Utshovঅধ্যায় 15
15.1
শল্য উবাচ
এবমুক্তঃ স ভগবাঞ্শচ্যা পুনরথাব্রবীৎ
বিক্রমস্য ন কালোঽয়ং নহুষো বলবত্তরঃ
15.2
বিবর্ধিতশ্চ ঋষিভির্হব্যৈঃ কব্যৈশ্চ ভামিনি
নীতিমত্র বিধাস্যামি দেবি তাং কর্তুমর্হসি
15.3
গুহ্যং চৈতত্ত্বয়া কার্যং নাখ্যাতব্যং শুভে ক্বচিৎ
গত্বা নহুষমেকান্তে ব্রবীহি তনুমধ্যমে
15.4
ঋষিয়ানেন দিব্যেন মামুপৈহি জগত্পতে
এবং তব বশে প্রীতা ভবিষ্যামীতি তং বদ
15.5
ইত্যুক্তা দেবরাজেন পত্নী সা কমলেক্ষণা
এবমস্ত্বিত্যথোক্ত্বা তু জগাম নহুষং প্রতি
15.6
নহুষস্তাং ততো দৃষ্ট্বা বিস্মিতো বাক্যমব্রবীৎ
স্বাগতং তে বরারোহে কিং করোমি শুচিস্মিতে
15.7
ভক্তং মাং ভজ কল্যাণি কিমিচ্ছসি মনস্বিনি
তব কল্যাণি যত্কার্যং তত্করিষ্যে সুমধ্যমে
15.8
ন চ ব্রীডা ত্বয়া কার্যা সুশ্রোণি ময়ি বিশ্বস
সত্যেন বৈ শপে দেবি কর্তাস্মি বচনং তব
15.9
ইন্দ্রাণ্যুবাচ
যো মে ত্বয়া কৃতঃ কালস্তমাকাঙ্ক্ষে জগত্পতে
ততস্ত্বমেব ভর্তা মে ভবিষ্যসি সুরাধিপ
15.10
কার্যং চ হৃদি মে যত্তদ্দেবরাজাবধারয়
বক্ষ্যামি যদি মে রাজন্প্রিয়মেতত্করিষ্যসি
বাক্যং প্রণয়সংয়ুক্তং ততঃ স্যাং বশগা তব
15.11
ইন্দ্রস্য বাজিনো বাহা হস্তিনোঽথ রথাস্তথা
ইচ্ছাম্যহমিহাপূর্বং বাহনং তে সুরাধিপ
যন্ন বিষ্ণোর্ন রুদ্রস্য নাসুরাণাং ন রক্ষসাম্
15.12
বহন্তু ত্বাং মহারাজ ঋষয়ঃ সংগতা বিভো
সর্বে শিবিকয়া রাজন্নেতদ্ধি মম রোচতে
15.13
নাসুরেষু ন দেবেষু তুল্যো ভবিতুমর্হসি
সর্বেষাং তেজ আদত্স্ব স্বেন বীর্যেণ দর্শনাৎ
ন তে প্রমুখতঃ স্থাতুং কশ্চিদিচ্ছতি বীর্যবান্
15.14
শল্য উবাচ
এবমুক্তস্তু নহুষঃ প্রাহৃষ্যত তদা কিল
উবাচ বচনং চাপি সুরেন্দ্রস্তামনিন্দিতাম্
15.15
অপূর্বং বাহনমিদং ত্বয়োক্তং বরবর্ণিনি
দৃঢং মে রুচিতং দেবি ত্বদ্বশোঽস্মি বরাননে
15.16
ন হ্যল্পবীর্যো ভবতি যো বাহান্কুরুতে মুনীন্
অহং তপস্বী বলবান্ভূতভব্যভবত্প্রভুঃ
15.17
ময়ি ক্রুদ্ধে জগন্ন স্যান্ময়ি সর্বং প্রতিষ্ঠিতম্
দেবদানবগন্ধর্বাঃ কিংনরোরগরাক্ষসাঃ
15.18
ন মে ক্রুদ্ধস্য পর্যাপ্তাঃ সর্বে লোকাঃ শুচিস্মিতে
চক্ষুষা যং প্রপশ্যামি তস্য তেজো হরাম্যহম্
15.19
তস্মাত্তে বচনং দেবি করিষ্যামি ন সংশয়ঃ
সপ্তর্ষয়ো মাং বক্ষ্যন্তি সর্বে ব্রহ্মর্ষয়স্তথা
পশ্য মাহাত্ম্যমস্মাকমৃদ্ধিং চ বরবর্ণিনি
15.20
এবমুক্ত্বা তু তাং দেবীং বিসৃজ্য চ বরাননাম্
বিমানে যোজয়িত্বা স ঋষীন্নিয়মমাস্থিতান্
15.21
অব্রহ্মণ্যো বলোপেতো মত্তো বরমদেন চ
কামবৃত্তঃ স দুষ্টাত্মা বাহয়ামাস তানৃষীন্
15.22
নহুষেণ বিসৃষ্টা চ বৃহস্পতিমুবাচ সা
সময়োঽল্পাবশেষো মে নহুষেণেহ যঃ কৃতঃ
শক্রং মৃগয় শীঘ্রং ত্বং ভক্তায়াঃ কুরু মে দয়াম্
15.23
বাঢমিত্যেব ভগবান্বৃহস্পতিরুবাচ তাম্
ন ভেতব্যং ত্বয়া দেবি নহুষাদ্দুষ্টচেতসঃ
15.24
ন হ্যেষ স্থাস্যতি চিরং গত এষ নরাধমঃ
অধর্মজ্ঞো মহর্ষীণাং বাহনাচ্চ হতঃ শুভে
15.25
ইষ্টিং চাহং করিষ্যামি বিনাশায়াস্য দুর্মতেঃ
শক্রং চাধিগমিষ্যামি মা ভৈস্ত্বং ভদ্রমস্তু তে
15.26
ততঃ প্রজ্বাল্য বিধিবজ্জুহাব পরমং হবিঃ
বৃহস্পতির্মহাতেজা দেবরাজোপলব্ধয়ে
15.27
তস্মাচ্চ ভগবান্দেবঃ স্বয়মেব হুতাশনঃ
স্ত্রীবেষমদ্ভুতং কৃত্বা সহসান্তরধীয়ত
15.28
স দিশঃ প্রদিশশ্চৈব পর্বতাংশ্চ বনানি চ
পৃথিবীং চান্তরিক্ষং চ বিচীয়াতিমনোগতিঃ
নিমেষান্তরমাত্রেণ বৃহস্পতিমুপাগমৎ
15.29
অগ্নিরুবাচ
বৃহস্পতে ন পশ্যামি দেবরাজমহং ক্বচিৎ
আপঃ শেষাঃ সদা চাপঃ প্রবেষ্টুং নোত্সহাম্যহম্
ন মে তত্র গতির্ব্রহ্মন্কিমন্যত্করবাণি তে
15.30
শল্য উবাচ
তমব্রবীদ্দেবগুরুরপো বিশ মহাদ্যুতে
15.31
অগ্নিরুবাচ
নাপঃ প্রবেষ্টুং শক্ষ্যামি ক্ষয়ো মেঽত্র ভবিষ্যতি
শরণং ত্বাং প্রপন্নোঽস্মি স্বস্তি তেঽস্তু মহাদ্যুতে
15.32
অদ্ভ্যোঽগ্নির্ব্রহ্মতঃ ক্ষত্রমশ্মনো লোহমুত্থিতম্
তেষাং সর্বত্রগং তেজঃ স্বাসু যোনিষু শাম্যতি