অধ্যায় 11

11.1

শল্য উবাচ
ঋষয়োঽথাব্রুবন্সর্বে দেবাশ্চ ত্রিদশেশ্বরাঃ
অয়ং বৈ নহুষঃ শ্রীমান্দেবরাজ্যেঽভিষিচ্যতাম্
তে গত্বাথাব্রুবন্সর্বে রাজা নো ভব পার্থিব

স তানুবাচ নহুষো দেবানৃষিগণাংস্তথা
পিতৃভিঃ সহিতান্রাজন্পরীপ্সন্হিতমাত্মনঃ

দুর্বলোঽহং ন মে শক্তির্ভবতাং পরিপালনে
বলবাঞ্জায়তে রাজা বলং শক্রে হি নিত্যদা

তমব্রুবন্পুনঃ সর্বে দেবাঃ সর্ষিপুরোগমাঃ
অস্মাকং তপসা যুক্তঃ পাহি রাজ্যং ত্রিবিষ্টপে

পরস্পরভয়ং ঘোরমস্মাকং হি ন সংশয়ঃ
অভিষিচ্যস্ব রাজেন্দ্র ভব রাজা ত্রিবিষ্টপে

দেবদানবয়ক্ষাণামৃষীণাং রক্ষসাং তথা
পিতৃগন্ধর্বভূতানাং চক্ষুর্বিষয়বর্তিনাম্
তেজ আদাস্যসে পশ্যন্বলবাংশ্চ ভবিষ্যসি

ধর্মং পুরস্কৃত্য সদা সর্বলোকাধিপো ভব
ব্রহ্মর্ষীংশ্চাপি দেবাংশ্চ গোপায়স্ব ত্রিবিষ্টপে

সুদুর্লভং বরং লব্ধ্বা প্রাপ্য রাজ্যং ত্রিবিষ্টপে
ধর্মাত্মা সততং ভূত্বা কামাত্মা সমপদ্যত

দেবোদ্যানেষু সর্বেষু নন্দনোপবনেষু চ
কৈলাসে হিমবত্পৃষ্ঠে মন্দরে শ্বেতপর্বতে
সহ্যে মহেন্দ্রে মলয়ে সমুদ্রেষু সরিত্সু চ

অপ্সরোভিঃ পরিবৃতো দেবকন্যাসমাবৃতঃ
নহুষো দেবরাজঃ সন্ক্রীডন্বহুবিধং তদা

শৃণ্বন্দিব্যা বহুবিধাঃ কথাঃ শ্রুতিমনোহরাঃ
বাদিত্রাণি চ সর্বাণি গীতং চ মধুরস্বরম্

বিশ্বাবসুর্নারদশ্চ গন্ধর্বাপ্সরসাং গণাঃ
ঋতবঃ ষট্চ দেবেন্দ্রং মূর্তিমন্ত উপস্থিতাঃ
মারুতঃ সুরভির্বাতি মনোজ্ঞঃ সুখশীতলঃ

এবং হি ক্রীডতস্তস্য নহুষস্য মহাত্মনঃ
সংপ্রাপ্তা দর্শনং দেবী শক্রস্য মহিষী প্রিয়া

স তাং সংদৃশ্য দুষ্টাত্মা প্রাহ সর্বান্সভাসদঃ
ইন্দ্রস্য মহিষী দেবী কস্মান্মাং নোপতিষ্ঠতি

অহমিন্দ্রোঽস্মি দেবানাং লোকানাং চ তথেশ্বরঃ
আগচ্ছতু শচী মহ্যং ক্ষিপ্রমদ্য নিবেশনম্

তচ্ছ্রুত্বা দুর্মনা দেবী বৃহস্পতিমুবাচ হ
রক্ষ মাং নহুষাদ্ব্রহ্মংস্তবাস্মি শরণং গতা

সর্বলক্ষণসংপন্নাং ব্রহ্মংস্ত্বং মাং প্রভাষসে
দেবরাজস্য দয়িতামত্যন্তসুখভাগিনীম্

অবৈধব্যেন সংয়ুক্তামেকপত্নীং পতিব্রতাম্
উক্তবানসি মাং পূর্বমৃতাং তাং কুরু বৈ গিরম্

নোক্তপূর্বং চ ভগবন্মৃষা তে কিংচিদীশ্বর
তস্মাদেতদ্ভবেত্সত্যং ত্বয়োক্তং দ্বিজসত্তম

বৃহস্পতিরথোবাচ ইন্দ্রাণীং ভয়মোহিতাম্
যদুক্তাসি ময়া দেবি সত্যং তদ্ভবিতা ধ্রুবম্

দ্রক্ষ্যসে দেবরাজানমিন্দ্রং শীঘ্রমিহাগতম্
ন ভেতব্যং চ নহুষাত্সত্যমেতদ্ব্রবীমি তে
সমানয়িষ্যে শক্রেণ নচিরাদ্ভবতীমহম্

অথ শুশ্রাব নহুষ ইন্দ্রাণীং শরণং গতাম্
বৃহস্পতেরঙ্গিরসশ্চুক্রোধ স নৃপস্তদা