Utshovঅধ্যায় 10
10.1
ইন্দ্র উবাচ
সর্বং ব্যাপ্তমিদং দেবা বৃত্রেণ জগদব্যয়ম্
ন হ্যস্য সদৃশং কিংচিত্প্রতিঘাতায় যদ্ভবেৎ
10.2
সমর্থো হ্যভবং পূর্বমসমর্থোঽস্মি সাংপ্রতম্
কথং কুর্যাং নু ভদ্রং বো দুষ্প্রধর্ষঃ স মে মতঃ
10.3
তেজস্বী চ মহাত্মা চ যুদ্ধে চামিতবিক্রমঃ
গ্রসেত্ত্রিভুবনং সর্বং সদেবাসুরমানুষম্
10.4
তস্মাদ্বিনিশ্চয়মিমং শৃণুধ্বং মে দিবৌকসঃ
বিষ্ণোঃ ক্ষয়মুপাগম্য সমেত্য চ মহাত্মনা
তেন সংমন্ত্র্য বেত্স্যামো বধোপায়ং দুরাত্মনঃ
10.5
শল্য উবাচ
এবমুক্তে মঘবতা দেবাঃ সর্ষিগণাস্তদা
শরণ্যং শরণং দেবং জগ্মুর্বিষ্ণুং মহাবলম্
10.6
ঊচুশ্চ সর্বে দেবেশং বিষ্ণুং বৃত্রভয়ার্দিতাঃ
ত্বয়া লোকাস্ত্রয়ঃ ক্রান্তাস্ত্রিভির্বিক্রমণৈঃ প্রভো
10.7
অমৃতং চাহৃতং বিষ্ণো দৈত্যাশ্চ নিহতা রণে
বলিং বদ্ধ্বা মহাদৈত্যং শক্রো দেবাধিপঃ কৃতঃ
10.8
ত্বং প্রভুঃ সর্বলোকানাং ত্বয়া সর্বমিদং ততম্
ত্বং হি দেব মহাদেবঃ সর্বলোকনমস্কৃতঃ
10.9
গতির্ভব ত্বং দেবানাং সেন্দ্রাণামমরোত্তম
জগদ্ব্যাপ্তমিদং সর্বং বৃত্রেণাসুরসূদন
10.10
বিষ্ণুরুবাচ
অবশ্যং করণীয়ং মে ভবতাং হিতমুত্তমম্
তস্মাদুপায়ং বক্ষ্যামি যথাসৌ ন ভবিষ্যতি
10.11
গচ্ছধ্বং সর্ষিগন্ধর্বা যত্রাসৌ বিশ্বরূপধৃক্
সাম তস্য প্রয়ুঞ্জধ্বং তত এনং বিজেষ্যথ
10.12
ভবিষ্যতি গতির্দেবাঃ শক্রস্য মম তেজসা
অদৃশ্যশ্চ প্রবেক্ষ্যামি বজ্রমস্যায়ুধোত্তমম্
10.13
গচ্ছধ্বমৃষিভিঃ সার্ধং গন্ধর্বৈশ্চ সুরোত্তমাঃ
বৃত্রস্য সহ শক্রেণ সংধিং কুরুত মাচিরম্
10.14
শল্য উবাচ
এবমুক্তাস্তু দেবেন ঋষয়স্ত্রিদশাস্তথা
যয়ুঃ সমেত্য সহিতাঃ শক্রং কৃত্বা পুরঃসরম্
10.15
সমীপমেত্য চ তদা সর্ব এব মহৌজসঃ
তং তেজসা প্রজ্বলিতং প্রতপন্তং দিশো দশ
10.16
গ্রসন্তমিব লোকাংস্ত্রীন্সূর্যাচন্দ্রমসৌ যথা
দদৃশুস্তত্র তে বৃত্রং শক্রেণ সহ দেবতাঃ
10.17
