অধ্যায় 25

25.1

যুধিষ্ঠির উবাচ
সমাগতাঃ পাণ্ডবাঃ সৃঞ্জয়াশ্চ; জনার্দনো যুয়ুধানো বিরাটঃ
যত্তে বাক্যং ধৃতরাষ্ট্রানুশিষ্টং; গাবল্গণে ব্রূহি তত্সূতপুত্র

সংজয় উবাচ
অজাতশত্রুং চ বৃকোদরং চ; ধনংজয়ং মাদ্রবতীসুতৌ চ
আমন্ত্রয়ে বাসুদেবং চ শৌরিং; যুয়ুধানং চেকিতানং বিরাটম্

পাঞ্চালানামধিপং চৈব বৃদ্ধং; ধৃষ্টদ্যুম্নং পার্ষতং যাজ্ঞসেনিম্
সর্বে বাচং শৃণুতেমাং মদীয়াং; বক্ষ্যামি যাং ভূতিমিচ্ছন্কুরূণাম্

শমং রাজা ধৃতরাষ্ট্রোঽভিনন্দ;ন্নয়োজয়ত্ত্বরমাণো রথং মে
সভ্রাতৃপুত্রস্বজনস্য রাজ্ঞ;স্তদ্রোচতাং পাণ্ডবানাং শমোঽস্তু

সর্বৈর্ধর্মৈঃ সমুপেতাঃ স্থ পার্থাঃ; প্রস্থানেন মার্দবেনার্জবেন
জাতাঃ কুলে অনৃশংসা বদান্যা; হ্রীনিষেধাঃ কর্মণাং নিশ্চয়জ্ঞাঃ

ন যুজ্যতে কর্ম যুষ্মাসু হীনং; সত্ত্বং হি বস্তাদৃশং ভীমসেনাঃ
উদ্ভাসতে হ্যঞ্জনবিন্দুবত্ত;চ্ছুক্লে বস্ত্রে যদ্ভবেত্কিল্বিষং বঃ

সর্বক্ষয়ো দৃশ্যতে যত্র কৃত্স্নঃ; পাপোদয়ো নিরয়োঽভাবসংস্থঃ
কস্তত্কুর্যাজ্জাতু কর্ম প্রজান;ন্পরাজয়ো যত্র সমো জয়শ্চ

তে বৈ ধন্যা যৈঃ কৃতং জ্ঞাতিকার্যং; যে বঃ পুত্রাঃ সুহৃদো বান্ধবাশ্চ
উপক্রুষ্টং জীবিতং সংত্যজেয়ু;স্ততঃ কুরূণাং নিয়তো বৈ ভবঃ স্যাৎ

তে চেত্কুরূননুশাস্য স্থ পার্থা; নিনীয় সর্বান্দ্বিষতো নিগৃহ্য
সমং বস্তজ্জীবিতং মৃত্যুনা স্যা;দ্যজ্জীবধ্বং জ্ঞাতিবধে ন সাধু

কো হ্যেব যুষ্মান্সহ কেশবেন; সচেকিতানান্পার্ষতবাহুগুপ্তান্
সসাত্যকীন্বিষহেত প্রজেতুং; লব্ধ্বাপি দেবান্সচিবান্সহেন্দ্রান্

কো বা কুরূন্দ্রোণভীষ্মাভিগুপ্তা;নশ্বত্থাম্না শল্যকৃপাদিভিশ্চ
রণে প্রসোঢুং বিষহেত রাজ;ন্রাধেয়গুপ্তান্সহ ভূমিপালৈঃ

মহদ্বলং ধার্তরাষ্ট্রস্য রাজ্ঞঃ; কো বৈ শক্তো হন্তুমক্ষীয়মাণঃ
সোঽহং জয়ে চৈব পরাজয়ে চ; নিঃশ্রেয়সং নাধিগচ্ছামি কিংচিৎ

কথং হি নীচা ইব দৌষ্কুলেয়া; নির্ধর্মার্থং কর্ম কুর্যুশ্চ পার্থাঃ
সোঽহং প্রসাদ্য প্রণতো বাসুদেবং; পাঞ্চালানামধিপং চৈব বৃদ্ধম্

কৃতাঞ্জলিঃ শরণং বঃ প্রপদ্যে; কথং স্বস্তি স্যাত্কুরুসৃঞ্জয়ানাম্
ন হ্যেব তে বচনং বাসুদেবো; ধনংজয়ো বা জাতু কিংচিন্ন কুর্যাৎ

প্রাণানাদৌ যাচ্যমানঃ কুতোঽন্য;দেতদ্বিদ্বন্সাধনার্থং ব্রবীমি
এতদ্রাজ্ঞো ভীষ্মপুরোগমস্য; মতং যদ্বঃ শান্তিরিহোত্তমা স্যাৎ