অধ্যায় 24

24.1

সংজয় উবাচ
যথার্হসে পাণ্ডব তত্তথৈব; কুরূন্কুরুশ্রেষ্ঠ জনং চ পৃচ্ছসি
অনাময়াস্তাত মনস্বিনস্তে; কুরুশ্রেষ্ঠান্পৃচ্ছসি পার্থ যাংস্ত্বম্

সন্ত্যেব বৃদ্ধাঃ সাধবো ধার্তরাষ্ট্রে; সন্ত্যেব পাপাঃ পাণ্ডব তস্য বিদ্ধি
দদ্যাদ্রিপোশ্চাপি হি ধার্তরাষ্ট্রঃ; কুতো দায়াঁল্লোপয়েদ্ব্রাহ্মণানাম্

যদ্যুষ্মাকং বর্ততেঽসৌ ন ধর্ম্য;মদ্রুগ্ধেষু দ্রুগ্ধবত্তন্ন সাধু
মিত্রধ্রুক্স্যাদ্ধৃতরাষ্ট্রঃ সপুত্রো; যুষ্মান্দ্বিষন্সাধুবৃত্তানসাধুঃ

ন চানুজানাতি ভৃশং চ তপ্যতে; শোচত্যন্তঃ স্থবিরোঽজাতশত্রো
শৃণোতি হি ব্রাহ্মণানাং সমেত্য; মিত্রদ্রোহঃ পাতকেভ্যো গরীয়ান্

স্মরন্তি তুভ্যং নরদেব সংগমে; যুদ্ধে চ জিষ্ণোশ্চ যুধাং প্রণেতুঃ
সমুত্কৃষ্টে দুন্দুভিশঙ্খশব্দে; গদাপাণিং ভীমসেনং স্মরন্তি

মাদ্রীসুতৌ চাপি রণাজিমধ্যে; সর্বা দিশঃ সংপতন্তৌ স্মরন্তি
সেনাং বর্ষন্তৌ শরবর্ষৈরজস্রং; মহারথৌ সমরে দুষ্প্রকম্প্যৌ

ন ত্বেব মন্যে পুরুষস্য রাজ;ন্ননাগতং জ্ঞায়তে যদ্ভবিষ্যম্
ত্বং চেদিমং সর্বধর্মোপপন্নঃ; প্রাপ্তঃ ক্লেশং পাণ্ডব কৃচ্ছ্ররূপম্

ত্বমেবৈতত্সর্বমতশ্চ ভূয়ঃ; সমীকুর্যাঃ প্রজ্ঞয়াজাতশত্রো
ন কামার্থং সংত্যজেয়ুর্হি ধর্মং; পাণ্ডোঃ সুতাঃ সর্ব এবেন্দ্রকল্পাঃ

ত্বমেবৈতত্প্রজ্ঞয়াজাতশত্রো; শমং কুর্যা যেন শর্মাপ্নুয়ুস্তে
ধার্তরাষ্ট্রাঃ পাণ্ডবাঃ সৃঞ্জয়াশ্চ; যে চাপ্যন্যে পার্থিবাঃ সংনিবিষ্টাঃ

যন্মাব্রবীদ্ধৃতরাষ্ট্রো নিশায়া;মজাতশত্রো বচনং পিতা তে
সহামাত্যঃ সহপুত্রশ্চ রাজ;ন্সমেত্য তাং বাচমিমাং নিবোধ