Utshovঅধ্যায় 23
23.1
বৈশংপায়ন উবাচ
রাজ্ঞস্তু বচনং শ্রুত্বা ধৃতরাষ্ট্রস্য সংজয়ঃ
উপপ্লব্যং যয়ৌ দ্রষ্টুং পাণ্ডবানমিতৌজসঃ
23.2
স তু রাজানমাসাদ্য ধর্মাত্মানং যুধিষ্ঠিরম্
প্রণিপত্য ততঃ পূর্বং সূতপুত্রোঽভ্যভাষত
23.3
গাবল্গণিঃ সংজয়ঃ সূতসূনু;রজাতশত্রুমবদত্প্রতীতঃ
দিষ্ট্যা রাজংস্ত্বামরোগং প্রপশ্যে; সহায়বন্তং চ মহেন্দ্রকল্পম্
23.4
অনাময়ং পৃচ্ছতি ত্বাম্বিকেয়ো; বৃদ্ধো রাজা ধৃতরাষ্ট্রো মনীষী
কচ্চিদ্ভীমঃ কুশলী পাণ্ডবাগ্র্যো; ধনংজয়স্তৌ চ মাদ্রীতনূজৌ
23.5
কচ্চিত্কৃষ্ণা দ্রৌপদী রাজপুত্রী; সত্যব্রতা বীরপত্নী সপুত্রা
মনস্বিনী যত্র চ বাঞ্ছসি ত্ব;মিষ্টান্কামান্ভারত স্বস্তিকামঃ
23.6
যুধিষ্ঠির উবাচ
গাবল্গণে সংজয় স্বাগতং তে; প্রীতাত্মাহং ত্বাভিবদামি সূত
অনাময়ং প্রতিজানে তবাহং; সহানুজৈঃ কুশলী চাস্মি বিদ্বন্
23.7
চিরাদিদং কুশলং ভারতস্য; শ্রুত্বা রাজ্ঞঃ কুরুবৃদ্ধস্য সূত
মন্যে সাক্ষাদ্দৃষ্টমহং নরেন্দ্রং; দৃষ্ট্বৈব ত্বাং সংজয় প্রীতিয়োগাৎ
23.8
পিতামহো নঃ স্থবিরো মনস্বী; মহাপ্রাজ্ঞঃ সর্বধর্মোপপন্নঃ
স কৌরব্যঃ কুশলী তাত ভীষ্মো; যথাপূর্বং বৃত্তিরপ্যস্য কচ্চিৎ
23.9
কচ্চিদ্রাজা ধৃতরাষ্ট্রঃ সপুত্রো; বৈচিত্রবীর্যঃ কুশলী মহাত্মা
মহারাজো বাহ্লিকঃ প্রাতিপেয়ঃ; কচ্চিদ্বিদ্বান্কুশলী সূতপুত্র
23.10
স সোমদত্তঃ কুশলী তাত কচ্চি;দ্ভূরিশ্রবাঃ সত্যসংধঃ শলশ্চ
দ্রোণঃ সপুত্রশ্চ কৃপশ্চ বিপ্রো; মহেষ্বাসাঃ কচ্চিদেতেঽপ্যরোগাঃ
23.11
মহাপ্রাজ্ঞাঃ সর্বশাস্ত্রাবদাতা; ধনুর্ভৃতাং মুখ্যতমাঃ পৃথিব্যাম্
কচ্চিন্মানং তাত লভন্ত এতে; ধনুর্ভৃতঃ কচ্চিদেতেঽপ্যরোগাঃ
23.12
সর্বে কুরুভ্যঃ স্পৃহয়ন্তি সংজয়; ধনুর্ধরা যে পৃথিব্যাং যুবানঃ
যেষাং রাষ্ট্রে নিবসতি দর্শনীয়ো; মহেষ্বাসঃ শীলবান্দ্রোণপুত্রঃ
23.13
বৈশ্যাপুত্রঃ কুশলী তাত কচ্চি;ন্মহাপ্রাজ্ঞো রাজপুত্রো যুয়ুত্সুঃ
কর্ণোঽমাত্যঃ কুশলী তাত কচ্চি;ত্সুয়োধনো যস্য মন্দো বিধেয়ঃ
23.14
স্ত্রিয়ো বৃদ্ধা ভারতানাং জনন্যো; মহানস্যো দাসভার্যাশ্চ সূত
