Utshovঅধ্যায় 22
22.1
ধৃতরাষ্ট্র উবাচ
প্রাপ্তানাহুঃ সংজয় পাণ্ডুপুত্রা;নুপপ্লব্যে তান্বিজানীহি গত্বা
অজাতশত্রুং চ সভাজয়েথা; দিষ্ট্যানঘ গ্রামমুপস্থিতস্ত্বম্
22.2
সর্বান্বদেঃ সংজয় স্বস্তিমন্তঃ; কৃচ্ছ্রং বাসমতদর্হা নিরুষ্য
তেষাং শান্তির্বিদ্যতেঽস্মাসু শীঘ্রং; মিথ্যোপেতানামুপকারিণাং সতাম্
22.3
নাহং ক্বচিত্সংজয় পাণ্ডবানাং; মিথ্যাবৃত্তিং কাংচন জাত্বপশ্যম্
সর্বাং শ্রিয়ং হ্যাত্মবীর্যেণ লব্ধ্বা; পর্যাকার্ষুঃ পাণ্ডবা মহ্যমেব
22.4
দোষং হ্যেষাং নাধিগচ্ছে পরীক্ষ;ন্নিত্যং কংচিদ্যেন গর্হেয় পার্থান্
ধর্মার্থাভ্যাং কর্ম কুর্বন্তি নিত্যং; সুখপ্রিয়া নানুরুধ্যন্তি কামান্
22.5
ঘর্মং শীতং ক্ষুত্পিপাসে তথৈব; নিদ্রাং তন্দ্রীং ক্রোধহর্ষৌ প্রমাদম্
ধৃত্যা চৈব প্রজ্ঞয়া চাভিভূয়; ধর্মার্থয়োগান্প্রয়তন্তি পার্থাঃ
22.6
ত্যজন্তি মিত্রেষু ধনানি কালে; ন সংবাসাজ্জীর্যতি মৈত্রমেষাম্
যথার্হমানার্থকরা হি পার্থা;স্তেষাং দ্বেষ্টা নাস্ত্যাজমীঢস্য পক্ষে
22.7
অন্যত্র পাপাদ্বিষমান্মন্দবুদ্ধে;র্দুর্যোধনাত্ক্ষুদ্রতরাচ্চ কর্ণাৎ
তেষাং হীমে হীনসুখপ্রিয়াণাং; মহাত্মনাং সংজনয়ন্তি তেজঃ
22.8
উত্থানবীর্যঃ সুখমেধমানো; দুর্যোধনঃ সুকৃতং মন্যতে তৎ
তেষাং ভাগং যচ্চ মন্যেত বালঃ; শক্যং হর্তুং জীবতাং পাণ্ডবানাম্
22.9
যস্যার্জুনঃ পদবীং কেশবশ্চ; বৃকোদরঃ সাত্যকোঽজাতশত্রোঃ
মাদ্রীপুত্রৌ সৃঞ্জয়াশ্চাপি সর্বে; পুরা যুদ্ধাত্সাধু তস্য প্রদানম্
22.10
স হ্যেবৈকঃ পৃথিবীং সব্যসাচী; গাণ্ডীবধন্বা প্রণুদেদ্রথস্থঃ
তথা বিষ্ণুঃ কেশবোঽপ্যপ্রধৃষ্যো; লোকত্রয়স্যাধিপতির্মহাত্মা
22.11
তিষ্ঠেত কস্তস্য মর্ত্যঃ পুরস্তা;দ্যঃ সর্বদেবেষু বরেণ্য ঈড্যঃ
পর্জন্যঘোষান্প্রবপঞ্শরৌঘা;ন্পতংগসংঘানিব শীঘ্রবেগান্
22.12
দিশং হ্যুদীচীমপি চোত্তরান্কুরূ;ন্গাণ্ডীবধন্বৈকরথো জিগায়
ধনং চৈষামাহরত্সব্যসাচী; সেনানুগান্বলিদাংশ্চৈব চক্রে
22.13
যশ্চৈব দেবান্খাণ্ডবে সব্যসাচী; গাণ্ডীবধন্বা প্রজিগায় সেন্দ্রান্
