Utshovঅধ্যায় 12
12.1
শল্য উবাচ
ক্রুদ্ধং তু নহুষং জ্ঞাত্বা দেবাঃ সর্ষিপুরোগমাঃ
অব্রুবন্দেবরাজানং নহুষং ঘোরদর্শনম্
12.2
দেবরাজ জহি ক্রোধং ত্বয়ি ক্রুদ্ধে জগদ্বিভো
ত্রস্তং সাসুরগন্ধর্বং সকিংনরমহোরগম্
12.3
জহি ক্রোধমিমং সাধো ন ক্রুধ্যন্তি ভবদ্বিধাঃ
পরস্য পত্নী সা দেবী প্রসীদস্ব সুরেশ্বর
12.4
নিবর্তয় মনঃ পাপাত্পরদারাভিমর্শনাৎ
দেবরাজোঽসি ভদ্রং তে প্রজা ধর্মেণ পালয়
12.5
এবমুক্তো ন জগ্রাহ তদ্বচঃ কামমোহিতঃ
অথ দেবানুবাচেদমিন্দ্রং প্রতি সুরাধিপঃ
12.6
অহল্যা ধর্ষিতা পূর্বমৃষিপত্নী যশস্বিনী
জীবতো ভর্তুরিন্দ্রেণ স বঃ কিং ন নিবারিতঃ
12.7
বহূনি চ নৃশংসানি কৃতানীন্দ্রেণ বৈ পুরা
বৈধর্ম্যাণ্যুপধাশ্চৈব স বঃ কিং ন নিবারিতঃ
12.8
উপতিষ্ঠতু মাং দেবী এতদস্যা হিতং পরম্
যুষ্মাকং চ সদা দেবাঃ শিবমেবং ভবিষ্যতি
12.9
দেবা ঊচুঃ
ইন্দ্রাণীমানয়িষ্যামো যথেচ্ছসি দিবস্পতে
জহি ক্রোধমিমং বীর প্রীতো ভব সুরেশ্বর
12.10
শল্য উবাচ
ইত্যুক্ত্বা তে তদা দেবা ঋষিভিঃ সহ ভারত
জগ্মুর্বৃহস্পতিং বক্তুমিন্দ্রাণীং চাশুভং বচঃ
12.11
জানীমঃ শরণং প্রাপ্তমিন্দ্রাণীং তব বেশ্মনি
দত্তাভয়াং চ বিপ্রেন্দ্র ত্বয়া দেবর্ষিসত্তম
12.12
তে ত্বাং দেবাঃ সগন্ধর্বা ঋষয়শ্চ মহাদ্যুতে
প্রসাদয়ন্তি চেন্দ্রাণী নহুষায় প্রদীয়তাম্
12.13
ইন্দ্রাদ্বিশিষ্টো নহুষো দেবরাজো মহাদ্যুতিঃ
বৃণোত্বিয়ং বরারোহা ভর্তৃত্বে বরবর্ণিনী
12.14
এবমুক্তে তু সা দেবী বাষ্পমুত্সৃজ্য সস্বরম্
উবাচ রুদতী দীনা বৃহস্পতিমিদং বচঃ
12.15
নাহমিচ্ছামি নহুষং পতিমন্বাস্য তং প্রভুম্
শরণাগতাস্মি তে ব্রহ্মংস্ত্রাহি মাং মহতো ভয়াৎ
12.16
বৃহস্পতিরুবাচ
শরণাগতাং ন ত্যজেয়মিন্দ্রাণি মম নিশ্চিতম্
ধর্মজ্ঞাং ধর্মশীলাং চ ন ত্যজে ত্বামনিন্দিতে
12.17
নাকার্যং কর্তুমিচ্ছামি ব্রাহ্মণঃ সন্বিশেষতঃ
শ্রুতধর্মা সত্যশীলো জানন্ধর্মানুশাসনম্
12.18
নাহমেতত্করিষ্যামি গচ্ছধ্বং বৈ সুরোত্তমাঃ
অস্মিংশ্চার্থে পুরা গীতং ব্রহ্মণা শ্রূয়তামিদম্
12.19
ন তস্য বীজং রোহতি বীজকালে; ন চাস্য বর্ষং বর্ষতি বর্ষকালে
ভীতং প্রপন্নং প্রদদাতি শত্রবে; ন সোঽন্তরং লভতে ত্রাণমিচ্ছন্
12.20
মোঘমন্নং বিন্দতি চাপ্যচেতাঃ; স্বর্গাল্লোকাদ্ভ্রশ্যতি নষ্টচেষ্টঃ
ভীতং প্রপন্নং প্রদদাতি যো বৈ; ন তস্য হব্যং প্রতিগৃহ্ণন্তি দেবাঃ
12.21
প্রমীয়তে চাস্য প্রজা হ্যকালে; সদা বিবাসং পিতরোঽস্য কুর্বতে
ভীতং প্রপন্নং প্রদদাতি শত্রবে; সেন্দ্রা দেবাঃ প্রহরন্ত্যস্য বজ্রম্
12.22
এতদেবং বিজানন্বৈ ন দাস্যামি শচীমিমাম্
ইন্দ্রাণীং বিশ্রুতাং লোকে শক্রস্য মহিষীং প্রিয়াম্
12.23
অস্যা হিতং ভবেদ্যচ্চ মম চাপি হিতং ভবেৎ
ক্রিয়তাং তত্সুরশ্রেষ্ঠা ন হি দাস্যাম্যহং শচীম্
12.24
শল্য উবাচ
অথ দেবাস্তমেবাহুর্গুরুমঙ্গিরসাং বরম্
কথং সুনীতং তু ভবেন্মন্ত্রয়স্ব বৃহস্পতে
12.25
বৃহস্পতিরুবাচ
নহুষং যাচতাং দেবী কিংচিত্কালান্তরং শুভা
ইন্দ্রাণীহিতমেতদ্ধি তথাস্মাকং ভবিষ্যতি
12.26
বহুবিঘ্নকরঃ কালঃ কালঃ কালং নয়িষ্যতি
দর্পিতো বলবাংশ্চাপি নহুষো বরসংশ্রয়াৎ
12.27
শল্য উবাচ
ততস্তেন তথোক্তে তু প্রীতা দেবাস্তমব্রুবন্
ব্রহ্মন্সাধ্বিদমুক্তং তে হিতং সর্বদিবৌকসাম্
এবমেতদ্দ্বিজশ্রেষ্ঠ দেবী চেয়ং প্রসাদ্যতাম্
12.28
ততঃ সমস্তা ইন্দ্রাণীং দেবাঃ সাগ্নিপুরোগমাঃ
ঊচুর্বচনমব্যগ্রা লোকানাং হিতকাম্যয়া
12.29
ত্বয়া জগদিদং সর্বং ধৃতং স্থাবরজঙ্গমম্
একপত্ন্যসি সত্যা চ গচ্ছস্ব নহুষং প্রতি
12.30
ক্ষিপ্রং ত্বামভিকামশ্চ বিনশিষ্যতি পার্থিবঃ
নহুষো দেবি শক্রশ্চ সুরৈশ্বর্যমবাপ্স্যতি
12.31
এবং বিনিশ্চয়ং কৃত্বা ইন্দ্রাণী কার্যসিদ্ধয়ে
অভ্যগচ্ছত সব্রীডা নহুষং ঘোরদর্শনম্
12.32
দৃষ্ট্বা তাং নহুষশ্চাপি বয়োরূপসমন্বিতাম্
সমহৃষ্যত দুষ্টাত্মা কামোপহতচেতনঃ