Utshovঅধ্যায় 27
27.1
সংজয় উবাচ
ধর্মে নিত্যা পাণ্ডব তে বিচেষ্টা; লোকে শ্রুতা দৃশ্যতে চাপি পার্থ
মহাস্রাবং জীবিতং চাপ্যনিত্যং; সংপশ্য ত্বং পাণ্ডব মা বিনীনশঃ
27.2
ন চেদ্ভাগং কুরবোঽন্যত্র যুদ্ধা;ত্প্রয়চ্ছন্তে তুভ্যমজাতশত্রো
ভৈক্ষচর্যামন্ধকবৃষ্ণিরাজ্যে; শ্রেয়ো মন্যে ন তু যুদ্ধেন রাজ্যম্
27.3
অল্পকালং জীবিতং যন্মনুষ্যে; মহাস্রাবং নিত্যদুঃখং চলং চ
ভূয়শ্চ তদ্বয়সো নানুরূপং; তস্মাত্পাপং পাণ্ডব মা প্রসার্ষীঃ
27.4
কামা মনুষ্যং প্রসজন্ত এব; ধর্মস্য যে বিঘ্নমূলং নরেন্দ্র
পূর্বং নরস্তান্ধৃতিমান্বিনিঘ্নঁ;ল্লোকে প্রশংসাং লভতেঽনবদ্যাম্
27.5
নিবন্ধনী হ্যর্থতৃষ্ণেহ পার্থ; তামেষতো বাধ্যতে ধর্ম এব
ধর্মং তু যঃ প্রবৃণীতে স বুদ্ধঃ; কামে গৃদ্ধো হীয়তেঽর্থানুরোধাৎ
27.6
ধর্মং কৃত্বা কর্মণাং তাত মুখ্যং; মহাপ্রতাপঃ সবিতেব ভাতি
হানেন ধর্মস্য মহীমপীমাং; লব্ধ্বা নরঃ সীদতি পাপবুদ্ধিঃ
27.7
বেদোঽধীতশ্চরিতং ব্রহ্মচর্যং; যজ্ঞৈরিষ্টং ব্রাহ্মণেভ্যশ্চ দত্তম্
পরং স্থানং মন্যমানেন ভূয়; আত্মা দত্তো বর্ষপূগং সুখেভ্যঃ
27.8
সুখপ্রিয়ে সেবমানোঽতিবেলং; যোগাভ্যাসে যো ন করোতি কর্ম
বিত্তক্ষয়ে হীনসুখোঽতিবেলং; দুঃখং শেতে কামবেগপ্রণুন্নঃ
27.9
এবং পুনরর্থচর্যাপ্রসক্তো; হিত্বা ধর্মং যঃ প্রকরোত্যধর্মম্
অশ্রদ্দধত্পরলোকায় মূঢো; হিত্বা দেহং তপ্যতে প্রেত্য মন্দঃ
27.10
ন কর্মণাং বিপ্রণাশোঽস্ত্যমুত্র; পুণ্যানাং বাপ্যথ বা পাপকানাম্
পূর্বং কর্তুর্গচ্ছতি পুণ্যপাপং; পশ্চাত্ত্বেতদনুয়াত্যেব কর্তা
27.11
ন্যায়োপেতং ব্রাহ্মণেভ্যো যদন্নং; শ্রদ্ধাপূতং গন্ধরসোপপন্নম্
অন্বাহার্যেষূত্তমদক্ষিণেষু; তথারূপং কর্ম বিখ্যায়তে তে
27.12
ইহ ক্ষেত্রে ক্রিয়তে পার্থ কার্যং; ন বৈ কিংচিদ্বিদ্যতে প্রেত্য কার্যম্
কৃতং ত্বয়া পারলোক্যং চ কার্যং; পুণ্যং মহত্সদ্ভিরনুপ্রশস্তম্
27.13
জহাতি মৃত্যুং চ জরাং ভয়ং চ; ন ক্ষুত্পিপাসে মনসশ্চাপ্রিয়াণি
ন কর্তব্যং বিদ্যতে তত্র কিংচি;দন্যত্র বৈ ইন্দ্রিয়প্রীণনার্থাৎ
27.14
এবংরূপং কর্মফলং নরেন্দ্র; মাত্রাবতা হৃদয়স্য প্রিয়েণ
