Utshovঅধ্যায় 13
13.1
শল্য উবাচ
অথ তামব্রবীদ্দৃষ্ট্বা নহুষো দেবরাট্তদা
ত্রয়াণামপি লোকানামহমিন্দ্রঃ শুচিস্মিতে
ভজস্ব মাং বরারোহে পতিত্বে বরবর্ণিনি
13.2
এবমুক্তা তু সা দেবী নহুষেণ পতিব্রতা
প্রাবেপত ভয়োদ্বিগ্না প্রবাতে কদলী যথা
13.3
নমস্য সা তু ব্রহ্মাণং কৃত্বা শিরসি চাঞ্জলিম্
দেবরাজমথোবাচ নহুষং ঘোরদর্শনম্
13.4
কালমিচ্ছাম্যহং লব্ধুং কিংচিত্ত্বত্তঃ সুরেশ্বর
ন হি বিজ্ঞায়তে শক্রঃ প্রাপ্তঃ কিং বা ক্ব বা গতঃ
13.5
তত্ত্বমেতত্তু বিজ্ঞায় যদি ন জ্ঞায়তে প্রভো
ততোঽহং ত্বামুপস্থাস্যে সত্যমেতদ্ব্রবীমি তে
এবমুক্তঃ স ইন্দ্রাণ্যা নহুষঃ প্রীতিমানভূৎ
13.6
নহুষ উবাচ
এবং ভবতু সুশ্রোণি যথা মামভিভাষসে
জ্ঞাত্বা চাগমনং কার্যং সত্যমেতদনুস্মরেঃ
13.7
শল্য উবাচ
নহুষেণ বিসৃষ্টা চ নিশ্চক্রাম ততঃ শুভা
বৃহস্পতিনিকেতং সা জগাম চ তপস্বিনী
13.8
তস্যাঃ সংশ্রুত্য চ বচো দেবাঃ সাগ্নিপুরোগমাঃ
মন্ত্রয়ামাসুরেকাগ্রাঃ শক্রার্থং রাজসত্তম
13.9
দেবদেবেন সংগম্য বিষ্ণুনা প্রভবিষ্ণুনা
ঊচুশ্চৈনং সমুদ্বিগ্না বাক্যং বাক্যবিশারদাঃ
13.10
ব্রহ্মহত্যাভিভূতো বৈ শক্রঃ সুরগণেশ্বরঃ
গতিশ্চ নস্ত্বং দেবেশ পূর্বজো জগতঃ প্রভুঃ
রক্ষার্থং সর্বভূতানাং বিষ্ণুত্বমুপজগ্মিবান্
13.11
ত্বদ্বীর্যান্নিহতে বৃত্রে বাসবো ব্রহ্মহত্যয়া
বৃতঃ সুরগণশ্রেষ্ঠ মোক্ষং তস্য বিনির্দিশ
13.12
তেষাং তদ্বচনং শ্রুত্বা দেবানাং বিষ্ণুরব্রবীৎ
মামেব যজতাং শক্রঃ পাবয়িষ্যামি বজ্রিণম্
13.13
পুণ্যেন হয়মেধেন মামিষ্ট্বা পাকশাসনঃ
পুনরেষ্যতি দেবানামিন্দ্রত্বমকুতোভয়ঃ
13.14
স্বকর্মভিশ্চ নহুষো নাশং যাস্যতি দুর্মতিঃ
কংচিত্কালমিমং দেবা মর্ষয়ধ্বমতন্দ্রিতাঃ
13.15
শ্রুত্বা বিষ্ণোঃ শুভাং সত্যাং তাং বাণীমমৃতোপমাম্
ততঃ সর্বে সুরগণাঃ সোপাধ্যায়াঃ সহর্ষিভিঃ
যত্র শক্রো ভয়োদ্বিগ্নস্তং দেশমুপচক্রমুঃ
13.16
তত্রাশ্বমেধঃ সুমহান্মহেন্দ্রস্য মহাত্মনঃ
ববৃতে পাবনার্থং বৈ ব্রহ্মহত্যাপহো নৃপ
13.17
বিভজ্য ব্রহ্মহত্যাং তু বৃক্ষেষু চ নদীষু চ
পর্বতেষু পৃথিব্যাং চ স্ত্রীষু চৈব যুধিষ্ঠির
13.18
সংবিভজ্য চ ভূতেষু বিসৃজ্য চ সুরেশ্বরঃ
বিজ্বরঃ পূতপাপ্মা চ বাসবোঽভবদাত্মবান্
13.19
অকম্প্যং নহুষং স্থানাদ্দৃষ্ট্বা চ বলসূদনঃ
তেজোঘ্নং সর্বভূতানাং বরদানাচ্চ দুঃসহম্
13.20
ততঃ শচীপতির্বীরঃ পুনরেব ব্যনশ্যত
অদৃশ্যঃ সর্বভূতানাং কালাকাঙ্ক্ষী চচার হ
13.21
প্রনষ্টে তু ততঃ শক্রে শচী শোকসমন্বিতা
হা শক্রেতি তদা দেবী বিললাপ সুদুঃখিতা
13.22
যদি দত্তং যদি হুতং গুরবস্তোষিতা যদি
একভর্তৃত্বমেবাস্তু সত্যং যদ্যস্তি বা ময়ি
13.23
পুণ্যাং চেমামহং দিব্যাং প্রবৃত্তামুত্তরায়ণে
দেবীং রাত্রিং নমস্যামি সিধ্যতাং মে মনোরথঃ
13.24
প্রয়তা চ নিশাং দেবীমুপাতিষ্ঠত তত্র সা
পতিব্রতাত্বাত্সত্যেন সোপশ্রুতিমথাকরোৎ
13.25
যত্রাস্তে দেবরাজোঽসৌ তং দেশং দর্শয়স্ব মে
ইত্যাহোপশ্রুতিং দেবী সত্যং সত্যেন দৃশ্যতাম্