Utshovঅধ্যায় 19
19.1
বৈশংপায়ন উবাচ
যুয়ুধানস্ততো বীরঃ সাত্বতানাং মহারথঃ
মহতা চতুরঙ্গেণ বলেনাগাদ্যুধিষ্ঠিরম্
19.2
তস্য যোধা মহাবীর্যা নানাদেশসমাগতাঃ
নানাপ্রহরণা বীরাঃ শোভয়াং চক্রিরে বলম্
19.3
পরশ্বধৈর্ভিণ্ডিপালৈঃ শক্তিতোমরমুদ্গরৈঃ
শক্ত্যৃষ্টিপরশুপ্রাসৈঃ করবালৈশ্চ নির্মলৈঃ
19.4
খড্গকার্মুকনির্যূহৈঃ শরৈশ্চ বিবিধৈরপি
তৈলধৌতৈঃ প্রকাশদ্ভিস্তদশোভত বৈ বলম্
19.5
তস্য মেঘপ্রকাশস্য শস্ত্রৈস্তৈঃ শোভিতস্য চ
বভূব রূপং সৈন্যস্য মেঘস্যেব সবিদ্যুতঃ
19.6
অক্ষৌহিণী হি সেনা সা তদা যৌধিষ্ঠিরং বলম্
প্রবিশ্যান্তর্দধে রাজন্সাগরং কুনদী যথা
19.7
তথৈবাক্ষৌহিণীং গৃহ্য চেদীনামৃষভো বলী
ধৃষ্টকেতুরুপাগচ্ছত্পাণ্ডবানমিতৌজসঃ
19.8
মাগধশ্চ জয়ত্সেনো জারাসংধির্মহাবলঃ
অক্ষৌহিণ্যৈব সৈন্যস্য ধর্মরাজমুপাগমৎ
19.9
তথৈব পাণ্ড্যো রাজেন্দ্র সাগরানূপবাসিভিঃ
বৃতো বহুবিধৈর্যোধৈর্যুধিষ্ঠিরমুপাগমৎ
19.10
তস্য সৈন্যমতীবাসীত্তস্মিন্বলসমাগমে
প্রেক্ষণীয়তরং রাজন্সুবেষং বলবত্তদা
19.11
দ্রুপদস্যাপ্যভূত্সেনা নানাদেশসমাগতৈঃ
শোভিতা পুরুষৈঃ শূরৈঃ পুত্রৈশ্চাস্য মহারথৈঃ
19.12
তথৈব রাজা মত্স্যানাং বিরাটো বাহিনীপতিঃ
পার্বতীয়ৈর্মহীপালৈঃ সহিতঃ পাণ্ডবানিয়াৎ
19.13
ইতশ্চেতশ্চ পাণ্ডূনাং সমাজগ্মুর্মহাত্মনাম্
অক্ষৌহিণ্যস্তু সপ্তৈব বিবিধধ্বজসংকুলাঃ
যুয়ুত্সমানাঃ কুরুভিঃ পাণ্ডবান্সমহর্ষয়ন্
19.14
তথৈব ধার্তরাষ্ট্রস্য হর্ষং সমভিবর্ধয়ন্
ভগদত্তো মহীপালঃ সেনামক্ষৌহিণীং দদৌ
19.15
তস্য চীনৈঃ কিরাতৈশ্চ কাঞ্চনৈরিব সংবৃতম্
বভৌ বলমনাধৃষ্যং কর্ণিকারবনং যথা
19.16
তথা ভূরিশ্রবাঃ শূরঃ শল্যশ্চ কুরুনন্দন
দুর্যোধনমুপায়াতাবক্ষৌহিণ্যা পৃথক্পৃথক্
19.17
কৃতবর্মা চ হার্দিক্যো ভোজান্ধকবলৈঃ সহ
অক্ষৌহিণ্যৈব সেনায়া দুর্যোধনমুপাগমৎ
19.18
তস্য তৈঃ পুরুষব্যাঘ্রৈর্বনমালাধরৈর্বলম্
অশোভত যথা মত্তৈর্বনং প্রক্রীডিতৈর্গজৈঃ
19.19
জয়দ্রথমুখাশ্চান্যে সিন্ধুসৌবীরবাসিনঃ
আজগ্মুঃ পৃথিবীপালাঃ কম্পয়ন্ত ইবাচলান্
19.20
তেষামক্ষৌহিণী সেনা বহুলা বিবভৌ তদা
বিধূয়মানা বাতেন বহুরূপা ইবাম্বুদাঃ
19.21
সুদক্ষিণশ্চ কাম্বোজো যবনৈশ্চ শকৈস্তথা
উপাজগাম কৌরব্যমক্ষৌহিণ্যা বিশাং পতে
19.22
তস্য সেনাসমাবায়ঃ শলভানামিবাবভৌ
স চ সংপ্রাপ্য কৌরব্যং তত্রৈবান্তর্দধে তদা
19.23
তথা মাহিষ্মতীবাসী নীলো নীলায়ুধৈঃ সহ
মহীপালো মহাবীর্যৈর্দক্ষিণাপথবাসিভিঃ
19.24
আবন্ত্যৌ চ মহীপালৌ মহাবলসুসংবৃতৌ
পৃথগক্ষৌহিণীভ্যাং তাবভিয়াতৌ সুয়োধনম্
19.25
কেকয়াশ্চ নরব্যাঘ্রাঃ সোদর্যাঃ পঞ্চ পার্থিবাঃ
সংহর্ষয়ন্তঃ কৌরব্যমক্ষৌহিণ্যা সমাদ্রবন্
19.26
ইতশ্চেতশ্চ সর্বেষাং ভূমিপানাং মহাত্মনাম্
তিস্রোঽন্যাঃ সমবর্তন্ত বাহিন্যো ভরতর্ষভ
19.27
এবমেকাদশাবৃত্তাঃ সেনা দুর্যোধনস্য তাঃ
যুয়ুত্সমানাঃ কৌন্তেয়ান্নানাধ্বজসমাকুলাঃ
19.28
ন হাস্তিনপুরে রাজন্নবকাশোঽভবত্তদা
রাজ্ঞাং সবলমুখ্যানাং প্রাধান্যেনাপি ভারত
19.29
ততঃ পঞ্চনদং চৈব কৃত্স্নং চ কুরুজাঙ্গলম্
তথা রোহিতকারণ্যং মরুভূমিশ্চ কেবলা
19.30
অহিচ্ছত্রং কালকূটং গঙ্গাকূলং চ ভারত
বারণা বাটধানং চ যামুনশ্চৈব পর্বতঃ
19.31
এষ দেশঃ সুবিস্তীর্ণঃ প্রভূতধনধান্যবান্
বভূব কৌরবেয়াণাং বলেন সুসমাকুলঃ
19.32
তত্র সৈন্যং তথায়ুক্তং দদর্শ স পুরোহিতঃ
যঃ স পাঞ্চালরাজেন প্রেষিতঃ কৌরবান্প্রতি