উপাহরত্ফল্গুনো জাতবেদসে; যশো মানং বর্ধয়ন্পাণ্ডবানাম্
22.14
গদাভৃতাং নাদ্য সমোঽস্তি ভীমা;দ্ধস্ত্যারোহো নাস্তি সমশ্চ তস্য
রথেঽর্জুনাদাহুরহীনমেনং; বাহ্বোর্বলে চায়ুতনাগবীর্যম্
22.15
সুশিক্ষিতঃ কৃতবৈরস্তরস্বী; দহেত্ক্রুদ্ধস্তরসা ধার্তরাষ্ট্রান্
সদাত্যমর্ষী বলবান্ন শক্যো; যুদ্ধে জেতুং বাসবেনাপি সাক্ষাৎ
22.16
সুচেতসৌ বলিনৌ শীঘ্রহস্তৌ; সুশিক্ষিতৌ ভ্রাতরৌ ফল্গুনেন
শ্যেনৌ যথা পক্ষিপূগান্রুজন্তৌ; মাদ্রীপুত্রৌ নেহ কুরূন্বিশেতাম্
22.17
তেষাং মধ্যে বর্তমানস্তরস্বী; ধৃষ্টদ্যুম্নঃ পাণ্ডবানামিহৈকঃ
সহামাত্যঃ সোমকানাং প্রবর্হঃ; সংত্যক্তাত্মা পাণ্ডবানাং জয়ায়
22.18
সহোষিতশ্চরিতার্থো বয়ঃস্থঃ; শাল্বেয়ানামধিপো বৈ বিরাটঃ
সহ পুত্রৈঃ পাণ্ডবার্থে চ শশ্ব;দ্যুধিষ্ঠিরং ভক্ত ইতি শ্রুতং মে
22.19
অবরুদ্ধা বলিনঃ কেকয়েভ্যো; মহেষ্বাসা ভ্রাতরঃ পঞ্চ সন্তি
কেকয়েভ্যো রাজ্যমাকাঙ্ক্ষমাণা; যুদ্ধার্থিনশ্চানুবসন্তি পার্থান্
22.20
সর্বে চ বীরাঃ পৃথিবীপতীনাং; সমানীতাঃ পাণ্ডবার্থে নিবিষ্টাঃ
শূরানহং ভক্তিমতঃ শৃণোমি; প্রীত্যা যুক্তান্সংশ্রিতান্ধর্মরাজম্
22.21
গির্যাশ্রয়া দুর্গনিবাসিনশ্চ; যোধাঃ পৃথিব্যাং কুলজা বিশুদ্ধাঃ
ম্লেচ্ছাশ্চ নানায়ুধবীর্যবন্তঃ; সমাগতাঃ পাণ্ডবার্থে নিবিষ্টাঃ
22.22
পাণ্ড্যশ্চ রাজামিত ইন্দ্রকল্পো; যুধি প্রবীরৈর্বহুভিঃ সমেতঃ
সমাগতঃ পাণ্ডবার্থে মহাত্মা; লোকপ্রবীরোঽপ্রতিবীর্যতেজাঃ
22.23
অস্ত্রং দ্রোণাদর্জুনাদ্বাসুদেবা;ত্কৃপাদ্ভীষ্মাদ্যেন কৃতং শৃণোমি
যং তং কার্ষ্ণিপ্রতিমং প্রাহুরেকং; স সাত্যকিঃ পাণ্ডবার্থে নিবিষ্টঃ
22.24
অপাশ্রিতাশ্চেদিকরূষকাশ্চ; সর্বোত্সাহৈর্ভূমিপালৈঃ সমেতাঃ
তেষাং মধ্যে সূর্যমিবাতপন্তং; শ্রিয়া বৃতং চেদিপতিং জ্বলন্তম্
22.25
অস্তম্ভনীয়ং যুধি মন্যমানং; জ্যাকর্ষতাং শ্রেষ্ঠতমং পৃথিব্যাম্
সর্বোত্সাহং ক্ষত্রিয়াণাং নিহত্য; প্রসহ্য কৃষ্ণস্তরসা মমর্দ
22.26
যশোমানৌ বর্ধয়ন্যাদবানাং; পুরাভিনচ্ছিশুপালং সমীকে
যস্য সর্বে বর্ধয়ন্তি স্ম মানং; করূষরাজপ্রমুখা নরেন্দ্রাঃ
22.27
