অধ্যায় 14

14.1

শল্য উবাচ
অথৈনাং রুপিণীং সাধ্বীমুপাতিষ্ঠদুপশ্রুতিঃ
তাং বয়োরূপসংপন্নাং দৃষ্ট্বা দেবীমুপস্থিতাম্

ইন্দ্রাণী সংপ্রহৃষ্টা সা সংপূজ্যৈনামপৃচ্ছত
ইচ্ছামি ত্বামহং জ্ঞাতুং কা ত্বং ব্রূহি বরাননে

উপশ্রুতিরুবাচ
উপশ্রুতিরহং দেবি তবান্তিকমুপাগতা
দর্শনং চৈব সংপ্রাপ্তা তব সত্যেন তোষিতা

পতিব্রতাসি যুক্তা চ যমেন নিয়মেন চ
দর্শয়িষ্যামি তে শক্রং দেবং বৃত্রনিষূদনম্
ক্ষিপ্রমন্বেহি ভদ্রং তে দ্রক্ষ্যসে সুরসত্তমম্

শল্য উবাচ
ততস্তাং প্রস্থিতাং দেবীমিন্দ্রাণী সা সমন্বগাৎ
দেবারণ্যান্যতিক্রম্য পর্বতাংশ্চ বহূংস্ততঃ
হিমবন্তমতিক্রম্য উত্তরং পার্শ্বমাগমৎ

সমুদ্রং চ সমাসাদ্য বহুয়োজনবিস্তৃতম্
আসসাদ মহাদ্বীপং নানাদ্রুমলতাবৃতম্

তত্রাপশ্যত্সরো দিব্যং নানাশকুনিভির্বৃতম্
শতয়োজনবিস্তীর্ণং তাবদেবায়তং শুভম্

তত্র দিব্যানি পদ্মানি পঞ্চবর্ণানি ভারত
ষট্পদৈরুপগীতানি প্রফুল্লানি সহস্রশঃ

পদ্মস্য ভিত্ত্বা নালং চ বিবেশ সহিতা তয়া
বিসতন্তুপ্রবিষ্টং চ তত্রাপশ্যচ্ছতক্রতুম্

তং দৃষ্ট্বা চ সুসূক্ষ্মেণ রূপেণাবস্থিতং প্রভুম্
সূক্ষ্মরূপধরা দেবী বভূবোপশ্রুতিশ্চ সা

ইন্দ্রং তুষ্টাব চেন্দ্রাণী বিশ্রুতৈঃ পূর্বকর্মভিঃ
স্তূয়মানস্ততো দেবঃ শচীমাহ পুরংদরঃ

কিমর্থমসি সংপ্রাপ্তা বিজ্ঞাতশ্চ কথং ত্বহম্
ততঃ সা কথয়ামাস নহুষস্য বিচেষ্টিতম্

ইন্দ্রত্বং ত্রিষু লোকেষু প্রাপ্য বীর্যমদান্বিতঃ
দর্পাবিষ্টশ্চ দুষ্টাত্মা মামুবাচ শতক্রতো
উপতিষ্ঠ মামিতি ক্রূরঃ কালং চ কৃতবান্মম

যদি ন ত্রাস্যসি বিভো করিষ্যতি স মাং বশে
এতেন চাহং সংতপ্তা প্রাপ্তা শক্র তবান্তিকম্
জহি রৌদ্রং মহাবাহো নহুষং পাপনিশ্চয়ম্

প্রকাশয়স্ব চাত্মানং দৈত্যদানবসূদন
তেজঃ সমাপ্নুহি বিভো দেবরাজ্যং প্রশাধি চ