অধ্যায় 20

20.1

বৈশংপায়ন উবাচ
স তু কৌরব্যমাসাদ্য দ্রুপদস্য পুরোহিতঃ
সত্কৃতো ধৃতরাষ্ট্রেণ ভীষ্মেণ বিদুরেণ চ

সর্বং কৌশল্যমুক্ত্বাদৌ পৃষ্ট্বা চৈবমনাময়ম্
সর্বসেনাপ্রণেতৄণাং মধ্যে বাক্যমুবাচ হ

সর্বৈর্ভবদ্ভির্বিদিতো রাজধর্মঃ সনাতনঃ
বাক্যোপাদানহেতোস্তু বক্ষ্যামি বিদিতে সতি

ধৃতরাষ্ট্রশ্চ পাণ্ডুশ্চ সুতাবেকস্য বিশ্রুতৌ
তয়োঃ সমানং দ্রবিণং পৈতৃকং নাত্র সংশয়ঃ

ধৃতরাষ্ট্রস্য যে পুত্রাস্তে প্রাপ্তাঃ পৈতৃকং বসু
পাণ্ডুপুত্রাঃ কথং নাম ন প্রাপ্তাঃ পৈতৃকং বসু

এবং গতে পাণ্ডবেয়ৈর্বিদিতং বঃ পুরা যথা
ন প্রাপ্তং পৈতৃকং দ্রব্যং ধার্তরাষ্ট্রেণ সংবৃতম্

প্রাণান্তিকৈরপ্যুপায়ৈঃ প্রয়তদ্ভিরনেকশঃ
শেষবন্তো ন শকিতা নয়িতুং যমসাদনম্

পুনশ্চ বর্ধিতং রাজ্যং স্ববলেন মহাত্মভিঃ
ছদ্মনাপহৃতং ক্ষুদ্রৈর্ধার্তরাষ্ট্রৈঃ সসৌবলৈঃ

তদপ্যনুমতং কর্ম তথায়ুক্তমনেন বৈ
বাসিতাশ্চ মহারণ্যে বর্ষাণীহ ত্রয়োদশ

সভায়াং ক্লেশিতৈর্বীরৈঃ সহভার্যৈস্তথা ভৃশম্
অরণ্যে বিবিধাঃ ক্লেশাঃ সংপ্রাপ্তাস্তৈঃ সুদারুণাঃ

তথা বিরাটনগরে যোন্যন্তরগতৈরিব
প্রাপ্তঃ পরমসংক্লেশো যথা পাপৈর্মহাত্মভিঃ

তে সর্বে পৃষ্ঠতঃ কৃত্বা তত্সর্বং পূর্বকিল্বিষম্
সামৈব কুরুভিঃ সার্ধমিচ্ছন্তি কুরুপুংগবাঃ

তেষাং চ বৃত্তমাজ্ঞায় বৃত্তং দুর্যোধনস্য চ
অনুনেতুমিহার্হন্তি ধৃতরাষ্ট্রং সুহৃজ্জনাঃ

ন হি তে বিগ্রহং বীরাঃ কুর্বন্তি কুরুভিঃ সহ
অবিনাশেন লোকস্য কাঙ্ক্ষন্তে পাণ্ডবাঃ স্বকম্

যশ্চাপি ধার্তরাষ্ট্রস্য হেতুঃ স্যাদ্বিগ্রহং প্রতি
স চ হেতুর্ন মন্তব্যো বলীয়াংসস্তথা হি তে

অক্ষৌহিণ্যো হি সপ্তৈব ধর্মপুত্রস্য সংগতাঃ
যুয়ুত্সমানাঃ কুরুভিঃ প্রতীক্ষন্তেঽস্য শাসনম্

অপরে পুরুষব্যাঘ্রাঃ সহস্রাক্ষৌহিণীসমাঃ
সাত্যকির্ভীমসেনশ্চ যমৌ চ সুমহাবলৌ

একাদশৈতাঃ পৃতনা একতশ্চ সমাগতাঃ
একতশ্চ মহাবাহুর্বহুরূপো ধনংজয়ঃ

যথা কিরীটী সেনাভ্যঃ সর্বাভ্যো ব্যতিরিচ্যতে
এবমেব মহাবাহুর্বাসুদেবো মহাদ্যুতিঃ

বহুলত্বং চ সেনানাং বিক্রমং চ কিরীটিনঃ
বুদ্ধিমত্তাং চ কৃষ্ণস্য বুদ্ধ্বা যুধ্যেত কো নরঃ

তে ভবন্তো যথাধর্মং যথাসময়মেব চ
প্রয়চ্ছন্তু প্রদাতব্যং মা বঃ কালোঽত্যগাদয়ম্