Utshovঅধ্যায় 18
18.1
শল্য উবাচ
ততঃ শক্রঃ স্তূয়মানো গন্ধর্বাপ্সরসাং গণৈঃ
ঐরাবতং সমারুহ্য দ্বিপেন্দ্রং লক্ষণৈর্যুতম্
18.2
পাবকশ্চ মহাতেজা মহর্ষিশ্চ বৃহস্পতিঃ
যমশ্চ বরুণশ্চৈব কুবেরশ্চ ধনেশ্বরঃ
18.3
সর্বৈর্দেবৈঃ পরিবৃতঃ শক্রো বৃত্রনিষূদনঃ
গন্ধর্বৈরপ্সরোভিশ্চ যাতস্ত্রিভুবনং প্রভুঃ
18.4
স সমেত্য মহেন্দ্রাণ্যা দেবরাজঃ শতক্রতুঃ
মুদা পরময়া যুক্তঃ পালয়ামাস দেবরাট্
18.5
ততঃ স ভগবাংস্তত্র অঙ্গিরাঃ সমদৃশ্যত
অথর্ববেদমন্ত্রৈশ্চ দেবেন্দ্রং সমপূজয়ৎ
18.6
ততস্তু ভগবানিন্দ্রঃ প্রহৃষ্টঃ সমপদ্যত
বরং চ প্রদদৌ তস্মৈ অথর্বাঙ্গিরসে তদা
18.7
অথর্বাঙ্গিরসং নাম অস্মিন্বেদে ভবিষ্যতি
উদাহরণমেতদ্ধি যজ্ঞভাগং চ লপ্স্যসে
18.8
এবং সংপূজ্য ভগবানথর্বাঙ্গিরসং তদা
ব্যসর্জয়ন্মহারাজ দেবরাজঃ শতক্রতুঃ
18.9
সংপূজ্য সর্বাংস্ত্রিদশানৃষীংশ্চাপি তপোধনান্
ইন্দ্রঃ প্রমুদিতো রাজন্ধর্মেণাপালয়ত্প্রজাঃ
18.10
এবং দুঃখমনুপ্রাপ্তমিন্দ্রেণ সহ ভার্যয়া
অজ্ঞাতবাসশ্চ কৃতঃ শত্রূণাং বধকাঙ্ক্ষয়া
18.11
নাত্র মন্যুস্ত্বয়া কার্যো যত্ক্লিষ্টোঽসি মহাবনে
দ্রৌপদ্যা সহ রাজেন্দ্র ভ্রাতৃভিশ্চ মহাত্মভিঃ
18.12
এবং ত্বমপি রাজেন্দ্র রাজ্যং প্রাপ্স্যসি ভারত
বৃত্রং হত্বা যথা প্রাপ্তঃ শক্রঃ কৌরবনন্দন
18.13
দুরাচারশ্চ নহুষো ব্রহ্মদ্বিট্পাপচেতনঃ
অগস্ত্যশাপাভিহতো বিনষ্টঃ শাশ্বতীঃ সমাঃ
18.14
এবং তব দুরাত্মানঃ শত্রবঃ শত্রুসূদন
ক্ষিপ্রং নাশং গমিষ্যন্তি কর্ণদুর্যোধনাদয়ঃ
18.15
ততঃ সাগরপর্যন্তাং ভোক্ষ্যসে মেদিনীমিমাম্
ভ্রাতৃভিঃ সহিতো বীর দ্রৌপদ্যা চ সহাভিভো
18.16
উপাখ্যানমিদং শক্রবিজয়ং বেদসংমিতম্
রাজ্ঞা ব্যূঢেষ্বনীকেষু শ্রোতব্যং জয়মিচ্ছতা
18.17
তস্মাত্সংশ্রাবয়ামি ত্বাং বিজয়ং জয়তাং বর
সংস্তূয়মানা বর্ধন্তে মহাত্মানো যুধিষ্ঠির
18.18
ক্ষত্রিয়াণামভাবোঽয়ং যুধিষ্ঠির মহাত্মনাম্
দুর্যোধনাপরাধেন ভীমার্জুনবলেন চ
18.19
আখ্যানমিন্দ্রবিজয়ং য ইদং নিয়তঃ পঠেৎ
ধূতপাপ্মা জিতস্বর্গঃ স প্রেত্যেহ চ মোদতে
18.20
ন চারিজং ভয়ং তস্য ন চাপুত্রো ভবেন্নরঃ
নাপদং প্রাপ্নুয়াত্কাংচিদ্দীর্ঘমায়ুশ্চ বিন্দতি
সর্বত্র জয়মাপ্নোতি ন কদাচিত্পরাজয়ম্
18.21
বৈশংপায়ন উবাচ
এবমাশ্বাসিতো রাজা শল্যেন ভরতর্ষভ
পূজয়ামাস বিধিবচ্ছল্যং ধর্মভৃতাং বরঃ
18.22
শ্রুত্বা শল্যস্য বচনং কুন্তীপুত্রো যুধিষ্ঠিরঃ
প্রত্যুবাচ মহাবাহুর্মদ্ররাজমিদং বচঃ
18.23
ভবান্কর্ণস্য সারথ্যং করিষ্যতি ন সংশয়ঃ
তত্র তেজোবধঃ কার্যঃ কর্ণস্য মম সংস্তবৈঃ
18.24
শল্য উবাচ
এবমেতত্করিষ্যামি যথা মাং সংপ্রভাষসে
যচ্চান্যদপি শক্ষ্যামি তত্করিষ্যাম্যহং তব
18.25
বৈশংপায়ন উবাচ
তত আমন্ত্র্য কৌন্তেয়াঞ্শল্যো মদ্রাধিপস্তদা
জগাম সবলঃ শ্রীমান্দুর্যোধনমরিংদমঃ