব্রুবন্
9.18
ন স শক্যঃ সুদুর্ধর্ষো ধৈর্যাচ্চালয়িতুং প্রভো
যত্তে কার্যং মহাভাগ ক্রিয়তাং তদনন্তরম্
9.19
সংপূজ্যাপ্সরসঃ শক্রো বিসৃজ্য চ মহামতিঃ
চিন্তয়ামাস তস্যৈব বধোপায়ং মহাত্মনঃ
9.20
স তূষ্ণীং চিন্তয়ন্বীরো দেবরাজঃ প্রতাপবান্
বিনিশ্চিতমতির্ধীমান্বধে ত্রিশিরসোঽভবৎ
9.21
বজ্রমস্য ক্ষিপাম্যদ্য স ক্ষিপ্রং ন ভবিষ্যতি
শত্রুঃ প্রবৃদ্ধো নোপেক্ষ্যো দুর্বলোঽপি বলীয়সা
9.22
শাস্ত্রবুদ্ধ্যা বিনিশ্চিত্য কৃত্বা বুদ্ধিং বধে দৃঢাম্
অথ বৈশ্বানরনিভং ঘোররূপং ভয়াবহম্
মুমোচ বজ্রং সংক্রুদ্ধঃ শক্রস্ত্রিশিরসং প্রতি
9.23
স পপাত হতস্তেন বজ্রেণ দৃঢমাহতঃ
পর্বতস্যেব শিখরং প্রণুন্নং মেদিনীতলে
9.24
তং তু বজ্রহতং দৃষ্ট্বা শয়ানমচলোপমম্
ন শর্ম লেভে দেবেন্দ্রো দীপিতস্তস্য তেজসা
হতোঽপি দীপ্ততেজাঃ স জীবন্নিব চ দৃশ্যতে
9.25
অভিতস্তত্র তক্ষাণং ঘটমানং শচীপতিঃ
অপশ্যদব্রবীচ্চৈনং সত্বরং পাকশাসনঃ
ক্ষিপ্রং ছিন্ধি শিরাংস্যস্য কুরুষ্ব বচনং মম
9.26
তক্ষোবাচ
মহাস্কন্ধো ভৃশং হ্যেষ পরশুর্ন তরিষ্যতি
কর্তুং চাহং ন শক্ষ্যামি কর্ম সদ্ভির্বিগর্হিতম্
9.27
ইন্দ্র উবাচ
মা ভৈস্ত্বং ক্ষিপ্রমেতদ্বৈ কুরুষ্ব বচনং মম
মত্প্রসাদাদ্ধি তে শস্ত্রং বজ্রকল্পং ভবিষ্যতি
9.28
তক্ষোবাচ
কং ভবন্তমহং বিদ্যাং ঘোরকর্মাণমদ্য বৈ
এতদিচ্ছাম্যহং শ্রোতুং তত্ত্বেন কথয়স্ব মে
9.29
ইন্দ্র উবাচ
অহমিন্দ্রো দেবরাজস্তক্ষন্বিদিতমস্তু তে
কুরুষ্বৈতদ্যথোক্তং মে তক্ষন্মা ত্বং বিচারয়
9.30
তক্ষোবাচ
ক্রূরেণ নাপত্রপসে কথং শক্রেহ কর্মণা
ঋষিপুত্রমিমং হত্বা ব্রহ্মহত্যাভয়ং ন তে
9.31
ইন্দ্র উবাচ
পশ্চাদ্ধর্মং চরিষ্যামি পাবনার্থং সুদুশ্চরম্
শত্রুরেষ মহাবীর্যো বজ্রেণ নিহতো ময়া
9.32
অদ্যাপি চাহমুদ্বিগ্নস্তক্ষন্নস্মাদ্বিভেমি বৈ
ক্ষিপ্রং ছিন্ধি শিরাংসি ত্বং করিষ্যেঽনুগ্রহং তব
9.33
শিরঃ পশোস্তে দাস্যন্তি ভাগং যজ্ঞেষু মানবাঃ
এষ তেঽনুগ্রহস্তক্ষন্ক্ষিপ্রং কুরু মম প্রিয়ম্
9.34
শল্য উবাচ
এতচ্ছ্রুত্বা তু তক্ষা স মহেন্দ্রবচনং তদা
শিরাংস্যথ ত্রিশিরসঃ কুঠারেণাচ্ছিনত্তদা
9.35
নিকৃত্তেষু ততস্তেষু নিষ্ক্রামংস্ত্রিশিরাস্ত্বথ
কপিঞ্জলাস্তিত্তিরাশ্চ কলবিঙ্কাশ্চ সর্বশঃ