স ক্রোধজং পাণ্ডব হর্ষজং চ; লোকাবুভৌ মা প্রহাসীশ্চিরায়
27.15
অন্তং গত্বা কর্মণাং যা প্রশংসা; সত্যং দমশ্চার্জবমানৃশংস্যম্
অশ্বমেধো রাজসূয়স্তথেষ্টঃ; পাপস্যান্তং কর্মণো মা পুনর্গাঃ
27.16
তচ্চেদেবং দেশরূপেণ পার্থাঃ; করিষ্যধ্বং কর্ম পাপং চিরায়
নিবসধ্বং বর্ষপূগান্বনেষু; দুঃখং বাসং পাণ্ডবা ধর্মহেতোঃ
27.17
অপ্রব্রজ্যে যোজয়িত্বা পুরস্তা;দাত্মাধীনং যদ্বলং তে তদাসীৎ
নিত্যং পাঞ্চালাঃ সচিবাস্তবেমে; জনার্দনো যুয়ুধানশ্চ বীরঃ
27.18
মত্স্যো রাজা রুক্মরথঃ সপুত্রঃ; প্রহারিভিঃ সহ পুত্রৈর্বিরাটঃ
রাজানশ্চ যে বিজিতাঃ পুরস্তা;ত্ত্বামেব তে সংশ্রয়েয়ুঃ সমস্তাঃ
27.19
মহাসহায়ঃ প্রতপন্বলস্থঃ; পুরস্কৃতো বাসুদেবার্জুনাভ্যাম্
বরান্হনিষ্যন্দ্বিষতো রঙ্গমধ্যে; ব্যনেষ্যথা ধার্তরাষ্ট্রস্য দর্পম্
27.20
বলং কস্মাদ্বর্ধয়িত্বা পরস্য; নিজান্কস্মাত্কর্শয়িত্বা সহায়ান্
নিরুষ্য কস্মাদ্বর্ষপূগান্বনেষু; যুয়ুত্সসে পাণ্ডব হীনকালম্
27.21
অপ্রজ্ঞো বা পাণ্ডব যুধ্যমানো; অধর্মজ্ঞো বা ভূতিপথাদ্ব্যপৈতি
প্রজ্ঞাবান্বা বুধ্যমানোঽপি ধর্মং; সংরম্ভাদ্বা সোঽপি ভূতেরপৈতি
27.22
নাধর্মে তে ধীয়তে পার্থ বুদ্ধি;র্ন সংরম্ভাত্কর্ম চকর্থ পাপম্
অদ্ধা কিং তত্কারণং যস্য হেতোঃ; প্রজ্ঞাবিরুদ্ধং কর্ম চিকীর্ষসীদম্
27.23
অব্যাধিজং কটুকং শীর্ষরোগং; যশোমুষং পাপফলোদয়ং চ
সতাং পেয়ং যন্ন পিবন্ত্যসন্তো; মন্যুং মহারাজ পিব প্রশাম্য
27.24
পাপানুবন্ধং কো নু তং কাময়েত; ক্ষমৈব তে জ্যায়সী নোত ভোগাঃ
যত্র ভীষ্মঃ শাংতনবো হতঃ স্যা;দ্যত্র দ্রোণঃ সহপুত্রো হতঃ স্যাৎ
27.25
কৃপঃ শল্যঃ সৌমদত্তির্বিকর্ণো; বিবিংশতিঃ কর্ণদুর্যোধনৌ চ
এতান্হত্বা কীদৃশং তত্সুখং স্যা;দ্যদ্বিন্দেথাস্তদনুব্রূহি পার্থ
27.26
লব্ধ্বাপীমাং পৃথিবীং সাগরান্তাং; জরামৃত্যূ নৈব হি ত্বং প্রজহ্যাঃ
প্রিয়াপ্রিয়ে সুখদুঃখে চ রাজ;ন্নেবং বিদ্বান্নৈব যুদ্ধং কুরুষ্ব
27.27
অমাত্যানাং যদি কামস্য হেতো;রেবংয়ুক্তং কর্ম চিকীর্ষসি ত্বম্
অপাক্রমেঃ সংপ্রদায় স্বমেভ্যো; মা গাস্ত্বং বৈ দেবয়ানাত্পথোঽদ্য