অধ্যায় 17

17.1

শল্য উবাচ
অথ সংচিন্তয়ানস্য দেবরাজস্য ধীমতঃ
নহুষস্য বধোপায়ং লোকপালৈঃ সহৈব তৈঃ
তপস্বী তত্র ভগবানগস্ত্যঃ প্রত্যদৃশ্যত

সোঽব্রবীদর্চ্য দেবেন্দ্রং দিষ্ট্যা বৈ বর্ধতে ভবান্
বিশ্বরূপবিনাশেন বৃত্রাসুরবধেন চ

দিষ্ট্যা চ নহুষো ভ্রষ্টো দেবরাজ্যাত্পুরংদর
দিষ্ট্যা হতারিং পশ্যামি ভবন্তং বলসূদন

ইন্দ্র উবাচ
স্বাগতং তে মহর্ষেঽস্তু প্রীতোঽহং দর্শনাত্তব
পাদ্যমাচমনীয়ং চ গামর্ঘ্যং চ প্রতীচ্ছ মে

শল্য উবাচ
পূজিতং চোপবিষ্টং তমাসনে মুনিসত্তমম্
পর্যপৃচ্ছত দেবেশঃ প্রহৃষ্টো ব্রাহ্মণর্ষভম্

এতদিচ্ছামি ভগবন্কথ্যমানং দ্বিজোত্তম
পরিভ্রষ্টঃ কথং স্বর্গান্নহুষঃ পাপনিশ্চয়ঃ

অগস্ত্য উবাচ
শৃণু শক্র প্রিয়ং বাক্যং যথা রাজা দুরাত্মবান্
স্বর্গাদ্ভ্রষ্টো দুরাচারো নহুষো বলদর্পিতঃ

শ্রমার্তাস্তু বহন্তস্তং নহুষং পাপকারিণম্
দেবর্ষয়ো মহাভাগাস্তথা ব্রহ্মর্ষয়োঽমলাঃ
পপ্রচ্ছুঃ সংশয়ং দেব নহুষং জয়তাং বর

য ইমে ব্রহ্মণা প্রোক্তা মন্ত্রা বৈ প্রোক্ষণে গবাম্
এতে প্রমাণং ভবত উতাহো নেতি বাসব
নহুষো নেতি তানাহ তমসা মূঢচেতনঃ

ঋষয় ঊচুঃ
অধর্মে সংপ্রবৃত্তস্ত্বং ধর্মং ন প্রতিপদ্যসে
প্রমাণমেতদস্মাকং পূর্বং প্রোক্তং মহর্ষিভিঃ

অগস্ত্য উবাচ
ততো বিবদমানঃ স মুনিভিঃ সহ বাসব
অথ মামস্পৃশন্মূর্ধ্নি পাদেনাধর্মপীডিতঃ

তেনাভূদ্ধততেজাঃ স নিঃশ্রীকশ্চ শচীপতে
ততস্তমহমাবিগ্নমবোচং ভয়পীডিতম্

যস্মাত্পূর্বৈঃ কৃতং ব্রহ্ম ব্রহ্মর্ষিভিরনুষ্ঠিতম্
অদুষ্টং দূষয়সি বৈ যচ্চ মূর্ধ্ন্যস্পৃশঃ পদা

যচ্চাপি ত্বমৃষীন্মূঢ ব্রহ্মকল্পান্দুরাসদান্
বাহান্কৃত্বা বাহয়সি তেন স্বর্গাদ্ধতপ্রভঃ

ধ্বংস পাপ পরিভ্রষ্টঃ ক্ষীণপুণ্যো মহীতলম্
দশ বর্ষসহস্রাণি সর্পরূপধরো মহান্
বিচরিষ্যসি পূর্ণেষু পুনঃ স্বর্গমবাপ্স্যসি

এবং ভ্রষ্টো দুরাত্মা স দেবরাজ্যাদরিংদম
দিষ্ট্যা বর্ধামহে শক্র হতো ব্রাহ্মণকণ্টকঃ

ত্রিবিষ্টপং প্রপদ্যস্ব পাহি লোকাঞ্শচীপতে
জিতেন্দ্রিয়ো জিতামিত্রঃ স্তূয়মানো মহর্ষিভিঃ

শল্য উবাচ
ততো দেবা ভৃশং তুষ্টা মহর্ষিগণসংবৃতাঃ
পিতরশ্চৈব যক্ষাশ্চ ভুজগা রাক্ষসাস্তথা

গন্ধর্বা দেবকন্যাশ্চ সর্বে চাপ্সরসাং গণাঃ
সরাংসি সরিতঃ শৈলাঃ সাগরাশ্চ বিশাং পতে

উপগম্যাব্রুবন্সর্বে দিষ্ট্যা বর্ধসি শত্রুহন্
হতশ্চ নহুষঃ পাপো দিষ্ট্যাগস্ত্যেন ধীমতা
দিষ্ট্যা পাপসমাচারঃ কৃতঃ সর্পো মহীতলে