9.36
যেন বেদানধীতে স্ম পিবতে সোমমেব চ
তস্মাদ্বক্ত্রান্বিনিষ্পেতুঃ ক্ষিপ্রং তস্য কপিঞ্জলাঃ
9.37
যেন সর্বা দিশো রাজন্পিবন্নিব নিরীক্ষতে
তস্মাদ্বক্ত্রাদ্বিনিষ্পেতুস্তিত্তিরাস্তস্য পাণ্ডব
9.38
যত্সুরাপং তু তস্যাসীদ্বক্ত্রং ত্রিশিরসস্তদা
কলবিঙ্কা বিনিষ্পেতুস্তেনাস্য ভরতর্ষভ
9.39
ততস্তেষু নিকৃত্তেষু বিজ্বরো মঘবানভূৎ
জগাম ত্রিদিবং হৃষ্টস্তক্ষাপি স্বগৃহান্যয়ৌ
9.40
ত্বষ্টা প্রজাপতিঃ শ্রুত্বা শক্রেণাথ হতং সুতম্
ক্রোধসংরক্তনয়ন ইদং বচনমব্রবীৎ
9.41
তপ্যমানং তপো নিত্যং ক্ষান্তং দান্তং জিতেন্দ্রিয়ম্
অনাপরাধিনং যস্মাত্পুত্রং হিংসিতবান্মম
9.42
তস্মাচ্ছক্রবধার্থায় বৃত্রমুত্পাদয়াম্যহম্
লোকাঃ পশ্যন্তু মে বীর্যং তপসশ্চ বলং মহৎ
স চ পশ্যতু দেবেন্দ্রো দুরাত্মা পাপচেতনঃ
9.43
উপস্পৃশ্য ততঃ ক্রুদ্ধস্তপস্বী সুমহায়শাঃ
অগ্নিং হুত্বা সমুত্পাদ্য ঘোরং বৃত্রমুবাচ হ
ইন্দ্রশত্রো বিবর্ধস্ব প্রভাবাত্তপসো মম
9.44
সোঽবর্ধত দিবং স্তব্ধ্বা সূর্যবৈশ্বানরোপমঃ
কিং করোমীতি চোবাচ কালসূর্য ইবোদিতঃ
শক্রং জহীতি চাপ্যুক্তো জগাম ত্রিদিবং ততঃ
9.45
ততো যুদ্ধং সমভবদ্বৃত্রবাসবয়োস্তদা
সংক্রুদ্ধয়োর্মহাঘোরং প্রসক্তং কুরুসত্তম
9.46
ততো জগ্রাহ দেবেন্দ্রং বৃত্রো বীরঃ শতক্রতুম্
অপাবৃত্য স জগ্রাস বৃত্রঃ ক্রোধসমন্বিতঃ
9.47
গ্রস্তে বৃত্রেণ শক্রে তু সংভ্রান্তাস্ত্রিদশাস্তদা
অসৃজংস্তে মহাসত্ত্বা জৃম্ভিকাং বৃত্রনাশিনীম্
9.48
বিজৃম্ভমাণস্য ততো বৃত্রস্যাস্যাদপাবৃতাৎ
স্বান্যঙ্গান্যভিসংক্ষিপ্য নিষ্ক্রান্তো বলসূদনঃ
ততঃ প্রভৃতি লোকেষু জৃম্ভিকা প্রাণিসংশ্রিতা
9.49
জহৃষুশ্চ সুরাঃ সর্বে দৃষ্ট্বা শক্রং বিনিঃসৃতম্
ততঃ প্রববৃতে যুদ্ধং বৃত্রবাসবয়োঃ পুনঃ
সংরব্ধয়োস্তদা ঘোরং সুচিরং ভরতর্ষভ
9.50
যদা ব্যবর্ধত রণে বৃত্রো বলসমন্বিতঃ
ত্বষ্টুস্তপোবলাদ্বিদ্বাংস্তদা শক্রো ন্যবর্তত
9.51
নিবৃত্তে তু তদা দেবা বিষাদমগমন্পরম্
সমেত্য শক্রেণ চ তে ত্বষ্টুস্তেজোবিমোহিতাঃ
অমন্ত্রয়ন্ত তে সর্বে মুনিভিঃ সহ ভারত
9.52
কিং কার্যমিতি তে রাজন্বিচিন্ত্য ভয়মোহিতাঃ
জগ্মুঃ সর্বে মহাত্মানং মনোভির্বিষ্ণুমব্যয়ম্
উপবিষ্টা মন্দরাগ্রে সর্বে বৃত্রবধেপ্সবঃ