Utshovঅধ্যায় 16
16.1
বৃহস্পতিরুবাচ
ত্বমগ্নে সর্বদেবানাং মুখং ত্বমসি হব্যবাট্
ত্বমন্তঃ সর্বভূতানাং গূঢশ্চরসি সাক্ষিবৎ
16.2
ত্বামাহুরেকং কবয়স্ত্বামাহুস্ত্রিবিধং পুনঃ
ত্বয়া ত্যক্তং জগচ্চেদং সদ্যো নশ্যেদ্ধুতাশন
16.3
কৃত্বা তুভ্যং নমো বিপ্রাঃ স্বকর্মবিজিতাং গতিম্
গচ্ছন্তি সহ পত্নীভিঃ সুতৈরপি চ শাশ্বতীম্
16.4
ত্বমেবাগ্নে হব্যবাহস্ত্বমেব পরমং হবিঃ
যজন্তি সত্রৈস্ত্বামেব যজ্ঞৈশ্চ পরমাধ্বরে
16.5
সৃষ্ট্বা লোকাংস্ত্রীনিমান্হব্যবাহ; প্রাপ্তে কালে পচসি পুনঃ সমিদ্ধঃ
সর্বস্যাস্য ভুবনস্য প্রসূতি;স্ত্বমেবাগ্নে ভবসি পুনঃ প্রতিষ্ঠা
16.6
ত্বামগ্নে জলদানাহুর্বিদ্যুতশ্চ ত্বমেব হি
দহন্তি সর্বভূতানি ত্বত্তো নিষ্ক্রম্য হায়নাঃ
16.7
ত্বয্যাপো নিহিতাঃ সর্বাস্ত্বয়ি সর্বমিদং জগৎ
ন তেঽস্ত্যবিদিতং কিংচিত্ত্রিষু লোকেষু পাবক
16.8
স্বয়োনিং ভজতে সর্বো বিশস্বাপোঽবিশঙ্কিতঃ
অহং ত্বাং বর্ধয়িষ্যামি ব্রাহ্মৈর্মন্ত্রৈঃ সনাতনৈঃ
16.9
শল্য উবাচ
এবং স্তুতো হব্যবাহো ভগবান্কবিরুত্তমঃ
বৃহস্পতিমথোবাচ প্রীতিমান্বাক্যমুত্তমম্
দর্শয়িষ্যামি তে শক্রং সত্যমেতদ্ব্রবীমি তে
16.10
প্রবিশ্যাপস্ততো বহ্নিঃ সসমুদ্রাঃ সপল্বলাঃ
আজগাম সরস্তচ্চ গূঢো যত্র শতক্রতুঃ
16.11
অথ তত্রাপি পদ্মানি বিচিন্বন্ভরতর্ষভ
অন্বপশ্যত্স দেবেন্দ্রং বিসমধ্যগতং স্থিতম্
16.12
আগত্য চ ততস্তূর্ণং তমাচষ্ট বৃহস্পতেঃ
অণুমাত্রেণ বপুষা পদ্মতন্ত্বাশ্রিতং প্রভুম্
16.13
গত্বা দেবর্ষিগন্ধর্বৈঃ সহিতোঽথ বৃহস্পতিঃ
পুরাণৈঃ কর্মভির্দেবং তুষ্টাব বলসূদনম্
16.14
মহাসুরো হতঃ শক্র নমুচির্দারুণস্ত্বয়া
শম্বরশ্চ বলশ্চৈব তথোভৌ ঘোরবিক্রমৌ
16.15
শতক্রতো বিবর্ধস্ব সর্বাঞ্শত্রূন্নিষূদয়
উত্তিষ্ঠ বজ্রিন্সংপশ্য দেবর্ষীংশ্চ সমাগতান্
16.16
মহেন্দ্র দানবান্হত্বা লোকাস্ত্রাতাস্ত্বয়া বিভো
অপাং ফেনং সমাসাদ্য বিষ্ণুতেজোপবৃংহিতম্
ত্বয়া বৃত্রো হতঃ পূর্বং দেবরাজ জগত্পতে
16.17
ত্বং সর্বভূতেষু বরেণ্য ঈড্য;স্ত্বয়া সমং বিদ্যতে নেহ ভূতম্
ত্বয়া ধার্যন্তে সর্বভূতানি শক্র; ত্বং দেবানাং মহিমানং চকর্থ
16.18
পাহি দেবান্সলোকাংশ্চ মহেন্দ্র বলমাপ্নুহি
এবং সংস্তূয়মানশ্চ সোঽবর্ধত শনৈঃ শনৈঃ
