Utshovঅধ্যায় 26
26.1
যুধিষ্ঠির উবাচ
কাং নু বাচং সংজয় মে শৃণোষি; যুদ্ধৈষিণীং যেন যুদ্ধাদ্বিভেষি
অয়ুদ্ধং বৈ তাত যুদ্ধাদ্গরীয়ঃ; কস্তল্লব্ধ্বা জাতু যুধ্যেত সূত
26.2
অকুর্বতশ্চেত্পুরুষস্য সংজয়; সিধ্যেত্সংকল্পো মনসা যং যমিচ্ছেৎ
ন কর্ম কুর্যাদ্বিদিতং মমৈত;দন্যত্র যুদ্ধাদ্বহু যল্লঘীয়ঃ
26.3
কুতো যুদ্ধং জাতু নরঃ প্রজান;ন্কো দৈবশপ্তোঽভিবৃণীত যুদ্ধম্
সুখৈষিণঃ কর্ম কুর্বন্তি পার্থা; ধর্মাদহীনং যচ্চ লোকস্য পথ্যম্
26.4
কর্মোদয়ং সুখমাশংসমানঃ; কৃচ্ছ্রোপায়ং তত্ত্বতঃ কর্ম দুঃখম্
সুখপ্রেপ্সুর্বিজিঘাংসুশ্চ দুঃখং; য ইন্দ্রিয়াণাং প্রীতিবশানুগামী
কামাভিধ্যা স্বশরীরং দুনোতি; যয়া প্রয়ুক্তোঽনুকরোতি দুঃখম্
26.5
যথেধ্যমানস্য সমিদ্ধতেজসো; ভূয়ো বলং বর্ধতে পাবকস্য
কামার্থলাভেন তথৈব ভূয়ো; ন তৃপ্যতে সর্পিষেবাগ্নিরিদ্ধঃ
সংপশ্যেমং ভোগচয়ং মহান্তং; সহাস্মাভির্ধৃতরাষ্ট্রস্য রাজ্ঞঃ
26.6
নাশ্রেয়সামীশ্বরো বিগ্রহাণাং; নাশ্রেয়সাং গীতশব্দং শৃণোতি
নাশ্রেয়সঃ সেবতে মাল্যগন্ধা;ন্ন চাপ্যশ্রেয়াংস্যনুলেপনানি
26.7
নাশ্রেয়সঃ প্রাবরানধ্যবস্তে; কথং ত্বস্মান্সংপ্রণুদেত্কুরুভ্যঃ
অত্রৈব চ স্যাদবধূয় এষ; কামঃ শরীরে হৃদয়ং দুনোতি
26.8
স্বয়ং রাজা বিষমস্থঃ পরেষু; সামস্থ্যমন্বিচ্ছতি তন্ন সাধু
যথাত্মনঃ পশ্যতি বৃত্তমেব; তথা পরেষামপি সোঽভ্যুপৈতি
26.9
আসন্নমগ্নিং তু নিদাঘকালে; গম্ভীরকক্ষে গহনে বিসৃজ্য
যথা বৃদ্ধং বায়ুবশেন শোচে;ত্ক্ষেমং মুমুক্ষুঃ শিশিরব্যপায়ে
26.10
প্রাপ্তৈশ্বর্যো ধৃতরাষ্ট্রোঽদ্য রাজা; লালপ্যতে সংজয় কস্য হেতোঃ
প্রগৃহ্য দুর্বুদ্ধিমনার্জবে রতং; পুত্রং মন্দং মূঢমমন্ত্রিণং তু
26.11
অনাপ্তঃ সন্নাপ্ততমস্য বাচং; সুয়োধনো বিদুরস্যাবমন্য
সুতস্য রাজা ধৃতরাষ্ট্রঃ প্রিয়ৈষী; সংবুধ্যমানো বিশতেঽধর্মমেব
26.12
মেধাবিনং হ্যর্থকামং কুরূণাং; বহুশ্রুতং বাগ্মিনং শীলবন্তম্
সূত রাজা ধৃতরাষ্ট্রঃ কুরুভ্যো; ন সোঽস্মরদ্বিদুরং পুত্রকাম্যাৎ
26.13
মানঘ্নস্য আত্মকামস্য চের্ষ্যোঃ; সংরম্ভিণশ্চার্থধর্মাতিগস্য
দুর্ভাষিণো মন্যুবশানুগস্য; কামাত্মনো দুর্হৃদো ভাবনস্য
26.14
অনেয়স্যাশ্রেয়সো দীর্ঘমন্যো;র্মিত্রদ্রুহঃ সংজয় পাপবুদ্ধেঃ
