অধ্যায় 21

21.1

বৈশংপায়ন উবাচ
তস্য তদ্বচনং শ্রুত্বা প্রজ্ঞাবৃদ্ধো মহাদ্যুতিঃ
সংপূজ্যৈনং যথাকালং ভীষ্মো বচনমব্রবীৎ

দিষ্ট্যা কুশলিনঃ সর্বে পাণ্ডবাঃ সহ বান্ধবৈঃ
দিষ্ট্যা সহায়বন্তশ্চ দিষ্ট্যা ধর্মে চ তে রতাঃ

দিষ্ট্যা চ সংধিকামাস্তে ভ্রাতরঃ কুরুনন্দনাঃ
দিষ্ট্যা ন যুদ্ধমনসঃ সহ দামোদরেণ তে

ভবতা সত্যমুক্তং চ সর্বমেতন্ন সংশয়ঃ
অতিতীক্ষ্ণং তু তে বাক্যং ব্রাহ্মণ্যাদিতি মে মতিঃ

অসংশয়ং ক্লেশিতাস্তে বনে চেহ চ পাণ্ডবাঃ
প্রাপ্তাশ্চ ধর্মতঃ সর্বং পিতুর্ধনমসংশয়ম্

কিরীটী বলবান্পার্থঃ কৃতাস্ত্রশ্চ মহাবলঃ
কো হি পাণ্ডুসুতং যুদ্ধে বিষহেত ধনংজয়ম্

অপি বজ্রধরঃ সাক্ষাত্কিমুতান্যে ধনুর্ভৃতঃ
ত্রয়াণামপি লোকানাং সমর্থ ইতি মে মতিঃ

ভীষ্মে ব্রুবতি তদ্বাক্যং ধৃষ্টমাক্ষিপ্য মন্যুমান্
দুর্যোধনং সমালোক্য কর্ণো বচনমব্রবীৎ

ন তন্ন বিদিতং ব্রহ্মঁল্লোকে ভূতেন কেনচিৎ
পুনরুক্তেন কিং তেন ভাষিতেন পুনঃ পুনঃ

দুর্যোধনার্থে শকুনির্দ্যূতে নির্জিতবান্পুরা
সময়েন গতোঽরণ্যং পাণ্ডুপুত্রো যুধিষ্ঠিরঃ

ন তং সময়মাদৃত্য রাজ্যমিচ্ছতি পৈতৃকম্
বলমাশ্রিত্য মত্স্যানাং পাঞ্চালানাং চ পার্থিবঃ

দুর্যোধনো ভয়াদ্বিদ্বন্ন দদ্যাত্পদমন্ততঃ
ধর্মতস্তু মহীং কৃত্স্নাং প্রদদ্যাচ্ছত্রবেঽপি চ

যদি কাঙ্ক্ষন্তি তে রাজ্যং পিতৃপৈতামহং পুনঃ
যথাপ্রতিজ্ঞং কালং তং চরন্তু বনমাশ্রিতাঃ

ততো দুর্যোধনস্যাঙ্কে বর্তন্তামকুতোভয়াঃ
অধার্মিকামিমাং বুদ্ধিং কুর্যুর্মৌর্খ্যাদ্ধি কেবলম্

অথ তে ধর্মমুত্সৃজ্য যুদ্ধমিচ্ছন্তি পাণ্ডবাঃ
আসাদ্যেমান্কুরুশ্রেষ্ঠান্স্মরিষ্যন্তি বচো মম

ভীষ্ম উবাচ
কিং নু রাধেয় বাচা তে কর্ম তত্স্মর্তুমর্হসি
এক এব যদা পার্থঃ ষড্রথাঞ্জিতবান্যুধি

ন চেদেবং করিষ্যামো যদয়ং ব্রাহ্মণোঽব্রবীৎ
ধ্রুবং যুধি হতাস্তেন ভক্ষয়িষ্যাম পাংসুকান্

বৈশংপায়ন উবাচ
ধৃতরাষ্ট্রস্ততো ভীষ্মমনুমান্য প্রসাদ্য চ
অবভর্ত্স্য চ রাধেয়মিদং বচনমব্রবীৎ

অস্মদ্ধিতমিদং বাক্যং ভীষ্মঃ শাংতনবোঽব্রবীৎ
পাণ্ডবানাং হিতং চৈব সর্বস্য জগতস্তথা

চিন্তয়িত্বা তু পার্থেভ্যঃ প্রেষয়িষ্যামি সংজয়ম্
স ভবান্প্রতিয়াত্বদ্য পাণ্ডবানেব মাচিরম্

স তং সত্কৃত্য কৌরব্যঃ প্রেষয়ামাস পাণ্ডবান্
সভামধ্যে সমাহূয় সংজয়ং বাক্যমব্রবীৎ