তমসহ্যং কেশবং তত্র মত্বা; সুগ্রীবয়ুক্তেন রথেন কৃষ্ণম্
সংপ্রাদ্রবংশ্চেদিপতিং বিহায়; সিংহং দৃষ্ট্বা ক্ষুদ্রমৃগা ইবান্যে
22.28
যস্তং প্রতীপস্তরসা প্রত্যুদীয়া;দাশংসমানো দ্বৈরথে বাসুদেবম্
সোঽশেত কৃষ্ণেন হতঃ পরাসু;র্বাতেনেবোন্মথিতঃ কর্ণিকারঃ
22.29
পরাক্রমং মে যদবেদয়ন্ত; তেষামর্থে সংজয় কেশবস্য
অনুস্মরংস্তস্য কর্মাণি বিষ্ণো;র্গাবল্গণে নাধিগচ্ছামি শান্তিম্
22.30
ন জাতু তাঞ্শত্রুরন্যঃ সহেত; যেষাং স স্যাদগ্রণীর্বৃষ্ণিসিংহঃ
প্রবেপতে মে হৃদয়ং ভয়েন; শ্রুত্বা কৃষ্ণাবেকরথে সমেতৌ
22.31
নো চেদ্গচ্ছেত্সংগরং মন্দবুদ্ধি;স্তাভ্যাং সুতো মে বিপরীতচেতাঃ
নো চেত্কুরূন্সংজয় নির্দহেতা;মিন্দ্রাবিষ্ণূ দৈত্যসেনাং যথৈব
মতো হি মে শক্রসমো ধনংজয়ঃ; সনাতনো বৃষ্ণিবীরশ্চ বিষ্ণুঃ
22.32
ধর্মারামো হ্রীনিষেধস্তরস্বী; কুন্তীপুত্রঃ পাণ্ডবোঽজাতশত্রুঃ
দুর্যোধনেন নিকৃতো মনস্বী; নো চেত্ক্রুদ্ধঃ প্রদহেদ্ধার্তরাষ্ট্রান্
22.33
নাহং তথা হ্যর্জুনাদ্বাসুদেবা;দ্ভীমাদ্বাপি যময়োর্বা বিভেমি
যথা রাজ্ঞঃ ক্রোধদীপ্তস্য সূত; মন্যোরহং ভীততরঃ সদৈব
22.34
অলং তপোব্রহ্মচর্যেণ যুক্তঃ; সংকল্পোঽয়ং মানসস্তস্য সিধ্যেৎ
তস্য ক্রোধং সংজয়াহং সমীকে; স্থানে জানন্ভৃশমস্ম্যদ্য ভীতঃ
22.35
স গচ্ছ শীঘ্রং প্রহিতো রথেন; পাঞ্চালরাজস্য চমূং পরেত্য
অজাতশত্রুং কুশলং স্ম পৃচ্ছেঃ; পুনঃ পুনঃ প্রীতিয়ুক্তং বদেস্ত্বম্
22.36
জনার্দনং চাপি সমেত্য তাত; মহামাত্রং বীর্যবতামুদারম্
অনাময়ং মদ্বচনেন পৃচ্ছে;র্ধৃতরাষ্ট্রঃ পাণ্ডবৈঃ শান্তিমীপ্সুঃ
22.37
ন তস্য কিংচিদ্বচনং ন কুর্যা;ত্কুন্তীপুত্রো বাসুদেবস্য সূত
প্রিয়শ্চৈষামাত্মসমশ্চ কৃষ্ণো; বিদ্বাংশ্চৈষাং কর্মণি নিত্যয়ুক্তঃ
22.38
সমানীয় পাণ্ডবান্সৃঞ্জয়াংশ্চ; জনার্দনং যুয়ুধানং বিরাটম্
অনাময়ং মদ্বচনেন পৃচ্ছেঃ; সর্বাংস্তথা দ্রৌপদেয়াংশ্চ পঞ্চ
22.39
যদ্যত্তত্র প্রাপ্তকালং পরেভ্য;স্ত্বং মন্যেথা ভারতানাং হিতং চ
তত্তদ্ভাষেথাঃ সংজয় রাজমধ্যে; ন মূর্ছয়েদ্যন্ন ভবেচ্চ যুদ্ধম্