বধ্বঃ পুত্রা ভাগিনেয়া ভগিন্যো; দৌহিত্রা বা কচ্চিদপ্যব্যলীকাঃ
23.15
কচ্চিদ্রাজা ব্রাহ্মণানাং যথাব;ত্প্রবর্ততে পূর্ববত্তাত বৃত্তিম্
কচ্চিদ্দায়ান্মামকান্ধার্তরাষ্ট্রো; দ্বিজাতীনাং সংজয় নোপহন্তি
23.16
কচ্চিদ্রাজা ধৃতরাষ্ট্রঃ সপুত্র; উপেক্ষতে ব্রাহ্মণাতিক্রমান্বৈ
কচ্চিন্ন হেতোরিব বর্ত্মভূত; উপেক্ষতে তেষু স ন্যূনবৃত্তিম্
23.17
এতজ্জ্যোতিরুত্তমং জীবলোকে; শুক্লং প্রজানাং বিহিতং বিধাত্রা
তে চেল্লোভং ন নিয়চ্ছন্তি মন্দাঃ; কৃত্স্নো নাশো ভবিতা কৌরবাণাম্
23.18
কচ্চিদ্রাজা ধৃতরাষ্ট্রঃ সপুত্রো; বুভূষতে বৃত্তিমমাত্যবর্গে
কচ্চিন্ন ভেদেন জিজীবিষন্তি; সুহৃদ্রূপা দুর্হৃদশ্চৈকমিত্রাঃ
23.19
কচ্চিন্ন পাপং কথয়ন্তি তাত; তে পাণ্ডবানাং কুরবঃ সর্ব এব
কচ্চিদ্দৃষ্ট্বা দস্যুসংঘান্সমেতা;ন্স্মরন্তি পার্থস্য যুধাং প্রণেতুঃ
23.20
মৌর্বীভুজাগ্রপ্রহিতান্স্ম তাত; দোধূয়মানেন ধনুর্ধরেণ
গাণ্ডীবমুক্তান্স্তনয়িত্নুঘোষা;নজিহ্মগান্কচ্চিদনুস্মরন্তি
23.21
ন হ্যপশ্যং কংচিদহং পৃথিব্যাং; শ্রুতং সমং বাধিকমর্জুনেন
যস্যৈকষষ্টির্নিশিতাস্তীক্ষ্ণধারাঃ; সুবাসসঃ সংমতো হস্তবাপঃ
23.22
গদাপাণির্ভীমসেনস্তরস্বী; প্রবেপয়ঞ্শত্রুসংঘাননীকে
নাগঃ প্রভিন্ন ইব নড্বলাসু; চঙ্ক্রম্যতে কচ্চিদেনং স্মরন্তি
23.23
মাদ্রীপুত্রঃ সহদেবঃ কলিঙ্গা;ন্সমাগতানজয়দ্দন্তকূরে
বামেনাস্যন্দক্ষিণেনৈব যো বৈ; মহাবলং কচ্চিদেনং স্মরন্তি
23.24
উদ্যন্নয়ং নকুলঃ প্রেষিতো বৈ; গাবল্গণে সংজয় পশ্যতস্তে
দিশং প্রতীচীং বশমানয়ন্মে; মাদ্রীসুতং কচ্চিদেনং স্মরন্তি
23.25
অভ্যাভবো দ্বৈতবনে য আসী;দ্দুর্মন্ত্রিতে ঘোষয়াত্রাগতানাম্
যত্র মন্দাঞ্শত্রুবশং প্রয়াতা;নমোচয়দ্ভীমসেনো জয়শ্চ
23.26
অহং পশ্চাদর্জুনমভ্যরক্ষং; মাদ্রীপুত্রৌ ভীমসেনশ্চ চক্রে
গাণ্ডীবভৃচ্ছত্রুসংঘানুদস্য; স্বস্ত্যাগমত্কচ্চিদেনং স্মরন্তি
23.27
ন কর্মণা সাধুনৈকেন নূনং; কর্তুং শক্যং ভবতীহ সংজয়
সর্বাত্মনা পরিজেতুং বয়ং চে;ন্ন শক্নুমো ধৃতরাষ্ট্রস্য পুত্রম্