16.19
স্বং চৈব বপুরাস্থায় বভূব স বলান্বিতঃ
অব্রবীচ্চ গুরুং দেবো বৃহস্পতিমুপস্থিতম্
16.20
কিং কার্যমবশিষ্টং বো হতস্ত্বাষ্ট্রো মহাসুরঃ
বৃত্রশ্চ সুমহাকায়ো গ্রস্তুং লোকানিয়েষ যঃ
16.21
বৃহস্পতিরুবাচ
মানুষো নহুষো রাজা দেবর্ষিগণতেজসা
দেবরাজ্যমনুপ্রাপ্তঃ সর্বান্নো বাধতে ভৃশম্
16.22
ইন্দ্র উবাচ
কথং নু নহুষো রাজ্যং দেবানাং প্রাপ দুর্লভম্
তপসা কেন বা যুক্তঃ কিংবীর্যো বা বৃহস্পতে
16.23
বৃহস্পতিরুবাচ
দেবা ভীতাঃ শক্রমকাময়ন্ত; ত্বয়া ত্যক্তং মহদৈন্দ্রং পদং তৎ
তদা দেবাঃ পিতরোঽথর্ষয়শ্চ; গন্ধর্বসংঘাশ্চ সমেত্য সর্বে
16.24
গত্বাব্রুবন্নহুষং শক্র তত্র; ত্বং নো রাজা ভব ভুবনস্য গোপ্তা
তানব্রবীন্নহুষো নাস্মি শক্ত; আপ্যায়ধ্বং তপসা তেজসা চ
16.25
এবমুক্তৈর্বর্ধিতশ্চাপি দেবৈ; রাজাভবন্নহুষো ঘোরবীর্যঃ
ত্রৈলোক্যে চ প্রাপ্য রাজ্যং তপস্বিনঃ; কৃত্বা বাহান্যাতি লোকান্দুরাত্মা
16.26
তেজোহরং দৃষ্টিবিষং সুঘোরং; মা ত্বং পশ্যের্নহুষং বৈ কদাচিৎ
দেবাশ্চ সর্বে নহুষং ভয়ার্তা; ন পশ্যন্তো গূঢরূপাশ্চরন্তি
16.27
শল্য উবাচ
এবং বদত্যঙ্গিরসাং বরিষ্ঠে; বৃহস্পতৌ লোকপালঃ কুবেরঃ
বৈবস্বতশ্চৈব যমঃ পুরাণো; দেবশ্চ সোমো বরুণশ্চাজগাম
16.28
তে বৈ সমাগম্য মহেন্দ্রমূচু;র্দিষ্ট্যা ত্বাষ্ট্রো নিহতশ্চৈব বৃত্রঃ
দিষ্ট্যা চ ত্বাং কুশলিনমক্ষতং চ; পশ্যামো বৈ নিহতারিং চ শক্র
16.29
স তান্যথাবত্প্রতিভাষ্য শক্রঃ; সংচোদয়ন্নহুষস্যান্তরেণ
রাজা দেবানাং নহুষো ঘোররূপ;স্তত্র সাহ্যং দীয়তাং মে ভবদ্ভিঃ
16.30
তে চাব্রুবন্নহুষো ঘোররূপো; দৃষ্টীবিষস্তস্য বিভীম দেব
ত্বং চেদ্রাজন্নহুষং পরাজয়ে;স্তদ্বৈ বয়ং ভাগমর্হাম শক্র
16.31
ইন্দ্রোঽব্রবীদ্ভবতু ভবানপাং পতি;র্যমঃ কুবেরশ্চ মহাভিষেকম্
সংপ্রাপ্নুবন্ত্বদ্য সহৈব তেন; রিপুং জয়ামো নহুষং ঘোরদৃষ্টিম্
16.32
ততঃ শক্রং জ্বলনোঽপ্যাহ ভাগং; প্রয়চ্ছ মহ্যং তব সাহ্যং করিষ্যে
তমাহ শক্রো ভবিতাগ্নে তবাপি; ঐন্দ্রাগ্নো বৈ ভাগ একো মহাক্রতৌ
16.33
এবং সংচিন্ত্য ভগবান্মহেন্দ্রঃ পাকশাসনঃ
কুবেরং সর্বয়ক্ষাণাং ধনানাং চ প্রভুং তথা
16.34
বৈবস্বতং পিতৄণাং চ বরুণং চাপ্যপাং তথা
আধিপত্যং দদৌ শক্রঃ সত্কৃত্য বরদস্তদা