অধ্যায় 28

28.1

যুধিষ্ঠির উবাচ
অসংশয়ং সংজয় সত্যমেত;দ্ধর্মো বরঃ কর্মণাং যত্ত্বমাত্থ
জ্ঞাত্বা তু মাং সংজয় গর্হয়েস্ত্বং; যদি ধর্মং যদ্যধর্মং চরামি

যত্রাধর্মো ধর্মরূপাণি বিভ্র;দ্ধর্মঃ কৃত্স্নো দৃশ্যতেঽধর্মরূপঃ
তথা ধর্মো ধারয়ন্ধর্মরূপং; বিদ্বাংসস্তং সংপ্রপশ্যন্তি বুদ্ধ্যা

এবমেতাবাপদি লিঙ্গমেত;দ্ধর্মাধর্মৌ বৃত্তিনিত্যৌ ভজেতাম্
আদ্যং লিঙ্গং যস্য তস্য প্রমাণ;মাপদ্ধর্মং সংজয় তং নিবোধ

লুপ্তায়াং তু প্রকৃতৌ যেন কর্ম; নিষ্পাদয়েত্তত্পরীপ্সেদ্বিহীনঃ
প্রকৃতিস্থশ্চাপদি বর্তমান; উভৌ গর্হ্যৌ ভবতঃ সংজয়ৈতৌ

অবিলোপমিচ্ছতাং ব্রাহ্মণানাং; প্রায়শ্চিত্তং বিহিতং যদ্বিধাত্রা
আপদ্যথাকর্মসু বর্তমানা;ন্বিকর্মস্থান্সংজয় গর্হয়েত

মনীষিণাং তত্ত্ববিচ্ছেদনায়; বিধীয়তে সত্সু বৃত্তিঃ সদৈব
অব্রাহ্মণাঃ সন্তি তু যে ন বৈদ্যাঃ; সর্বোচ্ছেদং সাধু মন্যেত তেভ্যঃ

তদর্থা নঃ পিতরো যে চ পূর্বে; পিতামহা যে চ তেভ্যঃ পরেঽন্যে
প্রজ্ঞৈষিণো যে চ হি কর্ম চক্রু;র্নাস্ত্যন্ততো নাস্তি নাস্তীতি মন্যে

যত্কিংচিদেতদ্বিত্তমস্যাং পৃথিব্যাং; যদ্দেবানাং ত্রিদশানাং পরত্র
প্রাজাপত্যং ত্রিদিবং ব্রহ্মলোকং; নাধর্মতঃ সংজয় কাময়ে তৎ

ধর্মেশ্বরঃ কুশলো নীতিমাংশ্চা;প্যুপাসিতা ব্রাহ্মণানাং মনীষী
নানাবিধাংশ্চৈব মহাবলাংশ্চ; রাজন্যভোজাননুশাস্তি কৃষ্ণঃ

যদি হ্যহং বিসৃজন্স্যামগর্হ্যো; যুধ্যমানো যদি জহ্যাং স্বধর্মম্
মহায়শাঃ কেশবস্তদ্ব্রবীতু; বাসুদেবস্তূভয়োরর্থকামঃ

শৈনেয়া হি চৈত্রকাশ্চান্ধকাশ্চ; বার্ষ্ণেয়ভোজাঃ কৌকুরাঃ সৃঞ্জয়াশ্চ
উপাসীনা বাসুদেবস্য বুদ্ধিং; নিগৃহ্য শত্রূন্সুহৃদো নন্দয়ন্তি

বৃষ্ণ্যন্ধকা হ্যুগ্রসেনাদয়ো বৈ; কৃষ্ণপ্রণীতাঃ সর্ব এবেন্দ্রকল্পাঃ
মনস্বিনঃ সত্যপরাক্রমাশ্চ; মহাবলা যাদবা ভোগবন্তঃ

কাশ্যো বভ্রুঃ শ্রিয়মুত্তমাং গতো; লব্ধ্বা কৃষ্ণং ভ্রাতরমীশিতারম্
যস্মৈ কামান্বর্ষতি বাসুদেবো; গ্রীষ্মাত্যয়ে মেঘ ইব প্রজাভ্যঃ

ঈদৃশোঽয়ং কেশবস্তাত ভূয়ো; বিদ্মো হ্যেনং কর্মণাং নিশ্চয়জ্ঞম্
প্রিয়শ্চ নঃ সাধুতমশ্চ কৃষ্ণো; নাতিক্রমে বচনং কেশবস্য