সুতস্য রাজা ধৃতরাষ্ট্রঃ প্রিয়ৈষী; প্রপশ্যমানঃ প্রজহাদ্ধর্মকামৌ
26.15
তদৈব মে সংজয় দীব্যতোঽভূ;ন্নো চেত্কুরূনাগতঃ স্যাদভাবঃ
কাব্যাং বাচং বিদুরো ভাষমাণো; ন বিন্দতে ধৃতরাষ্ট্রাত্প্রশংসাম্
26.16
ক্ষত্তুর্যদা অন্ববর্তন্ত বুদ্ধিং; কৃচ্ছ্রং কুরূন্ন তদাভ্যাজগাম
যাবত্প্রজ্ঞামন্ববর্তন্ত তস্য; তাবত্তেষাং রাষ্ট্রবৃদ্ধির্বভূব
26.17
তদর্থলুব্ধস্য নিবোধ মেঽদ্য; যে মন্ত্রিণো ধার্তরাষ্ট্রস্য সূত
দুঃশাসনঃ শকুনিঃ সূতপুত্রো; গাবল্গণে পশ্য সংমোহমস্য
26.18
সোঽহং ন পশ্যামি পরীক্ষমাণঃ; কথং স্বস্তি স্যাত্কুরুসৃঞ্জয়ানাম্
আত্তৈশ্বর্যো ধৃতরাষ্ট্রঃ পরেভ্যঃ; প্রব্রাজিতে বিদুরে দীর্ঘদৃষ্টৌ
26.19
আশংসতে বৈ ধৃতরাষ্ট্রঃ সপুত্রো; মহারাজ্যমসপত্নং পৃথিব্যাম্
তস্মিঞ্শমঃ কেবলং নোপলভ্যো; অত্যাসন্নং মদ্গতং মন্যতেঽর্থম্
26.20
যত্তত্কর্ণো মন্যতে পারণীয়ং; যুদ্ধে গৃহীতায়ুধমর্জুনেন
আসংশ্চ যুদ্ধানি পুরা মহান্তি; কথং কর্ণো নাভবদ্দ্বীপ এষাম্
26.21
কর্ণশ্চ জানাতি সুয়োধনশ্চ; দ্রোণশ্চ জানাতি পিতামহশ্চ
অন্যে চ যে কুরবস্তত্র সন্তি; যথার্জুনান্নাস্ত্যপরো ধনুর্ধরঃ
26.22
জানন্ত্যেতে কুরবঃ সর্ব এব; যে চাপ্যন্যে ভূমিপালাঃ সমেতাঃ
দুর্যোধনং চাপরাধে চরন্ত;মরিংদমে ফল্গুনেঽবিদ্যমানে
26.23
তেনার্থবদ্ধং মন্যতে ধার্তরাষ্ট্রঃ; শক্যং হর্তুং পাণ্ডবানাং মমত্বম্
কিরীটিনা তালমাত্রায়ুধেন; তদ্বেদিনা সংয়ুগং তত্র গত্বা
26.24
গাণ্ডীববিস্ফারিতশব্দমাজা;বশৃণ্বানা ধার্তরাষ্ট্রা ধ্রিয়ন্তে
ক্রুদ্ধস্য চেদ্ভীমসেনস্য বেগা;ত্সুয়োধনো মন্যতে সিদ্ধমর্থম্
26.25
ইন্দ্রোঽপ্যেতন্নোত্সহেত্তাত হর্তু;মৈশ্বর্যং নো জীবতি ভীমসেনে
ধনংজয়ে নকুলে চৈব সূত; তথা বীরে সহদেবে মদীয়ে
26.26
স চেদেতাং প্রতিপদ্যেত বুদ্ধিং; বৃদ্ধো রাজা সহ পুত্রেণ সূত
এবং রণে পাণ্ডবকোপদগ্ধা; ন নশ্যেয়ুঃ সংজয় ধার্তরাষ্ট্রাঃ
26.27
জানাসি ত্বং ক্লেশমস্মাসু বৃত্তং; ত্বাং পূজয়ন্সংজয়াহং ক্ষমেয়ম্
যচ্চাস্মাকং কৌরবৈর্ভূতপূর্বং; যা নো বৃত্তির্ধার্তরাষ্ট্রে তদাসীৎ
26.28
অদ্যাপি তত্তত্র তথৈব বর্ততাং; শান্তিং গমিষ্যামি যথা ত্বমাত্থ
ইন্দ্রপ্রস্থে ভবতু মমৈব রাজ্যং; সুয়োধনো যচ্ছতু ভারতাগ্র্যঃ