ঋষয়োঽথ ততোঽভ্যেত্য বৃত্রমূচুঃ প্রিয়ং বচঃ
ব্যাপ্তং জগদিদং সর্বং তেজসা তব দুর্জয়
10.18
ন চ শক্নোষি নির্জেতুং বাসবং ভূরিবিক্রমম্
যুধ্যতোশ্চাপি বাং কালো ব্যতীতঃ সুমহানিহ
10.19
পীড্যন্তে চ প্রজাঃ সর্বাঃ সদেবাসুরমানবাঃ
সখ্যং ভবতু তে বৃত্র শক্রেণ সহ নিত্যদা
অবাপ্স্যসি সুখং ত্বং চ শক্রলোকাংশ্চ শাশ্বতান্
10.20
ঋষিবাক্যং নিশম্যাথ স বৃত্রঃ সুমহাবলঃ
উবাচ তাংস্তদা সর্বান্প্রণম্য শিরসাসুরঃ
10.21
সর্বে যূয়ং মহাভাগা গন্ধর্বাশ্চৈব সর্বশঃ
যদ্ব্রূত তচ্ছ্রুতং সর্বং মমাপি শৃণুতানঘাঃ
10.22
সংধিঃ কথং বৈ ভবিতা মম শক্রস্য চোভয়োঃ
তেজসোর্হি দ্বয়োর্দেবাঃ সখ্যং বৈ ভবিতা কথম্
10.23
ঋষয় ঊচুঃ
সকৃত্সতাং সংগতং লিপ্সিতব্যং; ততঃ পরং ভবিতা ভব্যমেব
নাতিক্রমেত্সত্পুরুষেণ সংগতং; তস্মাত্সতাং সংগতং লিপ্সিতব্যম্
10.24
দৃঢং সতাং সংগতং চাপি নিত্যং; ব্রূয়াচ্চার্থং হ্যর্থকৃচ্ছ্রেষু ধীরঃ
মহার্থবত্সত্পুরুষেণ সংগতং; তস্মাত্সন্তং ন জিঘাংসেত ধীরঃ
10.25
ইন্দ্রঃ সতাং সংমতশ্চ নিবাসশ্চ মহাত্মনাম্
সত্যবাদী হ্যদীনশ্চ ধর্মবিত্সুবিনিশ্চিতঃ
10.26
তেন তে সহ শক্রেণ সংধির্ভবতু শাশ্বতঃ
এবং বিশ্বাসমাগচ্ছ মা তে ভূদ্বুদ্ধিরন্যথা
10.27
শল্য উবাচ
মহর্ষিবচনং শ্রুত্বা তানুবাচ মহাদ্যুতিঃ
অবশ্যং ভগবন্তো মে মাননীয়াস্তপস্বিনঃ
10.28
ব্রবীমি যদহং দেবাস্তত্সর্বং ক্রিয়তামিহ
ততঃ সর্বং করিষ্যামি যদূচুর্মাং দ্বিজর্ষভাঃ
10.29
ন শুষ্কেণ ন চার্দ্রেণ নাশ্মনা ন চ দারুণা
ন শস্ত্রেণ ন বজ্রেণ ন দিবা ন তথা নিশি
10.30
বধ্যো ভবেয়ং বিপ্রেন্দ্রাঃ শক্রস্য সহ দৈবতৈঃ
এবং মে রোচতে সংধিঃ শক্রেণ সহ নিত্যদা
10.31
বাঢমিত্যেব ঋষয়স্তমূচুর্ভরতর্ষভ
এবং কৃতে তু সংধানে বৃত্রঃ প্রমুদিতোঽভবৎ
10.32
যত্তঃ সদাভবচ্চাপি শক্রোঽমর্ষসমন্বিতঃ
বৃত্রস্য বধসংয়ুক্তানুপায়াননুচিন্তয়ন্
রন্ধ্রান্বেষী সমুদ্বিগ্নঃ সদাভূদ্বলবৃত্রহা
10.33
স কদাচিত্সমুদ্রান্তে তমপশ্যন্মহাসুরম্
সংধ্যাকাল উপাবৃত্তে মুহূর্তে রম্যদারুণে
10.34
ততঃ সংচিন্ত্য ভগবান্বরদানং মহাত্মনঃ
সংধ্যেয়ং বর্ততে রৌদ্রা ন রাত্রির্দিবসং ন চ
বৃত্রশ্চাবশ্যবধ্যোঽয়ং মম সর্বহরো রিপুঃ
10.35
যদি বৃত্রং ন হন্ম্যদ্য বঞ্চয়িত্বা মহাসুরম্
মহাবলং মহাকায়ং ন মে শ্রেয়ো ভবিষ্যতি
10.36
এবং সংচিন্তয়ন্নেব শক্রো বিষ্ণুমনুস্মরন্
অথ ফেনং তদাপশ্যত্সমুদ্রে পর্বতোপমম্
10.37
নায়ং শুষ্কো ন চার্দ্রোঽয়ং ন চ শস্ত্রমিদং তথা
এনং ক্ষেপ্স্যামি বৃত্রস্য ক্ষণাদেব নশিষ্যতি
10.38
সবজ্রমথ ফেনং তং ক্ষিপ্রং বৃত্রে নিসৃষ্টবান্
প্রবিশ্য ফেনং তং বিষ্ণুরথ বৃত্রং ব্যনাশয়ৎ
10.39
নিহতে তু ততো বৃত্রে দিশো বিতিমিরাভবন্
প্রববৌ চ শিবো বায়ুঃ প্রজাশ্চ জহৃষুস্তদা
10.40
ততো দেবাঃ সগন্ধর্বা যক্ষরাক্ষসপন্নগাঃ
ঋষয়শ্চ মহেন্দ্রং তমস্তুবন্বিবিধৈঃ স্তবৈঃ
10.41
নমস্কৃতঃ সর্বভূতৈঃ সর্বভূতানি সান্ত্বয়ন্
হতশত্রুঃ প্রহৃষ্টাত্মা বাসবঃ সহ দৈবতৈঃ
বিষ্ণুং ত্রিভুবনশ্রেষ্ঠং পূজয়ামাস ধর্মবিৎ
10.42
ততো হতে মহাবীর্যে বৃত্রে দেবভয়ংকরে
অনৃতেনাভিভূতোঽভূচ্ছক্রঃ পরমদুর্মনাঃ
ত্রৈশীর্ষয়াভিভূতশ্চ স পূর্বং ব্রহ্মহত্যয়া
10.43
সোঽন্তমাশ্রিত্য লোকানাং নষ্টসংজ্ঞো বিচেতনঃ
ন প্রাজ্ঞায়ত দেবেন্দ্রস্ত্বভিভূতঃ স্বকল্মষৈঃ
প্রতিচ্ছন্নো বসত্যপ্সু চেষ্টমান ইবোরগঃ
10.44
ততঃ প্রনষ্টে দেবেন্দ্রে ব্রহ্মহত্যাভয়ার্দিতে
ভূমিঃ প্রধ্বস্তসংকাশা নির্বৃক্ষা শুষ্ককাননা
বিচ্ছিন্নস্রোতসো নদ্যঃ সরাংস্যনুদকানি চ
10.45
সংক্ষোভশ্চাপি সত্ত্বানামনাবৃষ্টিকৃতোঽভবৎ
দেবাশ্চাপি ভৃশং ত্রস্তাস্তথা সর্বে মহর্ষয়ঃ
10.46
অরাজকং জগত্সর্বমভিভূতমুপদ্রবৈঃ
ততো ভীতাভবন্দেবাঃ কো নো রাজা ভবেদিতি
10.47
দিবি দেবর্ষয়শ্চাপি দেবরাজবিনাকৃতাঃ
ন চ স্ম কশ্চিদ্দেবানাং রাজ্যায় কুরুতে মনঃ